Hechos 4 - Kashibo-Kakataibo Biblia

Unicaman Pedro ꞌimainun Juanmi atun ꞌapucama manon

¹ Usaquian Pedrobëtan Juanën camainun ca judíos sacerdotecama ꞌimainun anuxun Nucën Papa Dios rabiti xubunu ꞌicë policíanën cushi ꞌimainun saduceo unicamax uacëxa.

² An —bamaxbia Jesús baísquicë ꞌain ca camabi uníxribi bama ꞌaíshbi baísquiti ꞌicë —quixun unicama ñuixuncë cupí ca axa ucë unicamax Pedro ꞌimainun Juanmi nishacëxa.

³ Nishi atúan bana ñuixuncëbë uquin ca Pedrocëñun Juan bibianquin buáncëxa. Buánxun ca bari cuabúcëbëa imë́ ꞌain, imë́shiira ñucánuan pëcaratamainun sipunu atsínmiacëxa.

⁴ Usa ꞌaínbi ca an a ñuiquin bana ñuixuncëxun cuati Jesúsmi catamëcë unicamax ꞌitsaira ꞌiacëxa. Acamax ca xanucëñunma nucë bënëcamaishi tupúncëx cinco milsa ꞌiacëxa.

⁵ Sipuonx pëcaracëbë ca judíos unibunën ꞌapucama ꞌimainun caniacëcë unicama ꞌimainun an Moisésnën cuënëo bana ꞌunáncë unicama, Jerusalénu timë́acëxa.

⁶ Acamabë ca judíos sacerdotenën cushicaman ꞌapu, Anás, a ꞌimainun Caifás, Juan, Alejandro ꞌimainun judíos sacerdotenën cushicaman aintsi ꞌibucamaribi anu timë́cë ꞌiacëxa.

⁷ Anu timë́xun ca Juancëñun Pedro sipunua bënun quixun suntáru xuacëxa. Xucëxuan chiquínbëtsinquin bëxun suntárunën axa timë́cë unicama nëbë́tsi nitsíncë ca anu ꞌicë ꞌapucaman ñucácëxa: —¿Uían ꞌamicëxun caramina aín niti bëtsicë uni pëxcüan? ¿Uisa cushiñu ꞌixun caramina ꞌan?

⁸ Ñucácëxun ca Nucën Papa Diosan Bëru Ñumshin Upitan quimicëxun Pedronën cacëxa: —Judíos ꞌapucama ꞌimainun caniacëcë unicama, cananuna mitsu cain:

⁹ Aín niti bëtsicë unia pëxcúcë ñuiquin camina uisai cara pëxcúonxa quixun nu ñucatin.

¹⁰ Usa ꞌain cananuna Israel unicaman ꞌunánun mitsu cain, Jesucristo, Nazaretnu ꞌicë mitsúnmi i curúsocënu matásmicëx bamacëbia Nucën Papa Diosan baísquimicë, an ꞌimicëx ca mitsúnmi iscë ënë uni pëxcúonxa.

¹¹ Cuënëo bana axa ësai quicë a camina ꞌunan, an maxax xubu ꞌacë unían a cuëënquinma raírishi caísun biquin racáncë maxax ꞌaíshbi ca a maxax bërí ami a xubu cushicë ꞌicën, itá upímia xubucama cushicë usaribiti. A banaxa quicësaribiti ca Jesucristo ami aín unicama cushicë ꞌiti ꞌicë quixun ca Nucën Papa Diosan bërí mëníoxa.

¹² Nucën Papa Diosan ca nuxnu nun ꞌuchacama tërë́ncë ꞌaish abë ꞌinúan an nu ië́minun Jesúsëshi ꞌimiaxa. Usa ꞌain ca an Nucën Papa Diosnan ꞌinun nu ië́miti bëtsi uni ꞌaíma ꞌicën.

¹³ Usa ꞌain ca Pedrobëtan Juanën quirica ꞌunáinracëma ꞌianan ꞌapuma ꞌixunbi racuë́quinma unicama bana ñuixunia isi judíos ꞌapucamax ratúacëxa. Usai ꞌiquin ca —ënë uni rabëtax ca axa Jesúsbë nicë a ꞌicë —quixun sináncëxa.

¹⁴ Usaquin sinánmainun ca a pëxcucë uni axribi atubë niacëxa. Nitsia isquin ca uisoquinbi Pedrocëñun Juan cacanma ꞌicën.

¹⁵ Caquinmabi Pedrocëñun Juan ëmánxun caínun quixun chiquíntancëx ca atúxbi ñucacanani ësai canancëxa:

¹⁶ —¿Uisa caranuna ënë uni rabë́ oti ꞌain? Ënën ca uni itsin ꞌacëma ñu ꞌaxa. Usoquian ꞌacë ca Jerusalénu ꞌicë unicaman ꞌunania. Usa ꞌain cananuna, usama ca quixun catima ꞌain.

¹⁷ Caquinmabi cananuna uni raírinëan cuanúnma ësoquin a rabë́ cati ꞌain, Jesús ñuiquian uinu ꞌicë unibi catëcënxunma ꞌanun. Jesús ñuiquinmi uni bana ñuixuntëcënia cananuna mitsu castícanti ꞌai quixun cananuna cati ꞌain.

¹⁸ Usai canantancëxun ca Pedrocëñun Juan cuënxun cacëxa: —Jesús ñuiquin camina uinu ꞌicë unibi bana ñuixuanan ꞌunánmitëcëntima ꞌain.

¹⁹ Cacëxunbi ca Pedrobëtan Juanën atu cacëxa: —Mitsúnbi ca sinan, ¿Nucën Papa Dios cara cuëënti ꞌic, nun nu aín bana manuanan mitsun banaishi cuati?

²⁰ An ñu ꞌaia isananu nun cuacë Jesusan bana ënë cananuna unicama ñuixuntëcënti ëntima ꞌain.

²¹ Usaquin cacëxun ca ꞌapucaman castícainsa tanquinbi, atun uni pëxcucë cupía unicaman Nucën Papa Dios rabicëbëtan ꞌama ꞌicën. Usa ꞌixun ca —ñuixuntëcënia caranuna mitsu uisoti ꞌai —quixuinshi catancëxun cuantánun ëancëxa.

²² Axa pëxcútisama ꞌaíshbi pëxcúcë uni ax ca cuarenta baritia inúcë ꞌiacëxa.

Aín unicaman Nucën Papa Dios aín cushia ꞌinánun ca

²³ Usa ꞌain ca cuanxun Pedrobëtan Juanën —judíos sacerotenën cushicamabëtan ca caniacëcë unicaman nu usaquin caxa —quixun aín raíri ñuixuancëxa.

²⁴ Ñuixunia cuaxun ca camáxbi abë banaquin Nucën ꞌIbu Dios cacëxa: —Min camina naí, me, bacacama unionan camabi ñuribi uniocën.

²⁵ Min Bëru Ñunshin Upitan ꞌimicëx ca nucën rara David, an mi rabicë, ax ësai quiacëxa: ¿Uisa cupí cara judíosma unicamax tsuáquirui nishia? ¿Uisa cupí cara unicaman ꞌatimaquin sinanin? Atúan usaquin sináncëxbi ca ñancáishi ꞌiti ꞌicën.

²⁶ Nucën ꞌIbu Diosmi ꞌianan ca aín Bëchicë Jesucristomiribi ꞌi ënë menu ꞌicë ꞌapucama tsuáquiruaxa, aín tucuricucamaxribi ca ami ꞌi timë́axa.

²⁷ David quiásabi oi ca asérabi ënë ëmanuax Herodesbë Poncio Pilato ꞌimainun judíosma unicama ꞌimainun Israel unicamaxribi, min Bëchicë upíira sinánñu, Jesús, ënë menu unúnmi caísa, ami nishi tsuáquirui timë́axa,

²⁸ usai ca ꞌiti ꞌicë quixunmi mëníosabi oi ca usai ami ꞌiaxa.

²⁹ Usa ꞌain camina a unicamaxa usai numi ꞌësë́nancë a bana min ꞌunánquin, racuë́quinma nun min bana uni ñuixunun nu ꞌaquinti ꞌain.

³⁰ ꞌAquianan camina min Bëchicë upíira sinánñu, Jesús, aín cushin, uni ꞌinsíncë pëxcüanan uni itsin ꞌacëma ñu ꞌanun nu ꞌamiti ꞌain.

³¹ Usaquin abë banaquin Nucën Papa Dios catancë́xa sënë́ncancëbë ca anua bucucancë xubu ax shaíquiacëxa. Usaía ꞌicëbëshi aín Bëru Ñumshin Upí atunu ucëbëtan ca an quimicëxun racuë́quinma Nucën Papa Diosan bana unicama ñuixuancëxa.

An Jesúsmi sináncë unicama ñu ꞌinánan

³² Usa ꞌain ca axa Jesús ñui quicë bana cuati ami catamëcë unicaman, camaxunbi bëtsin sináncësa oquin sináncëxa. Camaxunbi ca sináncëxa, —ꞌën ꞌaracacë ñucamax ca ꞌënanshima, camabi uninansa ꞌicë —quixun.

³³ Usaxun ca Jesusan aín bana ñuixunun caíscë unicaman atun iscë ꞌixun, Nucën ꞌIbu Jesús bamacë ꞌaíshbia baísquicë ñuiquin, racuë́quinma upí oquin Nucën Papa Diosan ꞌaquincëxun unicama ñuixuancëxa. Usa ꞌain ca an bana ñuixuncë unicamacëñun an aín bana cuacë unicamaribi upí sinánñu ꞌaish cuëënun Nucën Papa Diosan ꞌimiacëxa.

³⁴ Uinu ꞌicë uníxbi ca anun aín piti aín chupa marutiñuma ꞌiáma ꞌicën. Naëñu unicaman atun naë marumainun ca xubuñu unicamanribi atun xubu maruacëxa.

³⁵ Maruxun curíqui bixun ca Jesusan aín bana ñuixunun caíscë unicama ꞌináncëxa. ꞌInáncëxun bixun ca atun uinu ꞌicë unix cara anun aín piti, aín chupa maruti ꞌaíma ꞌicë, a curíqui mëtícaquin ꞌináncëxa. ꞌInáncëx ca uni achúshiratsubi ñuñuma ꞌiáma ꞌicën.

³⁶ Axa usai ꞌaquianancë unicama achúshi ca Levitan rëbúnqui, José cacë, Chipre nasínu ꞌicë, ꞌiacëxa. Ax ca Jesusan caíscë unicaman Bernabé caquinribi anëcë ꞌiacëxa. A banax ca an masá nuitutiabi cuëënmicë qui quicë ꞌicën.

³⁷ Usa ꞌixun ca Bernabénën aín naë maruxun curíqui bixun bëxun Jesusan caíscë unicama ꞌináncëxa.