Hechos 15 - Kashibo-Kakataibo Biblia

Jerusalénu timë́can

¹ Usa ꞌain ca judíos uni raíri Judea menuax Antioquíanu cuanxun, axa Jesucristomi catamëcë unicama ësaquin cacëxa: Mitsux asérabi Nucën Papa Diosnan ꞌinux ië́tisa tani camina Moisés quiásabi oi ꞌunánti oracacë ꞌiti ꞌain.

² Usaía quicëbëbi ca Pablobë Bernabé —usama ca —quiax atubë canancëxa. Canantancëxun ca Pablocëñun Bernabé ꞌimainun raíriribi Jerusalénu cuanxuan, anua ꞌicë an aín bana ñuixunuan Jesusan caíscë unicamacëñun axa Jesucristomi catamëcë unicaman cushicama, —judíosma ꞌaíshbi cara uni Jesucristonan ꞌiisa tani ꞌunántiocë ꞌiti ꞌicë —quixun ñucátanun quixun xuacëxa.

³ Xuquian Antioquíanu ꞌicë unicaman —bërúanx ca cuantan —quixun cacëx cuani Fenicia me ꞌabiani cuanan Samaria me ꞌabiani cuanquin ca —judíosma unicamaxribi ca sinanati Jesucristomi catamëaxa —quixun ñuixuancëxa. Usaquian ñuia cuati ca Fenicia ꞌimainun Samarianu ꞌicë axa Jesucristomi catamëcë unicamax cuëë́inra cuëë́ancëxa.

⁴ Usaquin ñuixunbiani cuani ca raíribë Bernabé ꞌimainun Pablo Jerusalénu bëbacëxa. Bëbaia isquin ca axa Jesucristomi catamëcë unicamabëtan, atun cushicama ꞌimainun aín bana ñuixunuan Jesusan caíscë unicamanribi cuëë́nquin —¿caina ain? —caquin atu biacëxa. Bicëxun ca —nun nu bana unicama ñuixuncëxuan cuatia ca Nucën Papa Diosan ꞌitsa uni Jesucristomi sinánmiaxa —quixun ñuixuancëxa.

⁵ Usa ꞌain ca axa Jesucristomi catamëcë fariseo unicama raírinëx nirui quiacëxa: —Judíosma ꞌaíshbia ax Jesucristomi catamëcë unicamax ca ꞌunántiocë ꞌianan usaía judíos unicama ꞌiti Moisésnën cuënëo bana raíri quicësaribi oi ꞌiti ꞌicë —quiax.

⁶ Usai quicëbë ca Jesusan aín bana ñuixunun caíscë unicama ꞌimainun axa Jesucristomi catamëcë unicaman cushicama —uisa cara ꞌiti ꞌicë —quixun sinánux timë́acëxa.

⁷ Timë́xun sinania ꞌuran canania oi niruqiun ca Pedronën atu cacëxa: —ꞌËn xucë́antu, camina ꞌunanin, Nucën Papa Diosan ca, Jesucristomi catamëtishi ca uni ainan ꞌinux ië́ti ꞌicë quixun judíosma unicama ñuixunun micama achúshi ꞌë caísacëxa, usaquin ꞌën ñuixuncëxun cuatía atúxribi ainan ꞌinun.

⁸ An camabi unían sináncë ñu ꞌunáncë ꞌixun ca Nucën Papa Diosan, a unicamax ca judíosma ꞌaíshbi Jesucristomi asérabi sinánxa quixun ꞌunánquin, nu ꞌimicësaribi oquin aturibi aín Bëru Ñunshin Upíñu ꞌinun ꞌimiaxa.

⁹ Nuxnu judíos ꞌicëa nu ꞌimicësaribi oquin ca Nucën Papa Diosan judíosma unicama Jesucristomi catamëcë cupí aín ꞌuchacama tërë́nquin aín sinan upí ꞌimiaxa.

¹⁰ ¿Usa ꞌaínbi caramina mitsux uisa cupí, usama ca quiax Nucën Papa Diosmi ꞌuchanan, judíosma unibu ca judíos unibu ꞌicësai ꞌiti ꞌicë quiax quin? Moisésnëan usai judíos unicama ꞌiti cuënëo bana cuacë ꞌaíshbi ca a banacama quicësabiira oi nucën raracamax ꞌiáma ꞌicën. Nuxribi cananuna atúxa ꞌiá usaribiti ꞌiacën.

¹¹ Usa ꞌaínbi cananuna ꞌunanin, nun ꞌuchacama cupí ainanma ꞌaíshbi ami catamëcëxun ca nun ꞌuchacama tërë́nquin Nucën ꞌIbu Jesusan nu Nucën Papa Diosnan ꞌimiaxa. Judíosma unicamaxa ami catamëtia ca usaribi oquin ainan ꞌimiaxa.

¹² Pedronën cacëx ca anu ꞌicë uni camáxbi banaima nëtë́ishiacëxa. Nëtë́ishitancëxun ca Pablonëan Bernabébëtan uisaira oquin cara judíosma unicaman aín bana cuaxa quixun ñuixuanan uisaira oquin cara Nucën Papa Diosan, aín cushínbi, atu uni itsin ꞌacëma ñu ꞌamiaxa, quixun ñuixuncëxun cuacëxa.

¹³ Usaquin caía Pablobë Bernabé sënë́ncëbëtan ca Jacobonën anu ꞌicë unicama cacëxa: —ꞌËn xucë́antu, ꞌën mitsu camainun ca cuat.

¹⁴ Simón Pedronën ca nu ñuixuanxa, Nucën Papa Diosan cara uisaira oquin judíos unicamaishima, judíosma unicamaribi nuibaquin ainan ꞌinun ꞌimiaxa quixun.

¹⁵ Usai ca ꞌiti icë quixun ca an Nucën Papa Dios quicë bana uni ñuixuncë unicaman cuënëocëxa. A banax ca ësai quia:

¹⁶ Mitsu ꞌaquintëcënquin cana aín rëbúnquinëxa ꞌapuma ꞌaínbi Davidnën rëbúnqui achúshi ꞌapu ꞌimiti ꞌain.

¹⁷ Judíos unicamainshima judíosma unicamanribia ꞌënan ꞌinuxun ꞌë ñucácë cupí cana acaman ꞌapu, Davidnën rëbúnqui achúshi ꞌimiti ꞌain.

¹⁸ Usai cana mitsun ꞌIbu Dios an ënë banacama bëráma ñuiá ꞌëx quin.

¹⁹ Usa ꞌain cana ꞌën sinanin, judíosma unicama axa sinanati Nucën Papa Diosnan ꞌinux Jesucristomi catamëcë, a cananuna usai judíos unicama ꞌiti Moisésnën cuënëo bana quicësabi oquian ꞌanun catima ꞌain.

²⁰ Ësaquinshi caquin cananuna acama quirica buánmiti ꞌain: Unínbia uniocë ñu rabiquian ꞌacë ñuina a camina pitima ꞌain, ꞌimainun camina min xanuma ꞌain xanubë ꞌitima ꞌain, ꞌimainun camina tëtsë́cacë ñuina pitima ꞌain, ꞌimainun camina ñuina imi pitima ꞌain.

²¹ Nucën raracaman ꞌásaribi oquin ca camabi ëmanuxun unin anua judíos unicama timë́ti xubunuxun anun ñu mëëtima nëtëcaman, Moisésnëan cuënëo bana ñuixunia. Usa ꞌixuan Moisésnën usai judíos unicama ꞌiti cuënëo bana ꞌunáncë ꞌicë cananuna ësaquin caquinshi atu quirica buánmiti ꞌain.

²² Usaía Jacobo quia cuaquin ca Jesusan aín bana ñuixunun caíscë unicama ꞌimainun axa Jesucristomi catamëcë unicaman aín cushicamabëtan sináncëxa, Antioquíanua Bernabé ꞌimainun Pablobë cuantánun cananuna rabë́ uni caísti ꞌai quixun. Usaquin sinánxun ca axa Jesucristomi catamëcë uni rabë́, Judas ꞌicëbi Barsabásribi cacë, acëñun Silas caísacëxa.

²³ Caístancëxun ca atúan buánun quixun ësaquin cuënëoxun quirica ꞌináncëxa: “Nux Jesusan aín bana uni ñuixunun caíscë ꞌimainun axa Jesucristomi catamëcë unicaman nun cushicamabëtan cananuna mitsu quirica buánmin. Mitsux judíosma ꞌaíshbimi Jesucristomi catamëcë ꞌaish nun xucë́antu ꞌicë, Antioquía ëmanu, ꞌimainun Siria menu, ꞌimainun Cilicia menu ꞌicë, cananuna ësaquin mitsu cain.

²⁴ Nun xucë́xmabi cuanxun isa uni raírinën mitsubë banaquin, usai judíos unicama ꞌiti Moisés quiásabi oi camina ꞌiti ꞌain quixun caquin mitsu masá nuitumiaxa quixuan ñuicania cananuna cuan.

²⁵ Usa ꞌain cananuna timë́xun, axa nubë nuibanancë Bernabé ꞌimainun Pablobë cuanxuan mitsu isi cuanun rabë́ uni caístancëxun xuti sinan.

²⁶ Nun caíscë uni a rabëtan ca ami nishquian unin ꞌaisa tancëxunbi Nucën ꞌIbu Jesucristoa usai ꞌia ñuiquin racuë́quinma unicama ñuixunia.

²⁷ Usa ꞌain cananuna Judascëñun Silas xutin, Bernabé ꞌimainun Pablobëa cuanun. Xucëxun ca atun ënë quirica quicësabi oquin mitsu ñuixunti ꞌicën.

²⁸ Nucën Papa Diosan Bëru Ñunshin Upitan sinánmicëxun cananuna sinan, ca asábi ꞌiti ꞌicën, mitsúnmi Moisésnën usai judíos unicama ꞌiti cuënëo banacama quicësabi oquin ꞌaquinma ënë ñuishi ꞌati:

²⁹ Unínbia uniocë ñu a rabiquian ꞌacë ñuina a camina pitima ꞌain ꞌimainun camina ñuina imi pitima ꞌain ꞌimainun camina tëtsë́cacë ñuina pitima ꞌain ꞌimainun ca aín xanuma ꞌain uni xanubë ꞌitima ꞌicën. Ënë banacama cuati camina mitsux asábi ꞌiti ꞌain. Bërúanx camina ꞌicanti ꞌain”.

³⁰ Usaquin quirica ꞌatancëxuan xucëx cuanx ca Antioquíanu bëbacëxa. Bëbaia cuatía timëtia ca axa Jesucristomi catamëcë unicama a buáncë quirica ꞌináncëxa.

³¹ ꞌInáncëxun a quirica uisai cara quia quixun istancëx ca cuëëni chuámashirua ꞌicancëxa.

³² Usa ꞌain ca an Nucën Papa Diosan sinánmicëxun bana uni ñuixuncë uni ꞌixun Judas ꞌimainun Silasnën ꞌitsa oquin bana ñuixunquin anu ꞌicë unicama ꞌësëacëxa. ꞌËsëcëxun upí oquin Jesús sinani chuámarua tani ca unicama cuëëancëxa.

³³ ꞌItsa nëtën Antioquíanu ꞌitancëxa Judasbë Silas an xucë unicamanu cuantëcënia ca anua ꞌicë axa Jesucristomi catamëcë unicaman —bërúanx camina cuanti ꞌai —quixun caquin xuacëxa.

³⁴ Usa ꞌaínbi ca Silanën Judas cuantámainun ax bërúti sináncëxa.

³⁵ Usaquin sinántancëx bërúxun ca anuxun Pablobëtan Bernabénën an Jesucristomi catamëcë ꞌixun aín bana ñuixuncë unicamabëtan —Nucën ꞌIbu Jesúsmi catamëti ca uni Nucën Papa Diosnan ꞌiti ꞌicë —quixun bana ñuixunquin Antioquíanu ꞌicë unicama ꞌunánmiacëxa.

Pablo mecama oi cuantëcëan (15.34-18.22)

³⁶ Usa ꞌain ca anu pain ꞌitancëxun Pablonën Bernabé cacëxa: —Anuxunu Nucën ꞌIbu Jesucristomi catamëti ca uni Nucën Papa Diosnan ꞌiti ꞌicë quixun bana ñuixuncë ëmacamanu cuanquin cananuna anua ꞌicë nun xucë́antu uisa cara istëcëni cuanti ꞌai —quixun.

³⁷ Cacëxun ca Bernabénën Juan ꞌicëbi Marcosribi cacë uni, a buántisa tancëxa.

³⁸ Buántisa taniabi ca Pablonën Bernabé cacëxa: —Panfilia nëtënuax ca nubëtan Nucën Papa Diosan bana unicama ñuixunima nu ëbëtsini uaxa. Usa ꞌain cananuna a buántima ꞌain.

³⁹ Usai canantancëx ënananquin Marcos buani ca Bernabé, manë nuntin Chipre nasínu cuancëxa.

⁴⁰ Cuancëbëtan ca Pablonën Silas abëa cuanun caísacëxa. Caíscë ca axa Jesucristomi catamëcë unicaman —Nucën ꞌIbu Diosan ca nuibaquin bërúanquin mi ꞌaquinia —quixun catancëxun xuacëxa.

⁴¹ Xucëx cuanquin ca Pablobëtan Silasnën Siria menu cuanan Cilicia menuribi cuanquin a mecamanuaxa Jesucristomi catamëcë unicama bana ñuixunquin Jesucristonan ꞌaísha cuëënun sinánmiacëxa.