Hechos 6 - Kashibo-Kakataibo Biblia

An raíri ꞌaquinti mëcën achúshi ꞌimainun rabë́ uni caíscan

¹ Usomainun ca amiribi amiribi an Nucën Papa Diosan bana cuati unicamax ꞌitsacëxa. Griego banan banacë unicama ꞌimainun hebreo banan banacë judíos unicamaribi ca Jesucristomi catamëacëxa. Usa ꞌaish ca axa hebreo banan banacë unicama ñui ësai griego banan banacë unicamax quiacëxa: —Camabi nëtën piti mëtícaquinbi ca nun aintsi xanu casunamëcë a piti ꞌinanima.

² Ësai quia cuaquin ca Jesusan aín bana uni ñuixunun caíscë uni mëcën rabë́ ꞌimainun rabë́ an, axa Jesucristomi catamëcë unicama camicë́xa timëtia, cacëxa: —Nun Jesucristo ñuiquin Nucën Papa Diosan bana ñuixunquinma uni piti mëtícati ca upíma ꞌicën.

³ Usa ꞌain camina mitsun mëcën achúshi ꞌimainun rabë́ uni an piti mëtícanun caísti ꞌain. Aín sinan ca upí ꞌicë quixuan unin ꞌunáncë ꞌianan Nucën Papa Diosan Bëru Ñumshin Upitan upí oquin sinánmicë ꞌianan sinánñuira ca a unicama ꞌiti ꞌicën. Caístancëxun camina atúan uni piti mëtícanun cati ꞌain.

⁴ Usocëbëtan cananuna nun abë banaquin Nucën Papa Dios unicama ñucáxuanan aín bana ñuixunti ꞌain.

⁵ Ësoquian cacëx ca camáxbi cuëëni —cananuna caísti ꞌai —quiax canancëxa. Canantancëxun ca Esteban, Nucën Papa Diosmi catamëcë ꞌicëa aín Bëru Ñumshin Upitan sinánmicë, acëñun Felipe, Prócoro, Nicanor, Timón, Parmenas, ꞌimainun Nicolás, Antioquíanu ꞌicë uni ꞌixunbia an judíos unicamabëtan Nucën Papa Diosan bana ꞌunáncë, acama caísacëxa.

⁶ Caístancëxuan bëia ca Jesusan aín bana ñuixunun caíscë unicaman, mëcënan ramëquin, Nucën Papa Dios ñucáxuancëxa.

⁷ Usa ꞌain ca amiribi amiribia, Jesús ax ca asérabi Cristo ꞌicë quixun Jerusalénuxun cuacocancëbë, ami sinani Nucën Papa Diosnan ꞌi unicamax ꞌitsacëxa. Usai ꞌicëbë ca judíos sacerdotecamaribi ꞌitsaxira Jesúsmi catamëacëxa.

Esteban bican

⁸ Esteban axa upí sinan ꞌianan Nucën Papa Diosmi cushicë uni an ca, an ꞌamicëxun uni itsin ꞌacëma ñu ꞌacëxa.

⁹ Usa ꞌain ca an uni itsin ꞌacëma ñu ꞌaia oi ami nishi, judíos unibunëan ñu mëëmicë ꞌaíshbia chiquícë unicamabë Alejandría, Cilicia, ꞌimainun Asia me acamanuaxa ucë unicamax timë́ax Estebanbë cërúanancëxa.

¹⁰ Usai abë cërúanancëxunbia Estebanën atun ꞌacësama oquin Nucën Papa Diosan Bëru Ñumshin Upitan sinánmicëxun bana ñuia cuati ca nëtë́cancëxa.

¹¹ Nëtë́xunbi ca uni raíri ësaquin cacëxa: —Nun mitsu cupíomainun camina Esteban ñuiquin unicama cati ꞌain, nun cuacëx ca ënë uni Moiséscëñun Nucën Papa Dios ñui ꞌatimati banaxa quixun.

¹² Cacëx cuanxun ca camabi uni ñuixuanan caniacëcë unicamaribi ꞌimainun an Moisésnën cuënëo bana ꞌunáncë unicamaribi ñuixunquin tsuácaruacëxa. Tsuácarucëx uxun ca Esteban bibianquin atun cushicaman ꞌapucamanu buáncëxa.

¹³ Abë cërúanancë unicaman ca uni raíriribi cëmëi isa Estebanmi manánun quixun cacëxa. Cacëx cuanxun ca ësaquin cacëxa: —Ënë unix ca Nucën Papa Diosan xubu upí ñuianan Moisésnën cuënëo banaribi ñui nëtëtima ꞌatimati banaia.

¹⁴ Nun cuacëx ca ësai Esteban quiaxa: Jesús Nazaretnu ꞌicë, an isa anuxun Nucën Papa Dios rabiti xubu rurupanan, Moisésnëan ax quicësabi oínu ꞌinun cuënëo bana aribi bëtsi oti ꞌicë quiax.

¹⁵ Usaía a unicamax a ñui quicëbëtan atun cushicaman ꞌapucama ꞌimainun anu timë́cëcamanribi iscëxbi ca Estebanën bëmánan ángelnën bëmánansa ꞌiacëxa.