Isaías 42 - Kashibo-Kakataibo Biblia

An kaískë uni ñui Nukën ꞌIbu kia bana

¹ Ësai ka Nukën ꞌIbu kiakëxa. Ënu ka ꞌën kuëënkësabi okin ꞌati ꞌën kaískë uni ax ꞌikën, ënëx ka ꞌëx a isi ꞌitsaira kuëënkë a ꞌikën, usa ꞌain kana ꞌën bëru ñunshin a ꞌinan, usa ꞌixun ka kamabi menu ꞌikë unikama upíokian ñu ꞌanun ꞌamiti ꞌikën.

² Usa ꞌain ka munuma banai kushin kiabi, ain bana ëman nikë unikaman kuakëma ꞌiti ꞌikën,

³ pëkú pëchi sitan ꞌakin pësínpakë aka xanun ꞌaisama ꞌikë putia. Usa ꞌaínbi ka ꞌën bakë bëchikënën uni ꞌaisama ꞌaísha ꞌuchañu ꞌainbi ainan ꞌisatania kuantanun katima ꞌikën. Tirí bënabuti kuínkësa ka axa ami sinanibi ami kushikëma uni ax ꞌikën. Usa unibi ka aina ꞌiaxma kuantanun katima ꞌikën. Anun kamabi ñu ꞌaisama këñuti nëtë utamainun ka aín kushinbi amia katamëkë unikama ꞌakinti ꞌikën.

⁴ Usai ꞌika tantimabi ꞌianan kana ꞌaima kixunbi sinántima ꞌikën, kamabi menu ꞌikë unikamaxa ax kikësabiokin ꞌai sënë́ntamainun Axa parúmpapa nasíkamanu ꞌikë unikama atun ka an ꞌunánmikësabi okin ꞌati ꞌikën.”

⁵ Dios Nukën ꞌIbu an naíkamë ꞌëo uniokin chaiira ꞌinun pënían, an ka me ꞌimainun anua kookë ñukama ꞌakëxa, ꞌanan ka unikamaribi anúan tsóti uin ꞌinan, ax aín uni kai ësai kia:

⁶ “ꞌËx min ꞌIbu ꞌixun kana ꞌën unimi ꞌinun mi kuëankën, ꞌimainun kana ꞌën mëkënan tuinkësa ꞌixun mi ꞌakinkëxmi, a banamiti ñusa ꞌixunmi, min uni ië́minun mi ꞌimiti ꞌain; ꞌën kana mi uniokën, usa ꞌixun kamina min, ꞌën ꞌa ñukama ñuikin ꞌën unikama kati ꞌain, an ka min tirítan pëkakësa ꞌixun bëtsi menu tsókë unikama asérabi ënkinma upíokin ñu ꞌanun ꞌunánmiti ꞌikën.

⁷ ꞌIanan kana ꞌën kuëënin bëxuñu unikama ain bëru bëpë́xkuti ñunshin ꞌatimanën ñu ꞌatima ꞌamikëx sipunu ꞌikësa ꞌikëbi chikíanan, ñatanxuan bë́anbëankibukënu xëpúkësa ꞌikë akama chikínti kana kuëënin.

⁸ ꞌËx kana min ꞌIbu a ꞌain, usakin anëkë kana ꞌëx ꞌain, usa ꞌixun kana uinu ꞌikë bëtsi dioskama ꞌë ꞌakësaribi okin rabinun ꞌamitima ꞌain, ꞌë rabikinma bëtsi dioskama rabinun mitsu ꞌamitima ꞌain.

⁹ Kamina ꞌunánkanti ꞌain bërámabi uisai kara ñu ꞌinuxun ꞌaia ꞌëx kia akamax ka sënë́ankëxa, ꞌianan kana bëría bënoi ñu ꞌitëkënti ami iskankëma a ñuikin; a mitsun ꞌunánti a ñukama ꞌikëmapan ꞌaínbi kana mitsu ñuixunti ꞌain.”

Dios ka kamabi unin an ië́mikëxun rabiti ꞌikën

¹⁰ Anun kantakëma kanta ió anun kamina Nukën ꞌIbu rabi kantakanti ꞌain; rabikin ka uinu kara me kuainakëakëxa anu tsóa unikama atúnribi rabiti ꞌikën, ꞌamainun ka uikamax kara aín manë nuntin parúmpapan kuania akaman ꞌamainun, ka parúmpapanu ꞌikë ñuinakama anribi rabiti ꞌikën, ꞌamainun ka parúmpapa nasínu tsóa unikama atúnribi rabiti ꞌikën.

¹¹ Anu uni ꞌikëma me ꞌimainun kamabi ëmakama ꞌimainun ka xubusa okin chupa ꞌakë anua ꞌikë Quedarnën rëbúnkinën ñaká anua ꞌikë akamaxribi kuëënti ꞌikën. ꞌImainun ka Selánu ꞌikë unikama axribi kuëëni; munuma aín bashi rëbukama anuax kantati ꞌikën.

¹² ꞌUsakin ꞌakin ka Nukën ꞌIbu axa parúmpapa nasínu ꞌikë mekamanu ꞌikë unikama atúnribi rabiti ꞌikën.

¹³ Usa ꞌain ka Nukën ꞌIbu ax uínbia uisakinbi kakëma ꞌianan, axa ꞌakánanti ꞌunánkëira uníxa bëtsibë ꞌakanani kushikë usai ꞌiti ꞌikën; munuma kuënkëni axa ami nishkë unikama an ñusmokin ꞌai ꞌiti ꞌikën.

¹⁴ Ësai ka Nukën ꞌIbu kiaxa: ꞌItsaira baritia inúkëbëbi kana ꞌëx uisaibi kiama ꞌain, usai ꞌën sinánxuama tani ꞌikinbi tënëi kana nishkëmasa ꞌiakën; ꞌaínbi kana bërí xanuxa aín tuá bakënux paë tani ini munuma kuënkëni raëti kushi uíni ꞌikë usairibi ꞌiti ꞌain.

¹⁵ Usa ꞌixun kana kamabi aín bashikama masókin këñuanan, ꞌimainun anua kookë ñukama ëskikëbëa chushi ëskinun ꞌimiti ꞌain; ꞌimianan kana bakakamaribi anu uni ꞌikëma mesa ꞌimianan ꞌian kamaribi ëskinun ꞌimiti ꞌain.

¹⁶ Usakin ꞌanan kana bëxuñu unikama aribi atun ꞌunánkëma bain, buánkin anua niama bain buánti ꞌain. Uankin kana bëánbëankibukë aribi atun ismainubia xabá ꞌinun ꞌimiti ꞌain, ꞌimianan kana me nankë́kë axribia mëníokati upiti rakanun ꞌimiti ꞌain. Ënë ñukama kana, kana ꞌaíma kikínma asérabi ꞌati ꞌain.

¹⁷ Uikamax kara unínbia a rabinuxun ꞌakë achúshi ñu ami katamëtia, ꞌianan ka an unioxun ñukama an ësokin kakë: mitsux kamina nun dioskama ꞌain kixun, kakë akamax ka ꞌaisamaira katë́ti ꞌuri kikë ꞌiti ꞌikën.

Israel unikaman ka bëxuñusa ꞌixun ꞌën kakëxun bana kuatima kia bana

¹⁸ “Ësakin ka Diosan Israel unikama kakëxa, mitsux kamina bana kuakëma pabëira unibusa ꞌain, usa ꞌain kamina kuakanti ꞌain; ꞌianan kamina bëxuñusakama mitsunribi uisa kara ñu ꞌikë kixun upíokin pain iskanti ꞌain.

¹⁹ Uíxbi ka bëxuñusa ꞌianan bana kuakëmasa ꞌaíma ꞌikën, mitsux kamina ꞌën kaískë uni, ꞌënbi xukë uni ꞌain, uibi ka bëxuñusa ꞌianan pabëirama ꞌikën, mitsux kamina an ꞌën bana ñuikë ꞌianan ꞌën unikama ꞌain.

²⁰ Mitsun kamina uiti ñuishi karana ꞌën mitsu kupí ꞌai ꞌisakën, ꞌaínbi kamina a sinánkima ꞌën kakëxun kuaisama tankanin; mitsun kamina kuatin, ꞌaínbi kamina ꞌën kakëxun uisa banabi kuaisama tanin.

²¹ Nukën ꞌIbu an ka ax Dios ië́mianankë ꞌixun, aín bana ax ka chaiira ꞌianan kushi ꞌikë kixun ꞌunánmisa tankëxa:

²² ꞌaínbi ka ënë unikama amia nishkë unikaman atun ñu mëkamanan aín ñu kamabi bikuanxa, usonan ka a unikama kamabi ñatanbiankin buánxun sipuaxa; usokin ꞌakian atu ꞌibuakë ꞌikëa an chikínti uni ka ꞌaíma ꞌikën, ꞌianan ka kuëëniamabi ñatanbiankin buánkë ꞌikëbi an chikínti uni ꞌaíma ꞌikën; ꞌianan ka an mëkamakin ñatankin bikëbi, kupíotankëxun bitëkënti ka ꞌaíma ꞌikën.”

²³ ¿Usa ꞌaínbi karamina uinu ꞌikë mitsukaman ënë banakama kikësabi oi ka ꞌiti ꞌikë kixun sinánkaniman? ¿Uix kara a banakama kikësabi oi kara ꞌia kixun kuatishi ꞌiti ꞌik?

²⁴ ¿Uin kara Israel unikama Jacobnën rëbúnkikama a raíri ꞌanan bibiankin ain menu buánun ꞌamiakëx? ¿An usakin ꞌakë ax kara asérabi Nukën ꞌIbun ꞌamikëma ꞌiakëx? Atux ka ami ꞌuchakëxa, usai ꞌikin ka an kakësokinbi ꞌakëma ꞌikën, ꞌianan ka ain bana ax kikësokinbi ꞌaíma ꞌianan, an ꞌunánmikësa okinbi ꞌaisama tankankëxa.

²⁵ Usa ꞌain ka atumi nishkin an tëmëramiti, ami nishkë unikaman bënë́kinshi ꞌakanankin ꞌanun ꞌamiakëxa; usakin Nukën ꞌIbun ꞌakëxunbi ka ꞌunánkinma kuaisama tankankëxa.