Hechos 20 - Kashibo-Kakataibo Biblia

Macedonia me ꞌimainun Grecia menu Pablo cuan

¹ Usaquin cacë́xa cuancëbëtan ca Pablonën axa Jesucristomi catamëcë unicama camicëx aia ꞌësë́anan bana ñuixuntancëxun —cuanmainun ca ꞌican —quixun atu cabiani Macedonia menu cuancëxa.

² Cuanquin ca a menua ꞌicë ëmacamanua ꞌicë axa Jesucristomi catamëcë unicama, ëníma Jesúsmi catamënun quixun caquin sinánmiacëxa. Sinánmibiani ca Grecia ꞌicëbi Acayaribi cacë menu cuancëxa.

³ Cuanx bëbax ca anu rabë́ ꞌimainun achúshi ꞌuxë ꞌiacëxa. Anu ꞌaish ca manë nuntin Siria menu cuanti sinánquinbi, judíos unicamaxa ami ꞌësë́nania ñuia cuati sinanacëxa. Sinanabiani ca Macedonia anu pain bain cuancëxa.

⁴ Cuancëbë ca Berea ëmanu ꞌicë uni, Sópater, a ꞌimainun Tesalónica ëmanu ꞌicë uni rabë́, Aristarco ꞌimainun Segundo, ꞌimainun Derbe ëmanu ꞌicë uni, Gayo, ꞌimainun Asia menu ꞌicë unicama, Timoteo, Tíquico, Trófimo, acamax Pablobë cuancëxa.

⁵ Cuanx Macedonia menu bëbacëbë ca atux pain Troas ëmanuxun nu caini cuani nu ëbiani rëcuë́nquiancëxa.

⁶ Usa ꞌain cananuna anun chamiti ñucëñunma ꞌacë pán anun piti nëtë inúmitancëx, nuxribi Filiposnuax manë nuntin cuanx, mëcën achúshi nëtë ꞌicëbë Troasnu bëbacën. Bëbax cananuna mëcën achúshi ꞌimainun rabë́ nëtë anu ꞌiacën.

Troas ëmanu Pablo ꞌiá

⁷ Anu ꞌaish cananuna domingo nëtën axa Jesucristomi catamëcë unicamabë pán tucapaxun pi timë́acën. Timë́an ca Pablonën, imëishinu cuanti ꞌain, ñantónpaquin ꞌuran bana ñuixuancëxa. Usoquin ca imë́ naëx ꞌitámainun ꞌacëxa.

⁸ Usoquin ca Pablonën xubu cata itsi manáinra ꞌicë, anua lamparín ꞌitsaira tiríocë ꞌicë anunu timë́cë, anuxun bana ñuixuancëxa.

⁹ Usaquian Pablonën manámi ꞌicë xubu cata rabë́ ꞌimainun achúshi, anuxun bana ñuixuncëbëbi ca bëná uni achúshi, Eutico cacë, ax xubu manámia ꞌicë xëcuë anu tsotax, ꞌuxcënan tënáncëx ꞌuxax ëman nipacëacëxa. Nipacëtía bamaia ca bicancëxa.

¹⁰ Bicëbë xubunuax ꞌibúquianquin bëná uni ꞌicúquin bitsi rantin purúnquin ca Pablonën anua ꞌicë unicama cacëxa: —Ratúaxma ca ꞌican, ca uinacëtia.

¹¹ Catancëx manan ꞌirutëcënxun, pán tucapaxun pianan pëcaratamainun bana ñuixunëti, ca Pablo atu ëbiani cuancëxa.

¹² Cuancëbë ca bëná uni Eutico axa chuáma ꞌaish asábi ꞌicë buani cuëënquiani cuancancëxa.

Troasnuaxa Pablo Miletonu cuan

¹³ Usa ꞌain cananuna Pablonëan taën cuainsa tanquin, anua bitsi cuanun cacëx, nux pain rëcuë́nquiani manë nuntin Asón cacë ëmanu cuancën.

¹⁴ Cuanx bëbaquin Asónua Pablo bibiani cananuna abë nuntin Mitilene cacë ëmanu cuancën.

¹⁵ Mitilenenuax coonx cananuna Quío cacë nasí rapasu bëbacën. Bëbax anuax coonx cananuna Samos cacë nasínu bëbacën. Bëbatancëx cananuna anu ꞌicë ëma Trogilio anuax pain tantiacën. Tanti anu ꞌinëti cuanx cananuna Mileto cacë ëmanu bëbacën.

¹⁶ Anuxun ca Pablonën Pentecostés cacë nëtë ꞌiisama pain ꞌain Jerusalénu bëbati sinánquin ꞌuran Asia menu ꞌiisama tanquin, Efeso ëma ꞌurama ꞌaínbi anu cuantima sináncëxa.

Efesonuaxa ax Jesucristomi catamëcë unin cushicama Pablonën bana ñuixuan

¹⁷ Usaquin sinánxun ca Miletonuxunbi Efesonua ꞌicë axa Jesucristomi catamëcë unin cushicamaxa anu unun quixun Pablonën camiacëxa.

¹⁸ Camicëx aia ca cacëxa: —Asia menu utancëx carana mitsubë ꞌaish uisai ꞌëx ꞌia quixun camina mitsun ꞌunanin.

¹⁹ ꞌËx mitsubë ꞌixun cana mitsúnmi ꞌë rabiti sinánquinma axa cuëëncësabi oi ꞌiquin Nucën ꞌIbu Jesucristo ñuiquin uni bana ñuixuan. Usoquin ꞌai cana bëunan mëscúanan judíos unicaman ꞌë bëtsi bëtsi ocëx ꞌaisamaira tëmëran.

²⁰ Usai ꞌiquinbi cana ënquinma uisai caramina Nucën Papa Dios cuëëncësabi oi ꞌinux upí ꞌiti ꞌai quixun racuë́quinma mitsu bana ñuixuan. Usaquin nëtë́quinma mitsúxmi timë́cë ñuixuanan cana mitsun xubucamanuxunribi mitsu bana ñuixuan.

²¹ Ñuixunquin cana judíos unicama ꞌimainun judíosma unicamaribi Nucën Papa Dios cuëëncësa oi ꞌinux sinanatía Nucën ꞌIbu Jesucristomi catamënun quixun can.

²² Usa ꞌain cana Nucën Papa Diosan Bëru Ñunshin Upitan sinánmicësabi oi Jerusalénu cuanin, uisai carana anuax ꞌiti ꞌai quixun ꞌunanimabi.

²³ An ꞌunánmicëxun cana ꞌunanin, uinu ꞌicë ëmanu carana cuani anuxun ca Nucën Papa Diosan Bëru Ñunshin Upitan ꞌë caia, anuax cana sipuocancë ꞌianan unían ꞌatimocëxun ꞌaisamaira oquin tëmëranuxun ꞌai quixun.

²⁴ Usaquian ꞌunánmicëxbi cana ꞌëx uisai carana ꞌiti ꞌai quixun sinani bënëtiman. Bamanuxunbi Nucën ꞌIbu Jesusan cacësabi oquin ꞌai cuëënquin sënë́onti cana cuëënin, Nucën Papa Diosan ca nuibaquin unicama ainan ꞌinun ië́misa tania quixuan camabi unin ꞌunánun.

²⁵ Usaquin sinánquinbi cana ꞌunanin, uicama carana Nucën Papa Diosan uni ꞌinun bana ñuixuan acaman ca ꞌë istëcënuxunma ꞌaia quixun.

^26-27 Mitsúnmi ꞌë istëcëncëxunmabi cana ësoquin mitsu cain, uisai cara Jesucristo cupí aín unicamax, an mëníosabi oi ꞌiti ꞌicë quixuan Nucën Papa Diosan ꞌë ꞌunánmicë, acama ñuiquin cana mitsuishima camabi ëmanu ꞌicë unicamaribi ñuixuan. Usa ꞌain ca ꞌën Jesucristo ñuiquin bana ñuixunia cuatibia ami catamëcëma ꞌain ꞌën ꞌuchama ꞌicën.

²⁸ Usa ꞌain camina mitsun mina ñu ꞌaisama ꞌai bërúancati ꞌain. Bërúancanan camina axa Jesucristomi catamëcë unicamaribia upí ꞌinun bërúanti ꞌain. Nucën Papa Diosan Bëru Ñunshin Upitan ca usoquinmi axa Jesucristomi catamëcë unicama bërúanun mitsu ꞌimiaxa. A unicamax ca axa bama cupí Nucën ꞌIbu Jesucristomi catamëcë ꞌaish aín uni ꞌicën.

²⁹ ꞌËn cana ꞌunanin, ꞌëx cuancëbë ca uni raíri uti ꞌicën. Uxun ca axa ami sináncë unicama, Jesucristomi catamëti bana a ënun quixun paránti ꞌicën. ꞌInúanëan bëtsi biquin carnero tsuácacësaribi oquin ca a unin axa ami sináncë unicama Jesús manunun quixun parántisa tanti ꞌicën.

³⁰ Ësaquinribi cana ꞌunanin, axa Jesucristomi catamëcë unicamabë timë́cë unicama bëtsi bëtsin ca Nucën Papa Dios cuëëncësabi oquin ñuixunquinma, cëmë bana ñuixunti ꞌicën, a bana quicësabi oi isa ꞌinun quixun.

³¹ Usa ꞌain camina unin paráncëma ꞌinuxun upí oquin sináinrati ꞌain. Camina sinánti ꞌain, rabë́ ꞌimainun achúshi barin cana ñantánbi nëtë́nbi nëtë́quinma bëunan mëscúquin mitsu ꞌësëan.

³² Bërí cana an bërúanun Nucën Papa Dios mitsu ñucáxunin. An ca nuibaquin mitsu ami cushinun ꞌimianan axa ami sináncë unicama ꞌimicësaribi oquin asérabi ainan ꞌaíshmi ax cuëëncësa oíshi ꞌinun mitsu ꞌimiti ꞌicën.

³³ ꞌËn cana curíqui ñucánan chupa uibi ñucácëma ꞌain.

³⁴ Mitsúnbi camina ꞌunanin, ꞌën mëcënanbi ñu mëëxun cana ꞌën piti ꞌimainun ꞌën chupa bianan ꞌëx abë ꞌicëcamaribi bixúan.

³⁵ Usaquin ñu mëëcë ꞌixun cana mitsu ꞌunánmia, mitsúnribimi usoquin ꞌanun, ñuñuma uni ñu ꞌinánuxun. Usaquin ꞌati sinani ca Nucën ꞌIbu Jesús ësai quiacëxa: “A unin ñu ꞌináncë uni ax cuëëncësamaira oi ca an uni ñu ꞌináncë uni ax cuëënia”. A bana camina manuquinma sinánti ꞌain.

³⁶ Ësaquin catancëx ca Pablo rantin puruni tsóbuti anu ꞌicë unicamabë Nucën Papa Diosbë banacëxa.

^37-38 Banai sënënia ca —ꞌë camina istëcënuxunma ꞌai —quia oi camáxbi masá nuituti abë ꞌicúcanani bëunan mëscúquin bërúanxa cuanun caquin manë nuntinu ꞌirumiquin Pablo buáncëxa.