Hechos 22 - Kashibo-Kakataibo Biblia

¹ ꞌËn aintsicama ꞌimainun caniacëcë unicama, uisai carana ꞌia quixun ꞌën asérabi mitsu ñuixunmainun ca cuat.

² Caía, hebreo banan Pablo banaia cuati ca pascësarua ꞌinun nëtë́acëxa. Nëtëtia ca Pablonën cacëxa:

³ —ꞌËx cana judíos uni, Cilicia menua ꞌicë ëma Tarso, anuax bacë́an ꞌain. Usa ꞌixunbi cana Jerusalén ënuax caniquin, an uni ꞌunánmicë uni, Gamaliel, an ꞌunánmicëxun quirica ꞌunánquin, nucën raracaman cuatia Moisésnën cuënëo bana upí oquin ꞌunáncën. ꞌImainun cana mitsúxmi ꞌicësaribiti Nucën Papa Diosan bana quicësabi oquin ꞌati cuëëancën.

⁴ Usa ꞌixun cana axa Jesucristomi sináncë unicama bëtsi bëtsi ocën. Bëtsi bëtsi oquin ꞌanan cana bëbu ꞌimainun xanuribi nëaxun tëmëramianan sipuanuxun buáncën.

⁵ Sacerdotnën cushicaman ꞌapubëtan ca caniacëcë unicamanribi ꞌunánxa, atun ca Damasconu ꞌicë judíos unicama ꞌinani cuanun quirica ꞌë ꞌináncëxa quixun. ꞌInáncëx cana axa Jesucristomi sináncë unicama Jerusalén ënuxun tëmëraminuxun bitsi cuancën.

Pablonëan axa usai Jesucristomi catamëa ñuia bana (Hch. 9.1-19; 26.12-18)

⁶ Bain cuani Damasconu bëbai cuanquin, ꞌën usai ꞌiti sináncëma ꞌaínbi ca bari xamáruti ꞌurama ꞌain, naínuax cushiira pëqui ichúquin nëbë́tsioraquin ꞌë pëcacëxa.

⁷ Usaquian pëcacëx menu nipacëxun cana ësaquian ꞌë cacë bana cuacën: “Saulo, Saulo, ¿uisoti caramina ꞌë bëtsi bëtsi oin?”

⁸ Ësaquian cacëxun cana cacën: “¿Ui caramina ꞌain? Nucën ꞌIbu Dios sapi camina ꞌain”. Cacëxun ca ꞌë cacëxa: “ꞌËx cana Jesús, Nazaretnu ꞌicë, ami bëtsi bëtsi ocë, a ꞌain”.

⁹ Usaquian ꞌë cacëbëtan pëquia isquinbi ca axa ꞌëbë cuancë unicaman ꞌëbëa banaia cuama ꞌicën.

¹⁰ Ësaquian cacëxun cana cacën: “Mix camina ꞌën ꞌIbu ꞌain. ¿Usa ꞌaish caramina añu ꞌën ꞌati cuëënin?” Cacëxun ca ꞌë cacëxa: “Niruquiani camina Damasconu cuanti ꞌain. Anuxun ca uisa ñu caramina ꞌati ꞌai quixun mi unin cati ꞌicën”.

¹¹ Usaquin cacëx menuax niruiabia axa pëquicë an bëtë́nancëx bëxuñu ꞌixun iscasmatia, axa ꞌëbë cuancë unicaman mëínbianquin buáncëx cana Damasconu bëbacën.

¹² Anu ca uni achúshi, Ananías cacë, an Moisésnën cuënëo bana quicësabi oquin ꞌacë ꞌiacëxa. Usa ꞌaish ca a unix Damasconu ꞌicë judíos unicaman, ax ca upí nuituñu ꞌicë quixun ñuicë ꞌiacëxa.

¹³ Usa ꞌaish ca ꞌë isi uacëxa. Uxun ca ꞌë cacëxa: Saulo, mix camina ꞌën xucën ꞌain. Camina amiribishi istëncënti ꞌain. Quixuan cacëxuinshi cana a isacën.

¹⁴ Iscëxun ca ꞌë cacëxa: Nucën Papa Dios, a nucën raracamanribi rabia, an ca mi caísacëxa, añu cara ax cuëënia quixun ꞌunánanmi aín Bëchicë aín sinan upíira aribi ꞌunánan ax banaia cuanun.

¹⁵ Usa ꞌixun camina min ami iscë ñucama ꞌimainun usaquian mi cacëxunmi cuacë banacamaribi camabi menu ꞌicë unicama ñuixunti ꞌain.

¹⁶ Usaími ꞌinúan caíscë ꞌaish camina bënëtishi nirui min ꞌuchacama tërë́nun Nucën ꞌIbu Jesúsmi catamëti nashimicë ꞌiti ꞌain.

Judíosma unicama bana ñuixunun Jesusan Pablo xua

¹⁷ Usa ꞌain cana Ananías quicësai ꞌitancëx Jerusalénu cuantëcëancën. Cuanx cana Nucën Papa Diosbë banai anuxun a rabiti xubunu cuancën. Anu ꞌixun cana namáquin iscësoquin Nucën ꞌIbu Jesús isacën.

¹⁸ Iscëxun ca ësaquin ꞌë cacëxa: Jerusalénu ꞌicë unicaman ca mínmi ꞌë ñuiquin cacëxunbi cuaisama tanti ꞌicën. Usa ꞌain camina bënëti Jerusalénuax cuanti ꞌain.

¹⁹ Usaquian cacëxunbi cana Nucën ꞌIbu Jesús cacën: Ënu ꞌicë judíos unicaman ca ꞌunánxa, ꞌën cana anua judíos unicama timë́ti xubucamanu cuanquin, axa mimi catamëcë unicama sipuanuxun buánan mëëa quixun.

²⁰ Estébanën an mi ñuiquin uni bana ñuixuncë, a maxaxan ꞌacanmainun cana ꞌëx anu ꞌixun cuëënquin an Esteban rëcë unicaman chupa bërúan.

²¹ Usaquin cacëxunbi ca Nucën ꞌIbu Jesusan ꞌë cacëxa: Camina cuanti ꞌain. Cana ꞌura ꞌicë judíosma unicamami bana ñuixunun mi xuti ꞌain.

Comandantenëx Pablobë bana

²² Usaquian Pablonën ñuixuncëxun pascësarua ꞌaish sëtë́xun cuatibi ca judíosma unicama ñuia quia cuati sharatëcëni quicancëxa: —Ënë uni ca bamati ꞌicën, ꞌaíma ꞌinun.

²³ Usai qui munuma banai sharati nishquin ca aín chupabi pëxun niquin me cupúcë bixun manámi mësuquin puacëxa.

²⁴ Usaría unicama ꞌia isquin ca comandantenën anua suntárucama bucucë xubunua Pablo atsínminun quixun aín suntárucama cacëxa. Canan ca, uisa cupí cara a ñui usai sharácania quixuan nu ñuixunun camina Pablo rishquiti ꞌai quixun cacëxa.

²⁵ Usaquian comandantenën cacëxuan rishquiminuxun nëamicëxunbi ca Pablonën anua ꞌicë capitán cacëxa: —¿Mitsúnmi románo uni, añu cara ꞌaxa quixun upí oquin cuaxunmashi rishquiti cara asábi ꞌic?

²⁶ Ësaía Pablo quia cuabiani cuanxun ca capitanën ësaquin comandante cacëxa: —Ënë unix ca románo ꞌaish quiricañu ꞌicën. Usa ꞌain camina uisaquin caramina ꞌaisa tani usoquin ꞌanuxun upí oquin sinánti ꞌain.

²⁷ Usaquian cacëx anu cuanquin ca comandantenën Pablo ñucáquin cacëxa: —¿Asérabi caramina mix románo ꞌaish quiricañu ꞌain? Cacëxun ca Pablonën cacëxa: —Usa cana ꞌain.

²⁸ Cacëxun ca comandantenën cacëxa: —Románo ꞌaish quiricañu ꞌinuxun cana ꞌën ꞌitsaira curíqui cupíocën. Quia ca Pablonën cacëxa: —ꞌËn papan Romanu ꞌicë quiricañu ꞌixun bëchia ꞌaish cana ꞌëx románo ꞌain.

²⁹ Usaía quia cuaquin ca axa a rishquinux cuaíncëcaman Pablo ëancëxa. Ëncëbë ca comandantenëxribi, románo ꞌaísha quiricañu ꞌicëbi cana Pablo nëamia quixun sinani, racuë́acëxa.

Judíos cushin ꞌapucaman Pablo ñucá

³⁰ Usa ꞌain ca pëcaracëbëtan comandantenën añu cupí cara Pablomi judíos unicama manania quixun ꞌunántisa tanquin, anúan nëacë manë risi tubunun quixun cacëxa. Canan ca sacerdotenën cushicama ꞌimainun judíos unibunën cushicaman ꞌapucama timënun quixun aín unicama cacëxa. Cacëxuan an cacësabi oquin timëan ca comandantenën Pablo axa timë́cë ꞌapucaman isnun chiquímiacëxa.