Hechos 14 - Kashibo-Kakataibo Biblia

Pablobë Bernabé Iconio ëmanu ꞌiá

¹ Antioquíanuax cuanx Iconio ëmanu bëbax ca Pablobë Bernabé anua judíos unicama timë́ti xubunu atsíancëxa. Atsínxuan bana ñuixuncëx ca ꞌitsaira judíos uni ꞌimainun judíosma uni acamaxribi ami sinani Jesúsmi catamëacëxa.

² Catamëcëbëtanbi ca Jesucristomi sinántisama tancë judíos unicaman, judíosma unicama ꞌatimaquin sinánmiquin axa Jesucristomi catamëcë unicamami nishnun quixun tsuáquirumiacëxa.

³ Usaía ꞌicancëbë ca Pablobë Bernabé anu pain atubë ꞌiacëxa. ꞌIxun ca Nucën ꞌIbu Jesúsmi catamëti racuë́quinma a ñuiquin upí oquin bana ñuixuancëxa. Ñuixuanan ca —nu nuibaquin ca Nucën Papa Diosan ainan ꞌinun nu ië́minun aín Bëchicë xuacëxa —quixun cacëxa. Usoquin an atu ñuixuncë banax ca asérabi ꞌicë quixuan camabi unin ꞌunánun ca Nucën ꞌIbu Jesusan ꞌamicëxun uni itsin ꞌacëma ñu a rabëtan ꞌacëxa.

⁴ Usa ꞌaínbi ca Iconio ëmanu ꞌicë unicama raírinëxa —judíos uni ꞌixun cananuna Jesucristomi catamëti bana cuatima ꞌai —quimainun raírinëxribishi —Jesusan aín bana ñuixunun caíscë uni rabë́ ënën bana ca upíira ꞌicë —quiacëxa.

⁵ Usax ca judíos uni raíri ꞌimainun judíosma uni raíriribi, acamax Iconionu ꞌicë atun cushicamabë Pablocëñun Bernabé ami nishquin ñu catancëxun maxaxan ꞌanux ꞌësë́nancëxa.

⁶ ꞌËsë́nania ñuia cuabiani ca Licaonia menu ꞌicë ëma rabë́, Listra ꞌimainun Derbe, ꞌimainun a ꞌurama ꞌicë me camanuribi cuancëxa.

⁷ Cuanxun ca a menu ꞌicë ëmacamanuxun —Jesucristomi catamëti aín ꞌuchacama tërë́ncë ꞌaish ca uni Nucën Papa Diosnan ꞌiti ꞌicë —quixun unicama bana ñuixuancëxa.

Listranuxuan Pablo maxaxan ꞌacan

⁸ Usa ꞌain ca uni achúshi aín niti bëtsicë usabi bacë́an ꞌaísha nicëma, ax Listranu ꞌiacëxa.

⁹ Usa ꞌixun ca a unin tsóxun Pablonëan bana ñuia cuacëxa. Cuatia isquin ca Pablonën, ënë unin ca —Nucën Papa Diosan ca ꞌë pëxcuti ꞌicë —quixun sinania quixun ꞌunáncëxa.

¹⁰ ꞌUnánquin ca munuma banaquin cacëxa: —Cushi ca nirut. Cacëxëshi nirui ca chirini niacëxa.

¹¹ Pablonëan usoia isi ca anu ꞌicë unicamax ratuti Licaonia menu ꞌicë unicaman banan munuma banai quiacëxa: —Unisa ꞌaish ca dios rabë́ nunu uaxa.

¹² Quitancëx ca Bernabé ñui —ax ca Júpiter ꞌicë —quianan Pablo ñui, an uni bana ñuixuncë ꞌain, —ax ca Mercurio ꞌicë —quiacëxa.

¹³ Usai quiquin ca anuxun Júpiter rabiti xubu axa a ëmanu atsínti bainubi ꞌain, an a rabicë sacerdote achúshinën Pablocëñun Bernabé rabinuxun, vaca bënëcamacëñun ñu ua upí oquin xëocë bëacëxa. Bëtancëxun ca unicamabëtan vaca bënëcama a rëquin Pablocëñun Bernabé rabitisa tancëxa.

¹⁴ Usaquian ꞌaisa tancëxunbi ꞌunani ca Pablobë Bernabé ratúacëxa. Ratuti atu nëbë́tsi cuanquin ca aín chupabi tucai munuma banaquin cacëxa:

¹⁵ —¿Uisocasquin caramina ësoquin ñu ꞌacanin? Nuxribi cananuna mitsusaribi unishi ꞌain. Usa ꞌaíshbi cananuna an mitsu ꞌaquincëxunmabimi ñancábi ñu rabicë, a ënquin Nucën Papa Dios ashi rabinun quixun mitsu cai uan. An bamatiomoi tsóo ꞌixun naí, me, bacacama ꞌimainun anu ꞌicë ñucamaribi unio, a camina sinánti ꞌain.

¹⁶ Bëráma ca Nucën Papa Diosan camabi baritian atun cuëëncësa oquin ñu ꞌanun quixun unicama ëancëxa.

¹⁷ Usaquin ënquinbi ca, ax ca asérabi Dios ꞌicë quixun ꞌunánun, an ꞌacësabi oquin upí oquinshi camabi menu ꞌicë unicama ꞌaquinquin, ꞌuí ꞌibúmiquin ñu ꞌapácëcamaribi canimiquin bimimia. Usoquin an ꞌimicë cupí cananuna ñu pi nux chuámarua bucuin.

¹⁸ Pablobëtan Bernabénën usoquin cacë́xbi ca a unicamax vaca bënë rëxun atu rabicatsi quiax sinanaisama tancëxa. Usai ꞌiquinbi munu sinanaquin ca rabiama ꞌicën.

¹⁹ Usaía ꞌicëbë Antioquía ꞌimainun Iconionuax uquin ca judíos unibunën raíri sinanamiquin Pablocëñun Bernabé maxaxan ꞌacëxa. ꞌAtancëxun —ca bamaxa —quixun sinánquin ca nirínbianxun ëma ꞌuri racáncëxa.

²⁰ Usoquin ꞌacëa bamacësa sinánquin axa Jesucristomi catamëcë unicaman nëbë́tsioracëxbi ca niruquiani a ëmanubi cuantëcëancëxa. Usai ꞌionx ca pëcaracëbë Pablobë Bernabé, Derbe ëmanu cuancëxa.

²¹ Cuanx bëbatancëxun ca —Jesucristomi catamëti ca aín ꞌuchacama tërë́ncë ꞌaish uni Nucën Papa Diosnan ꞌiti ꞌicë —quixun unicama bana ñuixuancëxa. Ñuixunia cuati ca ꞌitsa uni Jesucristomi catamëacëxa. Usaquin ꞌatancëx ca Derbenuax Listranu cuantëcëanx Icónionu cuanan Antioquíanuribi cuantëcëancëxa.

²² A ëmacamanu ꞌiquiani cuanquin ca axa Jesucristomi catamëcë unicama cushioquin Jesucristomi catamëti ënxunma ꞌanun ꞌësëanan nux Nucën Papa Diosnan ꞌaish cananuna uni itsían bëtsi bëtsi ocë ꞌiti ꞌai quixun cacëxa.

²³ Usoquin canan anua ꞌicë ëmacamanuax axa Jesucristomi catamëcë unicamabë timë́quin ca atun cushi ꞌinun, axa asérabi Jesucristomi catamëcë unicamaishi anëacëxa. Anëtancëx píma abë banaquin ca —axa mimi catamëcë ënë unicama camina upí oquin ñu ꞌanun sinánmianan bërúanti ꞌai —quixun Nucën Papa Dios atu ñucáxuancëxa.

Sirianu ꞌicë Antioquíanu Pablobë Bernabé cuantëcëan

²⁴ Usoquin ꞌatancëxun Pisidia menu ꞌicë Antioquíanuxunribi bana ñuixuntancëx ca anuax cuanx Panfilia menu bëbacëxa.

²⁵ Panfilia menu ꞌicë ëma Perge anuxun bana ñuixuntancëx ca Atalia ëmanuribishi cuancëxa.

²⁶ Anuax ca Sirianu ꞌicë Antioquía ëmanu manë nuntin cuantëcëancëxa. Ax ca anuxuan axa Jesucristomi catamëcë unicaman Nucën Papa Diosan ꞌamicëxun, atun ñu mëëti sënë́onquin ꞌatánun quixun xucë, a ëma ꞌiacëxa.

²⁷ Usa ꞌain ca bëbaxun axa Jesucristomi catamëcë unicama timëacëxa. Timëxun ca Nucën Papa Diosan ꞌamicëxuan ꞌacë ñucama ñuixuanan —judíos unicamaxëshima, judíosma unicamaxribi ca Nucën ꞌIbu Diosan sinánmicëx Jesucristomi catamëtia —quixun ñuixuancëxa.

²⁸ Ñuixuntancëx ca anu pain axa Jesucristomi catamëcë unicamabë Bernabé ꞌimainun Pablo ꞌitsa ꞌuxën pain Antioquíanu ꞌiacëxa.