Hechos 18 - Kashibo-Kakataibo Biblia

Pablo Corinto ëmanu ꞌiá

¹ Areópago cacë matánuxun bana ñuixuntancëx ca Pablo Atenas ëmanuax Corinto ëmanu cuancëxa.

² Cuanx bëbaxun ca judío uni achúshi, Aquila cacë, mëracëxa. Ax ca Ponto cacë menuaxa bacë́an ꞌiacëxa. Usa ꞌaish ca aín xanu Priscilabë Italia menu ꞌicë Roma ëmanu ꞌiacëxa. ꞌIcëbëbia anu ꞌicë ꞌapu Claudio ax —judíos unicamax ca camáxbi Romanuax cuanti ꞌicë —quicëbë ca Corintonu tsoti cuancëxa. Usa ꞌain ca Corintonu bëbatancëx Pablo Aquilacëñun Priscila isi cuancëxa.

³ Aquila ax ca Pablonëan ꞌacësaribi oquian an chupa xubu ꞌacë uni ꞌiacëxa. Usa ꞌain ca Pablonën aín xubunu ꞌixun Aquilabëtan chupa xubu ꞌacëxa.

⁴ Usoquin ꞌanan ca anun ñu mëëtima nëtëcaman anua judíos unicama timë́ti xubunu cuanxun —Jesús ax ca asérabi Cristo, axa utia judíos unicaman caíncë, a ꞌicë —quixun bana ñuixuancëxa. Ñuixuncëxun ca judíos unicama raíri ꞌimainun judíosma unicama raírinënribi —Jesús ax ca asérabia Nucën Papa Diosan xuá a ꞌicë —quixun ꞌunánquin sináncëxa.

⁵ Usa ꞌain ca Timoteobëa Silas Macedonianuax Corintonu bëban Pablonën bëtsi ñu mëëti ꞌaquinma Jesús ñui quicë banaishi ñuixuancëxa. Ñuixuanan ca judíos unicama, Jesús ax ca asérabi Cristo axa utia atun caíncë a ꞌicë quixun upí oquin ñuixuancëxa.

⁶ Cacëxbi ca aín bana timanan ami ꞌatimati banai ami nishacëxa. Usaía ꞌia ca Pablonën anuax ca cuania quixuan atun ꞌunánun aín chupa tacaquin cacëxa: —Mitsúxbi ꞌiisama tani camina Nucën Papa Diosnan ꞌitima ꞌain. Usaími ꞌicëxbi ca ꞌën ꞌuchama ꞌicën. Mitsúnmi ënë bana cuaisama tancëbëtan cana judíosma unicama ñuixuni cuanin.

⁷ Catancëx anua judíos unicama timë́ti xubunuax chiquíquiani ca judíosma ꞌixunbia an Nucën Papa Dios rabicë, Justo cacë uni, aín xubunu cuancëxa, axa anua judíos unicama timë́ti xubu rapasu ꞌain.

⁸ Usa ꞌain ca anua judíos unicama timë́ti xubunu ꞌicë ꞌapu, Crispo, abë aín xubunu ꞌicë aín aintsi ꞌibucamaxribi ami sinani Nucën ꞌIbu Jesúsmi catamëacëxa. Usai ꞌimainun ca Pablonëan bana ñuixunia cuati, ꞌaisamaira Corintonu ꞌicë unicamaxribi ami sinani Nucën ꞌIbu Jesúsmi catamëti nashimicë ꞌiacëxa.

^9-10 Usa ꞌain ca Pablonën namáquin cuacësa oquin ësaquian Nucën ꞌIbu Jesusan cacëxun imë́ cuacëxa: —ꞌË cana mibë ꞌain. Usa ꞌain ca uinu ꞌicë unínbi mi paë tanmiquin mëëtima ꞌicën. Ënë ëmanuax ca ꞌaisamaira uni ꞌënan ꞌiti ꞌicën. Usa ꞌain camina racuë́quin ënquinma ꞌën bana ñuixunti ꞌain.

¹¹ Usaquian cacëxun ca Pablonën achúshi bari ꞌimainun mëcën achúshi ꞌimainun achúshi ꞌuxë Corintonu ꞌiquin unicama Nucën Papa Diosan bana ñuixuancëxa.

¹² Usaquian ñuixuncëbëbi ca Galión, axa Acaya menu ꞌicë unicaman ꞌapu ꞌain, judíos unicamax Pablomi nishi tsuáquiruacëxa. Tsuáquiruquin bibianquin ca an uníxa unimi manania cuacë unicama timë́cë anu buáncëxa.

¹³ Buánxun ca Galión ꞌimainun abë ꞌicë unicama cacëxa: —Ënë unin ca usai judíos unicama ꞌiti Moisésnën cuënëo bana quicësama oquin Nucën Papa Dios rabinun quixun unicama caia.

¹⁴ Quixuan cacëbëa Pablo quicascëbëtanbi ca Galiónën judíos unicama cacëxa: —Ënë uníxa ñu ꞌaisama ꞌacë ꞌianan uni ꞌacë ꞌain cuni cana mitsúnmi a ñuiquin cacëxun cuatsian.

¹⁵ ꞌAínbi ca an mitsun cuati banaishi ñuixunquin, usai ca quia quixun ñuixunia. Usa ꞌain camina mitsúnbi mëníoti ꞌain. ꞌËn cana ënë ñu mitsu mëníoxuntima ꞌain.

¹⁶ Usaquin catancëxun ca Galiónën axa Pablomi manáncë unicama a cuantánun quixun cacëxa.

¹⁷ Cacëx cuanquinbi ca anua judíos unicama timë́ti xubunu ꞌicë ꞌapu, Sóstenes, a bixun mëëcancëxa. Usoia isquinbi ca Galionën caquinma isëshiacëxa.

Antioquíanu cuantëcëntancëxa Pablo amiribishi mecama oi cuantëcëan (18.18-21.26)

¹⁸ Usocëx ꞌitsa nëtën pain Corintonu ꞌitancëx ca Pablo Siria menu cuanti sinani axa Jesucristomi catamëcë unicama —cana cuanin —cabiani, Priscila ꞌimainun Aquílabë manë nuntin cuancëxa. Cuanx Cencrea ëmanu bëbaxun ca Pablonën, —ꞌën Nucën Papa Dios cacësabi oi ꞌi cana sënëni —quixun sinánquin aín bu tëamiacëxa.

¹⁹ Tëamitancëx cuanx ca Efeso ëmanu bëbacëxa. Bëbax Priscila ꞌimainun Aquila ëbiani cuanx anua judíos unicama timë́ti xubunu atsíanx ca anuax Pablo anua timë́cë judíos unicamabë banai atubë usai Jesús ꞌiti ñuiquin Nucën Papa Diosan bana cuënëo ñui canancëxa.

²⁰ Usaía ꞌia judíos unicaman atubëa ꞌinun cacëxbi ca Pablo anu ꞌiáma ꞌicën.

²¹ Abë ꞌiquinma ëbianquin ca atu cacëxa: —Judíos unicama anun timë́ti nëtë sënë́ncëbë atubë Jerusalénu ꞌitancëx cana Nucën Papa Dios cuëëncëbë mitsu isi utëcënti ꞌain. Quixun cabiani ca Efesonuax cuancëxa.

²² Cuanx Cesárea ëmanu bëbax ca nuntinuax ꞌibúquiani taën Jerusalénu cuancëxa. Cuanx bëbaxun atu istancëxun axa Jesucristomi catamëcë unicama —cuanmainun ca ꞌit —cabiani ca Antioquíanu cuancëxa.

²³ Antioquíanu ꞌëora pain ꞌitancëx ca Galacia menu ꞌicë ëma ꞌimainun Frigia menu ꞌicë ëmacama oi cuanquin Pablonën axa Jesucristomi catamëcë unicama upiti Jesucristomi sinani ax cuëëncësabi oi ꞌinun quixun caquin atu ꞌësëacëxa.

Efesonuxuan Apolosnën bana ñuixuan

²⁴ Pablonëan Galacia menu cuanan Frigia menuribi cuanquin axa Jesucristomi catamëcë unicama ꞌësëmainun ca Alejandría ëmanu ꞌicë judíos uni achúshi, Apolo, ax Efeso ëmanu cuanx anu ꞌiacëxa. Ax ca an Nucën Papa Diosan bana cuënëo upí oquin ꞌunáncë ꞌaish unicama upí oquin bana ñuixuncë ꞌiacëxa.

²⁵ Nucën ꞌIbu Jesús ñuixunquian ꞌunánmicancë ꞌixun ca Apólosnën cuëëni banaquin, Jesús ñuiquin, upí oquin Efesonu ꞌicë unicama ñuixuancëxa. Usaquin Jesús ñuiquin bana ñuixuanan, —aín ꞌuchacama chiquinatia ca Juanën uni nashimiacëxa —quixun ꞌunánquinbi ca Apolosnën —Jesucristonën ca aín Bëru Ñunshin Upí aín unicama abë́a ꞌinun ꞌinania —quixun ꞌunánma ꞌicën.

²⁶ Usa ꞌain ca anua judíos unicama timë́ti xubunuxun Apolosnën racuë́quinma bana ñuixunia cuaquin ca Aquílabëtan Priscilanën ꞌuri buánxun Apolos, Jesúsmi catamëti ca uni usai ꞌia quixun upí oquinra ñuixuancëxa.

²⁷ Usa ꞌain ca Acaya menua Apolos cuainsa tancëbëtan axa Jesucristomi catamëcë unicaman —asábi ca —catancëxun atuan upí oquin Apolo binun quixun caquin axa Acayanuax Jesucristomi catamëcë unicama quirica cuënëoxuancëxa. Cuënëoxunia quirica bibiani manë nuntin cuanx Acayanu bëbatancëxun ca Apolosnën anua ꞌicë a Nucën Papa Diosan nuibaquin Jesúsmi sinánmicë unicama upí oquin ꞌaquiancëxa.

²⁸ ꞌAquianan ca unicaman cuamainun —Cristo ca ucëma ꞌicë —quixuan sinaniabi abë banaquin judíos unicama, Jesús ax ca asérabi Cristo, axa utia atun caíncë a ꞌicë quixun canan usai ca Cristo ꞌiti ꞌicë quiax ca Nucën Papa Diosan bana cuënëo quia quixun ꞌunánmiacëxa.