Isaías 45 - Kashibo-Kakataibo Biblia

Nukën ꞌIbun Ciro kakë ꞌapu usakia ñu ꞌanu ká ñuikë bana

¹ Nukën ꞌIbun ka Ciro kakë uni ꞌapu ꞌimixun, aín mëkënan tuínxun ꞌakësokin, bëtsi menu ꞌikë unikama ꞌakin ꞌamiakëxa, ꞌanan ka ꞌapukama anun ꞌakánanti bikuanun ꞌamiakëxa. Nukën ꞌIbun ka Ciro kakë ꞌapun ismainunbi anun ëma kënëara xëpútikama uínbi xëputëkëntisama ꞌinun xëókinun ꞌimiakëxa. Usa ꞌain ka Diosan kakëxa:

² ꞌËxpain rëkuë́nkiani kuankin kana aín bashi chairukëkama a me sapan rakátanun rurupati ꞌain, ꞌanan kana anua atun ëma xëpukë manë tunan ꞌakë xëputi akama ëchikibunun ꞌimiti ꞌain, ꞌimianan kana xëputi takáshkakë manëkama axa tsasibunun ꞌimiti ꞌain.

³ ꞌËn kana mi ꞌinánti ꞌain ñu kupíkë unin unëkin nankë akama ꞌianan, unëkian unin ꞌunántisama okin anu nantinu nankë aribi mi ꞌinánti ꞌain. Usakin ꞌinánkëxun kamina min ꞌunánti ꞌain ꞌax ka Nukën ꞌIbu ꞌianan, Israel unikama Dios a ꞌikë kixun, usa ꞌain kana min anën mi kuëan.

⁴ Min ꞌunánkëxumabi kana upíokin mi ꞌën uni Israel Jacobnën rëbúnkikama, ꞌën kana mi kaisakën kaískin kana min anën mi kuëankën, usokin ꞌakë ka unikaman mi nuibatia ꞌën kana mi ꞌapu ꞌimian raíri ꞌapu kamasamaira ꞌinun.

⁵ ꞌËx kana Nukën ꞌIbu ꞌain, usa ꞌain ka ꞌësaribi ꞌaíma ꞌikën; usa ꞌain ka ꞌësaribi bëtsi dios ꞌaíma ꞌikën. ꞌËn kana ꞌëmi ꞌunánkëxumabi, usaími ꞌakananux mëníokanun ꞌimian,

⁶ usa ꞌain ka amiaxa bari urukë ꞌimainun amia bari kuabúkë, anuxun bëtsi dios ꞌësaribi ka ꞌaíma ꞌikë kixun ꞌunánkanti ꞌikën. ꞌËx kana min ꞌIbu ꞌain, ꞌësaribi ka ꞌaíma ꞌikën.

⁷ ꞌËn kana nëtë xabá ꞌinun ꞌimianan bëánkibukë aribi uniokën; ꞌimainun kana upia ñu ꞌinun ꞌimianan ꞌatimaribia ꞌinun ꞌimin. ꞌËx mitsun ꞌIbu ꞌixun kana usaía kamabi ñukama ñu ꞌinun ꞌimin.

Nukën ꞌIbux ka kamabi ñun ꞌIbu ꞌikë kikë ñuikë bana

⁸ “ꞌËn kana manámixunbi ꞌën kushi xuti ꞌain, ax ka naínuax kuénkuru ꞌibúmainun kuin kamanuax ꞌuí ꞌibúkin me chabókë usaribi ꞌiti ꞌikën; ꞌimainun ka anun ië́ti ax ñu bimisa ꞌiti ꞌikën, ꞌianan ka ñu ꞌupi ꞌati ax ñu uábukësa ꞌiti ꞌikën.”

Dios ax ka an unio ñukama manámi ꞌapu ꞌikën

⁹ Achúshi tasun me ꞌakë an ka asaribi tasunbëtan, an ꞌakë uni a kuëbitima ꞌikën. Chua me an ka anun tëkin ꞌakë uni a katima ꞌikën: “¿Añu kaina min ꞌai kixun kati ꞌik?” ꞌimainun kara an ꞌakë ñu anbi an ꞌakë a kati ꞌikën: “Mix kamina tëëti ꞌunánma ꞌai kixun.”

¹⁰ ꞌImainun kara tuákën aín papa ënë menuxun bakë bëchia a ñukati ꞌikën.

¹¹ Ësai ka aín Israel unikama ꞌIbu Dios upíira an unio ax kia: “¿Mitsun kaina uisai kara ꞌën bakë bëchikëkama ꞌinuxun ꞌaia ꞌë ñuixuanan, uisakin karana ꞌën ñu ꞌati ꞌai kixun ꞌë ꞌunánmiti ꞌain?

¹² ꞌËn kana mekama unionan anu ꞌikë unikama ꞌakën, ꞌanan kana naíkamë ꞌëo ꞌën mëkënan pëninkësa okin ꞌakën, ꞌanuxun kana anu ꞌikë ꞌispakama mëranun ꞌimiakën.

¹³ ꞌËn kana Ciro kakë uni ꞌapu ꞌixun abë ꞌakanankin uni ñusma okin anun ꞌamiakën, usa ꞌixun kana ꞌën ñu ꞌakian tëmërakimaishi ꞌanun ꞌamiti ꞌain; ꞌamikëxun ka an ꞌën ëma birutëkënun ꞌamianan axa ami nishkë unikaman bibiankin uan akamaribi chikínti ꞌikën, ꞌaínbi ka ꞌë kamina kupíoti ꞌai kiax kitima ꞌikën.” Nukën ꞌIbu kamabi kushiñuira ax ka ësai banai kiaxa.

¹⁴ Ësakin ka Diosan Israel unikama kaxa: “Egipto menua ꞌikë naënu ꞌikë unikama, ꞌimainun an ñu marukë Etiopíanu ꞌikë unikama, ꞌianan Sabánu ꞌikë unikama, atux ka nënkëirabu ꞌikën akamina, mitsunu ꞌinamëtia ñu mëëmiti ꞌain; usokëx ka manë risin tëkërëkakë ꞌaish mitsu kaxú, kuani mitsu bëtanain rantinpurunkin mitsu kati ꞌikën: Asérabi ka Diosan mitsu ꞌakinia, usa ꞌain ka bëtsi dios ꞌaíma ꞌikën.”

¹⁵ ꞌAínbi kamina mix achúshi Dios istima, an Israel unikama ië́mikë a ꞌain.

¹⁶ Kamabi an uniotankëxun bëtsi ñukama rabikë unikama ax atumia unikama kuaikëbë katë́ti rabinkë anunbi ñuumara ꞌiti ꞌikën.

¹⁷ ꞌAínbi ka Nukën ꞌIbun Israel unikama a ië́miakëxa, ië́mikin xënibua ꞌaínbi ꞌitiokin ië́miakëxa. Usa ꞌaish ka uínsaranbi katë́ti ñuumara ꞌitima ꞌikën.

¹⁸ Ësai ka an naíkamë ꞌëo unio, Nukën ꞌIbu Dios ax kia, an ka me ꞌatankëxun anubia ꞌitinu nankëxa, mex ka ñankáishi rakatima ꞌikë anu ka uni ꞌiti ꞌikën: ꞌËx kana Nukën ꞌIbu ꞌain, usa ꞌain ka bëtsi ꞌaíma ꞌikën.

¹⁹ ꞌËx kana unëax banananbi uinu kara me bëánkibukë ꞌikë anuaxbi banaima. ꞌËn kana Jacobnën rëbúnkikama kaiman: ꞌË kamina anu ñu ꞌikë anua barikanti ꞌain. ꞌËx mitsun ꞌIbu ꞌaish kana asérabi këmëima upiti banai ësai ka ñu ꞌiti ꞌikë kin.

Nukën ꞌIbu ka unin a rabinuxun ꞌakë ñukama masóti ꞌikë ñui kia bana

²⁰ “Kamabi unikama axa bëtsi menu buánkëx tëxëkë, mitsux kamina rikuatsini ꞌurama timë́ti ukanti ꞌain. Mitsun kamina ñu ꞌunánma ꞌixun unínbia, a rabinuxun ꞌakë i a ꞌiabiankin buani kuankanin, an mitsu ꞌakinumabi kamina dioskama ñukákanin, ñukákëxunbi ka a dioskaman mitsu ië́mitima ꞌikën.

²¹ Usa ꞌain ka timë́kankë ꞌain añu karamina mitsun a ax kiti uni anu ꞌiti ꞌikën, ax ka uin kara ësokin ꞌati sinánxun axa kiax bëtsibë bëtsibë ñukákananti ꞌikën: ¿Uin kara bërámabi ënë ñukama ꞌisama ꞌaínbi kitabati usai ka ñu ꞌinuxun ꞌaia kiax kiakëx? ¿Uixira kara bërámabi usaía ñu ꞌiti ñui ꞌitabakëbë usai ka ꞌinuxun ꞌaia kiakëx? ¿ꞌËx karana min ꞌIbu ꞌaish axa a ñukama ñui kia ꞌama ꞌain? Usa ꞌain ka ꞌësaribi Dios uinubi ꞌaíma ꞌikën. Uinubi ka ꞌësaribi Dios an ain unikama bëtsibë ꞌakanania kananmikin ië́mikë ꞌaíma ꞌikën.

²² Usa ꞌain kamina ꞌën mitsu ië́minun ꞌënu ukanti ꞌain, uinu kara me kuainakëakëxa anu ꞌikë unikamaxi ka ꞌuti ꞌikën, ꞌëx Dios ꞌain ka bëtsi ꞌësaribi ꞌaíma ꞌiti ꞌikën.

²³ ꞌËx kana sinanatëkëntima oi ëbi kiakën, ki kana ꞌën kana ꞌëmi nishkë unikama kanankin ꞌati ꞌai kiakën, kia a banakama sënë́nmikin kana ꞌati ꞌain: usa ꞌain ka a bana sënë́nkëbë kamabi nëtënu ꞌikë unikama ꞌën ismainunbi rantinpuruni tsóbuti ꞌëmi ꞌikin, min kakësa okinbi kananuna sinanatëkëntima okin ꞌati ꞌai kiax atux,

²⁴ kiti ꞌikën: Nukën ꞌIbun ka ax kushiira ꞌixun kamabi axa ami nishkë unikama ꞌati ꞌikën. Usa ꞌain ka uikamax kara ꞌëmi nishi ꞌë istisama tania akamami uni kuaiti ꞌikën.

²⁵ Asábi ka ꞌën ꞌakë ñukama kupín ka kamabi Israel unikama ami nishkë unikama kanankin ꞌatankëx, ꞌën ꞌakë ñukama ñui anun rabikanti ꞌikën.”