Isaías 44 - Kashibo-Kakataibo Biblia

Nukën ꞌIbun ka ax Dios ꞌixun ñu ꞌatima okin ꞌaíma

¹ Ësai ka Nukën ꞌIbu kiakëxa, bërí kamina ꞌën kakëxun Israel unikama Jacobnën rëbúnki mitsun kuati ꞌain, mitsux kamina ꞌën uni ꞌiti ꞌën kaískë ꞌain.

² ꞌËn kana min ꞌIbu ꞌixun mi uniokën, usa ꞌixun kana puku ꞌukëmëuküax bakënux uninun mi ꞌimiakën, usa ꞌain kana mi ꞌakinin. Kamina rakuë́kantima ꞌain Jesurún mitsux kamina ꞌën uni ꞌën kaisa Jacob aín rëbúnkikama ꞌain,

³ ꞌën kana anu uni ꞌikëma menua ꞌumpax ꞌinun ꞌimiti ꞌain, ꞌimianan kana me ëskikë anuribia xëxákama rakanu ꞌimiti ꞌain. ꞌËn kana min rëbúnkikama amiribishi upiti tsókanun ꞌimianan, upíokin sinánxunkin ꞌakinti ꞌain.

⁴ Usokëx ka xubi ꞌumpaxan upíokin chabókëx koi upiti ꞌirukësa ꞌianan, álamo kakë ikama baka kuëbí nikësa usaribi ꞌikanti ꞌikën.

⁵ Usa ꞌain ka achúshi uni kiti ꞌikën: ꞌËx kana Nukën ꞌIbuna ꞌainꞌ, bëtsíxribi ka ax ka Jacobnën rëbúnki ꞌikë kiax anëti ꞌikën, ꞌimainun ka bëtsínribi aín mëkënnu: ꞌËx kana Nukën ꞌIbunan ꞌai kixun kuënëoti ꞌikënꞌ.” Usai ꞌikin ka aín anëkëñun Israelnën anëribi kuënëoti ꞌikën.

Dios ax ka unin uniokë ñu a manámi ꞌikë kixun ñuikë bana

⁶ Ësai ka Nukën ꞌIbu, Israel unikama ꞌapu an atu biti, kamabi kushiñu ax kiaxa: “ꞌËx irapain kana ñu ꞌaíma ꞌain ꞌiakën, usa ꞌaish kana kamabi ñu këñúkëbëbi anubi ꞌiti ꞌain; usa ꞌain ka bëtsi dioskama ax ësaribi asérabi ꞌiti ꞌaíma ꞌikën.

⁷ ¿Uix kara ëbëtan sënën ꞌiti ꞌik? An unin ka uisa kara, kixun ꞌë ñuixunkin kati ꞌikën. ¿Uinra kara bërámabi ñuia ꞌixun usai ka ñukama ꞌiti ꞌikë, kianan axa ꞌiti ñukama aribi ñui kiti ꞌik?

⁸ ¡Usa ꞌaínbi kamina chuáma tani rakuë́tima ꞌain! ꞌËn kana usakin kan, bërámabi kana usai ka ꞌiti ꞌikë kixun kakën, usa ꞌain kamina mitsúnbi ꞌën usakin ñu ꞌakëmi ꞌunánkankë a ñuiti ꞌain. ¿Anu kara bëtsi dios ëbë sënën ꞌiti ꞌik? A mi katamëti bëtsi uni ka ꞌaíma ꞌikën; ꞌën kana achúshirabi ꞌunanima.”

⁹ Uin kara a rabiti ñu unio a unix ka añubima ꞌikën, ꞌianan ka unínbia uniokë ñukama ax isa upí ꞌikë kixun a ñukama upíokin bërúaia. Usa ꞌain ka an rabikë unikama ax bëxuñusa ꞌaish, añu kara ꞌaia kixun ꞌunanima rabinkë ꞌiti ꞌikën.

¹⁰ Uin kara ñu charoxun achúshi ñu ax dioskama ꞌikëmabi uni oia ax ka aín nëtë ñankaíshibi ꞌinúmia.

¹¹ Usa ꞌain ka an rabikë unikamax rabinkë bërúti ꞌikën. An ñukama uniokë ax ka unishi ꞌikën. Usa ꞌain ka akamaxbi anúan ñu ꞌatima ꞌakë isti nëtë anu ꞌiti ꞌikën, usai ꞌika atux rabini ꞌitsaira rakuë́tan bamati ꞌikën.

¹² Axa manën tëkë unin kara uisakin ꞌaia kananuna isti ꞌain: an ka anuxun xana okë tsi ënxaira anua bitankëxun manë xëtokë sincel anun uisa ñu kara ꞌaisatania, usakin martillonan chakakin mënioia. Usakin ka ain pëñan kushiokin anun tëkin ꞌaia. ꞌAínbi ka an manën tëëkë uni ax pima ꞌianan, ꞌumpaxbi xëaima ꞌianan aín kushi nëtë́ti atsania.

¹³ ꞌIanan kananuna axa i tukakën tëkë uni isti ꞌain: an ka anun tupunkë a bitankëxun anun tupuntankëxun añu kara ꞌaisa tanaia abi tankin lapisan ꞌanan anun turúakin ꞌati anúnribi ꞌaia, ꞌaxun ka anun tëkin manë xëtokën mënioia; usakin ꞌakin ka uni iskësabi ꞌitánun upíokin mënioia, usokin ꞌatankëxun ka anuxun Dios rabiti xubunu nania.

¹⁴ ꞌImainun ka uin kara kunxan ꞌapatia a ꞌuítan ꞌibúkin chabókin komia; usokin ꞌakëx ka kunxan a tëatiñu ꞌiti ꞌikën. ꞌIanan ka ciprese kakë i ꞌianan roble kakë i aribi ninuaxbi chaiira ꞌinun kanitanun bërúankë ꞌiti ꞌikën.

¹⁵ Usai ꞌia ka unin tíkati bitsia; bianan ka aín panákama ami sënamënuxun tíkaia; ꞌianan ka aín paná raíritan pán xuia; ꞌanan ka aín paná raíri a rabiti uni tankin ꞌaia, usakin ꞌatankëx ka a rabi ami ñanati ꞌikania.

¹⁶ Usakin ꞌananbi ka aín nëbëtsi tukakë a tsi ërë́rutanun tikaia, usokëxa ënxakëbëtan ka anu xuitankëxun nami anun puchákin pia. Usakin ꞌai ka anun puchatia. ꞌIanan ka ami sënamëti xanai kia: “¡Upíira ka tsi ërë́kë rapasu tsókë ꞌikën, sënamëti xanakë ënëx ꞌikën!”

¹⁷ Usai ꞌianan ka i paná tëxëkë a uni tankin ꞌaia, usakin ꞌatankëx ka ami ñanati ꞌikin rabikin ñukákin: “¡Mix ꞌën dios ꞌixun kamina ꞌë ië́miti ꞌai kixun kaia!”

¹⁸ A unin ka añu ñubi ꞌunanima ꞌianan kuatima; usa ꞌaish ka bëruñu ꞌaishi bëxuñusa ꞌixun iskamakësa ꞌikën, ꞌimainun ka aín sinánkë a sinánkamakësa ꞌixun asérabi ka ax ꞌikë kikë bana a sinánkin kuatima.

¹⁹ A unikaman ka usa ka ñu ꞌikë kixun sinanima, usai ꞌikin ka usa ka ñu ꞌikë kixun ꞌunanima kia: “Ka i paná raíri a tsi ërë́nkënu ëxkubutánun puruia, purutankëxun ka anu pán xuia, ꞌanan ka namiribi anu xuixun pitankëx ka nami kana xuixun pia kiax kia; kianan ka raíri i panákama ënë kana ꞌaisama ꞌikëbi ꞌan, ¡ꞌianan ka ꞌën rabikë ñu ënëx i paná ꞌakë ꞌikëbi ꞌën rabikë ikë kiax kia!”

²⁰ Asérabi ka ax chimapu pikësashi ꞌikën. Ax ka unin nu këmëkin sinánxun paránkëshi ꞌikën. A unikamax ka ië́tima ꞌikën. Usa ꞌixun ꞌën ꞌakë ñukama ënëx ka këmëkinshi ꞌakë ꞌikë kixun ꞌunanima.

Nukën ꞌIbun ka Israel unikama ꞌain ꞌuchakëkama tërënkin ië́mia kikë bana

²¹ “Nukën ꞌIbun ka Israel unibu kakëxa: Jacobnën rëbúnki mitsun kamina sinánti ꞌain, mix kamina ꞌën uni ꞌai kixun kanan; mix kamina ꞌën unio uni a ꞌain kixun kakëxa. Usa ꞌaish kamina Israel unikama mitsux ꞌëmi manútima ꞌain kixun.

²² ꞌËn kana ꞌatima ñu ꞌaimi mitsux ꞌuchakëkama a nëtënxuan mitsun ꞌuchakama tërënxunkin naínu ꞌikë nëtë kuin ꞌikësaia nëtë́nun ꞌimian. Usa ꞌain kamina ꞌëmi sinanatëkënti ꞌain ꞌën kana mi ië́mian.”

²³ ¡Naíkamë ꞌëo ax ka munuma kuëëni kuënkënti ꞌikën, usakian Nukën ꞌIbun ñu ꞌakë a isi! ¡Munuma kuënkëni ka me chaiira nankë́kë kamax unix ꞌikësaribiti ꞌiti ꞌikën! ¡Aín bashikama ꞌimainun ninu ꞌikë ikama axribi ka munuma unix ꞌikësai kuëënti ꞌikën, Nukën ꞌIbun ka aín kushi chaiira ismikin Israel unikama Jacobnën rëbúnkikama ië́miaxa usa ꞌain!

²⁴ Ësai ka Nukën ꞌIbu an mi bitëkënkë ax kiaxa, an ka mitsu ënë menu min titan bakëntisa ꞌikëmabi ꞌakëxa: “ꞌËx kana an kamabi ñu unio Nukën ꞌIbu a ꞌain, ꞌanan kana ꞌën naíkamë ꞌëo chaiira ꞌinun pënimëtanun ꞌimiakën ꞌimianan kana meribi anubia rakati anu nankën usakin ꞌaia ka uínbi ꞌë ꞌakianma ꞌikën.

²⁵ ꞌËn kana an këmëkin ñu ñuikë unikama kiasai ꞌinun ëniman; ꞌën kana an ñu tankë unikama atun sinánkësokin ꞌaíma ñunshinbakënu ꞌimin. ꞌËn kana an ñu ꞌunánkë unikamaxa usai ka ñu ꞌiti ꞌikë kikë usai ꞌinun ñu ꞌimiman, usa ꞌain ka atúxa usai ka ñu ꞌiti ꞌikë kikë ax ñankáishi ꞌiti ꞌikën.

²⁶ ꞌAínbi kana ꞌën unikamaxa usai ka ñu ꞌiti ꞌikë kikësaibia ñu ꞌinun ꞌimin, ꞌimianan kana ꞌën xukë unikaman sinánkësa oia ñu ꞌinun ꞌimin. ꞌËx kana Jerusalén ëmanu ka amiribishi uni tsótëkënti ꞌikë kin, ꞌianan ka Judá ëmanu ꞌikë ëmakama ka amiribishi birutëkënti ꞌikë kiax kin. ꞌËn kana an ñu mëëkë unikaman amiribishi axa ami nishkë unikaman aín kënëkama rurupa a birutëkënun ꞌaminuxun ꞌain.

²⁷ ꞌËn kana parúmpapa kamina ëskiti ꞌai kanan aín bakakama ꞌumpax ñuma ꞌinun ëskinun kati ꞌain.

²⁸ ꞌËn kana Persianu ꞌikë ꞌapu Ciro a kan: min kamina bërúankësa ꞌixun, min kamina ꞌën kuëënkësokin kamabi ꞌati ꞌain; ꞌianan kana ꞌën Jerusalén kan: mix kamina amiribishi birutëkënkë ꞌiti ꞌain; ꞌimainun ka anuxun ꞌë rabiti xubu aribi ꞌatëkënkë ꞌiti ꞌikën: ꞌAkin ka aín tapúmixun an ñu mëëkë unikaman maxax purutëkënti ꞌikën.”