Hechos 17 - Kashibo-Kakataibo Biblia

Tesalónica ëmanuaxa unicama tsuáquirua

¹ Usaquiani cuani Anfípolis ëma ꞌimainun Apolonia ëma anun cuanx ca Tesalónica ëmanu bëbacëxa. Tesalónicanu ca anua judíos unicama timë́ti xubu achúshi ꞌiacëxa.

² Usa ꞌain ca rabë́ ꞌimainun achúshi semana anu ꞌi, Pablo axa ꞌicësabi oi anun ñu mëëtima nëtë ꞌicëbë ꞌicëbë, anua judíos unicama timë́ti xubunu atsínxun, anua timëtia unicama cuënëo bana ꞌunánmiquin, Jesús ax ca asérabi Cristo ꞌicë quixun cai atubë canancëxa.

³ Cuënëo bananu ñuicësabi oquin ꞌunánmianan ca —a bana quicësabi oi ꞌiti ꞌaish ca Cristo paë tantancëx bamatancëx baísquiaxa —quixun canan ca —ꞌën mitsu ñuixuncë Jesús abi ca axa uti nun caíncë Cristo ax ꞌicë quixun ñuixuancëxa.

⁴ Ñuixunia cuati ca judíos unicama raíri, Jesús ax ca asérabi Cristo ꞌicë quixun sinani, ami catamëti Silas ꞌimainun Pablobë timë́acëxa. ꞌImainun ca griego banan banacë uni ꞌixunbia Nucën Papa Diosan bana cuacëcama, a ꞌimainun —ax ca aín nuitu upí ꞌicë —quixuan unin cacë xanucamaxribi Jesúsmi catamëacëxa.

⁵ Usa ꞌaínbi ca judíos unicama, an Jesús sináncëma, ax ami nutsi Silas ꞌimainun Pablomi nishquin uni ꞌatima chiquíshcama timëtancëxun a ëmanu ꞌicë unicama tsuáquirumiacëxa. Tsuáquirumi, Jasón cacë uni aín xubunu banaruquin barii ca, camabi unían isnun ëma nëbë́tsi buánti ca Pablocëñun Silas chiquínti ꞌicë quiax quicancëxa.

⁶ Usai quiquinbi mëraquinma ca Jasóncëñun axa Jesucristomi catamëcë unicama raíri nirínbianquin a ëmanu ꞌicë unicaman ꞌapunu buáncëxa. Buani ca munuma sharati quicancëxa: —An camabi menu ꞌicë unicama tsuáquirumicë uni rabëtax ca ënu uaxa.

⁷ Ucë ca Jasonën anua ꞌinun aín xubunu atsínmiaxa. A unicamax ca Romanu ꞌicë ꞌapu César quicë bana cuaisama tani, ꞌapu itsi ca Jesús ꞌicë quia.

⁸ Pablocëñun Silas ñuicania cuati ca unicamabë a ëmanu ꞌicë ꞌapucamaxribi sharati tsuáquiruacëxa.

⁹ Tsuáquiruiabi ca Jasónbëtan raírinën a ënun quixun curíqui ꞌináncëxa. ꞌInáncëxun ca Jasóncëñun raíri cuantánun quixun ëancëxa.

Pablobë Silas Berea ëmanu ꞌiá

¹⁰ Usai ꞌicëbëtan ca axa Jesucristomi catamëcë unicaman bënë́nquinshi imë́ Pablocëñun Silas Berea cacë ëmanu cuantánun quixun xuacëxa. Xucëx cuanx bëbatancëx ca anua judíos unicama timë́ti xubunu atsíancëxa.

¹¹ Atsínxuan bana ñuixuncëbëtan ca anua ꞌicë judíos unicaman, Tesalónica ëmanua ꞌicëcamasamaira ꞌixun, cuëënquin Pablonëan Jesús ñuiquin Nucën Papa Diosan bana ñuixunia cuacëxa. Cuaquin ca asérabi cara Pablonëan ñuixuncë bana ax ꞌicë quixun ꞌunáncasquin camabi nëtën Nucën Papa Diosan bana cuënëo isacëxa.

¹² Usaquin ꞌai ca atux ꞌitsáxira —asérabi ca —quixun sinani Jesucristomi catamëacëxa. Usai ꞌimainun ca griego banan banacë unicama ꞌimainun xanucamaribi —upí sinánñu ca —quixuan unin ꞌunáncë, acamax Jesucristomi catamëacëxa.

¹³ Usaía ꞌicëbëbi ca Tesalónicanu ꞌicë judíos unicamax, Pablonëan Bereanuxun Nucën Papa Diosan bana ñuixunia ñuicania cuabiani anuribishi cuancëxa. Cuanxun ca Pablomia nishnun quixun anu ꞌicë unicamaribi tsuáquirumiacëxa.

¹⁴ Tsuáquirumicëbëtanbi ca axa Jesucristomi catamëcë unicaman bënë́nquinshi Pablo manë nuntían cuantánun quixun xuacëxa. Xucëbë ca Timoteobë Silas Bereanubi bërúacëxa.

¹⁵ Bërúmainun ca an buáncë unicaman Pablo Atenas ëmanu buáncëxa. Buántancëxun a ëbianía Bereanu cuantëcënia ca Pablonën a unicama Timoteocëñuan Silas bënëtishi a isi unun quixun camiacëxa.

Atenas ëmanua Pablo ꞌiá

¹⁶ A unicama cuan ca Pablonën Atenas ëmanuxun Timoteocëñun Silas aia caíancëxa. Caini a ëmanu niquin, unían uniocë ñu a unin rabicë, a ꞌaisamaira isi ca Pablo masá nuituacëxa.

¹⁷ Usa ꞌixun ca anua judíos unicama timë́ti xubunuxun, judíos unicama ꞌimainun judíosma ꞌixunbia an Nucën Papa Dios rabicë unicamaribi, Jesús ax ca asérabi Cristo, axa uti judíos unicaman caíncë, a ꞌicë quixun sinánmisa tani cuënëo bana ñui atubë canancëxa. Usai ꞌianan ca camabi nëtën anuxun ñu marutinuaxribi anua ꞌicë unicamabë Jesús ñui canancëxa.

¹⁸ Cananmainun ca raíri unicama usa isa uni ꞌiti icë quixun epicúreo cacë unicaman bana ñuia cuacë, ꞌimainun estoico cacë unicamanribia bëtsi bana ñuia cuacë, a unicamaxribi uax Pablobë banacëxa. Abë banatancëx ca raírinëx quiacëxa: —¿Añu cara banañuira ꞌixun ënë unin nu ñuixuinsa tanin? Quicëbë ca raírinëx Pablonëan Jesús ñuianan —bama ꞌaish ca uni baísquiti ꞌicë —quixun cacëxun cuax quiacëxa: —Nun rabicë diosma, bëtsi dios ñui sapi ca quia.

¹⁹ Usai quitancëxun ca Pablo bibianquin matá, Areópago cacë, anu buánxun cacëxa: —Nun nu cuacëma a ñuiquinmi nu cacë bana ënë cananuna upí oquin ꞌunántisa tanin.

²⁰ Nun cuacëma ñu camina min ñuin. Uisai qui quicë cara quixun cananuna ꞌunántisa tanin.

²¹ Usa ꞌain ca Atenasnu ꞌicë unicama ꞌimainun ꞌuracëox uax atubë ꞌicë unicama an uisa bana cara an cuacëma ꞌicë a cuaisa tancëxa. ꞌImainun ca unían ñuia cuacëma ñuribi ñuiquin uni caisa tancëxa. Usai ca a unicamax ꞌiacëxa.

²² Usa ꞌain ca Pablo Areópagonu timë́cë unicama nëbë́tsinuax niruquin cacëxa: —Atenasnu ꞌicë unicama, ꞌën iscëxun camina mitsun dioscama ꞌitsaira sinánquin a rabin.

²³ ꞌËx ënë ëmanu ꞌicë bain niquin cana anuxunmi mitsun dioscama rabicë ꞌitsa isan. Isanan cana anuxun mitsun dios rabiquinmi anu ñu nanti ñu achúshinumi ësaquin cuënëocë isan: “Ënëx ca anuxun nun ꞌunáncëma dios rabiti a ꞌicën”. ꞌUnánxunmabimi rabicancë dios a cana ꞌën mitsu ñuixunin.

²⁴ An ca me ꞌimainun anu ꞌicë ñucamaribi uniocëxa. Ax ca naí, me acaman ꞌIbu ꞌicën. Usa ꞌaish ca ax anuxun a rabiti unin ꞌacë xubunu ꞌima.

²⁵ Unin a ñu ꞌaxuncëxmabi ca ax usabi ꞌiá ꞌaish usabi ꞌia. An ca anun nux tsóti nëtë ꞌimainun suñu, piti, ꞌimainun camabi ñuribi nu ꞌinania.

²⁶ An ca achúshi uni aín rëbúnquicamaxa mecamanu tsónun uniocëxa. Unioquin ca uiti barin cara aín rëbúnquicamax camabi menu tsóti ꞌicë quixun mëníonan, anua aín me sënë́ncëcamaribi mëníoxuancëxa.

²⁷ Nucën Papa Diosan ca ami sinánquian a ꞌunánun uni uniocëxa. Uisaxun caranuna a ꞌunánti ꞌai quixunu sináncëxbi ca Nucën Papa Dios nu ꞌurama ꞌicën.

²⁸ Nucën Papa Dios cupí cananuna tsotin, a cupí cananuna nitsin, a cupí cananuna ënë menu ꞌain. Mistun aintsi raírinëx ca ësai quiacëxa: “Nux cananuna diosan rëbúnqui ꞌain”.

²⁹ Nux aín rëbúnqui ꞌixun cananuna sinántima ꞌain, ax ca unían ꞌacë curi ꞌacë ñuusa ꞌianan uxua manë ꞌacë ñuusa ꞌianan maxax ꞌacë ñuusa ꞌicë quixun.

³⁰ Nucën Papa Dios ꞌunáncëma ꞌixun ca unin anbia uniocë ñu rabiacëxa. Rabia isquinbi ca Nucën Papa Diosan isëshiacëxa. Isëshia ꞌixunbi ca bërí camabi menu ꞌicë uni ꞌatimaquin sináncë ꞌixunbia sinananun quixun aín unicaman canun camia.

³¹ Nucën Papa Diosan ca mëníocëxa, anúan achúshi uni, Jesucristonën camabi uni, aín nuitu cara upí ꞌicë, cara upíma ꞌicë quixun isti nëtë. Usaquian ꞌanun ca an caísacëxa quixuan camabi unin ꞌunánun, ca Nucën Papa Diosan Jesús bamacëbi baísquimiacëxa.

³² Usaquian bamatancëx ca Jesús baísquiacëxa quixun ñuia cuati ca uni raírinëx Pablomi cuaiacëxa. Cuaimainun ca raírinën Pablo cacëxa: —Minmi ñuicë bana ënëmi ñuitëcënia cananuna bëtsi nëtën cuatëcënti ꞌain.

³³ Usaquian cacëx ca Pablo acama ëbiani cuancëxa.

³⁴ Cuancëbë Pablobë cuani ca raírinëx ami sinani Jesúsmi catamëacëxa. Acamax ca Dionisio, Areópagonu ꞌicë uni a ꞌimainun xanu achúshi Damaris cacë a ꞌimainun raíriribi ꞌiacëxa.