Hechos 25 - Kashibo-Kakataibo Biblia

Festonën Pablo ñucá

¹ Usa ꞌain ca ꞌapu ꞌinux cuanx Festo Judea menu bëbacëxa. Bëbax ca rabë́ ꞌimainun achúshi nëtë ꞌicëbë Cesárea ëmanuax Jerusalénu cuancëxa.

² Anua ꞌicë ca judíos sacerdotenën cushicama ꞌimainun judíos ꞌapucamanribi Pablomi manánquin Festo cacëxa,

³ ësaquin, —Nux cuëëncësabi oquin camina Pabloa Jerusalénu min unin bënun camiti ꞌain. Bain aia ꞌacatsi quiax ꞌësë́nanxun ca Pabloa bënun quixuan caminun quixun judíos unicaman Festo usaquin cacëxa.

⁴ Cacëxunbi ca Festonën cacëxa: —Pablo ca Cesáreanu sipuocë ꞌicën. ꞌËx cana ꞌitsama nëtë́inshi ënuax anu cuanin.

⁵ Usa ꞌain ca mitsun cushicamax ꞌëbë Cesáreanu cuanti ꞌicën. Cuanxun ca a unían ñu ꞌatima ꞌacë ꞌain, uisa ñu cara ꞌaxa quixun nu cati ꞌicën.

⁶ Catancëx ca mëcën rabë́ nëtësa ꞌicëbë Festo Jerusalénuax Cesárea ëmanu cuancëxa. Coonx pëcaracëbë, anua uníxa unimi manania cuacë uni tsóti, anu tsóbuxun ca Pablo bëcánun quixun camiacëxa.

⁷ Camicëxuan bëcëbë ca Jerusalénuaxa ricuatsíncë judíos unicamax a nëbë́tsiorati, ënë unin ca ꞌatima ñuira ꞌaxa quiacëxa. Usaía quicancëbëbi ca Pablo ñuia, usai quicancë bana ax ca asérabi ꞌicë quiáxa ax quiti uni raíri ꞌaíma ꞌiacëxa.

⁸ Usa ꞌain ca Pablonën amia manáncancëxun ësaquin Festo cacëxa: —ꞌËn cana Moisésnëan usai judíos unicama ꞌiti cuënëo bana quicësabi oi ꞌiaxma ꞌinun judíos unicama cacëma ꞌain. Usa ꞌaish cana ꞌëxribi a bana quicësabi oi ꞌian. ꞌIanan cana anuxun Nucën Papa Dios rabiti xubunu judíosma uni atsínmicëma ꞌain, atsínmima ꞌianan cana Romanu ꞌicë ꞌapu, César, aín bana tanxunma ꞌanun uni cacëma ꞌain.

⁹ Quia ca Festonën judíos unicamabë upí ꞌiisa tanquin Pablo cacëxa: —¿Mi ñuia quicancë bana ënë ꞌën anuxun mi mëíoxunun caina Jerusalénu cuainsa tanin?

¹⁰ Cacëxun ca Pablonën cacëxa: —ꞌËx románo uni ꞌicë ca Romanu ꞌicë ꞌapu, Césarnën ꞌimicë an uníxa románo unimi manania cuacë uni ainshi ꞌë ñuia uni quicë bana mëníoti ꞌicën. Usa ꞌain camina ꞌëx románo ꞌaían ꞌëmi uni manania minbi mëníoti ꞌain. Minbi camina ꞌunanin, judíos unicamami ꞌëx ꞌuchacëma ꞌain ca ꞌën ꞌacë ñu a aín ꞌapucaman mëníoti ꞌaíma ꞌicën.

¹¹ Axa quicësabi oquin nun ꞌati bana quicësa oquin ꞌacëma ꞌicëa unin ꞌë bamamiti ca asábi ꞌitsíanxa. Usa ꞌaínbi ca uisa ñubi ꞌuchacëma ꞌicë atúxa ꞌë ñui quicë bana asérabima ꞌain, uinu ꞌicë unínbi atúan ꞌanun judios unicama ꞌë ꞌinántima ꞌicën. Usa ꞌain cana Romanu ꞌicë ꞌapu Césarnënbia uisa cupí cara uni ꞌëmi manania quixun isti cuëënin.

¹² Usaquian cacëxun ca an a ꞌaquincë unicamabë banatancëxun Festonën Pablo cacëxa: —Césarnënbi uisa cupí cara uni mimi manania quixun isti cuëëncë cupí camina Césarnu cuanti ꞌain.

ꞌApu Agripanën Pablo ñucá

¹³ ꞌItsama nëtë ꞌicëbë ca ꞌapu Agripabë Berenice Cesárea ëmanu Festo isi cuancëxa.

¹⁴ Cuanx anu ꞌitsa nëtë ꞌia ca Festonën Pablo ñuiquin cacëxa: —Ënu ca sipuacë ꞌicëa Felixnën anubi ëbiancë uni achúshi ꞌicën.

¹⁵ Jerusalénu ꞌicë ca sacerdotenën cushicamabëtan judíos caniacëcëcaman a ñui ami manánquin ꞌë caxa, ꞌën a uni ꞌaminun quixun.

¹⁶ Cacëxunbi cana can: Románo ꞌapucaman ca, amia uni manáncë uni a uisa ꞌixunbi, ca bamati ꞌicë quixun caima, axa ami manáncë unicaman abë banaquin a uni añu ñu cara ꞌaxa quixun cacëma pain ꞌain.

¹⁷ Usa ꞌain cana atúxa Jerusalénuax ënu uóncë nëtë pëcaracëbëtan, anua an uníxa unimi manania cuacë uni tsóti, anu tsóbuxun Pablo bëcanun quixun camian.

¹⁸ Camiquin cana, ꞌatima ñuira sapi ca Pablonën ꞌaxa quixun sinan. Sinánquin camicëxuan Pablo bëánbi ca ꞌën sináncësa oi axa ami manáncë unicamax quicëma ꞌicën.

¹⁹ Quimabi ca ësai cuni quiaxa, nuxnu usai ꞌiti bana quicësabi oi ꞌima ꞌianan ca Pablonën, uni achúshi Jesús cacë, ax isa bamaxbi baísquiacëxa quixun ñuia quiax.

²⁰ Usa ꞌain cana uisa carana ënë uni oti ꞌai quixun sinántancëxun, ¿mi ñuia quicancë bana ënë anuxun mi mëníoxunun caramina Jerusalénu cuainsa tani? quixun Pablo ñucan.

²¹ Ñucátancëxun cana, César Augustonën ca ꞌëmia uni manáncë bana istancëxun uisa cara oti ꞌicë quixun ꞌë cati ꞌicë quixun ꞌë cacë cupí, anun Césarnu xuti nëtë sënë́ntamainuan sipunubi ꞌinun quixun can.

²² Usaquian cacëxun ca Agripanën Festo cacëxa: —ꞌËnribi cana a unían bana ñuia cuaisa tanin. Quiáxa quia ca Festonën cacëxa: —Imë́ishibi camina axa quia cuati ꞌain.

²³ Usaquian coon pëcaracëbë ca suntárunën cushicama ꞌimainun a ëmanu ꞌicë unin cushicamabë Berenice ꞌimainun Agripa aín ñun curánanën mëníocacuatsini uacëxa. Ucëbëtan ca Festonën Pablo bënun quixun aín suntárucama cacëxa.

²⁴ Cacëxuan Pablo bëcëbëtan ca Festonën axa ucëcama ësaquin cacëxa: —ꞌApu Agripacëñun cana axa ënu nubë timë́cë unicama cain, ënu ca a uni ñuia judíos unicamax, Jerusalénu ꞌimainun Cesáreanuaxribi, ami manani munuma banaquin, ax ca bamati ꞌicë quixun ꞌë cacë ax ꞌicën.

²⁵ ꞌAínbi ca ꞌën sináncëx a cupí bamati uisa ñubi ꞌacëma ꞌicën. Usa ꞌaínbi cana axbi, César Augustonënbi ca ꞌëmia uni manáncë bana istancëxun uisa cara oti ꞌicë quixun isti ꞌicë quixun ꞌë cacë cupí Césarnu xuti sinan.

²⁶ Sináncëxbi ca a ñuiquin, usai ca ënë uni ꞌiaxa quixun cati bana ꞌaíma íaxa. Usa ꞌain cana mitsúnmi ñucánuan a bënun quixun can. Agripa, mix nun ꞌapu ꞌixun camina a ñucáti ꞌain. ꞌImainun ca ënu ꞌicë unicamanribi a ñucáti ꞌicën, uisa ñu cara ꞌaxa quixun. Ñucácëxa quia cuaxun cana añu cara ꞌaxa quixun caquin nun ꞌapuira César quirica buánmiti ꞌain.

²⁷ Añu ñu ꞌaisama cara ꞌaxa quixun ñuixunxunmashi cana Césarnu sipuacë uni xutima ꞌain. Xuáxbi cana nuituñuma ꞌixun añu ñu ꞌacëma ꞌicëbi a uni xucësa ꞌiti ꞌain.