Isaías 30 - Kashibo-Kakataibo Biblia

An Egiptonu ꞌikë unikaman ꞌakinun kixun barikë unikama ñui kikë bana

¹ Ësai ka Nukën ꞌIbu asérabi kiakëxa: “¡Uisai kara mitsun bakë bëchikë bëbu ꞌimainun ꞌini xanukama atun kakëxun ꞌën bana kuaisama tania, usa ꞌixun atun ꞌëbë banaxunmabi ñu ꞌakatsi kixun atúnbi sinania, sinánkin ka usakin kananuna ñu ꞌati ꞌai kixun ꞌën sinánmikëxunmabi atúnbi sinánxun ꞌaia, usakin ꞌai ka atúxbi amiribi amiribi ꞌuchakania!

² Usai ꞌika bënë́kiani Egipto menu ꞌikë ꞌapu faraón an isa bërúankin ꞌakinun kixun ñukati kuania, ꞌaínbi ka atun ꞌë pain ñukátima; an isa ꞌakinun kixun ꞌapu faraón ñukati kuania, usai ꞌika Egiptonu ꞌikë unikamami atun isa ꞌakinun kiax ami katamëtia.

³ ꞌAínbi ka faraónën ꞌakinkë ax paránkinshia ꞌakë ꞌikën, usai Egiptonu ꞌikë unikamami katamëtibi ka atux rabinkë bërúti ꞌikën.

⁴ Mitsun kamina an bana ñuiti unikama Soán kakë ꞌimainun Hanés kakë ëmakama anu ꞌikë ꞌapu abë banati xuan, a kamina ka Egipto menu ꞌikë ëma anu an mitsu ꞌakinti bariti xuan,

⁵ ꞌaínbi ka a menu ꞌikë unikama ñu ꞌunánkëma ꞌixun mitsu paránkë ꞌiti ꞌikën, usa ꞌain ka mitsun bikë ñukama anbi mitsu ꞌakintima ꞌikën, usa ꞌain ka atúan mitsu ꞌakinkëxbi ꞌakinkëmasa ꞌiti ꞌikën, usokin ꞌakëx kamina paránkë bërúkanti ꞌain.”

⁶ Bërí kana ñuinakama Négueb menu ꞌikë akama ñui kin: a mex ꞌatimaira ꞌain ka anu paru ꞌinúankama axa kuëëkë, ꞌimainun runukama ꞌianan kapë́sa ñuina taëñu axa nuánkë akama ꞌikën. Burro ꞌimainun camello kaxunu puruxun ka ñu kupíkë Egipto me anua upa unikama ꞌikë anu buánti ꞌikën,

⁷ ꞌimainun ka a unikama ami katamëtia uni ꞌakinsa ꞌaishi ꞌakianainsama ꞌikën. Usa ꞌikë kana ësokin anëan: “Ñuina chaiira kuëëkinbi añu ñubi ꞌakëma kakin anëan.”

⁸ Usa ꞌain ka Diosan Isaías kakëxa, bërí kamina i parókin ꞌakë bitankëxun, xënibua ꞌaínbi a ñuitiokin ënë bana kuënëoti ꞌain, usakin ꞌa ꞌikë ka xënibua ꞌaínbi unin a sinánkin ñuikanti ꞌikën.

⁹ Ënë unikamax ka bana kuaisama tankë unibu ꞌikën, usa ꞌixun ka ꞌën bana kuaisama tania, usa ꞌain ka ꞌën ꞌunánmikë banakama kuaisama tani ꞌëmi sinanima.

¹⁰ Usa ꞌixun ka an Dios kikë bana ñuikë unikama kaia: “Namákësa okin kamina istima ꞌain.” Kanan ka an bana uni ñuixunkë unikama kaia: “Nukama kamina mitsun mi asérabi iskë ñukama ñuixuntima ꞌain; nu kamina an ꞌatima okin sinánmitima upí bana kati ꞌain; ꞌianan kamina nun ꞌaisa tankin sinánkë banakama nu ëmitima ꞌain.

¹¹ Mitsun ꞌakë ñu ꞌatimakama kamina ëntima ꞌain kixun, kakin kamina nun ꞌakë ñu ꞌatimakama ëni upiti tsónun nu katima ꞌain, usakin ꞌanan kamina Israel unikaman Dios ꞌupíira a ñuikin nu katima ꞌain.”

¹² Usa ꞌain ka Israel unikaman Dios upíira ax ësai kia: “Mitsun kamina usai ꞌiaxma ꞌinun kakë bana a kuaisama tanan, bënë́kinshi ñu ꞌatima ꞌanan, ñu ꞌatimaira ꞌai ami katamëkanin;

¹³ usa ꞌain ka ax mitsun ꞌuchabi ꞌikën. Ax ka anun ëma kënëarakë kënë manainra axa tënki tënkibuti ꞌitankëx unin sinánkë ꞌaímabi rurukubukë usaribi ꞌikën;

¹⁴ ꞌianan ka mapú ꞌakë ñutë axa pakëti sarimëti, ami chimapu bisama ꞌianan anun ꞌumpax kininua, bisamabi aín tukibukë usaribi ꞌinun masókë ꞌiti ꞌikën.”

¹⁵ Usa ꞌain ka Israelkaman ꞌIbu upíira ax ësai kia: “ꞌËn bana kikësokin ꞌatëkëni kamina mitsux uínbi ubíokëma upiti bukui ië́kë ꞌiti ꞌain. Usa ꞌain kamina uínbi ubiokëma bukui ꞌëmi katamëti kushiñu ꞌikanti ꞌain.” ꞌAínbi kamina mitsun ꞌën kakëxunbi kuëënkáma ꞌain,

¹⁶ kuëënima ka kikankëxa: “Usama ka caballonu ꞌirukiani kananuna abáti kuanti ꞌain.” Usai ꞌi nukamax abákë ax ka asábi ꞌiti ꞌikën. ꞌImainun kamina ësairibi kikankën: “Ishtuinshia kuankë caballonën nirinkë anu këñurukiani kananuna abati kuanti ꞌain.” Axa numi nishkë unikaman kuni ka bënëtishi niti ꞌunanxun nukama nuiti ꞌikën.

¹⁷ Usa ꞌain ka mil uni ax achúshi unían ꞌakatsi kixun kakëx abáti ꞌikën, ꞌimainun kamina kamabi mitsux mapai achúshi uni axa mitsumi nishkë an ꞌanuxun kakëx, ꞌitsamara tikitamainun abákanti ꞌain, usai ꞌi kamina achúshi i aín bashi rëbunu nikë usaribi ꞌianan, a istia unin ꞌunántiokin bashi tësapanu nitsínkë usaribi ꞌiti ꞌain.

¹⁸ ꞌAínbi ka Nukën ꞌIbu an upiokin ñu ꞌakë ꞌixun mitsumi sinania, usa ꞌixun ka an kamabi ñu upiokin mitsu nuibakin ꞌaia; an ka ax nuibanankëira ꞌikë kixun mitsun ꞌitsaira ꞌunánti kuëënia, Nukën ꞌIbu an ka ax xëshi Dios ꞌixun ñukama upiokin ꞌaia. ¡Usa ꞌain ka ami katamëtia ꞌakinti kuëënkë unikama kuëëinra kuëënti ꞌikën!