Isaías 40 - Kashibo-Kakataibo Biblia

Nukën ꞌIbun amiribishi Jerusalénnu tsókë unikama masá nuitutiabi upiokin sinánu ꞌimia ꞌikën

¹ Mitsun Dios ax ka ësai kiaxa: “ꞌËn unikama kamina kuëëntanun nuibakin ꞌakinti ꞌain;

² ꞌakianan kamina kuëëntanun nuibakin Jerusalénnu tsóa unikama a atúan tëmërakin bëtsi uni ñu mëëxuan a ka këñúaxa kixun kati ꞌain, kanan kamina atúxa usai ꞌikë anunbi ka ꞌën kakëxuan atun kuaisamatan a kupíoxa kixun kati ꞌain, ꞌënbi kana ꞌëmi ꞌitsaira ꞌuchaia rabë́ okin atu ꞌatima okën.”

³ Achúshi ángelnëx ka munuma banai ësai kia: “Nukën ꞌIbu ka ꞌaia kamina anu uni ꞌikëma menu bai mëníoxunti ꞌain, a kamina Nukën ꞌIbu Dios ꞌaxunti ꞌain, ax ka achúshi bai chaiira puntë ꞌianan naxba anu ñu ꞌirukëma me ꞌiti ꞌikën.

⁴ Kamabi me xëxañu ꞌianan bashi ꞌitsañu akamax ka me sapan ꞌinun nataka kikë ꞌiti ꞌikën, bashi tëpan ꞌimainun matá, mekama ax ka aín chairukëkama iskëma ꞌitánun mëníokakë ꞌikën, usai ꞌikëbë ka ꞌitsaira xëxákama ax nëtëtima ꞌimainun ain bashikama ax sapani aín rëbu iskëma ꞌiti ꞌikën.

⁵ Usa ꞌain ka Nukën ꞌIbun aín, kushia isnun ismiti ꞌikën. Ismikëxun ka kamabi unin timë́xun isti ꞌikën, usai ka Nukën ꞌIbu ax kiaxa.”

⁶ Achúshi unix ka ësai munuma banai kia: kia kana ꞌën ñukan: “¿Uisai karana ꞌëx munuma banai kiti ꞌain?” Kakëxun ka an ꞌë kaxa. Ënë bana kamina munuma banai kiti ꞌain kixun ka ꞌë kaxa. “Kamabi unix ka xubi kókë usaribi ꞌikën, ¡aín tsóti ax ka ñu ua naënu kotankëxi bëríbi nëtë́kë usa ꞌikën!

⁷ Xubix ꞌimainun ro uakama ax núkai ëski chushia, uínsaran kara Nukën ꞌIbun xunkaia anun ka usai ꞌia. Usa ꞌain ka asérabi unin tsóti ax bënëtishi xubi ꞌikësaribiti inutia.

⁸ Usa ꞌain ka xubi ax ëski chushimainun ro ua axribi chushi xanania, ꞌaínbi ka Nukën ꞌIbu Diosan bana, ax xënibua ꞌaínbi usabi ꞌiti ꞌikën.”

⁹ Sión an upí banakama ñuikë, ax ka aín bashi achúshi chaxkë́ira anu kuaruti ꞌikën. Jerusalén an upí banakama ñuikë, mix kamina kushiira banati ꞌain, Judá menu ꞌikë ëmakamanu ꞌikë unikama aturibi upí bana a ñuixunti ꞌain: ¡Ënu ka mitsun Dios ꞌikë kamina iskanti ꞌain!

¹⁰ Nukën ꞌIbu ax ka ꞌuti ꞌikën, an ka aín kushinshi ax kushiira ꞌixun ñu ꞌati ꞌikën. Usa ꞌixun ka amia nishkë unikama a pain ꞌatimotankëxun aín unikama bitsínkin bëti ꞌikën.

¹¹ ꞌIanan ka an ñuina bërúankë unían aín ñuina bërúankin; aín ñuinakama nuibakin aín shikami okin ꞌikúkin bixun tuianan, axa bërí bakënkëkamaribi bëruinra okë usaribi okin ꞌaia.

Israelnën Dios ax ka kushiira bëtsi ñu bëtan sënë́maira ꞌikë kixun ñuikë bana

¹² ¿Uin kara parúmpapa kamakëñun ꞌumpax aín mëkënan tupúanan, aín mëkën rëbukaman uiti chaiira kara naíkamë ꞌëo ꞌikë kixun tupuax? ¿Uin kara me putu kamabi uiti kara kixun tupúnti ꞌikë, ꞌianan kara anun ñu ꞌië tupúnti ꞌakë anun matákama ꞌimainun bashikama tupúnti ꞌik?

¹³ ¿Uin kara Nukën ꞌIbu ësokin kamina ñu ꞌatima ꞌai kixun kanan, usakin kamina ñu ꞌati ꞌai kixun ꞌunamiti ꞌik?

¹⁴ ¿Uin kara usakian ñu ꞌanun kixun ꞌësëanan usakin kamina ñu ꞌati ꞌai kixun kuamikin kakëx? ¿Uin kara usakin kamina uni ꞌati ꞌai kixun istánkëxuan ꞌanun ꞌunánmiakëx? ¿Uin kara uisai kara ënë nëtënu ꞌikë ñukama uniakëxa kixun ꞌunánmiakëx? ¿Uin kara usakin ñu unáni kamina sinánñuira ꞌiti ꞌai kixun ꞌunánmiakëx?

¹⁵ An iskëx ka bëtsi bëtsi menu ꞌikë ëmakamanu ꞌikë unikamax ꞌumpax tuskia iskë usaratsushi ꞌikën, ꞌianan ñu bëru ꞌitsama anun ñu tupunkë anu ꞌarukë usaribi ꞌikën; bëtsi bëtsi unikama parúmpapa nasínua ꞌikë ax ka masi bëru ꞌitsaira ꞌiskësa usaribi ꞌikën.

¹⁶ Kamabi Líbanu mekamanu ka ñuina ꞌitsairama ꞌikën usa ꞌaish ka bënë́kinshi ꞌatankëxun ꞌaímai këñutanun a xarotibi ꞌaíma ꞌikën, ꞌianan ka anua karu bënë́kinshi a tíkati bisamabi ꞌikën.

¹⁷ Kamabi menu ꞌikë ëmakamax ka an iskëx ñuumara ꞌikën; usa ꞌaish ka an iskëx anu ꞌikë unikamax kushima ꞌikën.

¹⁸ ¿Uinu ꞌikë bëtsi uni kamabëtan sënën kara Dios ꞌikë kixun kaina mitsun kati ꞌain? ¿Uisa ñu mitsúnbi uniokë ax kara asaribi ꞌiti ꞌik?

¹⁹ An ñu unioti ꞌunánkë unin ka charóxun ñu uni tankin ꞌaia, ꞌimainun ka an tëñuti ꞌanan mëñuti ꞌakë an ꞌatankëxun kurin ratáta kakin ꞌanan manë uxua aribi risi ꞌitánun ꞌaia.

²⁰ An ñu unioti ꞌunánkë an ka i chë́kisama upí baria, barixun ka an ñu ꞌati ꞌunánkë uni aribi, nipakëisama okin upíokin nitsinxunun kixun kaia.

²¹ ¿Mitsun kaina a küama ꞌain? ¿Ax kiabi kaina aín bana kuakama ꞌain? ¿Mitsu kara ꞌitabati ka usai ñu ꞌiakëxa kixun ñuixuama ꞌik? ¿Mitsun kaina mekama uniokëma ꞌaínbi kara uisa ñu ꞌiakëxa kixun ꞌunaniman?

²² Dios ax ka an me bëararakë kuman batsisa naí meu ꞌikë a manámi tsótaxa, usa ꞌixun ka kamabi uni champura ꞌakësa okinshi isia. An ka chupa ꞌakësokinshi naíkamë ꞌëo pëokaia, ꞌanan ka anu ꞌiti chupa këxtú pëokakin pëninkësa okinshi ꞌaia.

²³ Diosan ka kushiirabu unikama a kushiñumasa ꞌinun ꞌimianan, ënë menu ꞌikë ꞌapukama ñu ꞌatimara iskësa usarabi ꞌinun ꞌimia.

²⁴ Usa ꞌaish ka bërí ñu ꞌapákëx, me bitsi tapunakëkëma usaribi ꞌikën, usa ꞌain ka Diosan anu ꞌibúkin bëkinun ꞌimikëxuan suñun bëkakëx chushi bamaia, usai ꞌia ka anu kushi ꞌibúkin basi chushikë ꞌakësara okinshi suñuanën tákaia.

²⁵ Usa ꞌain ka Dios upíira ax ësokin ñukati kiaxa: “¿Mitsun kaina uibë sënën karana ꞌai kixun ꞌë kati ꞌain? ¿Uix kara ꞌësaribi ꞌiti ꞌik?”

²⁶ Manámi bësukin kamina naími okin iskanti ꞌain: ¿Uin kara kamabi ñu uniokëx? An ka kamabi uniotankëxun ꞌispakama aín anën anëkin nankëxa, usa ꞌixun ka achúshi achúshi usai kamina ꞌiti ꞌai kixun kakëxa. Aín kushi chaiira ꞌain ka uinu ꞌikë ꞌispaxbi nëtë́tima ꞌikën.

²⁷ Jacobnën rëbúnki Israel unikaman, ¿uisa kupín kaina banai bënë́kanin? ¿Uisa kupín kara ësai kikani: “Nukën ꞌIbun ka ꞌëx inúkë ñukama ꞌunanima; kianan Diosax ka numi sinanima kiax kikanin?”

²⁸ ¿Mitsun kaina ꞌunaniman? ¿Mitsun kaina a kuakëma ꞌain? Nukën ꞌIbu Dios ax ka uínsaranbi këñutima oi tsókë a ꞌikën, an ka kamabi me uniokin anu ꞌikë ñukamaribi uniokëxa, usa ꞌaish ka ax atsanx kana ꞌakasmati kiax kima; ꞌianan ka ax sinánñuira ꞌikë ax nëtë́tima ꞌikën.

²⁹ An ka axa atsánkë unikama kushitëkënun ꞌimia, ꞌimianan ka kushiñuma uni aribi amiribishi sinanatëkënia kushinun ꞌimia.

³⁰ Uni bënákama atúxribi ka atsanx kushiñumasa ꞌiti ꞌikën, ꞌianan ka kushiira unikama atúxribi pakëti ꞌikën,

³¹ ꞌaínbi ka axa Nukën ꞌIbumi katamëkë: unikama ax kuni kushiñumasa ꞌima abi kushiakëkiani; tëtëkamë ꞌëo nuani nikë usai nitsi abatibi atsantima ꞌikën ꞌimainun ka usai nitsibi atsantima ꞌikën.