Isaías 1 - Kashibo-Kakataibo Biblia

Judá menu tsókë Israel unikama ꞌucha bana

¹ Amósnën bakë bëchikë Isaías an ka namákësokin uisai kara Judá ꞌimainun Jerusalén ꞌinuxun ꞌaia kixun, ënë ꞌapukama ꞌain Diosan ismikëxun isakëxa, akamax ka ꞌiakëxa, ꞌapu Ozías, Jotam, Ahaz ꞌimainun Ezequías ënëkamax ka Judá menu bëtsix bëtsix ꞌiax chikikëbë ꞌapu ꞌiakëxa.

² Kamabi ñu axa naínu ꞌikë ꞌimainun menu ꞌikë an ka Nukën ꞌIbu Dios ax ka ësai kiaxa kuati ꞌikën: “ꞌËn kana ꞌën bakë bëchikë bëbukama ꞌimainun xanukama chatanun kanioruakën, ꞌaínbi ka atux ꞌën bana kuaisama tani ꞌëmi nishakëxa.

³ Vaca bënën ka aín ꞌibu ꞌunania, ꞌimainun ka burro bënën anuxua aín ꞌibun pimikë xubu ꞌunania; usa ꞌaínbi ka Israel unikaman ꞌën unibu ꞌixunbi an unio ꞌikëbi ꞌë ꞌunánima ꞌianan ꞌën kakëxunbi bana kuaisama tania.”

⁴ ¡Usa ꞌain ka atux kamaxi ꞌuchakanxa ꞌianan ka a unikaman ꞌitsaira ꞌatima ñuishi ꞌaia, atun chaitiokëkamaxribi ꞌatima ñuishi ꞌakë unibu ꞌia ꞌain ka atun ꞌaisa tankë ñu ꞌatimashi ꞌakania! Usa ꞌain ka aín ꞌIbu ꞌikëbi ꞌë ënkanxa ꞌëx kana Israel unikaman Dios upíira a ꞌain, usa ꞌikëbi ka ꞌën bana kuaisama tankin ꞌë manuaxa.

⁵ Mitsux kamina uisaxun ñu ꞌatima ꞌati kara kixun sinani kushi kananin, usa ꞌain ka mitsun nami anu ꞌatima oti ꞌaíma ꞌikën. Usa ꞌain ka aín maxkánuribi ankëti chankukë ꞌaish, an ꞌimikëx kushiñuma ꞌikën.

⁶ Taë rëbumiaxi ka mitsun maxkánubi bërúti chamarabi mitsun nami asábi ꞌaíma ꞌikën; kamabi namix ka chankui ꞌuákë ꞌianan; tëakin chakakësa ꞌianan, nami këñui kutankëx anuax tanpëkësa ꞌikën; usa ꞌikë ka uínbi ronkin chupa sanin rabunkëma ꞌikën, ꞌianan ka uínbi aín paë bachubuti tantitanun xënin síkakëma ꞌikën.

⁷ Usa ꞌain ka atun mekamax ꞌatima okë ꞌaish anu uni ꞌikëma mesa bëruaxa, ꞌimainun ka atun ëma kamaxribi anu rëkirukin tsin në́nkë ꞌikën. Mitsun ꞌismainunbi ka axa mitsumi nishkë unikaman mitsun ꞌapákë ñukama bixun piaxa. Usakia ꞌakëbë ka kamabi mekamax anu uni ꞌikëma mesaribi ꞌi, Sodoma ëmaxa këñukëx ꞌia usaribiti ꞌiaxa.

⁸ Usakin ꞌakëbë ka Jerusalén ëma axëshi bëruaxa, usa ꞌaish ka anu uvas ꞌapákë naë nëbëtsi ꞌuta ꞌakësashi ꞌikën, ꞌianan ka aín tuá piti melonar kakë ñu ꞌapáxun nëbëtsi xaban xabanbu ꞌinun kënëkë usaribi ꞌikën, ꞌianan ka a ëmax ami nishkë unikamainshi bëarabuinkë ꞌikën.

⁹ Nukën ꞌIbu Dios ax kamabi kushiñu ꞌixun ka nun chaitiokëkama ië́miama ꞌain sapi kananuna, nukamax bëríbi Sodoma ꞌimainun Gomorra ꞌiásai ꞌaíma ꞌitánun këñúkë ꞌitsían.

Uisakin kara asérabi Dios rabiti ꞌikë kikë bana

¹⁰ ꞌApukama Sodomanu ꞌiása mitsun kamina ësaia Dios kikë aín bana kuati ꞌain; ꞌimainun Gomorranu ꞌia unikamasa mitsunribi kamina ꞌupiokin nun Diosan bana bëmë́kin kuati ꞌain, nukaman Diosan ka mitsu ꞌunánmisa tania.

¹¹ Ësai ka Dios kiaxa: “¿Uisa kupín kaina mitsun ꞌaisamaira ñuina rëxun ꞌë xaroxunin? ꞌËx kana ꞌaisamaira carnero rëxun ꞌaímai këñutanun kixun xarokankë a isi anun atsan, ꞌimainun kana vaca bërí kanikëkama aín xëni abi kuëënima; ꞌianan kana vaca ꞌain bënëkama ꞌianan carnerokama ꞌimainun cabra bërí kanikëkama aín imi bikë akamabi kuëëniman.

¹² Mitsux kamina ꞌëbë banai ënu ꞌain, ꞌaínbi kara ¿uin anuxun ꞌë rabiti xubu ëman me mëníokë a chua oimi rikianun mitsu kax?

¹³ ꞌË nanxuinshikatsi kixun mitsun ꞌaisamaira ñu bëkankë ax ka ñankáishibimi bëkankë ꞌikën; usa ꞌain kana a ñukama xarokëxa kuínkë aín kuin a xëisama tanin. Mitsun kamina unikama ꞌuxë ió ꞌikëbëtan ꞌanan anun ñu mëëtima nëtë ꞌikë anun kuëënin, ꞌaínbi kana ꞌën an ñu ꞌatima ꞌakë unikaman usakin fiesta ꞌakin ñu ꞌatima ꞌakë a kuëënima.

¹⁴ ꞌUxë ió ꞌikëbëtan fiesta ꞌakë ꞌimainun ñu ꞌatima ꞌakë unikamax timëkankë a kana ꞌën istisama tanin; ¡ꞌianan kana usakia ꞌakë ñukama a iskin ꞌatimakin sinanin!

¹⁵ Uínsaran kaina ꞌë ñukákin manámi okin mëkën birui ëbë banain, anunbi kana ꞌën usakin ꞌaia mitsu istisama tani ꞌamo kuainakëtin; ꞌimainun kana ꞌitsaira ëbë banakin ñukákëxunbi, ꞌën a banakama kuatima. Mitsun mëkënkama ax ka anun uni ꞌakë ꞌaish imin mëshikikësa ꞌikën.

¹⁶ ¡Mitsúnmi ꞌuchakin ꞌakë ñukama a ëni kamina mëníokakanti ꞌain! ¡Mitsúnmi ꞌakë ꞌatima ñukama a kamina, ꞌën istisabi okin ënti ꞌain! ¡ꞌAisama ñumi ꞌakankë akamina ënkanti ꞌain!

¹⁷ ¡Ñu ꞌupíshi ꞌati kamina ꞌunánkanti ꞌain, ꞌianan kamina abi sinani kushikin ñu ꞌupíshi ꞌanan, bëtsi unikaman ꞌatimoiabi bëtsi ꞌakinti ꞌain, ꞌakianan kamina ꞌibuñumakë tuákama aturibi ꞌakinti ꞌain, ꞌanan kamina kasunamëkë xanu bëtsi unin ꞌatima oiabi anun rabanan në́kin ꞌakinti ꞌain!”

¹⁸ Ësai ka Dios kiaxa: “Bërí kamina uisai kaina ꞌikanti ꞌai kiax ënë bana mëníonanti timë́ti ꞌuti ꞌain: Mitsun ꞌuchakamaxa uvas baka chininkë chëxëira iskësa ꞌikëbi kana, axa matsi irukë uxuira uxu iskësa ꞌitánun mitsu mëníoxunti ꞌain; atun ꞌuchakamaxa chupa bëtsi bëtsi ñun pukukë iskësaribi ꞌikëbi kana, ꞌën xapu uxuira uxu iskësa ꞌitánun mëníokin tërënxunti ꞌain.

¹⁹ Mitsun ꞌën bana kikësabiokin ꞌati kuëënkin ꞌën bana tankin, kamina menu ꞌapákëxua upíokin tuaia ꞌain bimi bixun piti ꞌain;

²⁰ ꞌaínbi kamina abi ñunshinakëkin kakëxunbi ñu ꞌakani, an mitsu ꞌakinti ꞌaíma ꞌain ꞌakanankënuax bamakanti ꞌain.” “Usakin mitsu kanun ka Diosanbi ꞌë kaxa.”

Diosan ka an ñu ꞌupima ꞌatishi kuëënkë Jerusalén ëmanu ꞌikë unikama ꞌatima oti kixun ñuia bana

²¹ ¡Jerusalén ëmanu ꞌikë unikamax ka upiti buküakëxa, ꞌaínbi ka bërí bëtsi bëtsi unibë ꞌikë xanusa ꞌikën! Bëráma kamina mitsux upiti tsókin upíokin ñu ꞌakë ꞌiakën, ꞌanan kamina upiti tsóakën, ꞌaínbi kamina bërí an uni ꞌakë unikamasaribi ꞌikanin.

²² Bëráma kamina manë uxua ꞌakë kuríkisa ꞌikankën, usa ꞌia ꞌaibi kamina ñu puti bukúnkësa bërí ꞌain. Bëráma kamina uvas baka vino ꞌakësa ꞌikankën, usa ꞌia ꞌaibi kamina bërí uvas baka ꞌumpaxkë usaribi ꞌikanin.

²³ Mitsun ꞌapukamax ka bana kuakëma ꞌianan, an unin ñu bainu bëaraxun mëkamakë unikamabë ꞌunánankë ꞌikën. Usa ꞌixun ka akaman kuríkinën kupíokëxun an ñu ꞌupima ꞌakëma unibi ꞌatima ñu isa ꞌaxa kixun kanan ñu ꞌinainshiti akamaribi baria. ꞌIanan ka papañuma ꞌimainun titañuma tuákamaribi uisakin kara ꞌakinti ꞌikë usakin ꞌakinima ꞌianan, xanu kasunamëkë akamaribi tëmërai tsótiabi ꞌakinima.

²⁴ Usa ꞌain, ka kamabi kushiñu, Israel unikaman Dios ax asérabi kiakëxa: “¡Asá ka anuishi ka ꞌiti ꞌikën! ꞌËn kana axa ꞌëmi nishkë unikama aín ꞌakë ñukama iskin uisakin karana ꞌati ꞌai usakin ꞌati ꞌain. ꞌËn kana atun ꞌakë ñukama ꞌunánkin uisa karana oti ꞌai usakin ꞌati ꞌain.

²⁵ ꞌËn kana amiribishi mitsun ñu ꞌakëkama mëníoxunkin ñu puti bukúnxun në́nkë; usa ꞌitanun mitsun ꞌatima ñu ꞌakëkama upíira upí ꞌitánun mëníoti ꞌain.

²⁶ Usakin ꞌanan kana amiribishi an uisai kaina ꞌikani, usai ꞌia mëníoxunti akamaribi bërámami ꞌikan usaribitimi aña ꞌikanun mitsu ꞌimixunti ꞌain, ꞌanan kana an mitsu bana ñuixunkin ꞌësëti akamaribi bërámami ꞌikan usaribiti ꞌitëkënun ꞌimiti ꞌain. Usakin ꞌën ꞌan ka mitsu, rabi ësai kikanti ꞌikën, ëmanu tsókë unikaman ka upíokin bëtsi unikama ꞌakinia, ꞌianan ka a ëmanu tsókë unikama asérabi ñu ꞌakatsi kara kia usakinbi ñu ꞌaia.

²⁷ ꞌËn kana asérabi ꞌëx kikësabiokin an uni ië́mikë a ꞌain, usa ꞌixun kana Jerusalénnu tsókë unikama axa ꞌëmi sinántëkënkë akama ꞌiëmitëkënti ꞌain;

²⁸ ꞌaínbi kana an bana kuakëma unikama ꞌimainun ꞌuchañu unikama ꞌianan an ꞌën bana kuaisama tankë a unikama bamati ꞌikën.

²⁹ Usokin ꞌakëbë kamina anuxunmi mitsun dios rabikankë ñu ꞌapákë naëkama anu buküax kuëënkimi dios rabikankë anuax rabinkanti ꞌain.

³⁰ Mitsux kamina i aín pëchi ëskikë usaribi, ꞌianan naë anu ñu ꞌapákë ꞌumpaxñumasa ꞌain ëskikë usaribi ꞌinuxun ꞌain.

³¹ Uni aín kushibu mitsunu ꞌikë ax ka ñusmai basi chushikësa ꞌianan, an ꞌakë ñukamax a sinántëkëntisama ꞌitánun këñuti ꞌikën: Usakin ꞌakëx ka a rabëtaxbi a nëtënbi an bënánti ꞌaíma ꞌain rëkirui këñuti ꞌikën.”