Isaías 28 - Kashibo-Kakataibo Biblia

Samaria ëmanu tsókë Israel unikama ꞌiti ñuikë bana

¹ ¡Uisai kara Samarianu ꞌikë unikama bëtsi unikaman, atux isa upí uni ꞌikë kixun kakë axa ëma chaiira Efraín kakin anëkë anu tsókë paë́ntinën kuëëirabu uni atux ꞌiti ꞌikën; ꞌaínbi ka Samaria ëma ax me sapan upíira anu ꞌikën, usa ꞌaish ka ñu ua buinarakin mañutinu ꞌakëxbia bënëtishi núkai chushikë usa ꞌikën, usa ꞌixun ka anu ꞌikë unikaman paë bata ꞌaxun xëai paë́nkë a ënima!

² Ësokin mitsu kamainun kamina kuati ꞌain: Nun ꞌIbun kaískë achúshi uni kushiira ka anu ꞌikën, ax ka matsi bëruñunëxa masákuatsinkë usaribi ꞌikën, ꞌianan ka nëtë masákuatsinkëbë ukian suñuanën ñu masókë usaribi ꞌianan, nëtë́timaira uñe ꞌibúkian me mapukë usaribi ꞌiti ꞌikën. Usa ꞌixun ka ꞌain mëkënan menu nipakëisokin ꞌanan,

³ ꞌain taëkaman chakánan, axa rabiakati nux kananuna usa ꞌai kiax ñu paë xëatankëx kikë a ëmanu tsókë, Efraínën rëbúnkikama a ꞌati ꞌikën.

⁴ Usakin ꞌakëx ka a ëmanua ꞌikë unikama anuaxa ñu upiti tuákë menu ꞌikësa ꞌianan, ro ua upíira ꞌinun ꞌapákëxia núkakësa usai ꞌitánun ꞌanan, higo ax pain bimiax pëkë́kë unin mërakin mëkënan bixun: bënë́kinshi pikë usaribi okinshi ꞌati ꞌikën.

⁵ A nëtë ꞌikëbë ka Nun ꞌIbu kamabi kushiñuira ax, achúshi mañuti ichúkësamaira ꞌianan, achúshi ñu ꞌupiokin ꞌakë usaribi axa tsókë aín unikama ainan ꞌiti ꞌikën,

⁶ usa ꞌain ka Diosan an bana mëníokë ꞌapukaman, anuxun bana mëníokë anuxun asérabi ꞌupiokin ꞌakian suntárukaman, ꞌain ëma bërúanun atun bana mëníokë anuxun kati ꞌikën.

Jerusalénnu ꞌikë unikama ꞌati kianan usokin ñu ꞌaxunkatsi kia bana

⁷ ꞌImainun ka raíri unikamaxribi uvas baka vino ꞌakë xëatankëx amá aman kuani nitsia, ꞌimainun ka sacerdote unikama ꞌianan an Dios kikë bana ñuikë unikama atúxribi paë bata kushi a xëatankëx amá aman kuani nitsi kushiñumasa ꞌaish sinanima ꞌatimati banaia; ꞌianan ka namákësokian Diosan ismikëxbi amá aman kuani nikësai ꞌia, ꞌianan ka paën irakë ꞌixun uisakin kara bana mëníoti ꞌikë kixunbi ꞌunanima.

⁸ Usakia anuxun xëakë mesa ax ka ami kinankë ꞌaish, a isi kuínsakë chuaira ꞌikën, usa ꞌain ka anuxua usakin ꞌakankë anu achúshi ñu chuáñumama ꞌaíma ꞌikën.

⁹ ꞌIanan ka ꞌëmi kuai ësai kikania: “¡Nukama bana ꞌunami ka uti ꞌikën, ꞌimainun ka uisakin kara Diosan ismiaxa aribi nukama ꞌunamiti ꞌikën! ¡Nuxnu tuá xu bërí kanikënën,

¹⁰ kirika ꞌati ꞌunánkin ba, be, bi, bo, bu kakin ꞌunánkësaribi okin!”

¹¹ Asabi ka mitsunmi bana kuaisama tania, ka Diosan bëtsi banan banakin kuaisama ꞌitánun ënë unikama kati ꞌikën.

¹² Ësai ka bërámabi ax kiakëxa: “Ënu ka anu upiti tsóti ꞌikën, ënëx ka anu upiti tantiti ꞌikën; uix kara atsanxa ax ka tantiti ꞌikën.” ꞌAínbi ka ax kikësokin ꞌën bana kuakama ꞌikën.

¹³ Usa ꞌain ka Nukën ꞌIbun tuá xurakama bërí kirika ꞌati ꞌunánkë kakësokin kati ꞌikën. Usai ꞌika bërí niti ꞌunani tuáxura kuaníbi kaxutan pakëkësa usaribi, ꞌianan anun ñu biti nankë anu pakëtia ñu bikësa usaribi ꞌiti ꞌikën, usai ꞌika anuax chikítima ꞌikën.

¹⁴ Mitsux ꞌapu ꞌixun kamina Nun Ibu bana kuati ꞌain, bana kuakëma unibu, mitsux kamina Jerusalénnu ꞌikë unikaman ꞌapu ꞌain.

¹⁵ Mitsux kamina ësai kin: “Nukamax kananuna bamati abë achúshi ñu ꞌai mënion, usa ꞌain kananuna uisa ñu kara ꞌikëbëbi bamatima ꞌain. Usai ꞌia ka ñu ꞌaisama ꞌinúkë anbi nu ꞌaisama otima ꞌikën, nun kananuna këmëkë an nu ꞌakinun kixun barian, ꞌimainun kananuna bëtsi paránkë anribia nu bërúanun kixun baria.”

¹⁶ Usa ꞌain ka ësai Nun ꞌIbu kiaxa: ꞌËn kana Sión kakë ëmanu achúi maxax nanti ꞌain, ax ka achúshi maxax kupíirakë ꞌikën, ax ka achúshi maxax ami birukin xubu ꞌati nankë usaribi ꞌiti ꞌikën. Usa ꞌain ka uix kara ami katamëtia ax chuámarua tsóti ꞌikën.

¹⁷ ꞌËn kana xubu ꞌakënu a unían, anun xubu ꞌakin sënën ꞌitánun tupunkë manë tumua risiñu usaribi ꞌën ꞌakë ñukama ax upí ꞌinun ꞌimiti ain, ꞌimainun anun xubu puntëkin mëníoti usaribi ka uin kara upí ñu ꞌaia ax ꞌiti ꞌikën. Mitsun mi këmëi banai ismina uisa ñubi ꞌinútima ꞌai kixun sinánkë, a ka matsin titan masókin këñuti ꞌikën, ꞌimainun ka ami katamëtimi bukúnkë aribi bakan chinanti ꞌikën.