Hebreos 9 - Kashibo-Kakataibo Biblia

III. LEVITAN RËBUNQUINËN ÑU ꞌACË CUPI UNI ꞌIASAMAIRA OI CA JESUS CUPI UNI AIN ꞌUCHA TËRËNCË ꞌIA (9-10) Anuax judíos sacerdotecama Nucën Papa Diosbë baná tabernáculo ñuianan Jesucristo anu Nucën Papa Dios ꞌicë ñuicë bana

¹ Bëráma ca Nucën Papa Diosan judíos unicaman usoquin a rabinun quixun caquin, anuxuan Levitan rëbúnquinën judíos unicama a ñucáxunti tabernáculo cacë xubu ꞌanun quixun cacëxa.

² An Moisés cacësabi oquin ca judíos unicaman tabernáculo ꞌaquin, amo rabë́a aín namë́ ꞌitánun nëbë́tsi chupan bëpáncëxa. Anu paín atsínti anu ca anu lamparín nanti ꞌimainun curi mesa, anu uni itsin pitima pán nancë, acama ꞌiacëxa. Anu uni aín ꞌucha tërë́ncëma ꞌianan upiti mëníocacëma ꞌaish atsíntima ꞌain ca a ꞌiti Cata Upí cacë ꞌiacëxa.

³ Cata Upí a ꞌucë ca bëtsi cata ꞌiacëxa. Ax ca Cata Upíira cacë, ꞌiacëxa.

⁴ Tabernáculo nëbë́tsi rabë́ oquin bëpáncë chupa rapasu ca anuxun tsëpasa ñu sanutanun xaroti nancë ꞌiacëxa, a Cata Upíira cacë, a rapasu. A Cata Upíira cacë, anu ca bunánti, curin ratacacacë ꞌaish anúnribi aín namë́nu rocë ꞌiacëxa. A bunántinu ca curi ꞌacë chumu, anu maná cacë piti ñu ꞌitsamashi purucë, ꞌimainun Aaronën tsati ꞌaíshbi coo, a ꞌimainun maxax parúsha rabë́, anu usai ca aín uni ꞌiti ꞌicë quixun Nucën Papa Diosan cuënëo, acama ꞌiacëxa.

⁵ A bunánti aín mapútinu ca querubín rabë́, Nucën Papa Diosan suntárusa oquin curi uniocë, bësúnarabë oquin tsóncë ꞌiacëxa. A nëbë́tsinuax ca aín pëcacë ꞌucë mëucüax Nucën Papa Dios banacëxa. Anu ca judíos sacerdotenën cushicaman ꞌapun ꞌaracacë ñuinanën imi ánscacëxa, Nucën Papa Diosan atun ꞌuchacama tërë́nun. Ënë ñucama camina ꞌunáncan. Usa ꞌain cananuna camaira ñuiquin mitsu caiman.

⁶ Usaquin tabernáculo xubunu ꞌicë ñucama mënío ꞌain ca anu pain atsíncë cata, ax Cata Upí cacë, anu atsínxun judíos sacerdotenën an ꞌati ñu ꞌaia, lamparín mëníoti, pán mesanu nanti, acama, Nucën Papa Diosan mëníosabi oquin.

⁷ Acamax ca tabernáculo cata, anu pain atsínti, anuishi atsinia. Usa ꞌaínbi ca cata itsi, Upíira cacë, anu judíos sacerdotenën cushicaman ꞌapu axëshi camabi baritian achúshi oíshi atsinia. Anu atsínquin ca ꞌaracacë ñuinanën imi buania, aín ꞌuchacëñuan judíos unicaman ꞌuchacamaribi Nucën Papa Diosan tërë́nun quixun ánscaquin.

⁸ Nun nu a ñucama sinania ca Nucën Papa Diosan Bëru Ñunshin Upitan nu ësaquin ꞌunánmia, anu pain atsínti cata anuxun atun ꞌacësabi oquian camabi nëtën ñu ꞌacëbë ca judíos unicamax Cata Upíira cacë, anu Nucën Papa Dios ꞌicë, anu abë bananux atsinima.

⁹ Usai ca ꞌia quixun ꞌunánquin cananuna sinanin, Moisés quicësabi oquin ñuina rëxun xaroquinbi ca a unicaman, aín nuitu ca Nucën Papa Diosan iscëx asérabi upí ꞌicë quixun ꞌunanima. Usaribi cananuna nux ꞌai quixun cananuna sinanin.

¹⁰ Nucën Papa Diosan ca usoquin judíos unibunën ꞌati ñuiquin bëtsi bëtsi ñuina nami pitima ꞌimainun amiribi amiribi mëchucati, usa ñucama ꞌanun quixun mëníocëxa. Usai a banacama quicësabi oi ꞌibi ca atun nuitu upí ꞌima. An Jesucristo xuisama pain ꞌaían judios unibunën usa ñucama ꞌanun ca Nucën Papa Diosan mëníocëxa.

¹¹ Usa ꞌain ca Cristo ënë menu uá ꞌaish anu Nucën Papa Dios ꞌicë, anu cuantëcëancëxa. Ënë menuax cuantëcëan ꞌaish ca anua Nucën Papa Dios ꞌicë, anu ꞌicë sacerdote, an Nucën Papa Dios nu ñucáxuncë, a ꞌicën. Anu ax sacerdote ꞌicë ax unin ꞌacëma ꞌaish ca ënë nëtënu ꞌicë tabernáculosamaira ꞌicën.

¹² Tabernáculonu ꞌicë cata Upíira cacë, anua sacerdotenën cushicaman ꞌapun chivo ꞌimainun vaca bacë rëxun aín imi buan ꞌaínbi ca Jesucristo aín imi ꞌapati bamatancëx baísquiax, anuira Nucën Papa Dios ꞌicë anu cuancëxa. Anu ashiti cuan ꞌixun ca nun ꞌuchacama tërë́ncë ꞌaíshnu xënibua ꞌaínbi Nucën Papa Diosnan ꞌinun nu ꞌimia.

¹³ Judíos unicaman ca aín ꞌucha cupí chivo ímainun vaca bacë, tabernáculo xubunu buánxun rëxun judíos sacerdotenën a xaroxúnun ꞌinánia. ꞌInáncëxun ca sacerdotenën a ñuinacan imi bianan aín nami xaroxun aín chimapu bixun a unicamanu sácaia. Usoquian ꞌacëx aín ꞌucha tërë́ncë ꞌaishbi ca ꞌuchatëcënima ꞌinúan ꞌacëma ꞌicën.

¹⁴ Ñuina rëcë aín imi cupí uni ꞌicësamaira oi cananuna Cristo bama cupí nun ꞌucha tërë́ncë ꞌaish upí ꞌiti ꞌain. Nucën Papa Diosan Bëru Ñunshin Upí, axa usabi ꞌiá ꞌaish usabi ꞌicë, ax abë ꞌain ca Cristo, ax ꞌuchañuma ꞌaíshbi bamatsianxmabi, nun ꞌuchacama tërë́ncë ꞌinun bamacëxa. Xënibua ꞌaínbi abë ꞌitimoinu bamati ꞌicëbi ca nun ꞌuchacama tërë́nquin, ax aín imi ꞌapati bama cupí, Nucën Papa Dios, axa bamatimoi tsócë, a rabinu ax cuëëncësabi oi ꞌinun nu ꞌimia.

¹⁵ Usa ꞌain ca Nucën Papa Dios quiásabi oi, an Cristomi catamënun sinánmicë unicama xënibua ꞌaínbi abë ꞌinun Cristo bamacëxa. An Moisésnën cuënëo bana cua nucën raracaman ꞌucharibi ca Cristo bama cupí, tërë́ncë ꞌicën. Usa ꞌain ca Moisésnën cuënëo bana ꞌiásama Cristo ñui quicë bana ꞌicën.

^16-17 Unin ca uin cara ax bamacëbëtan aín ñu biti ꞌicë quixun ñuiquin, —usai ca ꞌiti ꞌicë —quicë quirica mëníoia. Usa ꞌaínbi ca a uníxa bamacëma pain ꞌain, aín ñu bëtsi uninanma ꞌicën. Aín ꞌibúxa bamacëbë cuni ca aín ñucama asérabi bëtsi uninan ꞌia.

¹⁸ Usaribi oquin ca ꞌaracacë ñuina aín imi ꞌapati bamacëbëtainshi Nucën Papa Diosan judíos unicama aín ꞌuchacama tërë́nquin manúmiacëxa.

¹⁹ Nucën Papa Diosan cacësabi oquin ca Moisésnën a banacama ñuiquin judíos unicama catancëxun vaca bacë imicëñun chivo imi bixun ꞌunpáxcëñun mëscutancëxun ro, hisopo cacë, aín xo, xónsa carnero rani ꞌacë risi anun tëcërëcacë a chabóquin, cuënëo banami ꞌanan unicamamiribi ánscacëxa.

²⁰ Anscaquin ca judíos unicama cacëxa: “Ënë imi ánscacë isquin camina ꞌunánti ꞌain, Nucën Papa Diosan ca asérabi ax quiásabi oquin mitsun ꞌucha tërë́nquin, mitsúxmi aín uni ꞌimainun ax mitsun Dios ꞌixun mitsu sinánxunia” quixun.

²¹ Usaribi oquin ca Moisésnën tabernáculo xubu ꞌimainun aín Cata Upí anu ꞌicë ñucama anun Nucën Papa Dios rabiquin ñu ꞌati, acamamiribi a ñuina imi ánscacëxa.

²² Usa ꞌain ca usoquin ca judíos sacerdotenën ꞌati ꞌicë quixun Moisésnën cuënëo bana quicësabi oquin, anun Nucën Papa Dios rabiti ñucama ami imi ánscacë ꞌiacëxa, a ñuxa Nucën Papa Diosan iscëx upí ꞌinun. Ñuina bamacëbëma ca judíos unin ꞌucha tërë́ncëma ꞌiá ꞌitsíanxa. Usaribiti ca Jesús bamama ꞌain unin ꞌucha tërë́ncëma ꞌitsíanxa.

Bamax Cristo baísquia cupíshi unin ꞌucha tërë́ncë ꞌiti ꞌicë quicë bana

²³ Usaria Jesucristo anua Nucën Papa Dios ꞌicë anu atsínti tani ca unin ꞌacë tabernáculo xubu aín Cata Upíira cacë, anu judíos sacerdotenën cushicaman ꞌapu atsíancëxa. Usai Jesucristo ꞌiti ꞌain ca a ñucama Nucën Papa Diosan upí isnun ꞌaracacë ñuinanën imi anu a sacerdotenën ánscacëxa. Usa ꞌaínbi cananuna ñuinanën imi ánscacë cupíma, Jesucristonëxbi aín imi ꞌapati bama cupíshi anua Nucën Papa Dios ꞌicë anu nux abë ꞌiti ꞌain.

²⁴ Ax ca tabernáculo, anua Nucën Papa Dios ꞌicë tanquian unin ꞌacë, anuma, anua Nucën Papa Dios ꞌicë anubi atsíancëxa, anuxuan nu Nucën Papa Dios ñucáxuncë anu.

²⁵ Judíos sacerdotenën cushicaman ꞌapu ax ca tabernáculo xubu aín Cata Upíira anu camabi baritia achúshitishi, aín imima, ꞌaracacë ñuinanën imi ánscai atsinia. Usa ꞌaínbi ca Cristo, anua Nucën Papa Dios ꞌicë, anu ꞌitsai atsínima.

²⁶ ꞌItsai atsínux ca ꞌitsai bama ꞌitsíanxa. Usa ꞌaínbi ca Cristo aín uti nëtë sënë́ncëbë uni ꞌinux uá ꞌaish bamatsianxmabi achúshitishi unin ꞌucha cupí bamacëxa.

²⁷ Ënë nëtënu ꞌicë camabi unix ca achúshitishi bamati ꞌicën. Usa ꞌicë ca aín ñu ꞌacëcama ꞌunánquin Nucën Papa Diosan uicamax cara aín nëtënu abë ꞌiti ꞌicë quixun canan uicamax cara anu abë ꞌitima ꞌicë quixun cati ꞌicën.

²⁸ Usaribiti ca Cristo ënë menuax achúshitishi bamacëxa. Ax ꞌuchañuma ꞌaíshbi ca camabi unin ꞌucha ainansa ꞌaish tërë́ncë ꞌinun bamacëxa. Bamatancëx baísquitancëx ca aín Papa Diosnu cuan ꞌaish amiribishi ënë nëtënu utëcënti ꞌicën. Camabi unin ꞌucha cupí bamatëcëni aima ca an aín uti caíncë unicama abëa ꞌinun bitsi utëcënuxun ꞌaia.