Hechos 26 - Kashibo-Kakataibo Biblia

Usai cana ꞌia quixuan Pablonën Agripa ca

¹ Festonën cacëxun ca Agripanën Pablo cacëxa: —Mixribi camina banati ꞌain. Usaquian cacëx ca camabi unin cuamainun aín mëcënan sanani ësai Pablo quiacëxa:

² —Agripa, ꞌëmia judíos unicamax manáncë banacama ñuiquin uisai carana ꞌia quixun mi cai cana cuëënin.

³ Min camina judíos unicamaxa usabi ꞌicë ꞌaish, usai ꞌia ꞌunanin. ꞌImainun camina añu ñu ñui cara quia quixunribi ꞌunanin. Usa ꞌixun camina ꞌën mi camainun bënë́quinma cuati ꞌain.

⁴ Judíos unicaman ca uisai ꞌi carana ꞌën nëtënuax cania quixun ꞌunánan uisai carana Jerusalénuaxribi ꞌia quixun ꞌë ꞌunánxa.

⁵ Usa ꞌain ca atun ꞌunáncë ꞌixun, ꞌëx cana ꞌitsa baritian fariseo uni ꞌai quixun caisa tanquin mi cati ꞌicën. Nux fariseo ꞌaish cananuna nux judíos unicama raíri ꞌicësamairai Moisésnën usai judíos unicama ꞌiti cuënëo bana quicësabi oi ꞌain.

⁶ An nucën raracama cásabi oquin ca Nucën Papa Diosan uni bamacama baísquimiti ꞌicë quicë banax ca asérabi ꞌicë quixun cana ꞌën sinanin. Usaquin ꞌën sináncë cupí ca ënë unicamax ꞌë ñui ꞌëmi manánxa.

⁷ Nucën rara Israel, aín bëchicëcamax ca mëcën rabë́ ꞌimainun rabë́ ꞌiacëxa. Aín bëchicëcaman rëbúnquinën ca anúan Nucën Papa Diosan uni bamacama baísquimiti nëtë cainia. Anúan aturibi baísquimicë ꞌiti nëtë ca uti ꞌicë quixun sinánquin ca nëtë́nbi imë́bi ami sinánquin Nucën Papa Dios rabia. Usa ꞌain cana mi cain, usaribiti ꞌëx ꞌicë cupí ca ënë unicamax ꞌëmi manania.

⁸ Mitsúnribi camina, Nucën Papa Diosan ca uni bamacama baísquimiti ꞌicë quixun sinanin. ¿Usa cat?

Ami catamëcëma ꞌixuan Pablonën Jesucristomi catamëcë unicama bëtsi bëtsi o

⁹ Catancëxun ca ësaquinribi Pablonën cacëxa: —ꞌËn cana sináncën, ꞌën Jesús Nazaretnu ꞌicë ami catamëcë unicama bëtsi bëtsi oti isa Nucën Papa Diosan iscëx upí ꞌicë quixun.

¹⁰ Usaquin sinánquin cana Jerusalénuxun a unicama bëtsi bëtsi oquin tëmëramianan, sacerdotenën cushicaman ꞌë cacësabi oquin axa Jesúsmi catamëcë uni ꞌaisamaira sipuacën. Sipuaia unin atu ꞌacëbëtan cana, asábi ca quixun sináncën.

¹¹ ꞌItsa oquin cana amia sinaniabi Jesucristomi catamëti ënía, ami ꞌatimati bananun quixun aín unicama bëtsi bëtsi ocën. Anua judíos unicama timë́ti xubucamanubi cuanquin cana usoquin ꞌacën. Usonan cana ñunshinacëquin bëtsi bëtsi menu ꞌicë ëmacamanuribi cuanquin, anu ꞌicë axa Jesucristomi catamëcë unicama bëtsi bëtsi ocën.

Uisai cara Jesucristomi catamëacëxa quixuan Pablonën ñuitëcëan

¹² Catancëxun ca ësaquinribi Pablonën cacëxa: i —Damasco ëmanuxunribi usaribi oquin ꞌanux cana sacerdotenën cushicaman usoquin ꞌanun quixun ꞌë ꞌaxuncë quirica buani cuancën.

¹³ Cuanquin cana bari xamárucëbë naínuax pëqui, barían pëcacësamaira oi ichuquin nëbë́tsioraquin axa ꞌëbë cuancë unicamacëñunbi ꞌë pëcacëxun isacën.

¹⁴ Pëcacëx cananuna camáxbi menu nipacëacën. Nipacëxun cana hebreo banan ësai quia cuacën: “Saulo, Saulo, ¿uisoti caramina ꞌë bëtsi bëtsi oin? Ami tatíqui chacati nishquin i tapun, taën ꞌaquinmi paë tancësa, usaribiti camina mibi ꞌin. Usaquin ꞌë ꞌai ꞌëmi sinántisama tani camina mixbi ꞌatimóracatin”.

¹⁵ Ësai quia cana cacën: “¿Ui caramina ꞌain? Nucën ꞌIbu Dios sapi camina ꞌain”. Cacëxun ca ꞌë cacëxa: “ꞌËx cana Jesús, ami bëtsi bëtsi ocë, a ꞌain.

¹⁶ Ca nirut. Minmi ꞌë ñuiquin, unicama canan bërími ꞌë iscë ñuianan, minmi ꞌën ꞌaia isti ñucamaribi ñuiquin, unicama canun cana mi cain.

¹⁷ Usa ꞌixun cana ꞌë ñuiquinmi bana ñuixunun judíos unicama ꞌimainun judíosmacamanu mi xutin. Usaquinmi ꞌaia cana unían bëtsi bëtsi onan bamamisa taniabi mi bërúanti ꞌain.

¹⁸ Minmi ꞌë ñuixuncëxa atux ñu ꞌatima ꞌatishi sinani bëánquibucënu nicësa ꞌaíshbi sinanaquin ñu upíshi ꞌati sinánun cana mi xutin, ñunshin ꞌatimanën ꞌapu Satanásnën ꞌibuacë ꞌaíshbi sinanatía Nucën Papa Diosnan ꞌinun. Usai ꞌëmi catamëcë ꞌaísha aín ꞌuchacama tërë́ncë ꞌinun cana atunu mi xutin. Usa ꞌain ca an mëníosabi oi atux aín unicamabë Nucën Papa Diosan nëtënu ꞌiti ꞌicën”.

Jesusan cacësabi oía Pablo ꞌiá

¹⁹ Pablonën ca ësaquinribi Agripa cacëxa: ꞌApu Agripa, cana mi cain, usaquian Jesusan naínuxun ꞌë cacëxun cana aín bana parë́quinma an cacësabi oquin ꞌacën.

²⁰ ꞌAquin, Jesús ñuiquin, Damasconu ꞌicë unicama ñuixuntancëxun cana Jerusalénu ꞌicë unicama ñuixuanan Judea menu ꞌicë ëmacamanuxunribi bana ñuixuan. Ñuixuanan cana judíosma unicamaribi ñuixunquin ësaquin can: ꞌAtimaquin sináncë ꞌaíshbi sinanati camina Nucën Papa Diosnan ꞌiti ꞌain. Usai ami sinánquin camina ñu ꞌaisama ꞌaquinma ax cuëëncësabi oquinshi ꞌati ꞌain, mix camina ainan ꞌai quixuan camabi unin ꞌunánun.

²¹ Usaquin ꞌën bana uni ñuixuncë cupí ca judíos unicaman anuxun Nucën Papa Dios rabiti xubunuxun bitancëxun ꞌë ꞌaisa tanxa.

²² Atúan ꞌë ꞌaisa taniábia Nucën Papa Diosan ꞌë ꞌaquinia ꞌë ꞌacëma ꞌixun cana ꞌën ꞌacësabi oquin uni aín cushibu ꞌimainun cushimacamaribi, Nucën Papa Dios ñuiquin bana ñuixunin. ꞌËn unicama ñuixuncë bana ax ca bëtsima, Moisés ꞌimainun an Nucën Papa Dios quicë bana uni ñuixuncë unicamanribia, usai ca ꞌiti ꞌicë quixun ñuia bana abi ꞌicën.

²³ A banax ca ësai quia: Tëmëratancëx ca Cristo bamati ꞌicën. Bamatancëxa baísquia ꞌain ca usaribiti camabi uni bama ꞌaíshbi Cristo utëcëncëbë baísquiti ꞌicën. Usai baísquia ꞌixun ca Jesusan judíos unicamaishima judíosma unicamaribi sinanati ami catamëtía aín sinan upí ꞌinun ꞌimiti ꞌicën.

Cristomi sinánun quixuan Pablonën Agripa cá

²⁴ Usaía Pablo an ñu ꞌacëcama ñui quicëbë ca Festo munuma banai quiacëxa: —Pablo, camina ñunshían. ꞌItsairami quirica ꞌacë cupí camina ñunshían.

²⁵ Cacëxunbi ca Pablonën cacëxa: —Festo, ꞌëx cana ñunshíncëma ꞌain. ꞌËn ñuicë bana ënëx ca sinánñuma uníxa quicësama ꞌicën, ax ca cëmëi quicëma ꞌicën.

²⁶ ꞌApu Agripa ënën ca ꞌëx a ñui quicë ñucama ënë upí oquin ꞌunánxa. Unían isnunma ñu ꞌacëma ꞌixun cana ꞌën, an ca asérabi ꞌën ñuicë ñucama ꞌunánxa quixun ꞌunanin. Usa ꞌain cana racuë́quinma ënë ñucama a ñuixunin.

²⁷ Usaquin Festo catancëxun ca Pablonën Agripa cacëxa: —¿An Nucën Papa Dios quicë bana uni ñuixuncë unicaman cuënëo banax cara asérabi ꞌicë quixun caina sinanin? ꞌËn cana ꞌunanin, asérabi ca a bana ꞌicë quixun camina sinanin.

²⁸ Cacëxun ca Agripanën Pablo cacëxa: —Bënë́nquinshi camina ꞌë Cristonën uni ꞌimitisa tanin.

²⁹ Quia ca Pablonën cacëxa: —Nucën Papa Dios cuëëncësabi oi cana mishima an ꞌëx quia cuacë unicamaxribia, ꞌëx ꞌicësaribiti, bënëtishi Cristonën uni ꞌiti cuëënin. Bënëtishi ꞌiananbia abi munu sinanati Cristonan ꞌiti cana cuëënin. Mix ꞌëx ꞌicësaribiti Cristonan ꞌaíshmi, ꞌëx ꞌicësaribiti manë risin tëcërëcacëma ꞌiti, cana cuëënin.

³⁰ Usaquian Pablonën cacëx ca Agripa ꞌimainun Festo ꞌimainun Berenice ꞌimainun abëa anu tsócëcama ax niruacëxa.

³¹ Niruquiani ꞌuri cuanx ca canani quiacëxa: —Ënë unían ꞌacë ñu ꞌatima ca ꞌaíma ꞌicën. Usa ꞌaish ca a cupí sipuanan bamamiti an ꞌacë ñu ꞌaíma ꞌicën.

³² Usai quiquin ca Agripanën Festo cacëxa: —Chiquíntisa ꞌaíshbi ca ënë unix Romanu ꞌicë ꞌapu, Césarnëinsa ënë ñu mëníoxunun anu cuancatsi quiaxa.