Isaías 11 - Kashibo-Kakataibo Biblia

Jesénën rëbúnkinuax ka an uni upiti bukunun ꞌakinti ꞌuti ꞌikë kixun ñuikë bana

¹ Ësai ka Dios kiakëxa, Jesénën rëbúnki achúshinuax ka i mo kótëkëni kanikë usaribi ꞌitánun achúshi uni mërati ꞌikën, usa ꞌi ka aín tapunuaxi kookësa ꞌi mërati ka ax ꞌapu ꞌiti ꞌikën.

² Usa ꞌain ka Diosan kushi ax ënima a unibëbi ꞌiti ꞌikën, an ka ñu ꞌunánkëira ꞌianan sinánñuira ꞌinun ꞌimianan, usa ka kixun bëtsi ꞌësëanan ñu ꞌaisatankinbi tënëi kushiñu ꞌianan, Diosmi uisa ñukama kara ꞌatima ꞌikë kixun, ꞌunáni rakuënun unikama ꞌunánmiti ꞌikën.

³ An ka ñu iskinshi uisa kara oti ꞌikë kixun aín kuëënkësa okinshi ꞌanan, ax ka usai ꞌiaxa, kixun unin ñuikë bana a kuakinshi usa ka ꞌiti ꞌikë kixun katima ꞌikën.

⁴ An ka an ꞌakinti ꞌaíma ꞌaia tëmërakë unikama ꞌimainun uni ñuñumakama atun menu ꞌikë akama ꞌakinti ꞌikën. Usa ꞌain ka aín banax achúshi tatsi tuínxun anun bënë́kinshi ñu ꞌakë unikama tëmëramikë usaribi ꞌiti ꞌikën, ꞌimainun ka aín kuëbitan xunkakësa okinshi ꞌatima ñuishi ꞌakë unikama këñunun ꞌimiti ꞌikën.

⁵ Ax ka unían ënkinma aín chupa pañukësa usaribi okin upíokin ñu ꞌai asérabi banati ꞌikën.

⁶ Usa ꞌain ka shórapana ꞌimainun ovejakama ax upitax bukuti ꞌikën, usai ꞌimainun ka ꞌinu ꞌimainun cabra tuá akamax bëtsibëbi tantiti ꞌikën, ꞌimainun ka vaca bakë bërí kanikë ꞌimainun paru ꞌinúan axribi bëtsi rapasu nitsi kaniti ꞌikën, usai ꞌi ka tuá xuratsukun buánkëx kuanshiti ꞌikën.

⁷ ꞌImainun ka vaca xanu ꞌianan, xaëón aín xanu axribi ꞌunánankë ꞌiti ꞌikën, ꞌimainun ka aín tuákama axribi bëtsibë timë́ax tanti bukuti ꞌikën. Paru ꞌinuánën ka vacan ꞌakësaribi okin pasto piti ꞌikën.

⁸ Achúshi tuakëx ka runu nëëira menu ꞌikë abë kuaiti ꞌikën, usai ꞌikin ka runu aín paë mukaira ꞌain nánu ꞌain mëkën atsímiti ꞌikën.

⁹ Kamabi ꞌën bashi upíira anu ka: an uinu ꞌikë unibi ꞌatima oti ꞌaíma ꞌiti ꞌikën, usa ꞌain ka parúmpapanua ꞌumpax buákirukësa usai ꞌia kamabi unin usakia Diosan ꞌa ñukama kuati ꞌikën, kiax ka kiakëxa.