Isaías 2 - Kashibo-Kakataibo Biblia

Diosan ka kamabi menuaxa uni ꞌakananima upitax bukunun ꞌimiti ꞌikën

¹ Ënëx ka usai ka Judá ꞌimainun Jerusalén ꞌinuxun ꞌaia kixun, Amósnën bëchikë Isaías a namákësa okin Diosan ká ꞌikën:

² Nëtë xënibukëbë ka anúan ꞌiti nëtë ꞌikëbë anua Diosan xubu ꞌikë bashi ax bëtsi bashikamasamaira ꞌinuxun ꞌaia. Usa ꞌain ka a bashixa bëtsi bashikamasama ꞌain bëtsi menu ꞌikë kamabi unikamax anu uti ꞌikën;

³ usa ꞌain ka bëtsi bëtsi menu ꞌikë ꞌitsaira uni anu bëbai, bëtsibë bëtsibë kánani kikanti ꞌikën: “Diosan bashi anuxun a rabiti xubu ꞌakë anu kananuna kuaruti ꞌain, anu ka Jacobnën rëbúnki Israel unikama Dios anuxun rabiti xubu ax ꞌikën, anuxun ka uisai karanuna tsóti ꞌai kixun an nu ꞌunánmiti ꞌikën, ꞌunánmikëx kananuna ax kuëënkësabi oi tsóti ꞌain.” Usa ꞌain ka Jerusalénnuxun Diosanbi ꞌain bana nukama ꞌunánmiti ꞌikën.

⁴ Diosan ka bëtsi bëtsi menu ꞌikë unikama ꞌakanantëkënima upitax bukunun ꞌitsaira uni uinu kara tsotia anuabi ꞌimiti ꞌikën. Usakin ꞌimikëxun ka atun manë xëtokë anua ꞌakanankë a anun ñu mëëkin me anun naëti ꞌanan, aín paka pia akamaribi anun bimia ñu ꞌapákë tëakin biti taxuñu okin ꞌati ꞌikën. Usokin ꞌaxun ka uinu ꞌikë ëma kamanuxunbi bëtsibë ꞌakananuxun anúan ꞌakanankë a bitëkëntima ꞌikën. Usonan ka uisai ꞌakánanti kara kixun uínbi bëtsi ꞌunámitima ꞌikën.

⁵ ¡Usa ꞌain kamina ꞌën aintsi Israel unikama mitsun kuati ꞌain, Diosan nu ꞌunánmikësabi oi kananuna ami sinánishi tsóti achúshi tirítan nu pëkakësa ꞌinun añu karanuna ꞌati ꞌai kixun ꞌunánti ꞌain!