Hebreos 8 - Kashibo-Kakataibo Biblia

Jesús ñui quicë bana

¹ Ënë banaxa bëtsi banasama ꞌicëmi mitsun ꞌunánun cananuna ënë ñuiquin mitsu cain, an Nucën Papa Dios aín unicama ñucáxunti, Jesús, ax ca usa ꞌaish bërí aín nëtënu abë ꞌaish, Nucën Papa Diosbë ꞌApu ꞌicën.

² Tabernáculo cacë xubu unin ꞌacë anuxuan Levitan rëbúnqui achúshinën judíos unicama Nucën Papa Dios ñucáxuncë ꞌaínbi ca anuxunma, aín nëtë anu Nucën Papa Dios ꞌicë, anuxunbi Jesusan nu Nucën Papa Dios ñucáxunia, Nucën Papa Diosan mëníosabi oquin.

³ An unicaman ꞌucha Nucën Papa Diosan tërë́nun ñuina rëcë xaronux ca sacerdotenën cushicaman ꞌapu an Nucën Papa Dios aín unicama ñucáxuncë ꞌia. Usaribiti ca Jesús unicaman ꞌucha tërë́ncë ꞌinun ñuina rëtíma, a cupía unicaman ꞌucha tërë́ncë ꞌinun bamatsianxmabi bamacëxa.

⁴ Bëríbi nubë ꞌaish ca Jesús sacerdote ꞌitsianxma. Levitan rëbúnquinëxëshi Moisés quiásabi oi sacerdote ꞌixun ca ñuina rëtancëxun xaroquin judíos unicama Nucën Papa Dios ñucáxunia.

⁵ —Jesucristo ax unicaman ꞌucha tërë́ncë ꞌinun bamax baísquitancëxun ca ënu ꞌëbë ꞌixun unicama ꞌë ñucáxunti ꞌicë —quixun sinánquin ca Nucën Papa Diosan bëráma Jesucristo ucëma pain ꞌain —Levitan rëbúnquinën ca tabernáculo xubunuxun judíos unicaman ꞌucha tërë́ncë ꞌinun ñuina rëxun xaroquin unicama ꞌë ñucáxunti ꞌicë —quixun mëníocëxa. Tabernáculo xubu ꞌati ñuiquin ca Nucën Papa Diosan Moisés “aín bashinuxun ꞌën mi ismicësabi oquin camina a xubu ꞌimainun anu ꞌicë ñucama ꞌati ꞌai” quixun cacëxa. Usa ꞌain cananuna ꞌunanin, Jesucristo aín nëtënu abë ꞌixun nu a ñucáxunti sinánquin ca judíos sacerdotenën tabernáculonu ꞌicë ñucama ꞌanun Nucën Papa Diosan mëníocëxa.

⁶ —Nucën Papa Diosan Moisés cuënëomia bana quicësabi oi ꞌi ca uni Nucën Papa Diosnan ꞌiti ꞌicë —quiáxa ax quicë bana, asamaira ca —Jesúsmi catamëtishi ca uni Nucën Papa Diosnan ꞌiti ꞌicë —quicë bana, ax ꞌicën. Usa ꞌain ca Levitan rëbúnquinën unin ꞌucha tërë́ncë ꞌinun ꞌásamaira oquin Jesusan nun ꞌucha tërë́nquin Nucën Papa Diosbë upí ꞌinun nu ꞌimia.

⁷ Usai ca judíos unicama ꞌiti ꞌicë quixun Moisésnën cuënëo bana quicësabi oquin ꞌai aín nuitu upí ꞌain ca bëtsi bana Jesús ñui quicë a Nucën Papa Diosan mëníoma ꞌitsíanxa.

⁸ Nucën Papa Diosan ca judíos unicama an cacësabi oi ꞌiiama isacëxa, aín bana cuënëo ësai quicësabi oquin: Nucën ꞌIbu Dios ca quia, usai ca judíos unicama, Israelnën rëbúnqui ꞌiti ꞌicë quixun Moisés cuënëomia bana ꞌinan, ꞌixunbi cana ꞌitsa bari inúcëbëtan bëtsi bana judíos unicama ꞌinánti ꞌain. Anun ꞌën a bana ꞌinánti nëtë ca uti ꞌicën.

⁹ A banax ca judíos unicama Egipto menua buánquin uisai cara atux ꞌiti ꞌicë quixun ꞌën Moisés cá banasama ꞌiti ꞌicën. Judíos unicama ꞌaquinsa tanquinbi cana atúan ꞌën bana cuaquin ꞌën cacësabi oquin ꞌacëma cupí atu ëancën.

¹⁰ Usa ꞌixunbi cana ꞌëx mitsun ꞌIbu Dios ꞌixun mitsu cain, usai ca judíos unicama ꞌiti ꞌicë quixun caquin ꞌën a pain ꞌinan bana sënë́ncëbëtan cana bëtsi bana judíos uni Israel unicama ꞌinánti ꞌain. Ësai ca a bana quiti ꞌicën: ꞌËn cana ꞌën cacë bana ꞌën unicaman manuquinma sinánan aín nuitu mëu upí oquin ꞌunánun ꞌunánmiti ꞌain. ꞌËx cana aín Dios ꞌaish atúan rabicë ꞌiti ꞌain. ꞌImainun ca atux asérabi ꞌën unicama ꞌiti ꞌicën.

¹¹ ꞌËn unicaman ca ꞌë ꞌunánti ꞌicën. Ñu ꞌunáncëma ꞌimainun ñu ꞌunáncë uni, apan ꞌimainun xucamanribi ca ꞌë ꞌunánti ꞌicën. Usa ꞌain ca uinu ꞌicë unínbi bëtsi uni, aín xucë́nbi, abë ꞌicë unibi cacëxunmabi atúnbi ꞌë ꞌunánti ꞌicën.

¹² Usaía ax ꞌicë uni a cana ñu ꞌatima ꞌacëbi nuibaquin aín ꞌuchacama tërë́nti ꞌain. Tërë́nxun cana manuquin aín ꞌuchacama sinántëcëntima ꞌain.

¹³ Ësaía Cristo cupí aín unicama aín nuitu upí ꞌiti ñui ca Nucën Papa Dios —ꞌën bëráma usai ca judíos unicama aín ꞌucha tërë́ncë ꞌiti ꞌicë quixun Moisés cuënëomia bana a camina ënti ꞌai —quiax quia. Usa ꞌaish ca a bana sënë́ntishi ꞌicën.