Hechos 21 - Kashibo-Kakataibo Biblia

Jerusalénu Pablo cuan

¹ Buáncëx ꞌiruax Efesonu ꞌicë unicama ëbiani cuanx cananuna Cos cacë nasínu cuancën. Anuax coonx cananuna Rodas cacë nasínu cuanx, anuaxribi Pátara cacë ëmanu bëbacën.

² Bëbaxun cananuna anua axa manë nuntin Fenicia menu cuanti uni raíri mëracën. Mërax cananuna a nuntin atubë cuancën.

³ Cuanxun Chipre nasía mëmiu ꞌicë inubiani cananuna Siria menu cuancën. Cuanx cananuna anu ꞌicë unicaman buáncë aín ñucama a nanpáxunti cupí Tiro ëmanu cuancën.

⁴ Usai Tironu bëbaxun, axa Jesucristomi catamëcë unicama mërax, cananuna mëcën achúshi ꞌimainun rabë́ nëtën atubë anu ꞌiacën. Nuxnu anu ꞌain ca Nucën Papa Diosan Bëru Ñunshin Upitan sinánmicëxun a unicaman uisai cara Pablo ꞌiti ꞌicë quixun ꞌunánquin Jerusalénu cuanxma ꞌinun quixun cacëxa.

⁵ Usaquian cacëbëbi cananuna a nëtëcama inúcëbë cuancën. A ëmanuax cuancëbë ca axa Jesucristomi catamëcë unicamax aín xanu ꞌimainun aín bëchicëbëbi nubë masinu cuancëxa. Cuanx cananuna rantin puruni tsóbuax masinuax Nucën Papa Diosbë banacën.

⁶ Usai ꞌitancëxun atubë ꞌicucananquin —cuanmainun ca bërúanx ꞌican —quixun atu cai cananuna manë nuntinu ꞌiruacën. ꞌIrucëbë ca a unicamax aín ꞌicënu cuantëcëancëxa.

⁷ Anuax cuanx cananuna Tolemaida ëmanu cuancën. Cuanx bëbaxun axa Jesucristomi catamëcë unicama catancëx cananuna achúshi nëtën atubë ꞌiacën.

⁸ Anuax pëcaratëcëncëbë cuanx cananuna Cesárea ëmanu bëbacën. Bëbax cananuna Felipenën xubunu abë ꞌi cuancën. Felipe ax ca an Jesús ñuiquin unicama bana ñuixuncë ꞌianan mëcën achúshi ꞌimainuan rabë́ uni Jerusalénuxun an piti mëtícanun caíscan acama achúshi ꞌiacëxa. A Felipebë cananuna ꞌiacën.

⁹ Aín bëchicë ca rabë́ ꞌimainun rabë́ xanu bënëñuma ꞌiacëxa. A xanucaman ca Nucën Papa Diosan sinánmicëxun bana uni ñuixuancëxa.

¹⁰ Anu ꞌitsa nëtë ꞌicëbë ca an Nucën Papa Diosan sinánmicëxun bana uni ñuixuncë uni achúshi Agabo cacë, ax Judea menuax bëbacëxa.

¹¹ Bëbax nu isi uxun anun Pablo tsitëcërëquicë, a biax anun tanëacanan anun mënëacati ca quiacëxa: —Nucën Papa Diosan Bëru Ñunshin Upí ca ësari quia: Ënën ꞌibu ca ësaribi oquin nëaxun Jerusalénu ꞌicë judíos unicaman judíosma unían binun ꞌinánti ꞌicën.

¹² Ësaría Agabo quia cuaquin ca nubëtan Cesáreanu ꞌicë unicamanribi, Jerusalénu cuanxma ꞌinun quixun Pablo cacëxa.

¹³ Cacëxbi ca Pablo quiacëxa: —¿Añu cupí caramina usai banai bëunan mëscúquin ꞌë masá nuitumin? Jerusalénuxuan Nucën ꞌIbu Jesúsnan cupí ꞌë nëacancëxbi cana bënë́tima ꞌain. Usoquin nëanan ꞌë ꞌacancëxbi cana asábi ꞌiti ꞌain.

¹⁴ Usai quia Jerusalénu cuancatsi quia cananuna Pablo sinanamicasmacën. Usa ꞌain cananuna quiacën: —Nucën ꞌIbu Dios cuëëncësabi oi ca ꞌiti ꞌicën.

¹⁵ Usa ꞌain cananuna ñu mëníobiani Cesáreanuax Jerusalénu cuancën.

¹⁶ Cuancëbë ca nubë Cesáreanuaxa ax Jesucristomi catamëcë unicama raíri cuancëxa. Acaman ca Chiprenuax ucë uni Mnasón, axa ꞌitsa baritian Jesucristomi catamëcë, a ꞌunáncë ꞌixun aín xubunu anunu ꞌinun nu buáncëxa.

Pablo Jacobo isi cuan

¹⁷ Usa ꞌain ca Jerusalénu bëbaia axa Jesucristomi catamëcë unicaman cuëënquin nu biacëxa.

¹⁸ Usaquian bicëx ꞌinëti cananuna pëcaracëbë Pablobë Jacobo isi cuancën. Abë ca axa Jesucristomi catamëcë unicaman cushicamaribi ꞌiacëxa.

¹⁹ ꞌIcë —¿uisa caina ꞌai? —quixun catancëx atubë banaquin ca Pablonën uisaira oquin cara Nucën Papa Diosan ꞌamicëxun, anua judíosma unicama ꞌicë ëmacamanuxun ñu ꞌaxa quixun ñuixuancëxa.

²⁰ Usaquian Pablonën ñuixuncëxun ca —asábi ca —quixun caquin Nucën Papa Dios rabiacëxa. Rabitancëxun ca Pablo ësaquin cacëxa: —Asábi ca. Usa ꞌaínbi camina ꞌunanin, ꞌaisamaira judíos unicamax ca Jesúsmi sinánxa. Sinánxunbi ca ësaquinribi sinania, Moisésnëan usai judíos unicama ꞌiti cuënëo bana quicésabi oi cananuna ꞌiti ꞌai quixun.

²¹ A unicamax ca quia, min isamina bëtsi bëtsi menua judíos unicama, Moisésnën usai judíos unicama ꞌiti cuënëo bana quicësabi oi ꞌiaxma ꞌinun quixun can. Canan isamina judíos unicaman ꞌacësaribi oquin bëbu tuá ꞌunántioxunma ꞌanun quixunribi can.

²² An usa bana cuacë unicamax ca mi ucë cuati timë́ti ꞌicën. ¿Usa ꞌain caramina uisai ꞌiti ꞌain?

²³ Nun ësaquin cacësabi oquin camina ꞌati ꞌain. Ënu ca rabë́ ꞌimainun rabë́ judíos uni, an Nucën Papa Dios cacësabi oi ꞌi sënë́nquian aín bu tëamitishi ꞌicën.

²⁴ Ënë uni buani camina abë judíos uni ꞌicësaribiti ꞌinux mixribi nashi mëníocati ꞌain. Mëníocanan camina a unicamaxa Moisésnën cuënëo bana usai ꞌiti quicësabi oi ꞌianan aín bu tëacë ꞌinun cupíoquin mëníocamiti ꞌain. Minmi usoia isquin ca judíos unicaman ꞌunánti ꞌicën, mix camina Moisésnën usai judíos unicama ꞌiti cuënëo bana quicësabi oi ꞌi quixun. ꞌUnánan ca mimia manáncë bana ax ca cëmë ꞌicë quixun ꞌunánti ꞌicën.

²⁵ Mixmi judío uni ꞌaish usai judíos unicama ꞌiti bana quicësabi oi ꞌiti ꞌaínbi ca nun sináncëx judíosma unicamax usai ꞌitima asábi ꞌicën. Usaquin sinánquin cananuna ësaquin ꞌaxun acama quirica buánmian: Judíos unicama usai ꞌiti banacama quicësa oquin ꞌaquinma camina ësaquinshi ꞌati ꞌain, unínbia uniocë ñu rabiquian ꞌacë ñuina camina pitima ꞌain, ꞌimainun camina ñuina imi pitima ꞌain, ꞌimainun camina tëtsë́cacë ñuina pitima ꞌain, ꞌimainun ca bëtsi xanubë ꞌima uni aín xanubëishi ꞌiti ꞌicën.

Roma ëmanua Pablo cuan ñuicë bana (21.27-28.31) Anuxun Nucën Papa Dios rabiti xubunuxun Pablo bican

²⁶ Usaquian abëa ꞌicëcamabëtan Jacobonën cacësabi oquin, rabë́ ꞌimainun rabë́ uni a buonx ca Pablo judíos unicama ꞌicësaribiti nashi abë mëníocacëxa. Mëníocanan ca uisa nëtën cara anun mëníocati nëtë sënë́nti ꞌicë quixun canan uisa nëtën cara Nucën Papa Dios rabiquin ñuina rëti ꞌicë quixun anu ꞌicë sacerdotebëtan mëníoi anuxun Nucën Papa Dios rabiti xubunu cuancëxa.

²⁷ Anun mëníocati nëtë mëcën achúshi ꞌimainun rabë́ sënë́nti ꞌuramara ꞌain ca judíos unicama raíri, Asianuax ucë, acaman Pablo anuxun Nucën Papa Dios rabiti xubunua isacëxa, isquian tsuácarucëxun Pablo biacëxa.

²⁸ Bitsi ca munuma cuënishi quicancëxa: —Israel unicama, nu ca ꞌaquin. Ënë unix ca an camabi menu cuanquin judíos unicamamia ꞌinun quixun unicama ñuixuncë a ꞌicën. Usa ꞌixun ca nun cuati bana Moisésnën cuënëo quicësabi oi ꞌiaxma ꞌinun quixun canan, anuxun Nucën Papa Dios rabiti xubu ënë ꞌatimaquin ñuiquinribi unicama caia. Usa ꞌixun ca anuxun Nucën Papa Dios rabiti xubunu judíosma, axa griego banan banacë unicama raíriribi atsínmiaxa. Atsínmixun ca ënë xubu upí ꞌatimamiaxa —quiax.

²⁹ Jerusalënuaxa abë nitsia isbaiëxanx ca Efesonu ꞌicë uni, Trófimo, a Pablonën anuxun Nucën Papa Dios rabiti xubunu atsínmicësa sinani usai quicancëxa.

³⁰ Usaía quicëbë tsuáquirui abácuatsini uquin ca Jerusalénu ꞌicë unicaman biquin, Pablo anuxun Nucën Papa Dios rabiti xubu ëman nirínbianquin bënë́nquinshi xëcuëcama xëpuacëxa.

³¹ Usaquin ꞌai Jerusalénu ꞌicë camabi uni tsuáquirucëa ñuia ca comandantenën cuacëxa.

³² Usaquin cuaquin aín suntárucamacëñun suntárunën cushicama timëtancëxun abáquianquin buanx ca comandante anua unicama ꞌicë anu bëbacëxa. Bëbaia isquin ca mëëquinbi Pablo ëancëxa.

³³ Usocëbë uquin ca Pablo biquin comandantenën aín suntárucama manë risi rabëtan tëcërëcanun quixun cacëxa. Caquin ca ui cara ax ꞌicë quixun ñucánan añu cara ꞌaxa quixun ñucácëxa.

³⁴ Ñucácëbëbia unicamax bëtsi bëtsi bana ñui sharácëbëtan upí oquin cuaquinma ca comandantenën anua suntáru bucucë xubunua buánun quixun cacëxa.

^35-36 Cacëxuan buáncëbë, a caxu cuanquin catícabiani ca unicama sharati tsuáquirui quiacëxa: —Ca bamati ꞌicën. Usai quia tsuáquirucëbëtan ca unínma ꞌaia quixun suntárucaman atun xubunua ꞌicë tapitia ꞌurama ꞌain Pablo ꞌicúquin birubianquin buáncëxa.

Unicamax ami manáncëxuan Pablonën ca

³⁷ Usoquin buánxuan atun xubunu suntárucaman atsínmicëxunbi ca Pablonën comandante cacëxa: —¿Bananun caina ꞌë ꞌimitima ꞌain? Cacëxun ca comandantenën cacëxa: —¿Griego banan banati caina ꞌunan?

³⁸ ¿Mix caramina Egiptonu ꞌicë uni an bari itsin, ꞌapumi nishquin unicama tsuáquirumitancëxun uni ꞌaquin cuatro mil uni, anu uni ꞌicëma menu buáncë, ama ꞌain?

³⁹ Usaquin ñucácëxun ca Pablonën cacëxa: —ꞌËx cana judío uni ꞌain, Cilicia menua ꞌicë ëma cha, Tarso, anu ꞌicë. ¿Usa ꞌain caramina ꞌën axa tsuáquirucë unicama canun ꞌë camitima ꞌain?

⁴⁰ Cacëxun ca comandantenën —camina cati ꞌai —quixun cacëxa. Cacëx tapitinu nixun mëcënan sanáncëxa nëtëtia ca Pablonën hebreo banan banaquin ësaquin unicama cacëxa: