Hechos 13 - Kashibo-Kakataibo Biblia

III. JUDIOS UNIBUNËXËSHIMA UNI ITSIRIBI JESUCRISTOMI CATAMËA (13-28) Mecama oia Pablo Jesús ñuiquin bana ñui cuan (13.1-15.33) Saulobëa Bernabé Jesús ñui bëtsi nëtënu cuan

¹ Antioquíanu ꞌicë axa Jesucristomi catamëcë unicama raírinëx ca an Nucën Papa Diosan sinánmicëxun bana uni ñuixuncë uni ꞌiacëxa, raírinëx ca an aín bana unicama ꞌunánmicë ꞌiacëxa. Usa ꞌain ca Bernabé ꞌimainun Simeón ꞌicëbi Tunan Uni caquinribi anëcë, a ꞌimainun Cirene menu ꞌicë uni, Lucio, a ꞌimainun Manaén, axa Galilea menu ꞌicë ꞌapu Herodes, abë canicë, a ꞌimainun Saulo, acamax Antioquíanu ꞌiacëxa.

² Usa ꞌixuan achúshi nëtën timë́xun ñu piquinma Nucën ꞌIbu Dios rabicëxun ca aín Bëru Ñunshin Upitan atu cacëxa: —ꞌËn caíscësabi oquian bana ñuixunun camina Saulocëñun Bernabé cati ꞌain.

³ Usaquian cacëxun piquinma Nucën Papa Dios ñucáxuntancëxun atun mëcënan ramëquin ca axa Jesucristomi catamëcë unicaman Bernabécëñun Saulo, Nucën Papa Diosan bana uni ñuixunia bërúanx cuantánun caxun xuacëxa.

Pablobëtan Bernabénën Chiprenuxun bana ñuixuan

⁴ Usaquian ꞌacëx ca Nucën Papa Diosan Bëru Ñunshin Upitan xucëx Saulobë Bernabé Seleucia ëmanu cuancëxa. Cuanx ca anuax manë nuntin Chipre nasínu cuancëxa.

⁵ Chiprenu ꞌicë ëma Salamina anu bëbatancëxun ca anu judíos unicama timë́cë xubucamanuxun Jesucristo ñuiquin Nucën Papa Diosan bana unicama ñuixuancëxa. Bana ñuixunia ca Juanënribi ꞌaquiancëxa.

⁶ Salaminanu ꞌicë unicama bana ñuixuntancëx ca Chipre nasícamanu cuantancëx Pafos cacë ëmanuribi bëbacëxa. Anua ca judíos uni achúshi, Barjesús caquin anëcë, ñubë́ uni a mëracëxa. Barjesús ax ca cëmëi —ꞌëx cana an Nucën Papa Dios quicë bana uni ñuixuncë uni a ꞌai —quiacëxa.

^7-8 Barjesús ax ca aín anë itsi Elimas cacë ꞌiacëxa. Elimas quicë ax ca ñubë́ qui quicë bana ꞌiacëxa. Barjesús ax ca Sergio Paulo cacë ꞌapu an ñu mëëxuncë uni ꞌiacëxa. Usa ꞌain ca Sergio Paulonën sinánñuira ꞌixun Nucën Papa Diosan bana cuaisa tanquin Bernabécëñun Saulo unun quixun camiacëxa. Sergio Paulonëan Nucën Papa Diosan bana sinántisa taniabi ca Barjesúsnën a bana sinánxma ꞌinun quixun cacëxa.

⁹ Usa ꞌaínbi ca Saulo ꞌicëbi Pablo caquinribi anëcë, an Nucën Papa Diosan Bëru Ñunshin Upitan sinánmicëxun Barjesús ñachacëxa.

¹⁰ Ñachaquin ca cacëxa: —Cëmë camina mix ꞌain. ꞌIanan camina ꞌatima uni ꞌaish ñunshin ꞌatimanën sinánmicë ꞌain. Usa ꞌixun camina min ñu upí cuëëniman. Nucën ꞌIbu Diosan banaxa cuaisa ꞌaish upí ꞌaínbi ¿caramina min uisa cupí a cuaxunma ꞌanun quixun uni paranin?

¹¹ Usa ꞌicë ca Nucën ꞌIbu Diosan bërí mi castícania. An ꞌimicëx bëxuñu ꞌixun camina ꞌitsa nëtën xabá isnuxunma ꞌain. Usaquian cacëxuinshi ca Barjesús bëxuñu ꞌixun iscasmacëxa. Iscasmaquin ca uin cara isa mëínbianquin buánti ꞌicë quixun mancasmacëxa.

¹² Usaía ꞌicëbëtan ca Pablonën Nucën ꞌIbu Jesús ñuia cuanan usaria Barjesús ꞌia isi ratuti Sergio Paulo ami sinani Jesucristomi catamëacëxa.

Pisidia menu ꞌicë ëma, Antioquía, anu Pablobë Bernabé cuan

¹³ Pafos ëmanuax nuntin cuanx ca Pablobë axa abë cuancë unicamabë Panfilia menu ꞌicë ëma, Perge, anu bëbacëxa. Bëbax ca raíri uni ëbiani Juan Jerusalénu cuantëcëancëxa.

¹⁴ Cuancëbë Perge ëmanuax cuanx ca Pisidia menu ꞌicë ëma Antioquía anu bëbacëxa. Bëbatancëx ca anuax anun ñu mëëtima nëtën anua judíos unicama timë́ti xubunu atsíntancëx tsoócëxa.

¹⁵ Tsotan anu ꞌicë unicamanribia cuamainun Moisésnën cuënëo bana ꞌimainun an Nucën Papa Dios quicë bana uni ñuixuncë unicamanribia cuënëo bana ꞌatancëxun ca a xubunu ꞌicë ꞌapucaman Pablocëñun Bernabé cacëxa: —ꞌËn xucë́antu, mitsúnribi unicama ꞌësëtisa tanquin camina cati ꞌain.

¹⁶ Cacëxun ca Pablonën niruquin an cacëxun cuanun quixun aín mëcënan sanánquin ësaquin cacëxa: —Israel unicama ꞌimainun an Nucën Papa Diosan bana sináncë unicama, ꞌën mi camainun ca ꞌën bana cuacan.

¹⁷ Nucën Papa Dios, Israel unibunën Dios, an ca nucën raracama ainan ꞌinun caísacëxa. Caístancëxuan an ꞌimicëx ca Egipto menu pain tsoti anuax uácëxa. Uatia ca Nucën Papa Diosan aín cushínbi atu Egiptonua bëacëxa.

¹⁸ Bëquin ca cuarenta baritian anu uni ꞌicëma men aia, atux ami catamëisama tancëxunbi bërúancëxa.

¹⁹ Usaquian ꞌacë́xa atux bëbacëbëtan ca Nucën Papa Diosan Canaán menua ꞌicë mëcën achúshi ꞌimainun rabë́ ꞌapu a aín unicamacëñunbi cëñuacëxa, a mecama ainan ꞌinun nucën raracama ꞌinánuxun.

²⁰ Usaquin ꞌatancëxun ca cuatrocientos cincuenta barin Nucën Papa Diosan bëtsix paían ꞌiá ꞌain, ꞌaían ꞌinun achúshi achúshi uni atun cushi ꞌimiacëxa, Samuelnëan anun axa quicë bana unicama ñuixunti nëtëa ꞌitámainun.

²¹ Usaía ꞌicëbëa Samuel anu ꞌain ca Israel unicamax ꞌapuñu ꞌiisa tancëxa. Usa ꞌain ca Nucën Papa Diosan Benjaminën rëbúnqui, Cis cacë unin bëchicë, Saúl, a cuarenta baritia ꞌapu ꞌimiacëxa.

²² Cuarenta baritia ꞌicëbëtan Saúl chiquíntancëxun ca Nucën Papa Diosan David Israel unicaman ꞌapu ꞌimiacëxa. David ñui ca Nucën Papa Dios quiacëxa: “ꞌËn iscëx ca Isaínën bëchicë, David, ax ꞌën sinánsaribi ꞌicën. Usa ꞌixun ca ꞌëx cuëëncësabi oquin ꞌati ꞌicën”.

²³ Davidnën rëbúnquicama achúshi ca Jesús ꞌiacëxa. Amia catamëcëxuan Israel unicama aín ꞌuchacama tërë́nquin ainan ꞌinun ië́minun ca Nucën Papa Diosan a ꞌimiacëxa, ax usai ꞌiti ñui quiásabi oquin.

²⁴ Jesús uisama pain ꞌain ca Juanën Israel unicama bana ñuixunquin ësoquin cacëxa: ꞌAtimaquin sinanibi sinanati camina nashimicë ꞌiti ꞌain.

²⁵ Aín bamati nëtëa ꞌurama ꞌain ca ësai Juan quiacëxa: Mitsun camina ꞌëx isana Cristo ꞌai quixun sinanin. Ama cana ꞌain. ꞌËx ama ꞌain ca ꞌë caxu ꞌësamaira uni aia. Axa upíira ꞌaish cushiira ꞌain cana ꞌëx asaribima ꞌaish ami rabini a ꞌurama ꞌitima ꞌain. Usai ꞌiquin cana aín taxacabi tubuxuntima ꞌain.

²⁶ ꞌËn xucë́antu, mitsúxmi Abrahamnën rëbúnqui ꞌaish raírinëx an Nucën Papa Diosan bana sináncë ꞌicë cana mitsu cain, Jesucristomi catamëti ca uni aín ꞌucha tërë́ncë ꞌaish Nucën Papa Diosnan ꞌiti ꞌicë quiáxa quicë bana, ënëx ca mitsúnribimi cuati ꞌicën.

²⁷ Ësaquinribi ca Pablonën Pisidia menu ꞌicë ëma, Antioquíanu ꞌicë anua judíos unicama timë́ti xubunuxun cacëxa: —Jerusalénu ꞌicë unicamabëtan ca aín cushicamanribi Jesús, ax ca Cristo, axa uti atun caíncë, a ꞌicë quixun ꞌunánma ꞌicën. Anun ñu mëëtima nëtën ꞌicëbë timë́xun an Nucën Papa Dios quicë bana uni ñuixuncë unicaman cuënëo bana iscë ꞌixunbi ca uisai quicë cara quixun ꞌunanimabi —ax ca bamati ꞌicë —quiacëxa, a bana quicësabi oi.

²⁸ Jesús ꞌanuxun sináncancëbëbi ca an ñu ꞌatima ꞌacë ꞌaíma ꞌiacëxa, a cupía ꞌati. Usa ꞌaínbi ca judíos unicaman ainsa Jesús ꞌaminun quixun Pilato cacëxa.

²⁹ Usai ca ax ꞌiti ꞌicë quiáxa a ñui cuënëo bana quiásabi oquin ca bamamiacëxa. Usa ꞌain ca i curúsocënua bamacë bitancëxun mapara naëcënu nanxun mëníocëxa.

³⁰ Mëníocëbi ca Nucën Papa Diosan baísquimiacëxa.

³¹ Baísquimicëx ca ꞌitsa nëtën pain ꞌi, abëa Galilea menuax Jerusalénu cuancë unicamami ꞌitsai chiquiracëacëxa. Usa ꞌain ca atun bërí a ñuiquin unicama ñuixunia.

³² Usa ꞌain cananuna mitsúxmi cuëënun upí bana ënë mitsu cain, Nucën Papa Diosan nucën raracama a ñuiquin cá a ca axa ucë ax ꞌiaxa quixun.

³³ Salmos dos, anu ca Nucën Papa Diosan aín bëchicë cá bana ꞌicën, ësai quicë: “Mix camina ꞌën Bëchicë ꞌain. Usa ꞌicë cana xënibua ꞌaínbimi ꞌëbë ꞌinun mi ꞌimin”. Usai ꞌinun ca Nucën Papa Diosan aín Bëchicë Jesucristo baísquimiacëxa. Usaquin ca ꞌacëxa quixun cananuna nun ꞌunanin.

³⁴ A banacamanu nun, an ca aín Bëchicë aín nami chëquítimoquin baísquimiti ꞌicë quixun ꞌunánun ca Nucën Papa Diosan aín uni ësaquinribi cuënëomiacëxa: “ꞌËn upí bana ñuiquin David cásabi oquin cana mitsu chuámarua ꞌinun ꞌimiti ꞌain”.

³⁵ Quianan ca ësairibi Salmos quiricanu quia: “Minan ꞌaish upí ꞌicë isquin camina bamacëbi ꞌën nami chëquinun ënquinma ꞌë baísquimiti ꞌain”.

³⁶ Usaquian Davidnën cuënëo ꞌaínbi cananuna ꞌunanin, Nucën Papa Dios cuëëncësabi oquin ꞌapu ꞌixun aín menu ꞌicë unicama ꞌaquintancëx ca David bamacëxa. Bamacë ca anu aín aintsi maían anuribi maíncancëxa. Maíncëx ca chëquiacëxa.

³⁷ David chëquia ꞌaínbi ca a Nucën Papa Diosan baísquimicë Jesús ax chëquiama ꞌicën.

³⁸ ꞌËn xucë́antu, usa ꞌain camina ꞌunánti ꞌain, Jesús cupíshi ca uni aín ꞌuchacama tërë́ncë ꞌiti ꞌicën. Ca usa ꞌicë quixun cananuna mitsu cain.

³⁹ Usaía judíos unicama ꞌitia Moisésnën cuënëo bana cuatíbi uni aín sinan upí ꞌiáma ꞌaínbi ca axa Jesucristomi catamëcë unicamax aín ꞌuchacama tërë́ncë ꞌaish Nucën Papa Diosan ꞌimicëx aín sinánribi upí ꞌicën.

⁴⁰ Camina bërúancacanti ꞌain, an Nucën Papa Dios quicë bana uni ñuixuncë unicaman cuënëo bana quicësabi oi mina ꞌin, a banax ca ësai quia:

⁴¹ Mitsux, ꞌën banami cuaicë ꞌaish, camina uisashiti caramina ratúanan cëñúti ꞌai quixun sinánti ꞌain. ꞌËx Dios ꞌixun cana mitsúnmi ismainun unin ꞌacëma ñu ꞌati ꞌain. A ꞌën ꞌaia isquian ñuicania cuaquinbi camina —asérabi ca —quixun sinántima ꞌain.

⁴² Usaquin caquin bana ñuixuntancëxa anu judíos unicama timë́ti xubunuax chiquitia ca abëa ꞌicëcamacëñun Pablo —anun ñu mëëtima nëtë itsínribi camina ënë banacama nu ñuixuntëcënti ꞌai —quixun unicaman cacëxa.

⁴³ Usa ꞌain ca unicamaxa a xubunuax chiquícëbë judíos uni raíri ꞌimainun judíosma ꞌixunbi Nucën Papa Diosan bana sinánquin ax quicësabi oquin ꞌacë, acamax Bernabé ꞌimainun Pablobë cuancëxa. Cuania buánquin ca Pablobëtan Bernabénën ꞌësëquin ësaquin cacëxa: —Nucën Papa Diosan mitsu nuibacëx camina ami manutima ax cuëëncësabi oi ꞌiti ꞌain.

⁴⁴ Usai ꞌiixan Pablobëtan Bernabénën anun ñu mëëtima nëtën Nucën Papa Diosan bana ñuixuntëcënia cuati ca a ëmanu ꞌicë unicamax camáxëshi timë́cësa ꞌinun timë́acëxa.

⁴⁵ Usaía ꞌitsaira uni timë́cë isi ca judíos unicamax pishui Pablomi nishacëxa. Ami nishi ca —cëmëi ca quia —quiax ꞌatimati Pablomi banacëxa.

⁴⁶ Usa ꞌain ca Pablobëtan Bernabénën racuë́quinma atu cacëxa: —Nun nu judíos uni ꞌicë mitsu pain Nucën Papa Diosan bana ñuixuncëxbi camina ꞌiti ꞌaíshbi ainan ꞌiisama tanquin aín bana cuaisama tancanin. Usa ꞌain cananuna judíosma unicama Jesús ñuiquin bana ñuixuni cuanti ꞌain.

⁴⁷ Usaquinu ꞌati ca Nucën ꞌIbu Dios cuëënia quixun cananuna ꞌunanin, Jesucristo ñuiquian ësoquin aín bana cuënëo isquin: Israel unicamaishima bëtsi unicamaribi aín sinan upí ꞌinun ꞌiminun cana mi ꞌimian. ꞌImianan cana aín ꞌuchacama tërë́ncë ꞌaísha ꞌënan ꞌinunmi camabi menu ꞌicë unicama ië́minun mi ꞌimian.

⁴⁸ Usoquian caia cuati ca judíosma uni raírinëx cuëëni, —Nucën Papa Diosan bana ënëx ca asábi ꞌicë —quiacëxa. Usa ꞌaish ca uicamax cara Nucën Papa Diosnan ꞌaish xënibua ꞌaínbi abë ꞌiti ꞌicë acamax Jesucristomi catamëacëxa.

⁴⁹ Usai ꞌimainun ca anu ꞌicë unicaman Nucën ꞌIbu Diosan bana a mecamanuxun ñuixuncania cuacëxa.

⁵⁰ Usa ꞌaínbi ca judíos unicaman Pablocëñun Bernabé ñui ami ꞌatimati banaquin bëtsi bëtsi xanu Nucën Papa Diosmi sináncë ꞌianan —atux ca aín nuitu upí ꞌicë —quixun unin cacë acama ꞌimainun a ëmanu ꞌicë cushi unicamaribi Bërnabé ꞌimainun Pablomia nishnun quixun tsuáquirumiacëxa. Usocëxun ca Pablocëñun Bernabé bëtsi bëtsi oquin aín nëtënuaxa cuanun quixun xuacëxa.

⁵¹ Usa ꞌain ca a ëmanuax cuanquin —nun aín bana cuatima ca Nucën Papa Diosan iscëx ꞌaisama ꞌicë —quixuan anu ꞌicë unicaman ꞌunánun quixun aín taxacanu ꞌicë me cupúcë tacabiani, Iconio cacë ëmanu cuancëxa.

⁵² Cuanbi ca Antioquía ëmanu ꞌicë axa Jesucristomi catamëcë unicama aín Bëru Ñunshin Upíñu ꞌaish chuámashirua tani cuëëancëxa.