Hechos 9 - Kashibo-Kakataibo Biblia

Sinanatia Saulo Jesúsmi catamëa (Hch. 22.6-16; 26.12-18)

¹ Usa ꞌain ca Saulo, axa Nucën ꞌIbu Jesúsmi catamëcë unicama cëñucatsi quiax, atumi xuamati nishacëxa. Nishquin ca sacerdotenën cushicaman ꞌapu anu cuanxun cacëxa:

² —Damasco ëmanuaxa ax Jesúsmi catamëcë unicama ꞌimainun xanucamaribi bixun nëaxun, Jerusalénu bënun camina quirica ꞌaxun ꞌë ꞌinánti ꞌain. ꞌInáncëxun cana Damasconu cuanxun anua judíos unicama timë́ti xubucamanu cuanquin atu bariti ꞌain.

³ Usaquin cacëxuan quirica ꞌináncëxun bibiani bain cuanxa, Damasco ëmanu bëbai cuaniabi ca naínuxun nëbë́tsioraquin pëcaquin bëtë́nancëxa.

⁴ Usoquian pëcacëx menu nipacëquin ca ësaía quia cuacëxa: —Saulo, Saulo, ¿uisati caramina ꞌë bëtsi bëtsi oin?

⁵ Ësai quia ca cacëxa: —¿Ui caramina ꞌain, Nucën ꞌIbu Dios sapi camina ꞌain. Cacëxun ca cacëxa: —ꞌËx cana Jesús, ami bëtsi bëtsi ocë, a ꞌain. Ami tatíqui chacati nishquin i tapun, taën ꞌaquinmi paë tancësa, usaribiti camina mibi ꞌin.

⁶ Usoquian cacëxun cuati ratúirai racuëti bërëruquin ca Saulonën cacëxa: —¿Añu ñu ꞌën ꞌati caina cuëënin? Cacëxun ca Jesusan cacëxa: —Niruquiani ca Damasco ëmanu cuantan. Anuxun ca unin añu caramina ꞌati ꞌain quixun mi cati ꞌicën.

⁷ Usai quia cuaquinbi a ñubi isíma ca Saulobë cuancë unicamax ratúiracëxa.

⁸ Ratúmainun menuax nirui bëpë́quiquinbi ca Saulonën iscasmacëxa. Iscasmatia ca abëa cuancë unicaman mëínbianquin Damasconu buáncëxa.

⁹ Buáncëxunbi ca rabë́ ꞌimainun achúshi nëtë bëxuñu ꞌixun pima ꞌianan xëama ꞌicën.

¹⁰ Usaía ꞌimainun ca Jesucristomi catamëcë uni achúshi, Ananías cacë, ax Damasconu ꞌiacëxa. Anu ꞌixun ca namáquin cuacësa oquin ësaquian Nucën ꞌIbu Jesusan cacëxun cuacëxa: —Ananías. Cacëxuinshi ca Ananíasnën cacëxa: —Ënu cana ꞌain.

¹¹ Cacëxun ca Nucën ꞌIbu Jesusan cacëxa: —Niruquiani camina bai, Tëntúñuma caquin anëcë, anu cuanti ꞌain. Cuanxun camina Judasnën xubunu cuanquin anu ꞌicë uni ñucáti ꞌain, Tarsonu ꞌicë uni Saulo cacë ax cara ënu ꞌicë quixun. Anuax ca Saulo Nucën Papa Diosbë banaia.

¹² Banaquin ca namáquin iscësoquin, uni achúshi, Ananías cacë, aín xubunu atsínquin a bëpë́xcunun quixun aín mëcënan ramëcëxun isaxa.

¹³ Usaquian cacëxun cuaquin ca Ananíasnën cacëxa: —Itsaira unin ca ꞌë caxa, a unin ca ꞌaisama ñu ꞌaquin, axa Jerusalénuax mimi catamëcë unicama bëtsi bëtsi oia quixun.

¹⁴ Usa ꞌixun ca axa minan ꞌaish mibë banacë unicama sipuanuxun buánun isa quirica ꞌaxunun quixun sacerdotenën cushicama caxa.

¹⁵ Cacëxunbi ca Nucën ꞌIbu Jesusan Ananías cacëxa: —Racuë́axma ca cuantan. ꞌËn caíscë ꞌixun ca a unin judíos unicamaishima, bëtsi mecamanu ꞌicë unicamaribi aín ꞌapucamacëñunbi ñuixunquin ꞌë ñuiquin bana ñuixunti ꞌicën.

¹⁶ Usoquin ꞌë ñuiquin bana ñuixunquin ca ꞌunánti ꞌicën, uisairai cara ꞌënan cupí tëmëraia quixun.

¹⁷ Usaquian Jesusan cacëx ca Ananías anua Saulo ꞌicë xubunu cuancëxa. Cuanx atsínxun ca aín mëcënan ramëquin Saulo cacëxa: —ꞌËn xucën Saulo, axa anúnmi ucë bainuax mibë banaëxancë, Nucën ꞌIbu Jesús, an ca minu unun ꞌë xuaxa, amiribishi istëcëananmi aín Bëru Ñumshin Upíñu ꞌinun.

¹⁸ Ësaquian Ananíasnën cacëbëshia aín bërunuax ñu xacá tínbu rëucucëbëtainshi ca Saulonën isacëxa. Usai ꞌi nirutancëx ca Saulo nashimicë ꞌiacëxa.

¹⁹ Nashimicë ꞌixun pitancëx amiribishi cushitëcëni ca axa Jesucristomi catamëcë unicamabë Damasconu pain ꞌiacëxa.

Saulonëan Damasconuxun bana ñuia

²⁰ Anu ꞌixun ca anua judíos unicama timë́ti xubucamanuxun, Jesús ax ca asérabi Nucën Papa Diosan Bëchicë ꞌicë quixun unicama ñuixuancëxa.

²¹ Usoquian Saulonën bana ñuixunia cuati ca unicama ratuti a ñui quiacëxa: —Ënë unix ca an Jerusalénuxun ami catamëquin a ië́minun Jesús ñucácë unicama tëmëramicë, a ꞌicën. Ax ca sacerdotenën cushicamanu buánuxun ënu ꞌicë unicamaribi bitsi uaxa. ¿Usa cat?

²² Quicancëbëtanbi ca Saulonën aín bana cushiira ꞌixun Damasconu ꞌicë unicama sináncasmamiquin —Jesús ax ca asérabi Cristo, axa ënë menu uti judíos unicaman caíncë a ꞌicë —quixun bana ñuixuancëxa.

Judíos unicama ami ꞌësë́nancëx Saulo cuan

²³ Usoquin atu bana ñuixunía ꞌitsa nëtë anu ꞌicëbë ca judíos unicama Saulo ꞌacatsi quiax ꞌësë́nancëxa.

²⁴ A ꞌacatsi quiáxa ꞌësë́nancania ñuia ca Saulonën cuacëxa. Usa ꞌain ca chiquitia ꞌanuxun nëtë́nbi ꞌanan imë́bi Damasconën cënë xëcuëcamanuxun bëaraquin caíancëxa.

²⁵ Caíncania ꞌunánquin ca axa Jesucristomi catamëcë unicaman Saulo, caquí chanu ꞌaruxun, cënë manámia ꞌicë xëcuën, imë́ nanpácancëxa. Nanpácëx ca ꞌibúquiani Saulo Jerusalénu cuancëxa.

Saulo Jerusalénu ꞌiá

²⁶ Cuanx bëbaxa atubë ꞌiisa tancëxbi ca axa Jesucristomi catamëcë unicamax Saulo isa Jesucristomi catamëcëma ꞌicë quixun sinani ami racuë́acëxa.

²⁷ Usa ꞌaínbi ca Bernabénën Saulo Jesusan aín bana ñuixunun caíscë unicamanu buáncëxa. Buánxun ca Saulo ismiquin ñuixunquin atu cacëxa: —Saulonën ca bainua Nucën ꞌIbu Jesús isaxa. Iscëx ca abë banaxa. Usaía banan ca ami catamëti aín uni ꞌixun Damasconu ꞌicë unicama, Jesús ca asérabi Cristo ꞌicë quixun ñuixuanxa.

²⁸ Usoquian Bernabénën cacëxun ca atubëa ꞌinun Saulo biacëxa. Bicëxun ca Jerusalénuxun Saulonën atubë niquin Nucën ꞌIbu Jesús ñuiquin unicama bana ñuixuancëxa.

²⁹ Ñuixunquin ca axa griego banan banacë judíos unicamabëribi bananan cuëbicananquin racuë́quinma —Jesús ax ca asérabi Cristo ꞌicë —quixun cacëxa. Usoquian cacëxun ca a ꞌacatsi quixun sináncancëxa.

³⁰ Usai quicania ꞌunánxun ca axa Jesucristomi catamëcë unicaman Saulo Cesárea ëmanu buánxun, Tarso ëmanua cuantánun xuacëxa.

³¹ Usa ꞌain ca Judea menu ꞌimainun Galilea menu ꞌimainun Samaria menuribi, axa Jesucristomi catamëcë unicama uínbi ubíocëma ꞌaish chuámarua bucüacëxa, usai ꞌi ca Jesucristomi catamëti ꞌitsarui cushiacëxa. Usaía ꞌicëbë ca raíri uniribi abë timëti Nucën ꞌIbu Diosan bana upí oquin cuati, aín Bëru Ñumshin Upitan ꞌaquincëx ꞌitsarui Jesúsmi sináncëxa.

Eneas pëxcúa

³² Usaía ꞌimainun ca Pedro bëtsi bëtsi ëmanu cuani Lida ëmanuribi axa Jesucristomi catamëcë unicama isi cuancëxa.

³³ A ëmanuxun ca uni achúshi, Eneas cacë, ñuá ꞌaish nirucuaínquinbi tancëma ꞌaísha ocho baritia aín anu ꞌuxtinubi racácë, a mëracëxa.

³⁴ Mëraquin ca Pedronën cacëxa: —Eneas, Jesucristonën ca mi pëxcuia. Ca nirut, niruxun ca min anu ꞌuxti mëníot. Cacëxëshi ca niruacëxa.

³⁵ Usai ꞌiáxa Eneas nitsia isi ca Lida ëma ꞌimainun Sarona menu ꞌicë unicama, usama ꞌaíshbi sinanati Nucën ꞌIbu Jesucristomi catamëacëxa.

Dorcas cacë xanu baísquia

³⁶ Jesucristomi sináncamainun ca Jope cacë ëmanu ꞌicë xanu achúshi Tabita, aín anë itsi Dorcas, anribia Nucën Papa Diosan bana cuacë, ax ꞌiacëxa. A xanun ca ñu upíshi ꞌaquin usabi ocë ꞌixun ñuñuma unicama ñu ꞌináncëxa.

³⁷ Usa ꞌain ca Tabita ax ꞌinsíanx bamacëxa. Bamacë nashimitancëxun ca xubu cata itsi manámi buánxun anu racáncancëxa.

³⁸ Jopenuaxa Tabita bamacëbëtan ca anu ꞌicë axa Jesucristomi catamëcë unicaman, Pedro ca Lidanu ꞌicë quixuan ñuicania cuacëxa. Usa ꞌain ca Lida ëma axa Jope ꞌurama ꞌain bënëtishia unúan Pedro catánun rabë́ uni xuacëxa.

³⁹ Xucëx cuanxuan cacëxëshi ca Pedro uni rabë́ abëbi Jopenu cuancëxa. Cuanx bëbaxa anu Dorcas racáncënu buáncancëx atsinia ca xanu casunamëcëcaman nëbë́tsioracëxa. Nëbë́tsiorati inquin ca ñutisama pan ꞌixúan Dorcasnën ꞌacë cutúncëñun chupacama Pedro ismiacëxa.

⁴⁰ Ismicëxun anu ꞌicë xanucama ëman chiquínun catancëx ca Pedro rantin purúanx tsóbuax Nucën Papa Diosbë banacëxa. Banatancëxun, anua racácë au bësuquin isquin ca cacëxa: —Tabita, ca nirut. Cacëxëshi bëpëquiquin Pedro isi nirui ca tsóracëacëxa.

⁴¹ Usariashi ca Pedronën mëínquin biruacëxa. Birutancëxun ca axa Jesucristomi catamëcë unicamacëñunbi casunamëcë xanucamaribi cuënxun axa baísquicë xanu atu ismiacëxa.

⁴² Usoquin ꞌacëa cuacoia ca camabi unin Jope ëmanuxun cuacëxa. Cuati ca ꞌitsa uni Nucën ꞌIbu Jesúsmi sinani ami catamëacëxa.

⁴³ Usotancëx ca Pedro ꞌitsa nëtën Jopenu, an ñuina xacá mëníoti ꞌunáncë uni, Simón cacë, aín xubunu ꞌiacëxa.