Hechos 5 - Kashibo-Kakataibo Biblia

Ananíasbëa Safira ꞌucha

¹ Usa ꞌaínbi ca bëtsi uni, Ananías cacë, aín xanu, Safira cacë, abëtan aín naë maruquin curíqui biacëxa.

² Bixunbi ca aín xanúan ꞌunáncëbi, naë cupí bicë curíqui mësú ainanbi ꞌinun nanan acamaishi isa biaxa quixun paránquin mësúishi buánxun Jesusan caíscë unicama ꞌináncëxa.

³ ꞌInania ca Pedronën cacëxa: —Ananías, ¿uisacasquin cara ñumshin ꞌatimanën ꞌapu, Satanás, an ꞌibuaquin, Nucën Papa Diosan Bëru Ñunshin Upí paráncësa ꞌixunmi me cupími bicë curíqui mësú binun mi sinánmiax?

⁴ Minan ꞌaish ca a me maruxunmi a cupí bicë curíqui mix cuëëncësabi oquin ꞌati asábi ꞌiaxa. ¿Uisa cupí caramina cëmëti sinan? Mix usai ꞌicë ax ca unimishi cëmëcëma ꞌicën. Camina Nucën Papa Diosmi cëmëan.

⁵ Ësai quia cuatishi ca Ananías nipacëti bamacëxa. An usai bamacë ñuicania cuacë unicamax ca racuë́iracëxa.

⁶ Bamacëbë uxun ca anu ꞌicë bëná unicaman chupan rabúnbianquin buánxun Ananías maíancëxa.

⁷ Usai ꞌian rabë́ ꞌimainun achúshi hora ꞌicëbë ca aín xanuribishi aín bënëa bamacë ꞌunánxmaishi uax xubunu atsíancëxa.

⁸ Atsinia ca Pedronën cacëxa: —ꞌË ca ñuixun. ¿Min me cupí caramina ënë curíquicamaishi bian? Cacëxun ca xanun cacëxa: —Usa ca aín cupí ꞌiaxa, ashi cananuna bian.

⁹ Cacëxunbi ca Pedronën cacëxa: —¿Uisaira ꞌixun caramina Nucën Papa Diosan Bëru Ñumshin Upí parani ami ꞌuchati min bënëbëtan sinan? Bëná unicama ca min bënë maínbëtsini aia. Atun ca usaribitimi bamaia miribi buánti ꞌicën.

¹⁰ Cacëxëshi ca Pedro tanáin nipacëti bamacëxa. Usai ꞌia ca bëná unicama atsínquinbi bamacë mëraxun bibianquin buánxun aín bënë rapasu maíancëxa.

¹¹ Usacëbë ca axa Jesucristomi catamëcë unicama ꞌimainun an ñuicania cuacë unicamaxribi racuë́ira racuë́acëxa.

Jesusan aín bana ñuixunun caíscë unicaman uni itsin ꞌacëma ñu ꞌa

¹² Usa ꞌain ca Jerusalénu ꞌicë unicaman, ax ca atubë ꞌicë quixun ꞌunánun Nucën Papa Diosan ꞌamicëxun, Jesusan caíscë unicaman uni itsin ꞌacëma ñu ꞌacëxa. Usocëbë ca axa Jesúsmi catamëcë unicamax Salomón cacë anun uni nicë, anubi ꞌi anuxun Nucën Papa Dios rabiti xubunu camabi nëtën timë́acëxa.

¹³ Anu timë́axa ꞌicëbëbi ca ami racuëti uni raíri atubë ꞌiáma ꞌicën. ꞌIquinmabi ca —atux ca atun nuitu asérabi upí ꞌicë —quixun sináncëxa.

¹⁴ Usaía ꞌimainun ca bëtsi unicamaxribi ꞌitsaira, xanubëbi bëbucamaxribi Nucën ꞌIbu Jesúsmi catamëacëxa.

¹⁵ Usa ꞌain ca camabi unin, uni ꞌinsíncëcama aín bacë́tinën bëxun bëxun, anúan Pedro uti bainu nancëxa, Pedro cuaíncëbëtan aín tupë́oncëinshi pëxcúnun quixun.

¹⁶ Usomainun ca Jerusalén ꞌurama ꞌicë ëmanu ꞌicë unicamanribi uni ꞌinsíncë ꞌimainun uni ñumshin ꞌatimañu a camabi bëacëxa. Bëcëx ca pëxcúcancëxa.

Pedrocëñun Juan ꞌatimocan

¹⁷ ꞌAisamaira uni Jesúsmi sinania isi ca judíos sacerdotenën cushicaman ꞌapu ꞌimainun abë ꞌicë saduceo unicama nishacëxa.

¹⁸ Nishi ami tsuáquiruxun ca Jesusan aín bana ñuixunun caíscë unicama bixun sipuacëxa.

¹⁹ Usocëbi ca Nucën ꞌIbu Diosan xucëx, imë́ uxun, aín ángel achúshinën sipu xëócaxun chiquínquin cacëxa:

²⁰ —Anuxun Nucën Papa Dios rabiti xubunu cuanxun camina Jesúsmi catamëcë ꞌaish ca uni Nucën Papa Diosnan ꞌiti ꞌicë quicë bana unicama ñuixunti ꞌain.

²¹ Ësoquian ángelnën cacësabi oquin ca pëcaracëbë cuanxun anuxun Nucën Papa Dios rabiti xubunu atsínxun anu ꞌicë unicama bana ñuixuancëxa. Bana ñuixunmainun ca sacerdotenën cushicaman ꞌapu ꞌimainun abë ꞌicë unicaman, judíos cushibunën ꞌapucama timë́mianan sipuacë unicama bënun quixun policía xuacëxa.

²² Xucëx cuanxunbi ca policíacaman sipunua mëráma ꞌicën. Usobëtsini utëcënxun

²³ ca cacëxa: —Nun iscëx ca asérabi sipu cushioquin xëtáscë ꞌiaxa. An bërúancë suntárucamaribi ca aín xëcuë tanáinbi nicë ꞌiaxa. ꞌAínbi ca nun xëocaquin iscëxbi uni achúshibi ꞌaíma ꞌiaxa.

²⁴ Policía quia cuati ca sacerdotenën cushicaman ꞌapu ꞌimainun anuxun Nucën Papa Dios rabiti xubunu ꞌicë guardianën ꞌapu ꞌimainun sacerdotenën cushicamax ratuti canancëxa: —¿Uisashi oquin cara ënë unin nu sináncasmamiti ꞌic?

²⁵ Usai ꞌia ca uni achúshinën uxun cacëxa: —Minmi sipuoncë unicaman ca anuxun Nucën Papa Dios rabiti xubunuxun unicama bana ñuixunia.

²⁶ Ësoquin cacëx cuanxun ca policíacamabëtan aín cushin, anuxun Nucën Papa Dios rabiti xubunu atsínxun, bana unicama ñuixuniabi a unicama biacëxa. Bixunbi ca unicaman maxaxan ꞌati sinani racuë́quin, mëëquinma anua judíos cushicaman ꞌapucama timë́cë anu upí oxuinshi buáncëxa.

²⁷ Usobëtsinquian bëcancë ca sacerdotenën cushicaman ꞌapun cacëxa:

²⁸ —Nun cananuna mitsu amiribishi Jesús ñuiquin bana ñuixunxunma ꞌanun quixun can. Cacëxunbi mitsun nëtë́quinma a bana uni ñuixunia chanioia ca Jersualénu ꞌicë unicaman cuaxa. Usa ꞌaish camina nun isanuna uni Jesús ꞌamia quiaxribi quicanin.

²⁹ Ësai quia ca Pedrobëtan Jesusan aín bana ñuixunun caíscë unicaman cacëxa: —Unin cacësa oquin ꞌaquinbi cananuna Nucën Papa Dios, a ꞌati cuëëncëma ñu a ꞌaquinma, a ꞌatia ax cuëëncë, a ñu cuni ꞌati ꞌain.

³⁰ Aín Bëchicë, mitsun i curúsocënu uni matásmicë, a ca Nucën Papa Dios, a nun rabicësaribi oquin nucën raracaman rabia, an baísquimiaxa.

³¹ Usotancëxun ca abëa aín mëqueu ꞌApu ꞌinun ꞌimiaxa. ꞌImianan ca axa atun ꞌApu ꞌaían a cupíshi sinanati Israel unicama atun ꞌucha tërë́ncë ꞌaish ië́cë ꞌinun ꞌimiaxa.

³² Ax ca asérabi usa ꞌicë quixun cananuna nun camabi uni cain. Nucën Papa Diosan aín bana cuacë unicama ꞌináncë aín Bëru Ñunshin Upí, anribi ca —asérabi ca usa ꞌicë —quixun uni ꞌunánmia.

³³ Quia cuati nishquin ca judíos unibunën ꞌapucaman atu ꞌati sináncë́xa.

³⁴ Usa ꞌaínbi ca ꞌapucama achúshi, fariseo uni, Gamaliel caquin anëcë, anu ꞌiacëxa. Gamaliel ax ca an usai judíos unicama ꞌiti Moisésnën cuënëo bana ꞌunáncë ꞌicëa camabi unin aín bana tancë ꞌiacëxa. Usa ꞌixun ca niruquin atu cacëxa: —Ënë unicama ca ëman pain chiquin.

³⁵ Cacëxuan chiquíncëbëtan ca ësoquin ꞌapucama cacëxa: —Israel unicama, ënë unicama ꞌanuxun camina upí oquin pain sinánti ꞌain.

³⁶ Mitsun camina sinánti ꞌain, uni achúshi, Teudas cacë, an ca ax isa cushi ꞌicë quixun uni paráncëxa. Paráncëx ca cuatrocientos uni abë timë́acëxa. Usa ꞌicëbia a uni ꞌacancëbë ca axa abë nicë unicamax tsuáqui abati nëtë́acëxa.

³⁷ Usocë́xa nëtë́a ꞌaínbi ca anun camabi unin aín anë ꞌati nëtën, Judas cacë uni, Galileanu ꞌicë, axribi usaribiti ax isa cushi ꞌicë quixun uni parani cëmëacëxa. Usaria aribishi aín bana cuati ca ꞌitsa uni abë timë́acëxa. Usa ꞌicëbia a uniribishi ꞌacancëbë ca axa abë nicë unicama tsuáqui nëtë́acëxa.

³⁸ Usai ꞌia sinánquin cana mitsu cain, ënë unicama camina isëshiti ꞌicanin. Anbi sináncë banaishi uni ñuixuncë ꞌaish ca ñancáishi ꞌiti ꞌicën.

³⁹ ꞌAínbi, Nucën Papa Diosanbi ꞌunánmicëxun bana ñuixuanan ñu ꞌacë ꞌicë camina uisabi ocantima ꞌain. Nucën Papa Diosmi atumina nishcanin ca bërúanracat.

⁴⁰ Ësai quia cuaquin ca —asérabi ca usa ꞌicë —quixun sináncëxa. Usaquin sinánquin ca Jesusan aín bana ñuixunun caíscë unicama cuënxun rishquitancëxun, Jesús ñuiquin unicama bana ñuixuntëcënxunma ꞌanun catancëxun, cuantánun xuacëxa.

⁴¹ Xucëxun ꞌapucama ëbiani ca —Jesúsnan cupí tëmëranun ca Nucën Papa Diosan nu caísaxa —quixun sinani cuëënquiani cuancëxa.

⁴² Cuanxun ca ꞌapucaman ñuixuntëcënxunma ꞌanun cacëxunbi ënquinma camabi nëtën anuxun Nucën Papa Dios rabiti xubunuxun ꞌanan anua atux ꞌicë xubucamanuxunribi, Jesús ax ca Cristo axa uti nun caíncë, a ꞌicë quixun uni bana ñuixuancëxa.