Hechos 27 - Kashibo-Kakataibo Biblia

Roma ëmanua Pablo cuan

¹ Usaquin anua César ꞌicë Italia menu nu xuti sinántancëxun ca Agripabëtan Festonën, Pablocëñuan sipuacë uni raíriribi, an buánun quixun Julio cacë capitán a cacëxa. Julio ax ca Augusto cacë suntárucama achúshi ꞌiacëxa.

² Usa ꞌain cananuna parúnpapa cuëbí cuanx, Adramitio ëmanuaxa ucë manë nunti, axa Asia menu cuanti, anu ꞌiruacën. Nubë ca Macedonia menu ꞌicë ëma Tesalónica, anua ꞌicë uni Aristarco, axribi cuancëxa.

³ Usaquiani coonx cananuna Sidón cacë ëmanu bëbacën. Anu bëbaxun ca abë upí ꞌixun Julionën Pablo a ëmanua ꞌicë axa abë nuibanancë unicama isanan abë bananan, atun xubunuxun pitánun quixun cacëxa.

⁴ Usa ꞌain cananuna Sidónuax cuaniabia suñun anúnu cuancë amiax uquin bëcacëx, caxutanma nu buania quiax, nu mëmiua ꞌicë Chipre nasí inubiani amotan cuancën.

⁵ Cuanx cananuna Cilicia me ratábianxun Panfilia meribi ratábianx Licia menua ꞌicë ëma Mira cacë anu bëbacën.

⁶ Mira ëmanuxun ca a capitanën Alejandría ëmanuax ucë manë nunti isacëxa. Isun ca anúnu nux Italianu cuanun aín ꞌibubëtan mëníocëxa.

⁷ Mëníocëbë cuanx ꞌitsa nëtë munu cuanquin cananuna Gnido cacë ëma isacën. Isbiani cuaniabia anúnu cuancë amiax uquin nëtë́quinma suñun bëcacëx cananuna Salmón ëma inubiani Creta cacë nasí a rapasu cuancën.

⁸ Cuanx cananuna numi ꞌiquian suñun bëcacëx cuëtsinan munu cuanx, Buenos Puertos cacë ëma, Lasea cacë ëma cha ꞌurama ꞌicë, anu bëbacën.

⁹ Anu bëbaquiani cuancëbëa, mita rënimëbúcëbë ca parúnpapan cuanti ꞌaisama ꞌiacëxa. Usa ꞌain ca Pablonën axa nubë cuancë unicama ësaquin cacëxa:

¹⁰ —ꞌËn sináncëx ca usabi cuanti ꞌaisama ꞌicën. Usabi cuani cananuna nunti ꞌimainun ñucama nëtë́mianan nuxribi cëñúti ꞌain.

¹¹ Cacë́xbi ca an manë nunti niquincë unicaman cushi ꞌimainun nunti ꞌibúxribi anu ꞌuran ꞌiisama tanmainun Julionëxribi Pablonën bana cuaisama tani cuancatsi quiax bënë́acëxa.

¹² Usa ꞌain ca mita inúmi anu ꞌiti cuëënquinma, unicama aín patsanën ësaquin sináncëxa: —Ënuax cuanx caranuna Fenice ëma, Creta nasí aúa bari cuabúcë, au cuanx mita inútamainun anu ꞌi cuanti ꞌai quixun cananuna tanti ꞌain.

Parúnpapa tucánquia

¹³ Usaquin sináncëbëbia aín tsipúmiax suñu munuishi bëquicëbëtan ca an manë nunti niquincë unicaman —cananuna cuanti ꞌai —quixun sináncëxa. Sinánbianquin ca Creta nasí cuëtsinan nu buáncëxa.

¹⁴ Cuancëbëbi ca suñúan matámiax bëquiacëxa.

¹⁵ Usai ꞌiquian cuainsama oquin manë nunti tuíncëbëtan cananuna anbia nu buántanun quixun sináncën.

¹⁶ Suñúan bëquiquin buáncëx cananuna nasí chucúma, Cauda cacë, a rapasu cuani ami catamëacën. Ami catamëquin cananuna nunti chamaratsu bëchunan buaniabi anun tëcërëcacë itsi a biquin anun bëacën.

¹⁷ Bëxun cananuna manë nunti chanu ꞌaruacën. ꞌArutancëxun ca an manë nunti niquincë unicaman manë nunti cushioquin aín amo camabi runucaxun nëacëxa. Nëatancëxun ca sináncëxa, Sirte cacë masi ꞌurama sapi cananuna ꞌai quixun. Uinu ꞌicë unin cara a masi amatia, ax ca anu pëánquiax ëchiquitima ꞌicë quixun sinani ca anu cuainsama tancëxa. Usa ꞌain ca racuëti amiquisama tanquin, chupa ami suñu bëquicë, an nunti niquincë unin buánpacëxa. Buánpaquin ca suñúinshia nu buántanun quixun sináncëxa.

¹⁸ Usaquiani coónbia suñúan nëtë́cëbëtanma ca an manë nunti niquincë unicaman ñu buáncëcama raíri parúnpapa nëbë́tsi puacëxa.

¹⁹ Usaquin ꞌón cananuna nunribi nuntinua ꞌicë ñucama parúnpapa nëbë́tsi puacën.

²⁰ Usobiani cuanquin cananuna ꞌitsa nëtën bari isíma, ꞌisparibi isíma, ꞌianan suñúanën parúnpapa bëchúancë, ashi isquin —ënuax cananuna bamati ꞌai —quixun sináncën.

²¹ Usa ꞌain ꞌitsa nëtën picëma ꞌain ca Pablonën atu nëbë́tsinuax niruquin unicama cacëxa: —ꞌËn mitsu cacësabi oi Buenos Puertosnubi bërúax cananuna asábi ꞌianan nun ñucama pucëma ꞌitsían.

²² ꞌAínbi camina masá nuitutima chuámashi ꞌicanti ꞌain. Achúshi uníxbi cananuna bamatima ꞌain, manë nuntíxëshi ca nanë́ti ꞌicën.

²³ Ënë imë́ cana ainan ꞌixun ꞌën a rabicë, Nucën Papa Diosan xucë́xa ucë ángel isan.

²⁴ Iscëxun ca ꞌë caxa: Pablo, camina racuë́tima ꞌain. Mi cupí ca micëñun axa mibë manë nuntinu ꞌicë unicamaribi bacamiquiti ꞌicëbi Nucën Papa Diosan ië́miti ꞌicën. Ië́micëx cuanx camina Romanu ꞌicë ꞌapu, Césarnu bëbati ꞌain.

²⁵ Angelnën ꞌë cacë sinani camina chuámarua ꞌicanti ꞌain. ꞌËn cana ꞌunanin, Nucën Papa Diosan ꞌimicëx ca ángelnën ꞌë cacësabi oi ꞌiti ꞌicën.

²⁶ Usa ꞌaínbi ca manë nuntíxëshi nasínu ꞌirui anu ránquiti ꞌicën.

²⁷ Usa ꞌain cananuna rabë́ semana ꞌicëbë suñúanëan amo amo oquin buáncëx, parúnpapa Adria cacë, anu ꞌiacën. Anuxun ca imë́ naëx an nunti niquincë unicaman —sapi cananuna menu bëbai —quixun sináncëxa.

²⁸ Sinánxun ca parúnpapa nëmin tanquin —ca treinta y seis metros ꞌicë —quixun isacëxa. Isax ꞌuri cuanxun tantëcënquin ca —ca veintisiete metros ꞌicë —quixun isacëxa.

²⁹ Isax ca maparami ꞌia manë nunti tuquiti sinani racuë́quin aín tsipúnuxun rabë́ ꞌimainun rabë́ manë cha, tësë itsin tëcërëcaxun, manë nunti anubi bëspúnun nipácëxa. Imë́ naëx nipátancëxun ca pëcaranun quiax bënë́quin caíancëxa.

³⁰ Caínquin ca an nunti niquincë unicaman manë nunti rëbunuxun tësë itsin tëcërëcaxun manë nipácësa ꞌitánun, nunti chucúmara a anun menu cuanuxun nanpácatsi quixun sináncëxa.

³¹ Usoquian a unicaman ꞌaia oquin ca Pablonën Capitán Juliocëñun aín suntárucama cacëxa: —Ënë unicama manë nuntinu bërúcëbëma camina mitsux bacamiquiti ꞌain.

³² Pablonën cacëxun ca suntárucaman anun nunti chucúma tëcërëcacë itsicama tëaxun, bacan buántanun nipácëxa.

³³ Usa ꞌain ca pëcarati ꞌurama ꞌain Pablonën camaxunbia pinun quixun ësaquin cacëxa: —Rabë́ semana camina ñu pima ꞌianan ꞌuxcëma ꞌain.

³⁴ Uinu ꞌicë uníxbi ca nëtë́tima ꞌicën. Camina usabi ꞌinuxun ꞌacanin. Usa ꞌain camina min nami cushinuxun piti ꞌain.

³⁵ Usaquin caquin ca Pablonën pán bixun, acaman ismainunbi —asábi ca —Nucën Papa Dios catancëxun, tucapaxun piacëxa.

³⁶ Usaquin caquian piia isquin ca masá nuitucë a nëtë́quin camaxunbi piacëxa.

³⁷ Manë nuntinua ꞌicë unicamax cananuna doscientos setenta y seis uni ꞌiacën.

³⁸ Acaman ca uiti cara piisa tania pitancëxun, manë nuntia xanúntanun trigo sacocama parúnpapanu puacëxa.

Manë nunti nanë́a

³⁹ Usa ꞌain ca pëcaracëbëtan me isquinbi uinu cara quixun an nunti niquincë unicaman ꞌunánma ꞌicën. ꞌUnánquinmabi ca parúnpapa tsintúncënua masi isquin anu manë nunti ꞌaruti sináncëxa.

⁴⁰ Sinánxun ca anun tëcërëcacë itsi tëaquin manëa nipácë a parúnpapanubi ëancëxa. Ëanan ca anun puntëbianquin buánti manë nunti tsipúnua ꞌicë inti, a anun tëcërëcacë itsicama tubuacëxa. Tubutancëxun ca manë nunti rëbunu nitsíncë iimi, ami ꞌiquian suñun manë nunti buánun quixun chupa buánruacëxa.

⁴¹ Chupa buánrucëbë bëqui, ami ꞌi cushiquin buánxun, ca suñun baca xobucë rabë́ nëbë́tsia ꞌicë masinu ráncaisama oquin manë nunti ꞌaruacëxa. Usa ꞌain ca ráncaisama ꞌain ami ꞌi cushi xuquiquin bacan manë nunti tsipun tucapacëxa.

⁴² Tucapacëbëtan ca sipuacë unicama mëñuquianx abáti rabanan suntárucaman ꞌacatsi quiacëxa.

⁴³ ꞌAcatsi quiabi ca aín capitán Julionën Pabloribima ꞌaia quixun sinánquin, sipuacë unicama ꞌaxunma ꞌanun quixun aín suntárucama cacëxa. Canan ca an mëñuti ꞌunáncëcamax paían mëñuquianx ꞌirumainuan,

⁴⁴ an mëñuti ꞌunáncëma unicamaxribi manë nunti panatan mëñuquianx caman ꞌirutanun quixun cacëxa. Capitán Julionën cacësabi oi mëñuquiani cuanx ca camáxbi caman ꞌirui cëñúruacëxa.