Isaías 43 - Kashibo-Kakataibo Biblia

Nukën ꞌIbun ka uni ië́miti ꞌikë kikë bana

¹ Bërí kanima Israel unikama Jacobnën rëbúnki min, an kamabi ñu unio Nukën ꞌIbu ax ka mitsu ësakin kai kia kuati ꞌain: “Kamina rakuë́kantima ꞌain, ꞌën kana mitsu ië́mian; ꞌën kana min anën mi kuëan, usa ꞌaish kamina mitsux ꞌën uni ꞌain.

² Mitsux ꞌumpaxan ꞌinúkëbëbi kana ꞌëxribi anu ꞌiti ꞌain, usa ꞌain kamina bakaribi sikatibi bakami kitima ꞌain, ꞌianan ka tsi rëkirukënën anun inutiabi mi chuxtima ꞌikën, ꞌianan ka ꞌain rëkirukë anbi mi xanotima ꞌikën.

³ ꞌËx kana min ꞌIbu, an mi ië́miti a ꞌain, ꞌëx kana Israel kaman Dios ꞌupíira a ꞌain. ꞌËn kana mitsu ꞌënan ꞌinun biakën; ꞌën kana Egipto, Etopía ꞌimainun Sabá mitsumi nishkë uni aín kushinua chikínun ꞌën mi kupíoxuan.

⁴ ꞌËn kana ꞌitsaira mi nuibatin, mix kamina bëtsi ñu kamasamaira ꞌain ꞌimainun kana ꞌën mi nuibatin. Mitsu ꞌënan ꞌiti bikin ië́mikin bërúanuxun kana unikama ꞌimainun bëtsi menu ꞌikë unikama atu ꞌamiti ꞌain.

⁵ Mitsux kamina rakuë́tima ꞌain, ꞌëx kana mitsubë ꞌain. Usa ꞌain kana amiaxa bari urukë ꞌimainun amia bari kuabúkë, anuabi min unikama amiribishi timë́tëkënun ꞌimiti ꞌain.

⁶ ꞌËn kana aín tsipumiu ꞌikë axa mitsumi nishkë unikama: mitsun menubi kuantëkëntanua mitsu xunun kati ꞌain. ꞌImainun kana aín rëbumiu ꞌikë axa mimi nishkë unikamaribi: ꞌanubi mitsu ꞌimixuma ꞌanun kati ꞌain. ꞌËn bakë bëchikë bëbukama ꞌianan, ꞌën ꞌini bëchikë kamina bëti ꞌain, uinu kara me kuainakëaxa anu ꞌaish ꞌura ꞌikëbi,

⁷ ꞌën unikama kamina kamabi mitsun bëtëkënti ꞌain akamax ka ꞌën aintsi ꞌibu ꞌikën, usa ꞌain kana atu ꞌën uniokën, usa ꞌixun ka atun ꞌë rabiti ꞌikën.

⁸ ꞌËn kana ꞌën unikama bëtëkënti ꞌain, atux ka bëruñu ꞌikë ꞌaínbi ka bëxuñusa ꞌikën, ꞌianan ka kuatia, ꞌaínbi ka pabësa ꞌixun bana kuakëmasa oia.

⁹ Kamabi ëmanu ꞌikë unikama kamina timëti ꞌain, ꞌiminun ka bëtsi menu ꞌikë unikamaribi timë́ti ꞌikën. ¿Uinu ꞌikë a unikamanu ꞌikë unix kara usai ka ꞌinuxun ꞌaia kianan, usai ka ñu inúakëxa kiax kiti ꞌik? Anu kara achúshi uni axa usai ka ꞌiakëxa, kixun kuatankëx asérabi ka usai ñukama inúakëxa kiti ꞌaíma ꞌiti ꞌikën. Ax ka usai ka ꞌiakëxa kiax kiti ꞌikën, ki ka asérabi ka usai ñu kiakëxa kiax kiti ꞌikën.”

¹⁰ Ësai ka Nukën ꞌIbu asérabi kiakëxa: “Mitsun kamina uisakin karana ñu ꞌakën akama ñuiti ꞌain. Mitsux kamina ꞌën unikama ꞌën kaisa a ꞌain, ꞌëmi katamëkin ꞌunánkin kamina, ꞌëx karana ui ꞌai kixun ꞌë ꞌunánkanti ꞌain. ꞌËx ꞌisama ꞌain ka uinu ꞌikë bëtsi diosbi asérabi ꞌaíma ꞌiakëxa. ꞌIanan ka ꞌëx pain ꞌia ꞌain bëtsi dios ꞌaíma ꞌiti ꞌikën.

¹¹ ꞌËx ishi kana Nukën ꞌIbu a ꞌain; ꞌimainun ka ꞌësaribi axa ië́mianankë ꞌaíma ꞌikën.”

¹² Ësai ka Nukën ꞌIbu asérabi kiakëxa: ꞌËx kana kiakën ꞌimainun kana ꞌësaribi a ñui kiakën: ꞌën kana mitsu ië́mian; uinu ꞌikë bëtsi dios ꞌunánkëma ka usakin ꞌama ꞌikën, mitsun kamina uisakin karana ꞌën ñu ꞌakën kixun ñuikanti ꞌain.

¹³ Bërámabi ꞌiá ꞌaish kana ꞌëx Dios a ꞌain. Uínbi ka ꞌën kushinua uni chikintima ꞌikën. Uínbi ka ꞌën ꞌakë ñu ꞌaisama ꞌinun kamina ꞌai kixun ꞌë katima ꞌikën.

¹⁴ Israel unikaman ꞌIbu Dios ꞌupíira, an atu ië́mikë ax ka ësai kiaxa: mitsu ië́mikin ꞌakinuxun kana Babilonianu suntárukama xuti ꞌain, ꞌakian anun ëmanu atsínti ain xëkuëkama rurupanun xuti ꞌain, usokin atun ëma masókin ꞌaia isi ka caldeo unikamax masánuituti inkanti ꞌikën.

¹⁵ ꞌËx kana Nukën ꞌIbu an Israel unikama unio a ꞌain, ꞌianan kana Dios ꞌupíira, mitsun ꞌapu ꞌain kiax ka kiakëxa.

¹⁶ Nukën ꞌIbun ka parúmpapa anúan ain unikama kuanti panarabënun ꞌimiakëxa, usokin ꞌakin ka anua ꞌumpax kushiira nëminra ꞌikë axa me rakati bai ꞌi ëskinun ꞌimiakëxa,

¹⁷ an ka suntáru kushiirabu anuax, ꞌakanankë caballonën nirinkë a ꞌimainun ain caballokama anuxun këñukin atu ꞌati buania kuanun chikíankëxa. Usakin buani kuanxi ka a suntárukama bakami ki amiribishi nirutëkëni baiskima ꞌinun këñuakëxa, usai ꞌika tirí këñuti bënakë usai ꞌikankëxa.

¹⁸ Bërí ka Nukën ꞌIbu ësakin ain unikama kai kiáxa: “Bëráma inúkë ñukama akamina sinántima ꞌain, ꞌianan kamina ꞌia ñukama aribi amiribishi sinántëkëntima ꞌain.

¹⁹ ꞌËn kana ñu ió ꞌinun ꞌatëkënti ꞌain, ꞌaia kamina bëríbi mëratia iskanti ꞌain, anu uni ꞌikëma menu kana achúshi bai ꞌimiti ꞌain, ꞌimianan kana anu ñu ꞌirukëma me anuribi, baka ꞌimiti ꞌain.

²⁰ Usakin ꞌaia ka ñuina raëkëma, an ñuina bamakë ꞌain nami pikë ñuina chabu a ꞌimainun, ñuina pëchiñu avestrus kakë akamanribi ꞌë rabiti ꞌikën, usa ꞌain kana ꞌën anu uni ꞌikëma menu ꞌumpax kushiira chikiti manámi ki ꞌinun ꞌimin, ꞌimianan kana me anu ñu ꞌirukëmanu bakakama ꞌimin, ꞌimia ka ꞌën kaískë unikaman a ꞌumpax xëati ꞌikën,

²¹ a unikama kana ꞌën uniokën ꞌë rabinun, usa ꞌain ka atun ꞌë rabikanti ꞌikën.

²² ꞌAínbi kamina Israel unikama Jacobnën rëbúnki, mitsun ꞌë baritisama tani atsankin ꞌë ënkankën.

²³ ꞌË kamina ꞌaímai këñutanun ovejakama xaroxuama ꞌain, ꞌianan kamina ꞌë rabikin ñuina xaroma ꞌain. ꞌËn kana mi atsaniabi ubíokin ꞌëmi ñukama ꞌinainshinun káma ꞌain, ꞌianan kana kuëëniamabi ubíokin tsëpasa ñu sanuira xaromiama ꞌain.

²⁴ ꞌIanan kamina kuríkinën tutish sanuira a maruama ꞌain, ꞌë ꞌinainshiti bëkësa obëtsinkin bënuxun, ꞌianan kamina ñuina rëxun xarokë aín xëni bikë anunbi mitsun ꞌë kuëëmiama ꞌain. Usokin ꞌakinma kamina ꞌitsaira mitsux ꞌuchakë anun ꞌë atsamiakën; usokëx kana mitsun ñu ꞌatima ꞌaimi ꞌuchakë anun ꞌëx nishakën.

²⁵ ꞌAínbi kana ꞌëx mitsun Dios ꞌixun, uni ꞌaimi ꞌuchakëkama a tërënxunkin uinsaranbi sinántëkëntima ꞌain.

²⁶ Ñu ꞌatima ꞌai ꞌëmi banai ꞌuchakë ꞌixun kamina ꞌëbë banakin añu kaina a ꞌën mëníonun ꞌë kati ꞌain. Kakëxun kana mitsux kaina asérabi ñu ꞌatima ꞌakëma upí uni ꞌai kixun isti ꞌain.

²⁷ Min chaitiokëkama axirapaia tsóa ax ka ꞌuchakëxa, an mitsu ñu ꞌunánmikë unikaman ka ꞌën kakëxun kuaisama tankankëxa,

²⁸ mitsun ꞌapukaman ka anuxun ꞌë rabiti xubunuxun atun kuëënkësa okin ꞌaisama ñu ꞌakankëxa; usakin ꞌaia kana Israel unikama Jacobnën rëbúnki mitsu masókin këñuanan mitsumi kuaikanun ëankën kiax ka Dios kiakëxa.