Isaías 33 - Kashibo-Kakataibo Biblia

Nukën ꞌIbun an ꞌakinun kainkë uni ꞌakinti ñuikë bana

¹ ¡Mitsun bëtsi unikama masókin ꞌatimokë ꞌikëbi ka mitsu bëtsi unikaman masókin ꞌatimokëma ꞌikën; Mitsun kamina bëtsi unikama ꞌatimo ꞌaínbi ka bëtsi unikamanribi mitsu ꞌatima okëma ꞌikën! Uínsaran kaina bëtsi uni masókin ꞌakin këñuin, anun ka bëtsi unikamanribi mitsu masókin ꞌati ꞌikën; uínsaran kaina bëtsi unikama mi ꞌakësabi okin ꞌati sinánxun ꞌaima, anun ka bëtsi unikaman mi ꞌati ꞌikën.

² Nukën ꞌIbu nu nuibakin kamina nukama ꞌakinti ꞌain, nun kananuna minmi nu ꞌakinun kainin. Nu kamina nëtë́tibi ꞌakinti ꞌain, ꞌimainun kamina uinsaran nëtën kara anun nux tëmërati nëtëkama ꞌia anunbi nu ië́miti ꞌain.

³ Uínsaran kara mixmi atu ꞌakatsi kia kuatia anun ka unikamax abisi abáti ꞌikën; uínsaran kaina min kushi ismikin nu ꞌakinin anun ka bëtsi menu ꞌikë unikamax abisi abáti ꞌikën;

⁴ usa ꞌain ka axa ami nishkë unikamax champu ꞌitsa nuania nëtë kuin masá kuatsini ukësai ukin axa ami nishkë unikaman, atun ñu kupíkë akamabi bianan anúan ñuñuira ꞌikankë akamabi bikuanti ꞌikën.

⁵ Nukën ꞌIbu ax ka kamabi ñun ꞌibu ꞌaish a manámi ꞌianan naíkamë ꞌëonuribi ꞌia; an ka Jerusalénnu ꞌikë unikama ꞌimainun Judá menu ꞌikë unikama raíri uisai kara ñu upíshi ꞌai upí tsóti ꞌikë kixun ꞌunánmiaxa,

⁶ usa ꞌixun ka uisai kara xënibua ꞌaínbi an bërúankëx aín unikama bukuti ꞌikë kixun ꞌunánmiti ꞌikën. Ñu ꞌunánkë ꞌianan upiokinra ñu ꞌunánkëira an ka ñu achúshi kupíkësaira ꞌixun uni ië́mia; usa ꞌain ka Nukën ꞌIbumi rakuë́ti ax ñuñuira ꞌikë usamaira ꞌikën.

⁷ ¡Kamina kuakanti ꞌain uisai kara axa ꞌakánanti ꞌunainrabu ax anun ëmanu niti bai anuax kuënkëni kikania kixun, ꞌimainun ka ꞌakanantima ka kixuan bana mëníotanun xukë unikama atux inia kuati ꞌikën!

⁸ Bai kama axribi anun nikima ënkë ꞌikën, uixi anun nitima ꞌikën. Ñu ꞌakatsikiax bëtsibë bërí kanankë a ꞌaíma ꞌinun ënkë ꞌikën; usa ꞌain ka timë́ax kananxuan ñu mëëkë akamaribi ꞌaíma ꞌikën, ꞌianan ka bëtsibë nuibanani kanankë abi ꞌaíma ꞌikën.

⁹ Mex ka uni ñukë ꞌain masá nuitukë usa ꞌikën, Líbano me axribi ka anu ꞌikë ikama chushikë ꞌain unix ꞌikësai rabinkësa ꞌikën, ꞌimainun ka Sarón kakë me sapan kiankë axribi anu uni ꞌikëma mesa ꞌikën, ꞌimainun ka Basán me ꞌianan Carmelo kakë bashi anu ꞌikëkama axribi me ëskikëbë xanani ikama axribi aín pëchi rëukubutia.

¹⁰ Nukën ꞌIbu ka ësai kia: “Bëríra kana ꞌën ñu ꞌati ꞌain; ꞌakin kana bërí uisakin karana ꞌën ñu ꞌai kixun uni ismikin kamabi ñu chabu ꞌën kushin ꞌëx ꞌapu ꞌixun ꞌati ꞌain.

¹¹ Usa ꞌain ka usakin ñu ꞌakatsi kixun sinánkë ꞌimainun mitsun ñu mëëti ꞌakë akamax basi chushikë ꞌianan ñu puti bukúnkë usaribi ꞌikën; usa ꞌikë kana ꞌën xunkaia tsin ñu ꞌakësa okinshi këñuti ꞌain.

¹² Ëmakamanu unikama bërúkë ax ka ñu xarokëx aín chimapuishi bërukësa ꞌiti ꞌikën; usai ꞌika muxa tëapaxun bukúnxun unin në́nia tsin pikë usaíshi ꞌiti ꞌikën.

¹³ ꞌUra ꞌikë unikama anribi ka ꞌën ꞌakë ñukama kuati ꞌikën, kuamainun ka ꞌurama ꞌikë unikamanribi uisakin karana ꞌën kushínbi ñu ꞌa kixun ꞌunánti ꞌikën.”

¹⁴ Jerusalén ëmanu ꞌikë unikama ꞌimainun Judá menu ꞌikë unikama atúxribi ka ꞌuchakë ꞌaish ꞌitsaira rakuë́ti bërëia, ꞌimainun ka an Diosan bana ꞌunánkëma unikama atúxribi ꞌitsaira rakuëtan bamai ësai kia: “¿Uinu ꞌikë nukamax kara tsi ërë́kin an ñu xarokin këñúkë anu ꞌianan, këñutima oia ërë́kë anu ꞌiti ꞌit?”

¹⁵ An upí ñuishi ꞌai asérabi këmëima banakë uni ꞌianan, an bëtsi uni aín ñu kuëëniamabi bikuantankëx anun ñuñukëma ꞌianan, bëtsi ꞌatima oxunun kixun bëtsin ꞌinainshikë kuríki bikëma a ꞌianan, an bëtsi uni usakin kananuna uni rëtëti ꞌai kixun kakëxunbi kuëënxunkëma ꞌianan, an uisaxunbi usakin kana ñu ꞌatima ꞌati ꞌai kixun sinánkëma uni,

¹⁶ akamax ka upitax rakuë́tima tsóti ꞌikën, usai ꞌika ami katamëti achúshi xubu mapara ꞌakë ami katamëanan, aín piti ꞌitsaira ñu ꞌianan, a xëati ꞌumpax ꞌitsairañu ꞌaish ñuñumama ꞌitima ꞌikën.

¹⁷ Usa ꞌain kamina mitsun bërúnbi axa ꞌapu ꞌiti uni a istëkënti ꞌain, ax ka ꞌapu ꞌupíira ꞌinuxun ꞌaia; an ka uinu kara me kuainakëakëxa anu ꞌaísha ꞌuraira ꞌaínbi unikaman ꞌapu ꞌiti ꞌikën.

¹⁸ Anunmi rakuë́ti tsóa nëtëkama a sinani, kamina ësai kikanti ꞌain: “¿Uinu kara an kupíonun kixun ubíokin kupíomixun an kuríki tupuán suntárunën kushikama ax ꞌik? ¿Uinu kara an sënën kara kixun ñu ëñë tupuán ax ꞌik? ¿Uinu kara suntárunën kushikaman anuxun nu ñatanun xunuxua anun ëma kënëarakama anuxun bërúankëkama an tupuán ax ꞌik?”

¹⁹ Usa ꞌain kamina bërí amiribishi bëtsi ëmanu ꞌikë unikama bana kuakëma ꞌain, atun bana ax ka mitsun kuaisama tëira ꞌianan, uisai kara kia kixun uinu ꞌikë mitsúnbi kuaisama ꞌikën.

²⁰ Anuxun nëtë inúkin fiesta ꞌati Sión kakë ëma a kamina iskanti ꞌain; Jerusalén ëma uisabi oisama okin bërúankë a kamina mitsun bërúnbi isti ꞌain; ax ka anu ꞌinuxun ꞌupiokin unin i nitsintankëxun shaíkisama okin ꞌanan uínbi ain itsikama tënkapatisama okin ꞌakë usaribi ꞌiti ꞌikën.

²¹ Anuxun ka Nukën ꞌIbu nukama aín kushi ismiti ꞌikën. Ax ka achúshi baka kushiira abákë ꞌimainun naxbaira usaribi ꞌiti ꞌikën, usa ꞌaínbi ka axa ami nishkë unikama atu ꞌakatsi kiax anúan ꞌakanani kuankë atun manë nunti intían nikinkë a ꞌimainun chaiira kushiira ax ꞌinútima ꞌikën.

^22-23 Usa ꞌain ka Nukën ꞌIbu ax an bana nu mëníoxunkë ꞌixun a tanti banakama nukama ꞌaxunia, ꞌimainun ka ax nukaman ꞌapu ꞌikën, usa ꞌixun ka an nu ië́miti ꞌikën. Axa numi nishkë unikaman atun nunti anun tëkërëkakë itsikaman ka churukukë ꞌixun ami tëkërëkakë i a tuinima, usa ꞌain ka ami tëkërëkakë chupa ax pënimëtima. Usai ꞌikëbëtan kananuna numi nishkë unikaman atun ñu kupíkë bikuanti ꞌain, bimainun ka bëxuñu unikama ꞌimainun aín taëmi ñukë unikamanribi atun ñu kamabi atima onan numi nishkë unikaman ñu bikuanti ꞌikën.

²⁴ Usa ꞌain ka anu ꞌikë unikama: “Kana ꞌinsían kitima ꞌikën.” Diosan ka Jerusalénnu ꞌikë unikama ꞌimainun Judá menu tsókë unikama atun ꞌuchakama mëníoxunti ꞌikën.