Hechos 24 - Kashibo-Kakataibo Biblia

Felixnën ñucácëxuan Pablonën cá

¹ Mëcën achúshi nëtë ꞌicëbë ca sacerdotenën cushicaman ꞌapu, Ananías, abë caniacëcë uni raíri ꞌimainun Tértulo cacë uni, an banati ꞌunáinracë, acamax Cesárea ëmanu cuancëxa. Cuanx bëbax ca Pablomi manánux Felixnu riquiancëxa.

² Riquian, suntárunën Pablo bëcëbëtan, ca Tértulonën Felix ësaquin cacëxa: —Mixmi ꞌapu ꞌain cananuna upitax bucuin. Sinánñuira ꞌixun camina min nuxnu upitax bucunun upí oquin bana mëníoin.

³ Mix camina usa ꞌai quixun sinánquin cananuna camabi ëmanuxun camabi nëtën, asábi ca quixun sinani, upitax bucuin.

⁴ Usa ꞌain camina mix upí nuituñu ꞌixun, nun ꞌitsaira ñuixunquinma bana ꞌitsamashi mi ñuixunmainun, nun cacëxun cuati ꞌain.

⁵ Ënë unix ca nun iscëx an camabi menua judíos unicama bëtsi bana ñuixunquin ubíoquin tsuáquirumicë ꞌianan nazareno cacë unicaman cushi a ꞌicën.

⁶ Usa ꞌixuan judíosma uni anu atsínmixun anuxun Nucën Papa Dios rabiti xubu ꞌatimamiti ꞌicëbi cananuna Moisë́snëan cuënëo nun cuati bana quicësabi oquin ꞌanuxun biixan.

⁷ Bicëbi ca comandante Lisiasnën aín suntárubë cuanxun nu bicuaënxanxa.

⁸ Nu bicuantancëx ca axa Pablomi manáncë unicamainsa minu uxun a ñuiquin mi cati ꞌicë quiax quiixanxa. Usa ꞌain camina caisa tanquin Pablo ñucáti ꞌain. Ñucácëxa quia cuaquin camina minbi nuxnu a ñui quicë banacamax ca asérabi ꞌicë quixun ꞌunánti ꞌain.

⁹ Usaquian Tértulonën Felix can, ca abë ucë judíos unicamanribi Tértulo quicësabi oi ca asérabi ꞌiaxa quixun cacëxa.

¹⁰ Ësaquian cacëxun cuatancëxun ca Felixnën Pablo axribia bananun quixun aín mëcënan sanánquin tanxuancëxa. Tanxuncëxun ca Pablonën cacëxa: —Minmi ꞌitsa baritian ënë menuxun uni itsi ñuia mimi uni manáncëxun cuacë ꞌicë cana racuëtima cuëënquin uisai carana ꞌia quixun mi cain.

¹¹ Usa ꞌain camina asérabi cara ꞌën mi cacë bana ꞌicë quixun ꞌunántisa tanquin bëtsi uni ñucáti ꞌain. Anuxun Nucën Papa Dios rabinux ꞌëx Jerusalénu cuaënxancë ca mëcën rabë́ ꞌimainun rabë́ nëtësa ꞌicën.

¹² Anu ꞌicë ca anuxun Nucën Papa Dios rabiti xubu ꞌimainun anu judíos unicama timë́ti xubucama ꞌimainun ëmacamanuxunribi abë cuëbícananquin ꞌën unicama tsuáquirumia uinu ꞌicë unínbi iscëma ꞌicën.

¹³ ꞌImainun ca ënë unicamaxa quicë bana ënëx ca asérabi ꞌicë quixuan an mi cati uni ꞌaíma ꞌicën.

¹⁴ Usa ꞌain cana mi cain, Nucën Papa Dios a ꞌën raracaman rabia, a cana ꞌënribi rabin. Aín bana, Moisésnën cuënëo ꞌimainun an Nucën Papa Dios quicë bana uni ñuixuncë unicamanribi cuënëo, a banacamax ca asérabi ꞌicë quixun cana ꞌunan. Usa ꞌaish cana a banacama quicësabi oía uá aín Bëchicë amia ax ꞌëbë sináncë unicamabë ami catamëtin, judíos unicama raírinëxa ami sinántisama tancëbëbi.

¹⁵ Atúan sináncësaribi oquin cana, bama ꞌaish ca uni upícama ꞌimainun uni ꞌatimacamaxribi baísquiti ꞌicë quixun sinanin.

¹⁶ Usaquin sináncë ꞌaish cana Nucën Papa Diosmi ꞌuchaima ꞌianan uisa unimibi ꞌuchaima ꞌiisa tanin. Usai ꞌinuxun cana camabi nëtën ñu ꞌatima ꞌaquinma ñu upíshi ꞌain.

¹⁷ Usa ꞌain cana ꞌitsa barin bëtsi bëtsi menu ꞌitancëx Jerusalénu utëcëan. Uquin cana nun aintsi ñuñumacama ꞌinánun quixuan uni raírinën ꞌë bëmicë curíqui bëan. Bëanan cana ꞌën curíquiribi anuxun Nucën Papa Dios rabiti xubunuxun ꞌinánuxun bëan.

¹⁸ Bëxun ꞌinánux cana judíos unicama ꞌicësaribiti nashi mëníocan. Anun mëníocati nëtë sënë́ncëbë cana ꞌën bëcë curíquicama ꞌinani anuxun Nucën Papa Dios rabiti xubunu cuan. Anua ca axa Asianuax ucë judíos unicaman ꞌë mëraxa. Axa ꞌëbë tsuáquiruti ꞌitsa uni ca anu ꞌaíma ꞌiaxa.

¹⁹ Asianuax ucë unicama ax ꞌëmi manántisa tani ca ënuxun mi ꞌë ñuiquin cai utsíanxa.

²⁰ Usa ꞌain ca atúxa ucëma ꞌain, axa Tértulobë ucë ënë unicaman mi cati ꞌicën, Jerusalénuxuan judíos ꞌapucaman ꞌë ñucácëbëtan cara uisa ñu ꞌacë ꞌë isaxa quixun.

²¹ Caquin ca, ꞌapucaman cuamainun, bama ꞌaish ca Cristo utëcëncëbë unicama baísquiti ꞌicë quixun ꞌën sináncë ꞌain camina ꞌëmi manáncani quiax ꞌëx quiixancë bana mi ñuixunti ꞌicën.

²² Usaía Pablo quia cuaquin ca Felixnën, Jesúsmi catamëti ca uni Nucën Papa Diosnan ꞌiti ꞌicë quixun ꞌunáncë ꞌixun nëtë itsin mëníonuxun, Tërtulo ꞌimainun abë ucë unicama ësaquin cacëxa: —Comandante Lisias ax ucëbëtan cana Pablo ñuimi quicë bana ënë mëníoti ꞌain.

²³ Catancëxun ca Felixnën aín capitán cacëxa: —Chiquíti rabanan camina Pablo bërúanti ꞌain. Bërúanquinbi camina añu cara ꞌaisa tania a ꞌamianan axa abë nuibanancë unicaman a istisa tania ismianan añu ñu cara cuëënia a ꞌaxunun ꞌamiti ꞌain.

²⁴ Usa ꞌain ca nëtë itsin Felix, judía xanua biá, Drusila cacë, abë utëcëancëxa. Uxun ca Cristomi catamëti ca uni Nucën Papa Diosnan ꞌiti ꞌicë quixun ñuia cuaisa tanquin Pablo camiacëxa.

²⁵ Camicëx uxuan, Jesucristomi catamëtia uni, aín ꞌuchacama tërë́ncë ꞌaish Nucën Papa Dios cuëëncësabi oi ꞌiti bana ñuixuanan ꞌatima ñu ꞌatëcëinsa tanquinbi tënëti banaribi ñuixuanan aín ñu ꞌatima ꞌacë cupía unin paë tanquin tëmërati bana ñuixuncëxun cuati ratúquin ca Felixnën Pablo cacëxa: —Camina cuanti ꞌain. A ꞌën ꞌati ñu ꞌaíma ꞌain cana amiribishi mi camitëcënti ꞌain.

²⁶ Usaquin cacë́xa cuan ca Felixnën —ꞌën chiquínun ca Pablonën ꞌë curíqui ꞌinánti ꞌicë —quixun sináncëxa. Usaquin sinánquin camicëxa cuancëbë cuancëbë ca Pablobë ꞌitsai banacëxa.

²⁷ Usaquin rabë́ baritia inúnmi ꞌapu ꞌaíshbi chiquíquin ca Felixnën judíos unicamabë upí ꞌiisa tanquin Pablo sipunubi ëancëxa. Felix chiquícëbë ca bëtsi uni Porcio Festo cacë, ax ꞌapu ꞌiacëxa.