Isaías 41 - Kashibo-Kakataibo Biblia

Nukën ꞌIbu Dios ꞌën kana Israel unikama tëmëraiabi ꞌakinti ꞌai kia ñuikë bana

¹ “Ësai ka Dios kiakëxa, axa parúmpapa nëbëtsi ꞌikë nasínu bukukë unikama an ka nëtë́xun ꞌëx kia kuati ꞌikën. Bëtsi bëtsi menu tsókë unikamax ka kushi mëníokati ꞌikën. Uisai kaina mitsux tsóti anu banakin mëníonun kamina timë́kanti ꞌain; bërí kananuna timë́xun uisakin karanuna mëníoti ꞌai kixun isti ꞌain.

² ¿Uin kara amiaxa bari urukë amiaxa ꞌapu an kamabi kupitanuma ꞌakanankë ax mëranun ꞌimiakëx? ¿Uin kara bëtsi bëtsi menu ꞌikë unikama aín ꞌapukama atux an ꞌakë unikama ami ꞌinamëkëbëtan aín, suntárukaman aín manë xëtokë, ꞌimainun aín kanti ꞌitsaira uni ꞌakëbëa raíri unix basi chushikë ꞌikësa usaribiti basatanun ꞌati ꞌik?

³ ¿Uin kara aín suntárukamabëtan nuibiani uisaibi ꞌima men kuankëmasa ꞌinun nuankiani kuankësa ꞌinun ꞌimiti ꞌit?

⁴ ¿Uin kara ënë ñukama ësokin ꞌakëx? ¿Uin kara bërámabi ꞌa ꞌixun bëríbi usaía ñu inútikama a ꞌimiti it? ꞌËx kana mitsun ꞌIbu Dios achúshi a ꞌain, uin kara uinsaranbi ꞌitabakënu unin ñuiama ñu ꞌakëxa.

⁵ Axa parúmpapa nasínu ꞌikë ëmakamanu tsókë unikama ax ka a isi ꞌitsaira rakuë́kankëxa; usai ꞌimainun ka mekama shaíki kamabi mex shaíkiakëxa. Usai ꞌikëbë timë́xun ka ꞌaia kixun iskanti ꞌikën.”

⁶ An ñu unioti ꞌunánkë an ka abëtan ñu ꞌakë a kuëëmikin uni ábia ënxuma ꞌanun kixun kati ꞌikën.

⁷ An ñu unioti ꞌunánkë an ka tëñuti ꞌanan, mëñuti ꞌakë a abia ꞌanun kuëëmikin kati ꞌikën; ꞌimainun ka anun chakati ꞌakë anua an manë, chakakë aribi ënxuma ꞌanun kati ꞌikën, minmi manë charoxun takáshkakë ax ka asábi ꞌikën, usokin ꞌatankëxun kamina mi uniokë ñu a shaíkibë́kinima nipakëtia usa ꞌain rabún matásti ꞌain.

⁸ “Israel unikama ꞌën uni Jacob a ꞌën kaisa aín rëbúnkikama, ꞌimainun Abraham ꞌën uni aín rëbúnkikama: Mitsun kamina ꞌën kakëxun kuakanti ꞌain.

⁹ ꞌËn kana uinu ꞌikë menu kaina ꞌi anuabi chikínbëtsinkin mitsu bëakën, ꞌianan kana uinu kara me kuainakëakëxa anuabi kuënxun mitsu kakën: ‘Mitsux kamina ꞌën uni ꞌain.’ ꞌËn kana mitsu timakinma kaisakën.

¹⁰ ꞌËx kana mitsubë ꞌain usa ꞌain kamina rakuë́kantima ꞌain; ꞌëx kana mitsun Dios ꞌain usa ꞌain kamina rakuë́kantima ꞌain, ꞌën kana mitsu kushionan ꞌakinti ꞌain, ꞌën kana mitsu anun ꞌakánanti manë xëtokë ꞌën mëkënan tuínxun ꞌakësokin axa mimi nishkë unikamami kupitanuma ꞌanun ꞌamiti ꞌain.

¹¹ Usa ꞌain ka kamabi axa mitsumi nishkë unikamax rabinkëbu ꞌianan ñuumarasabu ꞌiti ꞌikën; ꞌianan ka axa mitsubë ꞌakanankatsi kikë unikama achúshirabi nitánuma maërakatanun këñúkë ꞌiti ꞌikën.

¹² Usai ꞌikë kamina axa mitsumi nishkë unikama barikinbi mërakantima ꞌain; usa ꞌain ka axa mibë ꞌakanankë akamax anu buküaxi ꞌaimasa ꞌiti ꞌikën.

¹³ ꞌËx mitsun ꞌIbu Dios ꞌixun kana, ꞌën mëkënan tuinkësa ꞌinun mitsu ꞌakinti ꞌain usakin ꞌakinuxun kana mitsu kan; Usa ꞌain kamina rakuë́tima ꞌain, ꞌën kana mitsu ꞌakini usa ꞌain.”

¹⁴ Ësai ka Nukën ꞌIbu asérabi kiakëxa: “Israel unikama Jacobnën rëbúnki ꞌitsamara ꞌaish kushimarasa unin iskëbi rakuëtima, ꞌaínbi kamina mitsux rakuë́tima ꞌain. ꞌËn kana mitsu ꞌakinin. ꞌËx Israel unikaman Dios upíira ꞌixun kana, mitsu bitëkënti ꞌain.

¹⁵ Usakin ꞌakin kana mitsu anun ñu tákati i xëta, xëtabu ió aín xëta upí ꞌitánun ꞌakë usaribi ꞌimiti ꞌain; ꞌimikëxun kamina bashikama ñu putusa ꞌimianan me sapankamaribi, basi chushikësa ꞌitánun ꞌimiti ꞌain.

¹⁶ Usakin ꞌaxun tákaia ka suñun bëkikin nuánmiti ꞌikën; ñu bimia aín bimikama këñunbi anu ꞌibúkin suñúan kushiiran ñu ꞌakësaribi okin ꞌabisoti ꞌikën. Usa ꞌain kamina mitsun ꞌIbu ꞌain kuëënkanti ꞌain, usai ꞌikamina mitsux rabiakati Israel unikaman Dios upíira ax ka nubë ꞌikë kiax kikanti ꞌain.

¹⁷ Uni ñuñuma ꞌaish kuríkiñuma akaman ka ꞌumpax barikinbi mëraima. Usa ꞌaish ka ꞌumpax xëaima shimax aín tëru ëskia; ꞌaínbi kana ꞌëx aín ꞌIbu ꞌixun atu ꞌakinti ꞌain, ꞌëx Israel unikaman Dios ꞌixun kana atu ꞌakinkin ëntima ꞌain.

¹⁸ ꞌIanan kana anu uni ꞌikëma bashikama anubia ꞌumpax ꞌinun ꞌimiti ꞌain ꞌimianan kana me sapan kamanuribi xëxá manánmi ki shióbuti upíbu ꞌinun ꞌimiti ꞌain; ꞌimianan kana anu uni ꞌikëma me ëskikë anuribia xëxákama ꞌinun ꞌimiti ꞌain.

¹⁹ Anu uni ꞌikëma menu kana kunxan, acacia kakë i ꞌianan pëñanakëkë i ꞌimainun olivos akamaribi kómiti ꞌain; komianan kana me anu ñu ꞌapátisamai ëskikë anubi pino kakë i akëñunbi i chaxkë́irabu akamabi kómiti ꞌain,

²⁰ usakin ꞌakë ka kamabi unin iskin ꞌunánti ꞌikën, ꞌimainun ka upíokin sinanan kuati ꞌikën, ꞌëx aín ꞌIbu ꞌixun ka ënë ñukama ꞌën kushínbi ꞌa kixun ꞌunánkanti ꞌikën, ꞌianan ka ꞌëx Israel unikaman Dios upíira ꞌixun kana usakin ꞌa kixun ꞌunankanti ꞌikën.”

Nukën ꞌIbu Dios unínbi uniokë ñukama masókatsi kia bana

²¹ ꞌApuira Jacobnën rëbúnkikaman ꞌIbu ax ka ësai kiaxa: “A rabinuxun unin bëtsi ñukama tankin uniokë akamax ka uisakin kara ñu ꞌaia kixun ꞌë ñuixuni ukanti ꞌikën.

²² Uxun kamina uisai kara ñu ꞌinuxun ꞌaia kixun nu kanan uisai kara ñu ꞌiakëxa kixun nu ñuixunti ꞌain, ñuixunkëxun kananuna nukaman upíokin kuakin sinánti ꞌain; kuamainun kamina uisai kara ñu ꞌinuxun ꞌaia akamaribi nu ñuixunti ꞌain, ñuixunkëxun kananuna uisai kara a ñukama ꞌinuxun ꞌaia kixun ꞌunánti ꞌain;

²³ usa ꞌain ka uisai kara a ñukama ꞌiti ꞌikë kixun nukama kati ꞌain, kanan kamina asérabi karamina mitsux dioskama a ꞌai kixun nukama ismiti ꞌain. ꞌIanan kamina ꞌatipaxun ñu upí ꞌanan ñu ꞌatima ami nux ꞌitsaira rakuë́tisabi ꞌitanun ꞌati ꞌain.

²⁴ ¡ꞌAínbi kamina mitsux añu ñubima ꞌain ꞌimainun kamina añu ñubi ꞌaisama ꞌain! An mitsu kaískë unikama ax ka upíokin iskëma ꞌiti ꞌikën.

²⁵ ꞌËn kana achúshi uni amiaxa bari urukë amiax mëranun ꞌimiti ꞌain; a uni kana ꞌën aín anën kuënti ꞌain, usa ꞌain ka aín tsipúmiax a uni uti ꞌikën. Utankëxun ka ꞌapukama atu chua me aín taën amákësokinshi ꞌati ꞌikën; ꞌanan ka an mapú ñutë ꞌati aín taën amákin chë́kakë usaribi okin ꞌati ꞌikën.

²⁶ ¿Uinra kara anúan ꞌitabati ꞌikë anunbi pëua ꞌixun, nukaman ꞌunánun ñuiakëx? ¿Uinu ꞌikë mitsuxira kaina bërámabi uisai kara ñu ꞌiti ꞌikë kiax nukamax kinun kiti ꞌain? Uinu ꞌikë mitsúxbi kamina usai ka ꞌinuxun ꞌaia kiax kiama ꞌain, uínbi ka achúshi banarabi banaia kuama ꞌikën.

²⁷ ꞌËxbi kana usai ka Siónnu ꞌikë unikama tsónuxun ꞌaia kiax bërámabi kiakën, usa ꞌixun kana ꞌënbi Jerusalénnu tsókë unikama katánun an bana ñuikë uni achúshi xuakën xukëx kuanxun ka axa aminishkë unikaman uban unikama ax ka basirakëma ꞌaínshi utëkënti ꞌikë kixun kakëxa.

²⁸ ꞌËn iskëx ka bëtsi dioskama ꞌëmi mëratima; usa ꞌain ka an ꞌë usai kamina ꞌiti ꞌai kixun kati ꞌaíma ꞌikën, ꞌianan ka an ꞌën ñukákë banakama usai ka ꞌinxun ꞌaia kixun ꞌë kati ꞌaíma ꞌikën.

²⁹ ¡Akama achúshinëxbi ka añumabi ꞌikën! Usa ꞌixun ka añu ñubi ꞌaima; usa ꞌain ka unin a rabinuxun uniokë ñu usaribi ꞌaish ñankáishi ꞌikën.