Hechos 12 - Kashibo-Kakataibo Biblia

Jacobo bama ꞌimainun Pedro sipuacan

¹ Usomainun ca ꞌapu ꞌixun Heródesnën axa Jesucristomi catamëcë uni raíri bëtsi bëtsi omiacëxa.

² Bëtsi bëtsi omiquin ca Juanën xucën, Jacobo, a manë xëtocën ꞌamiacëxa.

³ Usoquin ꞌacëbëa judíos unicama cuëënia isquin ca Heródesnën Pedroribishia binun quixun aín suntárucama cacëxa. Anun chamiti ñucëñunma ꞌacë pán piti nëtë ꞌain ca Heródesnën Pedro bimitancëxun sipuamiacëxa.

⁴ Sipuamiquin ca ësaquin sináncëxa: Ënë nëtëcama inúcëbëtan sipunua chiquíminuxun cana judíos unicaman ismainun uisa carana Pedro oti ꞌai quixun isti ꞌain. Usaquin sinánquin ca chiquíti rabanan Heródesnën Pedro sipuanun quixun cacëxa. Cacëxun ca dieciseis suntáru a bërúanun mëníoquin policíanën rabë́ ꞌimainun rabë́ suntárunën paían bërúanun quixun sipuamiacëxa. Usoquin ca suntárucaman an paían bërúancëcamaxa cuancëbë cuancëbë uquin raírinënribi bërúancëxa.

⁵ Usa ꞌixun ca Pedro sipunua bërúancëxa. Usa ꞌaínbi ca axa Jesucristomi catamëcë unicaman nëtë́quinma Nucën Papa Dios Pedro ñucáxuancëxa.

Nucën Papa Diosan Pedro sipunua chiquían

⁶ Imë́ishi Heródesnën ñucánuan përcaratamainun ca acëñunbi manë risin mëtëcërëcacë ꞌixuan suntáru rabëtan pararuamainun Pedro ꞌuxacëxa. ꞌUxmainun ca an sipu bërúancë suntáru rabë́ribi xëcuë tanáin chiquitin rabanan bërúain niacëxa.

⁷ Usa ꞌaínbi ca Nucën ꞌIbu Diosan xucë́xa aín ángel ucëbëshi aín cushían sipu pëcacë ꞌiacëxa. Usaía ꞌicëbëtan aín pichánpurunu ratícaquin bësúnquin ca ángelnën Pedro cacëxa: —Bënëtishi ca nirut. Quixuan cacëbëshi ca anun mëtëcërëcacë manë risi tubucuti nipacëacëxa.

⁸ Usai ꞌicëbëtan ca ángelnën cacëxa: —Mi cuanun ca anúnmi tsitëcërëquicë mëníonan min taxaca tañut. Usaquin cacë́xa mëníocatia ca ángelnën Pedro cacëxa: —Min tarin rabumëxun ca ꞌë nuibëtsin.

⁹ Cacëx chiquíquin ca Pedronën asérabi ca an ꞌë buania quixun ꞌunánquinmabi ángel nuibiancëxa. ꞌUnánquinmabi ca —namati cana ësai ꞌi —quixun sináncëxa.

¹⁰ Sinánbiani cuanquian an bërúancë suntáru ëbianquin an ꞌurínxun bërúancë suntáru aribishi inubiancëbë ca anun ëman cuantinua ꞌicë manë xëcuë axbi xëóquiacëxa. Usai ꞌicëbë chiquíquiani cuanquin, bai itsi inúishi ca Pedro ëni ángel nëtë́acëxa.

¹¹ Nëtë́cëbë ca upí oquin sinani Pedro quiacëxa: —Asérabi cana bërí ꞌunanin, judíos unicamax cuëëncësabi oquian Heródesnën ꞌë ꞌati ꞌicëbi ca aín ángel xuquin Nucën ꞌIbu Diosan ꞌë ië́miaxa —quixun.

¹² Usaquin sinánbiani ca Juan ꞌicëbi Marcosribi caquin anëcë uni, aín tita Maríanën xubunu cuancëxa, anuaxa timë́ax ꞌaisamaira uni Nucën Papa Diosbë banacë, a xubunu.

¹³ Cuanx bëbaquian xëcuë taxcaia cuabëtsini ca xanu xuntacu, Rode, ax xëócai uacëxa.

¹⁴ Uquinbi Pedro banaia cuati cuëëni ca xëcuë xëocaíma —Pedro ca ëman nitsaxa —quixun cai amiribishi mëú abáquiancëxa.

¹⁵ Abáquianquian cacëxunbi ca cacancëxa: —Sapi camina ñunshían —quixun. Usaquin cacëxbi ca quiacëishiacëxa: —Asérabi ca Pedro ꞌicën. Quia ca: —Ama ca. Aín ángel sapi ca —quixun cacancëxa.

¹⁶ Usaia cananmainun ca Pedronën ꞌitsa oquin xëcuë taxcacëxa. Usoquian ꞌacëbëtan xëócaquinbi Pedro mërai ca ratúcancëxa.

¹⁷ Ratúcaniabi ca nëtë́nun quixun aín mëcënan sanánquin, usoquin ca Nucën ꞌIbu Diosan sipunua ꞌë chiquínbëtsinquin bëaxa quixun atu ñuixuancëxa. Ñuixuntancëxun ca cacëxa: —ꞌËn mi cacë banacama ënë camina Jacobo ꞌimainun nun xucë́antu ñuixunti ꞌai —quixun. Cabiani ca ëma itsinu cuancëxa.

¹⁸ Usaía ꞌion pëcaracëbë ca an bërúoncë suntárucamax, uimi cara Pedro quiónxa quiax sináncasmai raíribë ñucacanancëxa.

¹⁹ Usa ꞌain ca —ꞌaíma ca —quixuan ñuia cuaquin Pedro barinun quixun Herodesnën suntárucama cacëxa. Cacëxun bariquinbi ca mërama ꞌicën. Mëracëbëtanma ca an Pedro sipunua bërúoncë suntárucama a ñucátancëxun ꞌanun quixun raíri cacëxa. Usomitancëx ca Herodes Judea menuax Cesárea ëmanu tsoti cuancëxa.

Herodes bama

²⁰ Usa ꞌain ca Tiro ꞌimainun Sidón ëmanu ꞌicë unicamami Herodes nishacëxa. Herodes atumi nishcë ꞌixunbi ca a isi cuanti sináncancëxa. Usaquin sinánbiani riquianxun ca an Herodes ñu ꞌaquincë uni, Blasto, abë pain banacëxa. Abë banai mëníonanquin ca ësoquin cacëxa: —Tiro ꞌimainun Sidón ëmanu ꞌicë unicama nux cananuna aín menua piti marui, Herodesbë nuibanani tsótisa tanin. Usa ꞌain cananuna abë banatisa tanin.

²¹ Usaquian atun Blasto cacë bana cuaxun ca Herodesnën anúan a unicamabë banati nëtë mëníocëxa. Anúan abë banacanti nëtëa ucëbë ca ꞌapun pañucë chupa upíira pañuax anu ꞌapu tsótinu tsoócëxa. Tsotax ca a isía ricuatsincë unicaman cuanun banacëxa.

²² Banaia cuati ca sharárui quicancëxa: —Axa banacë uni ënëx ca unima ꞌicën, ënëx ca achúshi dios ꞌicën.

²³ Usaía quicancëbëbi ca Herodes: ꞌËx cana diosma ꞌain, ꞌë rabixunma ca Diosëshi rabican —quiama ꞌicën. Usa ꞌain ca unicaman a rabicëbëtan, Nucën ꞌIbu Diosan bënë́nquinshi xucëxuan, aín ángelnën ꞌimicëx Herodes ꞌinsíancëxa. ꞌInsíanx ca xënan picëx bamacëxa.

²⁴ Usa ꞌaínbi ca ꞌitsaira uni Nucën ꞌIbu Jesúsmi catamëacëxa. Usai ꞌimainun ca camabi menuxunribi ami sinánquin Jesús ñuiquin cuacocancëxa.

²⁵ Usaía ꞌimainun ca Saulobë Bernabé Jerusalénuxun a buáncë curíqui unicama ꞌinántancëx, Juan ꞌicëbi Marcosribi cacë a buani, Antioquíanu cuantëcëancëxa.