Hechos 19 - Kashibo-Kakataibo Biblia

Pablo Efesonu ꞌiá

¹ Corinto ëmanua Apolos ꞌain ca Pablo matá me sapáncama oi cuantancëx Efesonu bëbacëxa. Bëbaxun ca anu ꞌicë axa Jesucristomi sináncë unicama mëracëxa.

² Mëraxun ca ñucácëxa: —¿Mitsúxmi Jesucristomi sináncëbë cara aín Bëru Ñunshin Upí mitsunu uax? Quixuan ñucácëxun ca cacëxa: —Nun cananuna Jesucristomi catamëti ca uni aín Bëru Ñunshin Upíñu ꞌia quixun ñuia cuacëma ꞌain.

³ Usaía quia ca Pablonën atu cacëxa: —¿Añu sinani caramina nashimicë ꞌian? Cacëxun ca cacëxa: —Juanëan uni ꞌunánmicë bana sinani cananuna nashimicë ꞌian.

⁴ Cacëxun ca Pablonën cacëxa: —ꞌAtimaquin sináncë ꞌixunbia sinanatia ca Juanën uni nashimiacëxa. Nashimiquin ca cacëxa, axa a caxu uti uni achúshi, Jesús, axa utia judíos unicaman caíncë, Cristo, ami sinánun quixun.

⁵ Usaía Pablo quia cuati ca Nucën ꞌIbu Jesúsmi catamëti a unicamax nashimicë ꞌiacëxa.

⁶ Usa ꞌain ca a unicama Pablonën aín mëcënan ramë́cëbë atunu Nucën Papa Diosan Bëru Ñunshin Upí uacëxa. Usaría ꞌicëbë unin ꞌunáncëma banan bananan ca a unicaman, usaquian Nucën Papa Diosan sinánmicë bana unicama ñuixuancëxa.

⁷ Anu ꞌicë uni nashimicëcama ax ca mëcën rabë́ ꞌimainun rabë́ unisa ꞌiacëxa.

⁸ Usa ꞌain ca Pablonën anu rabë́ ꞌimainun achúshi ꞌuxë ꞌiquin, anua judíos unicama timë́ti xubunuxun racuë́quinma upí oquin Jesús ñuiquin bana ñuixuancëxa. Ñuixunquin ca, Jesucristomi catamëti ca uni Nucën Papa Diosnan ꞌiti ꞌicë quixuan ꞌunánun anu ꞌicë unicama ñuixuancëxa.

⁹ Ñuixuniabi ca raírinën masáquin sinánquin cuaisama tancëxa. Usaquin cuaisama tani ca anu timë́cë unicaman cuamainunbi —Jesúsmi sinánti ca ꞌaisama ꞌicë —quiax quiacëxa. Usai quicëbë, anuax chiquíquianquin ca Pablonën axa Jesucristomi catamëcë unicama buani, Tirano cacë unían anuxun uni ꞌunánmicë xubu, anu cuancëxa. Cuanxun ca anuxun camabi nëtën bana ñuixuancëxa.

¹⁰ Usaquin ca Pablonën rabë́ barin anuxun bana ñuixuancëxa. Pablonëan usaquin ñuixuncëxun ca Asianu ꞌicë unicama, judíos unicama ꞌimainun judíosma unicamanribi Nucën ꞌIbu Jesús ñuiquian ñuixuncë bana cuacëxa.

¹¹ Cuacëbëtan ca Pablonën anuxun Nucën Papa Diosan ꞌamicëxun uni itsin ꞌacëma ñu ꞌacëxa.

¹² Usa ꞌain ca amia Pablo ratíquicë chupa ꞌimainun pañun abia anu buania mëëi uni ñucëcamax pëxcúacëxa, pëxcúmainun ca ñunshin ꞌatimacamaxribi uninuax chiquíacëxa.

¹³ Nucën Papa Diosan ꞌamicëxuan Pablonën usoquin ꞌaia istancëxun ca an cuaínbëquini niquin uninua ñunshin ꞌatima chiquíncë judíos unicama raírinën, Nucën Papa Diosan ꞌamicëxuan Pablonën ꞌacësaribi oquin ꞌati sináncëxa. Usaquin sinánquin ca uninu ꞌicë ñunshin ꞌatima cacëxa: —Pablonëan unicama ñuixuncë Jesús an ꞌamicëxun cana mi cain, ënë uninuax ca chiquit —quixun.

¹⁴ Usaquian an ñu ꞌacë uni raírinëx ca judíos sacerdotenën cushicama achúshi, Esceva cacë, aín bëchicë mëcën achúshi ꞌimainun rabë́ ꞌiacëxa.

¹⁵ Usa ꞌixuan cacëxunbi ca ñunshin ꞌatimanën Escevanën bëchicëcama cacëxa: —Jesús ꞌimainun cana Pabloribi ꞌunan. Usa ꞌixunbi cana ui caramina ꞌai quixun mitsu ꞌunaniman.

¹⁶ Quixun cai chirínquianx anu ꞌiruquin ca ñunshin ꞌatimañu uni an cupinunma atu mëëacëxa. Mëëquian cushíinra mëëcëx ca chupañuma ꞌaish aín nami tëátëábu ꞌaish xubunuax chiquiti abácëxa.

¹⁷ Usoquian ꞌacëa ñuia ca Efesonu ꞌicë judíos unicama ꞌimainun judíosma unicamanribi cuacëxa. Cuati racuë́quin ca: —Nucën ꞌIbu Jesús, ax ca cushiira ꞌicë —quiquin a rabiacëxa.

¹⁸ Usaía ꞌicëbë uxun ca axa Jesúsmi catamëcë ꞌitsa unin —usaribi oquin cana ꞌën ñu ꞌatima ꞌacë —quixun chiquinacëxa.

¹⁹ Usomainun ca an ñubë́ti ꞌunáncë unicaman anua ñubë́ti ꞌunáncë quiricacama bëxun, camabi unían ismainun nëëancëxa. Usa ꞌain ca a quiricacaman cupí cincuenta mil curíquisa ꞌiacëxa.

²⁰ Usaría ꞌimainun ca a ñuiquin bana ñuia cuati Jesucristomi catamëti unicamax amiribi amiribi ꞌitsacëxa.

²¹ Usa ꞌain ca Pablonën Macedonia me ꞌimainun Acaya menu pain cuantancëx Jerusalénu cuanti sináncëxa. Jerusalénu cuanti sinani ca quiacëxa: Anu pain ꞌitancëx cana Roma ëmanuribi cuanti ꞌain.

²² Usaquin sinánxun ca Pablonën an ꞌaquincë uni rabë́, Timoteo ꞌimainun Erasto, a Macedonia menua cuantánun xuacëxa. Xutancëx ca Asia menua ꞌicë ëma Efeso, anu ꞌëora pain í bërúacëxa.

Efesonu ꞌicë unicamaxa tsuáquirua

²³ Efesonuaxa Pablo cuancëma pan ꞌain ca Jesucristo ñuicë bana cuaisama tani, a ëmanu ꞌicë unicamax tsuáquiruacëxa.

²⁴ Usaía ꞌinun ca Demetrio, an uxua manë unioquin ñu chucúmaracama ꞌati ꞌunáncë, an tsuáquirumiacëxa. Demetrio an anuxun diosa Artemisa cacë rabiti xubu iscësa ꞌitánun chamaburatsu oquin manë uxua uniocëxa. Unioxun maruquin ca a ꞌimainun abëtan ñu ꞌacë unicamanribi ꞌitsaira curíqui biacëxa.

²⁵ Demetrionën ca abëtan usoquin ꞌacë unicama ꞌimainun anribia usaribi oquin ñu ꞌacë unicamaxa, an camicëx timëtia cacëxa: —Mitsun camina ꞌunanin, ënë ñu ësoquin ꞌatancëxun maruquin cananuna anun nun ñu maruti curíqui bitsin.

²⁶ Usa ꞌaínbi camina mitsun Pablo isanan an ñuicë banaribi cuatin. An ca Efeso ëmanushima, Asia menu ꞌicë ëmacama oquin, unían a rabinuxun ꞌacë ñu ax ca asérabi diosma ꞌicë quixun caquin, a rabixunma ꞌanun caquin ꞌaisamaira uni sinánmiaxa.

²⁷ Usoquian sinánmicëxun ca unin nun nu uniocë uxua manë ꞌacë xuburatsu bitima ꞌicën. ꞌImainun ca Diananëxa cushi ꞌaínbi unicaman anuxuan a rabicë xubu cha manuti ꞌicën. Diana axa Asianu ꞌicë unicama ꞌimainun camabi menu ꞌicë unicaman rabicë ꞌaíshbi ca rabicëma ꞌiti ꞌicën.

²⁸ Usai Demetrio quia cuati ca nishi sharati tsuáquirui quicancëxa: —Cushiira ca Diana ꞌicën. Efesonu ꞌicë unicaman rabicë diosa ca Diana ꞌicën.

²⁹ Usari quicëbë ca Efeso ëmanu ꞌicë unicama sharati tsuáquiruacëxa. Tsuáquiruquin Macedonia menu ꞌicë uni rabë́, Gayo ꞌimainun Aristarco, axa Pablobë nicë, a bixun nirínbianx ca anua unicama timë́cë xubunu abáquianx atsíancëxa.

³⁰ Atsíncëbëa anu ꞌicë unicama cai axribi atsíntisa taniabi ca axa Jesucristomi catamëcë unicaman —miribima bitsia atsíanxma ca ꞌit —quixun Pablo cacëxa.

³¹ Camainun ca an ꞌunáncë Asia menu ꞌicë ꞌapu raírinënribi anu timë́canti xubunu atsíanxma ꞌinun quixun Pablo camiacëxa.

³² Usa ꞌain ca axa timë́cë unicamax tsuáquirui, raírinëxa bëtsi ñu ñui quimainun raírinëxribi bëtsi ñu ñui banai sharácëxa. Sharáquinbi ca aín patsanën añu ꞌanux cara timë́axa quixun ꞌunánma ꞌicën.

³³ Pablomia ꞌicësaribiti ca anua timë́cë unicamax anua atubë ꞌicë judíos unicamamiribi nishacëxa. Usaía ami nishcëxun ca judíos unicama an Alejandro, uisai ꞌi cara timë́axa quixun an anua timë́cë unicama canun quixun cacëxa. Cacëxun ca Alejandronën aín mëcënan sanánquin aín bana cuanun quixun cacëxa.

³⁴ Cacëxbi ca —ax ca judío uni ꞌicë —quixun ꞌunani nëtëtima rabë́ horan pain munuma sharati quicancëxa: —Cushiira ca Diana ꞌicën. Efesonu ꞌicë unicaman rabicë diosa ca Diana ꞌicën.

³⁵ Usa ꞌain ca sharatia nëtë́nun cacëxbi nëtë́tisama taniabi an ꞌapu quirica cuënëoxuncë unin nëtë́miacëxa. Nëtë́mia ca cacëxa: —Efesonu ꞌicë unicama, ꞌën mitsu camainun ca cuat. Ënë ëmanu ꞌicë unicamax ca an anuxun Diana rabiti xubu bërúanan a iscësa maxax naínuax nipacëcë bërúancë ꞌicën. Usa ca quixun ca camabi menu ꞌicë unicaman ꞌunánxa.

³⁶ Usa ꞌain ca, usama ca quiax uíxbi quitima ꞌicën. Usa ꞌain camina nëtë́ti ꞌain. Nëtë́anan camina sinánxunmaishi ñu ꞌatima ꞌain.

³⁷ Mitsúnmi bëcë uni rabëtax ca mitsun rabicë diosa ñui ꞌatimati banacëma ꞌicën.

³⁸ Usa ꞌaínbi ca Demetrio ꞌimainun an abëtan uxua manë ꞌacë ñu ꞌacë unicaman, unimi manántisa tanquin, an uníxa uni itsimi manania cuacë unicama cati ꞌicën. Canan ca ꞌapu raíriribi cati ꞌicën. Cacëbëtanbi ca Demetrio ꞌimainun abë ꞌicë unicamaxa ami manáncë unicamanribi, an uníxa uni itsimi manania cuacë unicama cati ꞌicën.

³⁹ Usa ꞌain camina bëtsi ñuribi mëníoisa tanquin anúan ꞌapucama timë́ti nëtën anu timë́cë unicaman cuamainun cati ꞌain.

⁴⁰ Uisai ꞌi caranuna sharati quixuan ñucácancëxun a ñuiquin cati ca ꞌaíma ꞌicën. Usa ꞌain ca ꞌapumi nishínu ꞌicësa sináncanti ꞌicën.

⁴¹ Usaquin catancëxun ca timë́cë unicama cuantánun quixun xuacëxa.