Isaías 35 - Kashibo-Kakataibo Biblia

Israel unikama Jerusalén kakë ëmanu utëkënti ñuikë bana

¹ ꞌËx kana kuëënin anu uni ꞌikëma, me ëskikë ax kuëënti, kuëënkëbë ka ꞌitsaira anu ñu bimi uábuti ꞌikën,

² ꞌianan ka ro ua ax ꞌapákësa ꞌinun uábuti ꞌikën, usaía ꞌikëbë ka unikama ꞌitsaira kuëënti ꞌikën. Diosan ka a menu ni upíira ꞌimiti ꞌikë, Líbano menu ꞌikësa ꞌinun, ꞌimianan ka Carmelo kakë me upíira a ꞌimainun me sapan Sarón kakë usaribi ꞌimiti ꞌikën. Kamabi unikaman Nukën ꞌIbu ax ka kushiira ꞌianan, ꞌapuira ꞌikë kixun ꞌunánti ꞌikën.

³ An ꞌëx kia kuakë mitsun kamina, axa ꞌakinti kuëënkë unikama ꞌakinti ꞌain, ꞌakinkin kamina atsánkë unikama a kuëëntanun sinanamikin kati ꞌain,

⁴ kanan kamina axa rakuë́ti ꞌishtun banakëma unikama aribi: “Rakuëama ꞌinun kati ꞌain. ¡An nu ië́miti Nun Dios ka nu ꞌurama ꞌaish nubëbi ꞌikën, ꞌianan ka mitsumi nishkë unikama atux kuëënkësa okin tëmëramiti ꞌikën!”

⁵ Usa ꞌain ka bëxuñu unikama an ꞌupiokin ismainun, pabë unikama anribi paxabarakakin bana kuati ꞌikën;

⁶ ꞌimainun ka uni ꞌain niti bëtsikë akamax chaxu abati ꞌikësai churunti ꞌikën, ꞌimainun ka banakëma unixi munuma banati ꞌikën. ꞌIanan ka anu uni ꞌikëma me ëskikë anuax kushiira ꞌinun ꞌumpax ꞌitsaira ax bënëtishi shióbuti chikiti ꞌikën.

⁷ Anu uni ꞌikëma menu ka ꞌumpax chaiira ꞌiti ꞌikën, ꞌimainun ka me ëskikë anubi xëxá upíira manámi chikíkë ꞌiti ꞌikën. Anu ka bërí an ñuina rëtëxun paxa pikë kamun raëkëmakama ꞌia, usa ꞌain ka anu toëón ꞌimainun xatsíon kóti ꞌikën.

⁸ ꞌImainun ka anu achúshi bai cha upíira ꞌiti ꞌikën, “ax ka bai upí kakin anëkë ꞌiti ꞌikën.” Usa ꞌain ka uikamax kara aín ꞌucha sinánkin ain niti mëníokëma ꞌikë akamax a bain nitima ꞌikën; ꞌimainun ka sinánñuma unikama atúxribi anun inuti nitima ꞌikën.

⁹ Anu ka paru inuán ꞌianan raëkëma ñuinakama axribi ꞌutima ꞌikën. Usa ꞌain ka bai an ië́mikë Israel unikama aín menubi an ꞌimikëx riküatsintëkënun Diosan ꞌimiti ꞌikën;

¹⁰ a unikamax ka Nukën ꞌIbun ainan ꞌinun bitëkënkë unikama ꞌiti ꞌikën; usa ꞌaish ka Jerusalén ëmanu atsini kantai kuëënkanti ꞌikën, usai ꞌika anu kuëëni xënibua ꞌaínbi tsóti ꞌikën. Usai kuëëni chuámarua tani anu tsókëbë ka uínsaranbi masá nuituti inkë ax atunu ꞌitëkëntima ꞌikën.