Hechos 28 - Kashibo-Kakataibo Biblia

Malta cacë nasínua Pablo ꞌiá

¹ Usai camáxbi bacamiquibi ië́xun cananuna —Malta cacë nasí ca ënëx ꞌicë —quixun a isacën.

² A nasínu ꞌicë unicaman ca nu nuibaquin, ꞌuí ꞌimainun matsi ꞌain, ami nux sënamënun quixun tsi tícaquin ërë́nruacëxa.

³ Ërë́nrucëbëtan ca Pablonën mëchan xanúncë bixun, tsi rëquirucënu niacëxa. Nicëbë tsian xarocëxun tanbëtsini uquin ca Pablo runun mëcháncëxa.

⁴ Usoia isi ca a nasínu ꞌicë unicamax ratuti ësai canancëxa: —Ënë unix ca asérabi an uni ꞌacë uni ꞌicën. Bacamiquibi ië́axbi ca aín ꞌucha cupí bamati ꞌicën.

⁵ Canancëbëtanbi ca Pablonën runu mëtúasquiquin tsinu niacëxa. Usoíbi ca Pablo uisaíbi ꞌiama ꞌicën.

⁶ Usai ꞌia isquin ca aín mëcën ca uáti ꞌicë quixun anu ꞌicë unicaman sináncëxa. Sinánan ca —ca bamati ꞌicë —quixun sináncëxa. Sinánxun ꞌuran caíncëxbia uatima ꞌianan bamaiama oi ca bëtsi oquin sinani —ënë unix ca dios achúshi ꞌicë —quiacëxa.

⁷ Anunu ꞌicë a ꞌurama ca a nasínu ꞌicë Publio cacë uni aín tucuricu aín me ꞌiacëxa. Usa ꞌain ca a unin bitancëxun aín xubunu ꞌinun quixun nu cacëxa. Cacëx anu rabë́ ꞌimainun achúshi nëtën abë ꞌia ca pimianan nu ꞌaquiancëxa.

⁸ Nux anu ꞌain ca Publionën papa ꞌinsinan ꞌianan chixutanribi ꞌi, racácë ꞌiacëxa. Usa ꞌicëa ñuia cuati ca Pablo a isi cuancëxa. Cuanxun ca Nucën Papa Diosbë banatancëxun aín mëcënan ramëquin pëxcüacëxa.

⁹ Usocëbëa anu aia ca Pablonën a nasínua ꞌicë uni ñucëcamaribi pëxcüacëxa.

¹⁰ Usocëbëtan ca a nasínu ꞌicë unicaman numi sinánquin nu ꞌaquiancëxa. ꞌAquianan ca nuxnu cuancëbëtan, manë nuntinu nun pibianti ñucamaribi nu ꞌaruxuancëxa.

Pablo Romanu bëba

¹¹ Usa ꞌain cananuna rabë́ ꞌimainun achúshi ꞌuxën Malta nasínu ꞌiacën. ꞌItancëx cananuna anuxun mita inúmia aín ꞌibu anu ꞌain, Alejandríanuxuan bëcë manë nunti anun cuanux anu ꞌiruacën. A manë nuntin rëbunu ca uni rabëtan bëmánan tanxun ꞌacë i ꞌiacëxa, ax ca Cástor ꞌimainun Pólux caquin anëcë ꞌiacëxa.

¹² Malta nasínuax a nuntinu ꞌiruquiani cuanx cananuna Siracusa cacë ëmanu bëbacën. Bëbax cananuna anu rabë́ ꞌimainun achúshi nëtën ꞌiacën.

¹³ ꞌItancëx cuanquin me ratábiani, parúnpapa cuëbíushi cuanx cananuna Regio cacë ëmanu bëbacën. Bëbonx suñúan caxucüax uquin nu bëcacëx cuanx cananuna rabë́ nëtë ꞌicëbë Puteoli cacë ëmanu bëbacën.

¹⁴ Bëbaxun cananuna anuxun axa Jesucristomi catamëcë uni raíri mëracën. Mëracëxuan abë ꞌinun cacëx cananuna anu achúshi semana ꞌiacën. Achúshi semana ꞌitancëx cananuna Roma ëmanu bain cuancën.

¹⁵ Usa ꞌain ca nuxnu cuania cuabëtsini axa Jesucristomi catamëcë uni raíri Romanuax ricuatsini Apio Foro cacë ëmanuax nubë mëranani uacëxa. ꞌImainun ca raírinëxribi Tres Tabernas cacë ëmanuax nubë mëranancëxa. Acamabënu mëranancëbëtan ca Pablonën Nucën Papa Dios —asábi ca —caquin upí oquin sináncëxa.

¹⁶ Usari ꞌi cananuna Roma ëmanu bëbacën. Bëbacëbëtan ca capitán Julionën an bëcë sipuacë unicama a guardianën cushi ꞌináncëxa. ꞌInánan ca Pablo bëtsi xubunua ꞌinun canan an bërúanun quixun suntáru achúshi cacëxa.

Romanuxuan Pablonën bana ñuixuan

¹⁷ Romanu bëbax, rabë́ ꞌimainun achúshi nëtë ꞌitancëxun ca Pablonën judíos uni aín cushicamaxa a isi unun quixun camiacëxa. Camicëx aía timëtia ca Pablonën cacëxa: —ꞌËn aintsicama, cana mitsu cain, ꞌën cana judíos unicama uisa ocëma ꞌain, uisa oíma cana nun chaitiocëcama ꞌiásabi ꞌian. Usai ꞌiabi ca Jerusalénuxun judíos unicaman an sipuanun quixun romános unicama ꞌë ꞌinánxa.

¹⁸ ꞌInáncëxun ꞌë ñucáxun ca ꞌunánxa, ꞌën ñu ꞌacë ꞌaíma ꞌain ca a cupía ꞌë ꞌati ꞌaíma ꞌicë quixun. Usa ꞌain ca ꞌë chiquíntisa tanxa.

¹⁹ Chiquíntisa taniabi ca judíos unicaman ꞌëa chiquínxunma ꞌanun caxa. Usaquian caia cana ꞌapucama can, Romanu ꞌicë ꞌapu, Césarnën ca ꞌëmia manáncë banacama mëníoti ꞌicë quixun. ꞌËmia atux manáncë banacama a ñuixunibi cana Césarmi judíos unicama ñui manántima ꞌain.

²⁰ Usa ꞌixun cana mitsu isanan mitsubë banatisa tanquin, ꞌëmi isi unun quixun mitsu camian. Judíos unicaman sináncësaribi oquin cana —bama ꞌaish ca uni baísquiti ꞌicë —quixun sinanin. ꞌËn usaquin sináncë cupí cana manë risi ënën tëcërëcacë ꞌain.

²¹ Usaía quia ca anua ꞌicë judíos unicaman Pablo cacëxa: —Nun cananuna Judea menuxuan bëmicë quirica mi ñuiquian ꞌacë achúshiratsubi bicëma ꞌain. ꞌImainun ca anuax ucë judíos unicamax mi ñuiquin, min isamina ñu ꞌatima ꞌai quixun nu cacëma ꞌicën.

²² Cananuna ꞌunanin, mecama oquin ca axa Jesúsmi sináncë unicama ami nishquin unin ñuia. Usa ꞌain cananuna minmi a uisaira cara a ñucama ꞌicë quixun ñuia cuaisa tanin.

²³ Usa ꞌain ca a nëtë́an Pablonën bana ñuia cuacatsia quicë a nëtën ꞌaisamaira uni anua Pablo ꞌicënu uacëxa. Aía timëtia ca bari xamárutamainun ñuixuanan xupíopaquinribi bana ñuixuancëxa. Bana ñuixunquin ca uisari cara uni Nucën Papa Diosnan ꞌiti ꞌicë quixun canan —Moisés ꞌimainun an Nucën Papa Dios quicë bana uni ñuixuncë unicamaxribia, axa uti Cristo a ñui quiásabi oi ca Jesús uacëxa —quixun ñuixuancëxa.

²⁴ Pablo quia cuaquian raíri unicaman —a banax ca asérabi ꞌicë —quixun cuamainun ca raírinën —a banax ca asérabima ꞌicë —quixun cuaisama tancëxa.

²⁵ Usai ꞌi ca raírinëxa —asábi ca —quimainun uni raírinëxribi —usama ca —quicëbëtan, camaxunbi bëtsi bëtsi oquin sináncëxa. Usaía ꞌia ca Pablonën ësaquin cacëxa: —Nucën Papa Diosan Bëru Ñunshin Upitan sinánmicëxuan Isaíasnën nucën raracama cá banax ca asérabi ꞌicën. A banax ca ësai quia:

²⁶ Camina anu cuanxun atúan cuanun ësaquin judíos unicama cati ꞌain: Mitsun pabitan ꞌën bana ñuia cuaquinbi camina uisai cara quia quixun ꞌunántima ꞌain. Mitsun bërun ꞌën ꞌaia isíbi camina ꞌëx cushiira ꞌaínbi ꞌëmi sinántima ꞌain.

²⁷ Atun nuitu mëu ꞌunántisama tanan ca judíos unicaman atun pabitan cuaquinbi uisai quicë cara quixun ꞌunántisama tania. Atun bërúnbi ꞌën ꞌaia isquinbi ca ꞌëx cushiira ꞌaínbi ꞌëmi sinántisama tania. ꞌËmi sinanatia cana atu ꞌën uni ꞌinun ië́mitsian. Usa ꞌaínbi ca ꞌiisama tanxa.

²⁸ Camina ꞌunánti ꞌain, ꞌën mitsu ñuixuncë bana, Jesucristomi catamëtishi ca uni Nucën Papa Diosnan ꞌiti ꞌicë quiax quicë, a bana ñuixunia ca judíosma unicaman cuaxa. Usa ꞌaish ca atux a bana quicësabi oi ꞌiti ꞌicën.

²⁹ Usaquian Pablonën cacëx ca judíos unicamax Pablonëan ñuicë banacama a ñui qui atúxbi cuëbicananquiani atun xubunu cuancëxa.

³⁰ Usa ꞌain ca Pablo aín xubunu ꞌiquin xubu ꞌibu cupíoi anu rabë́ baritia ꞌiacëxa. Anu ꞌixun ca axa a isi ucë unicama nuibaquin biacëxa.

³¹ Biquin ca uisari cara uni Nucën Papa Diosnan ꞌiti ꞌicë quixun ñuixuanan uisai cara Nucën ꞌIbu Jesucristomi catamëti ꞌiti ꞌicë quixun ñuixuancëxa, uinu ꞌicë unínbia ubíocëma ꞌixun.