Isaías 32 - Kashibo-Kakataibo Biblia

ꞌApun asérabi ꞌakin upiokin ñu ꞌati bana

¹ Ësai ka Isaías kiakëxa: anu ka achúshi ꞌapu an upíokin ñu ꞌakë ꞌiti ꞌikën, ꞌimainun ka an bana mëníokë bëtsi ꞌapukama atúnribi upíokin ñu ꞌati ꞌikën.

² Usa ꞌaish ka atu achúshi achúshinëx suñu bëki nëtë masá kuatsinkëbë ñumi katamëkë usaribi ꞌiti ꞌikën, ꞌianan ka xëxá ꞌumpax shióbukian me ëskikë chabóti ꞌakë ain baí usaribi, ꞌianan anu uni ꞌikëma menua mapara chaiira an tupë́onkë ꞌain barin xarokëx ami katamëkë usaribi ꞌikanti ꞌikën.

³ An ka uisakin kara ñu ꞌati ꞌikë, kixun pain ꞌunánkë ꞌiti ꞌikën, ꞌianan ka aín unikaman banaia bëmë́kin kuati ꞌikën,

⁴ usa ꞌain ka an kuëënkësokin ñu ꞌakinma, uisa ñux kara a ꞌaisa upí ñu ꞌikë a isanan ñu ꞌaisama isi kuni ka banati ꞌikën.

⁵ Usa ꞌain ka uni mënin sinan ñukakama ax bëtsi unin istisama tankëma ꞌikë kixun kakëma ꞌiti ꞌikën, ꞌianan ka an rabinkima ñu ꞌashikë uni axribi unin usa ka a uni ꞌikë kixun kakëma ꞌiti ꞌikën.

⁶ Usa ꞌain ka unin ꞌatimati tsotia timakin istisama tankë uni ax ꞌatima ñu ꞌatishi banaia; usai ꞌikin ka ñu ꞌatima ꞌati sinánkin uisakin kara ñu ꞌatimaira ꞌakin a tanti bana kikësokin ꞌakinma bëtsi uni ꞌati ꞌikë kixun baria, usai ꞌi ka Nukën ꞌIbu ñui këmëi ꞌatimati banaia; usa ꞌixun ka axa ꞌakëñuma nikë unikama abi pananx a isi kuaniabi pimima, ꞌianan ka shimakë unikama aribi xëamima.

⁷ ꞌImainun ka rabinkima an ñu ꞌashikë uni an uisakin ñu ꞌati kara ꞌunánkë ꞌixun; uisakin kara uni paránti ꞌikë kixun sinánkin, ꞌatimakin unin ñuiti ñuishi ꞌaia; ꞌanan ka uni ñuñumakama a këmëkin ñu ꞌatima inúnun paránia, ꞌanan an ñu kuëënkin bisatankë akamaribi ñu ꞌupiokin ꞌaxúnun kakëxunbi ꞌatima okin paránia.

⁸ Usa ꞌaínbi ka upí uni an upiokin, sinánkin bëtsiokin sinántëkënkima an sinánkësabi okin ñu ꞌaia.

Diosan xanukama tëmëramixunbi ꞌakintëkënti ñuikë bana

⁹ Xanukama a ñubi ꞌati sinanima bukukë mitsun, kamina ësokin ꞌën mitsu kakëxun kuati ꞌain. Xanukama axa ñu ꞌaíma bukukë mitsun kamina ꞌën bana kuati ꞌain.

¹⁰ Bërí kamina mitsux asábi ꞌikanin, ꞌaínbi kamina ënuax achúshi baritia ꞌikëbë rakuë́tan bamakanti ꞌain, usai ka a bitëkënti ñu ꞌapákë aín bimi ꞌaíma ꞌianan uvas ꞌaíma ꞌain ꞌiti ꞌikën.

¹¹ Xanukama añu ñubi ꞌati sinánkëma, mikamax kamina rakuë́ti bërëti ꞌain; mitsux kamina uisa ñubi kana ꞌinútima ꞌai kiax kin, usa ꞌain kamina rakuë́ti ꞌain, mitsunribi kamina ami pañukankë chupa pëtankëxun chupa xëni masá nuitukin ꞌakësa ꞌinun pañukanti ꞌain.

¹² Usai ꞌi kamina ka masá nuitutia kixun ꞌunánun, shitinki anu ñu ꞌapákëxa ꞌitsaira tuákë anuax ꞌianan, anu uvas ꞌapákë naëkama anu kuaibë nianan aín inkëbë niti ꞌikën.

¹³ Usai ꞌimainun ka anu ꞌëx ꞌikë menua ꞌikë ꞌën ëmanu xubi muxañu ꞌimainun me ꞌatima ꞌiti ꞌikën, usai ꞌikëbë ka anuaxa unikama kuëënkë xubu ëmanu ꞌikë anuribi muxa kóti ꞌikën.

¹⁴ ꞌImainun ka ꞌapun xubu akama ënkë ꞌiti ꞌikën; ꞌimainun ka ëma anuax chikíkin upíokin kënëarakë anua uni ꞌitsaira ꞌikë aribi ashikin ënkanti ꞌikën, usakin ënkë ꞌain ka pasto koia pi burro raëkëma, ꞌimainun vaca akamax anu bukuti ꞌikën.

¹⁵ ꞌAínbi ka Nukën ꞌIbu kamabi kushiñu an ñu unio an amiribishi nukama ꞌakintëkënti ꞌikën, usakin ꞌakin ka me ënkëxa anu ñu ꞌapátisama ꞌikëbi anu ñu ꞌapátisa ꞌimitëkënti ꞌikën, usakin ꞌakëx ka a me anu unin ñu ꞌapátisabi upíira ꞌiti ꞌikën.

¹⁶ Usa ꞌain ka kamabi menu ꞌikë unikamax añu ñux kara upí ꞌikë ashi ꞌai bukukanti ꞌikën.

¹⁷ Usai ika uisaibi ꞌima añu kara upí ꞌikë ashi ꞌai, uínbi ubíokëma xënibua ꞌaínbi bukukannun ꞌimiti ꞌikën.

¹⁸ Usa ꞌain ka ꞌën, unikamax uínbi ubíokëma, upitax upiokin ꞌakë atun xubunu bukukanti ꞌikën,

¹⁹ ꞌianan ka nikama unin tëapakin këñúkëbëbi ëmanu ꞌikë unikama rabinkë bërútima ꞌikën.

²⁰ Usai ꞌi kamina mitsux chuámarua tsókanti ꞌain, mitsun ñu ꞌapákëa ꞌumpaxan chabókëbë ꞌianan, ka mitsun burro ꞌimainun vaca bënëkaman piti pasto ꞌitsaira ꞌiti ꞌikën.