Hechos 16 - Kashibo-Kakataibo Biblia

Pablo ꞌimainun Silasbë Timoteo cuan

¹ Cuanx ca Pablobë Silas Derbe ëmanu cuanan anuribi cuani Listra ëmanu bëbacëxa. Anu ca axa Jesucristomi catamëcë Timoteo cacë uni ꞌiacëxa. Aín titax ca judío xanu ꞌianan Jesúsmi sináncë ꞌiacëxa, ꞌimainun ca aín papax griego banan banacë ꞌiacëxa.

² Listra ꞌimainun Iconio ëmanu ꞌicë axa Jesucristomi catamëcë unicaman —upí uni ca —quixun ñuicë ca Timoteo ꞌiacëxa.

³ Usa ꞌain ca abëa Timoteo cuanti cuëënquin Pablonën sináncëxa, —Timoteonën papax ca judío unima ꞌaish griego banan banacë ꞌicë quixun ca Listranu ꞌicë ꞌimainun Iconionu ꞌicë judíos unicaman ꞌunania. Usa ꞌain ca Timoteo judíos unicaman aín bana cuaisama tanti rabanan judíos uni ꞌicësai ꞌunántiocë ꞌiti ꞌicë —quixun. Sinántancëxun ꞌunánti oracamibianquin ca Pablonën Timoteo buáncëxa.

⁴ Listranuax Timoteo buani bëtsi bëtsi ëmanu cuanquin ca anu ꞌicë unicama, uisaquin cara Jerusalénu ꞌicë Jesusan aín bana ñuixunun caíscë unicama ꞌimainun axa Jesucristomi catamëcë unin cushicaman caxa quixun bana ñuixuancëxa. Ñuixunquin ca atúxa quicësabi oquin camina ꞌati ꞌai quixun axa Jesucristomi catamëcë unicama cacëxa.

⁵ Usaquian Pablobëtan Timoteonën bëtsi bëtsi ëmanu cuanquin bana ñuixuncëx ca axa ami catamëcë unicamax upiti Jesúsmi sináncëxa. Usai ꞌicëbëa camabi nëtën uni raírinëxribi ami sináncëbë ca axa Jesucristomi catamëcë unicama ꞌaisamaira ꞌiacëxa.

Namácësa oquian Pablonën Macedonianu ꞌicë uni isa

⁶ Usaquiania cuania Asianuxun bana ñuixunxunma ꞌanun Nucën Papa Diosan Bëru Ñunshin Upitan sinánmicëx ca Pablobë Silas ꞌimainun Timoteo Frigia cacë me ꞌimainun Galacia cacë menuribi cuancëxa.

⁷ Cuanx anu bëbaquin Misia cacë me inubiani, Bitinia cacë menuribishi cuainsa taniabi ca Nucën ꞌIbu Jesusan Bëru Ñunshin Upitan anu cuanxma ꞌinun sinánmiacëxa.

⁸ Sinánmicëx ca Misia inubianx Troas cacë ëmanu bëbacëxa.

⁹ Bëbaxun ca Pablonën imë́ namáquin iscësoquin Macedonia menu ꞌicë uni achúshia nicë isacëxa. Iscëxun ca cacëxa: Macedonia ënu uxun camina nu ꞌaquinti ꞌain.

¹⁰ Usoquian Pablon namáquin iscësa oquin isan cananuna nun Macedonia menuxun, Jesucristomi catamëti ca uni ainan ꞌiti ꞌicë quixun bana ñuixuni cuanti ca Nucën Papa Dios cuëënia quixun sináncën. Sinánquin cananuna bënë́nquinshi anu cuanuxun ñu mëníocën.

Pablobëa Silas Filipos cacë ëmanu ꞌiá

¹¹ Manë nuntin Troasnuax cuanshiax Samotracia cacë nasínu bëbonx cananuna Neápolis ëmanu bëbacën.

¹² Anuax cuanx cananuna Filipos ëmanu bëbacën. Filipos ax ca Macedonia menu ꞌicë ëma cha anuribia Romanu ꞌicë unicama ꞌicë ꞌiacëxa. Anu cananuna ꞌitsamashi nëtë ꞌiacën.

¹³ A ëmanuax cananuna anun ñu mëëtima nëtën baca cuëbí cuancën, anuaxa axa ami sináncë unicamax usabii ꞌicë ꞌaish Nucën Papa Diosbë banacë, anu. Cuanquinbi xanucama timë́cë isi anu tsóbuquin cananuna Jesúsmi catamëti bana atu ñuixuancën.

¹⁴ A xanucama achúshi ca Lidia cacë ꞌiacëxa. Ax ca Tiatira ëmanu ꞌicë xanu ꞌianan, an chupa upí minanën pucucësa marucë ꞌiacëxa. Usa ꞌaish ca ami sinánquin Nucën Papa Dios rabicë ꞌiacëxa. Usa ꞌixuan Pablonën bana ñuia cuatia ca Nucën ꞌIbu Diosan Jesucristomi catamëtía ainan ꞌinun sinánmiacëxa.

¹⁵ Sinánmicëx Jesucristomi catamëti ca Lidia, aín xubunu ꞌicëcamabë, nashimicë ꞌiacëxa. Nashimicë ꞌixun ca nu cacëxa: —Mitsun, ꞌëx cana asérabi Jesucristonan ꞌain quixun sinani camina ꞌën xubunu ꞌiti ꞌain. Usaquin nu caía nux anu ꞌiti cuëëncëbë cananuna anu ꞌiacën.

¹⁶ Nëtë itsin anuaxa uni abë banacë anuax Nucën Papa Diosbë banai cuanquinbi cananuna xanu xuntacu achúshi ñunshin ꞌatimañu isacën. A xanun ca ñunshin ꞌatimanëan ꞌunánmicëxun uisai cara ꞌiti ꞌicë quixun ñucácëxun uni usai camina ꞌiti ꞌain quixun ñuixuancëxa. Usoquin ꞌaquin ca aín patróncama ꞌitsa curíqui bimiacëxa.

¹⁷ A xanu xuntacunëx ca Pablocëñun nu nuibiani munuma banai quiacëxa: —Ënë unicaman ca Dios, naínu ꞌicë ꞌApuira a ñu ꞌaxunia. Usa ꞌixun ca anúnmi mitsun ꞌuchacama tërë́ncë ꞌaish ainan ꞌiti bana mitsu ñuixunia.

¹⁸ Usai quiquin ca ꞌitsa nëtën nu nuiacëxa. Usoquin ꞌuran ubíocëx cuainacë́quin ca Pablonën ñunshin ꞌatima cacëxa: —Jesucristonëan quimicëxun cana mi cain, ënë xanunuax ca chiquit. Quixuan cacëxëshi ca bënëtishi ñunshin ꞌatima chiquíacëxa.

¹⁹ Usai ꞌicëbëtan ca aín patróncaman, a xanuan an ꞌacësabi oquin ñu ꞌacëbëtanma ca curíqui bitima ꞌicë quixun sinánquin, Pablocëñun Silas biacëxa. Bibianquin ca anua ꞌapu ꞌicënu buáncëxa.

²⁰ Buánxun ca an uni bëtsi unimi manania cuacë uni cacëxa: —Ënë uni rabëtan judíos uni ꞌixun bana ñuixuncëxun cuati ca nun ëmanu ꞌicë unicamax tsuáquiruia.

²¹ Tsuáquirumiquian bana ñuixuncë ꞌaínbi cananuna nun romano uni ꞌixun an ñuixuncë bana axa quicësabi oquin ꞌatima ꞌain.

²² A xanun patróncaman usaquin an uni uni itsimi manania cuacë unicama caia cuati, ca camabi uni Pablo ꞌimainun Silasmi tsuáquiruacëxa. Tsuáquirucëbëtan ca a unicaman, aín chupa pëmitancëxuan manë xon rishquinun quixun aín unicama cacëxa.

²³ Usoquin cacëxun cushíinra ꞌitsa oquin rishquitancëxun ca sipuacëxa. Sipuatancëxun ca an sipunu ꞌicë unicama bërúancë uni cacëxa, Pablocëñun camina Silas machiquitia upí oquin bërúanti ꞌai quixun.

²⁴ Usoquin ꞌanúan cacëxun ca sipu ꞌucë mëúira atsínmixun i quini ocën tabíataxacëxa.

²⁵ Usoquian ꞌacëx ca Pablobë Silas imë́ naëx Nucën Papa Diosbë bananan a rabi cantacëxa. Usaría ꞌia ca anua ꞌicë sipuacë uni raírinën cuacëxa.

²⁶ Usaía ꞌicëbëa me cushínra shaíquicëbë ca ami tapuocë icama shaíquicëbëa xëcuëcamaxribi xëoquimainun manë risi anun uni sipuacë tëcërëcacëcama tubucuti rëucüacëxa.

²⁷ Usaía ꞌicëbë bësuquinbi, xëcuëcama xëóquicë isquin ca an sipuacë unicama chiquíti rabanan bërúancë unin sináncëxa, —sipuacë unicama ca chiquíquiani cuanxa —quixun. Sinánquin ca axbi taroracácatsi quixun aín manë xëtocë biacëxa.

²⁸ Bitsiabi ca Pablonën munuma banaquin cacëxa: —Taroracaxma ca ꞌit. Camáxbi cananuna ënu ꞌain.

²⁹ Cacëxuinshi, anun pëcaxun isti a aín uni ñucáxun bibianx ca bënëtishi abáquiani sipu mëú atsíancëxa. Atsini, bërëqui racuëtan bamai ca Pablo ꞌimainun Silas tanáin rantin purúancëxa.

³⁰ Usai ꞌitancëxun ëman buánquin ca Pablo ꞌimainun Silas cacëxa: —¿Añu carana ꞌën ꞌuchacama tërë́ncë ꞌaish ië́nuxun ꞌati ꞌain?

³¹ Quia ca cacëxa: —Nucën ꞌIbu Jesucristomi sinani ca ami catamët. Ami catamëti camina min xubunu ꞌicë min aintsi ꞌibucamabëbi mitsun ꞌuchacama tërë́ncë ꞌaish Nucën Papa Diosnan ꞌiti ꞌain.

³² Caxun ca a ꞌimainun aín xubunu ꞌicëcamaribi Nucën ꞌIbu Jesús ñuiquin bana ñuixuancëxa.

³³ Ñuixuncëxuinshi ca imë́bi an sipuacë unicama bërúancë unin Pablo ꞌimainun Silas anua manë xon ꞌacë aín namicama chucaxuancëxa. Chucaxuncëbë ca an sipuacë unicama bërúancë unibë axa aín xubunu ꞌicëcamaxribi Jesúsmi catamëti nashimicë ꞌiacëxa.

³⁴ Usa ꞌixun ca an sipuacë unicama bërúancë unin aín xubunu buánxun Pablocëñun Silas pimiacëxa. Usocëx ca a unibë aín xubunua ꞌicë aín aintsi ꞌibucamaxribi Nucën Papa Diosmi catamëti ainan ꞌaish, chuámashirua tani cuëëancëxa.

³⁵ Usaía ꞌian pëcaracëbëtan ca an uníxa uni itsimi manania cuacë unicaman policía xuquin cacëxa: —An sipuacë unicama bërúancë uninu cuanxun camina a uni rabë́a cuantánun ënun quixun cati ꞌain.

³⁶ Usaquin caxun xucëx cuanxuan cacëxun ca an sipuacë unicama bërúancë unin Pablo cacëxa: —An uníxa uni itsimi manania cuacë unicaman ca mi chiquínun quixun ꞌë camiaxa. Usa ꞌain camina chuámashirua ꞌaish cuanti ꞌain.

³⁷ Usaquian an sipuacë unicama bërúancë unin cacëxun ca Pablonën policíacama cacëxa: —Nux románo uni ꞌaish quiricañu ꞌicëbi, añu caranuna ꞌa quixun nu ñucáxunmabi, ca camabi unían ismainun rishquimitancëxun nu sipuamionxa. ¿Usaquin ꞌamionxunbi cara bërí uni raírinën isnúnma nu chiquinin? Ax ca ꞌaisama ꞌicën. Atúxbi ca nu chiquini uti ꞌicën.

³⁸ Ësoquian Pablonën cacëxun cuabiani cuantëcënxun ca policíacaman an uni uni itsimi manania cuacë unicama cacëxa. Caquian, románo uni ꞌaish ca quiricañu ꞌicë quixun cacëxun cuati ca racuë́acëxa.

³⁹ Racuëti anu cuanxun ca Pablocëñun Silas cacëxa: —Mix camina románo uni ꞌaish quiricañu ꞌain quixun ꞌunánxunma cananuna mi ꞌón. Caquin ëman buánxun ca —ënë ëmanuax camina cuanti ꞌai —quixun cacëxa.

⁴⁰ Usaquian cacëx sipunuax chiquíquiani ca Lidianën xubunu cuancëxa. Cuanx atsínquinbi ca axa Jesucristomi catamëcë unicama anu timë́cë isquin upí oquin ꞌësëtancëx anuaxribi cuancëxa. Tesalónica ëmanuaxa unicama tsuáquirua