Hebreos 7 - Kashibo-Kakataibo Biblia

Jesús ax ca Melquisedec ꞌiásaribiti an aín unicama Nucën Papa Dios ñucáxuncë ꞌicë quicë bana

¹ Mitsux Abrahamnën rëbúnqui ꞌixun camina ꞌunanin, Melquisedec ax ca Salem cacë menu ꞌicë unicaman ꞌapu ꞌiacëxa. Ax ca sacerdote, an unicama Nucën Papa Dios manámi ꞌicë a ñucáxuncë ꞌiacëxa. Usa ꞌain ca bëtsi menu ꞌicë ꞌapucaman Abrahamnën xucënan bëchicë Lot cacë, aín nëtënu ꞌicë unicamabë ꞌacánanquin ñusmotancëxun aín ñucamacëñunbi ꞌitsa uni ꞌimainun xanu ꞌimainun tuáribi buáncëxa. Usoquin ꞌacë cuabiani aín unicama buani cuanxun ca Abrahamnënribi a suntárucama ñusmoxun abámianan anu ꞌicë ꞌapucaman buáncë unicamacëñun camabi ñu bitëcëancëxa. Bibiani cuantëcëni ca Abraham Melquisedecbë mëranancëxa. Abë mërananquin ca Melquisedecnën, Nucën Papa Diosan ca Abraham ꞌaquianxa quixun ꞌunanquin —an ca mi upí oquin sinánxunia —quixun caquin, a Nucën Papa Dios ñucáxuancëxa.

² Usaquin cacëxun ca Abrahamnën an bëcë ñucama mësú Melquisedec ꞌináncëxa. Melquisedec quicë bana ax ca “upí ꞌapu ca ax ꞌicë” qui quicë bana ꞌicën. Melquisedec ax ca Salem cacë menu ꞌicë unibu aín ꞌapu ꞌiacëxa. Salem quicë bana ax ca “bëtsi unibubë ꞌacananima ca chuámarua bucuia” qui quicë bana ꞌicën. Usa ꞌain ca Melquisedec ꞌacánanti sináncëma ꞌapu ꞌiacëxa.

³ Melquisedec a ca uix cara aín papa ꞌiacëxa, uix cara aín tita ꞌiacëxa, añu nëtën cara bacë́ancëxa, añu nëtën cara bamacëxa, uicamax cara aín rara ꞌiacëxa, abi unin ꞌunánma ꞌicën. Usa ꞌain ca judíos unibunëx —Melquisedec ax ca bamama ꞌicë —quia. Nucën Papa Diosan Bëchicënëx ca nëtë́timoi xënibua ꞌaínbi sacerdote, an unicama Nucën Papa Dios ñucáxuncë ꞌicën, uni Melquisedec ñui quiásaribiti.

⁴ Abraham a pain nucën rara, anbi ca abëa ꞌacánancë unicama ñusmoxuan bicë ñu mësú ax ꞌapu ꞌicë, Melquisedec, ꞌináncëxa. Usa ꞌain cananuna ꞌunanin, Abraham ax ca Melquisedec meu ꞌiacëxa quixun.

⁵ Moisés cuënëomiquin ca Nucën Papa Diosan —ësai ca ꞌiti ꞌicë —quixun caquin ësaquin cacëxa: —Abrahamnën rëbúnqui achúshi, Leví cacë, aín rëbúnquicamaxa sacerdote ꞌicë ca Abrahamnën rëbúnquicama raírinën aín ñucama mësú ꞌinánti ꞌicë —quixun. A uni camáxbi Abrahamnën rëbúnqui ꞌaish aín aintsi ꞌixunbi sacerdotecama usaquin aín ñu ꞌinánun ca Nucën Papa Diosan mëníocëxa.

⁶ Usa ꞌaínbi ca Melquisedec, Levitan rëbúnqui ꞌixunmabi, Abrahamnën aín ñucama mësú ꞌináncëxun biacëxa. Nucën Papa Diosan upí oquin sinánxuncë, Abraham, a ca Melquisedecnën aín ñu biquin —an cacësabi oquin usoquin ca Nucën Papa Diosan mi ꞌaxunti ꞌicë —quixun caquin Nucën Papa Dios ñucáxuancëxa.

⁷ Uni itsían Nucën Papa Dios ñucáxuncë uni ax ca an Nucën Papa Dios ñucáxuncë uni meu ꞌicën. Uinu ꞌicë unínbi ca —usama ca —quixun caima. Usa ꞌain ca Abraham Melquisedec meu ꞌiacëxa.

⁸ Levitan rëbúnqui, judíos sacerdotecama, a judíos unicama raírinën aín ñu mësú ꞌináncë, acamax ca uni ꞌaish bamaia. Usa ꞌaínbi ca Abrahamnën aín ñu mësú Melquisedec, a ñuia uni —ax ca bamama ꞌicë —quicë, a ꞌináncëxa.

⁹ Usa ꞌain ca ësoquinribi sinánti asábi ꞌicën: Levitan chaitiocë Abraham, an ca Melquisedec aín ñu mësú ꞌináncëxa, ax a meu ꞌixun. Usa ꞌain ca Levitan rëbúnqui, sacerdotecama, a judíos unicaman bërí aín ñu mësú ꞌináncë, acamaxribi Abrahambëtan aín ñu mësú Melquisedec ꞌinánsa ꞌicën.

¹⁰ Levitan rëbúnquicama ꞌaíma pain ꞌaíshbi ca Abrahambë ꞌicësa ꞌiacëxa, aín rëbúnqui ꞌaish. Usa ꞌain cananuna ꞌunanin, Melquisedec, ax ca Levitan rëbúnqui, sacerdotecama, acamabë sënë́nmaira cushi ꞌiacëxa quixun.

¹¹ Bëráma ca Nucën Papa Diosan ꞌamicëxun Moisésnën, uisai cara judíos unicama ꞌiti ꞌicë quicë bana cuënëocëxa. A bana Levitan rëbúnquicama, sacerdotecama ꞌixun, judíos unicama ꞌunánminun ca Nucën Papa Diosan mëníocëxa. Usa ꞌixuan Levitan rëbúnquinën ꞌaquincëx judíos unicama asérabi aín nuitu upí ꞌaish Nucën Papa Dios quicësabi oi ꞌicëbë ca sacerdote itsi Aarón ꞌiásama, Melquisedec ꞌiásaribi, Jesús uáma ꞌitsíanxa.

¹² Usa ꞌain ca usaquin judíos unicaman ꞌati bana, Levitan rëbúnquicama sacerdote ꞌixun judíos unicama ꞌunánmicë, a ꞌunanibi aín sinan upíma ꞌain, a ënquin bëtsi bana Jesús ñui quicë unin cuanun Nucën Papa Diosan mëníocëxa.

¹³ Nucën ꞌIbu Jesús a ñui Nucën Papa Diosan bana cuënëo quicë, ax ca judíos uni ꞌaíshbi Levitan rëbúnquima Judanën rëbúnqui ꞌiacëxa. Judanën rëbúnquinëx ca judíos sacerdote ꞌiti ꞌicë quiax ca Moisésnën cuënëo bana quiáma ꞌicën.

¹⁴ Camabi unin ca ꞌunania, Nucën ꞌIbu Jesús ax ca Judanën rëbúnqui ꞌiacëxa quixun. Usa ꞌaínbi ca Moisés sacerdote ñui, Judanën rëbúnquinëx ca sacerdote ꞌiti ꞌicë quiax quiáma ꞌicën. Levitan rëbúnquishi ca usai ꞌiti ꞌiacëxa.

¹⁵ Usa ꞌain cananuna upí oquin ꞌunanin, Nucën Papa Diosan ca Melquisedec ꞌiásaribitia sacerdote ꞌinun Jesúsëshi,

¹⁶ ax bamaxbi bamatëcëntimoi baísquicë ꞌicë, a sacerdote ꞌimiacëxa, Moisésnën cuënëo bana, Judanën rëbúnqui ca sacerdote ꞌiti ꞌicë quicë ꞌaímabi.

¹⁷ A ñuiquin ca Nucën Papa Diosan ësaquin cacëxa: Mix camina nëtë́timoi usabi sacerdote, an ꞌën unicama ꞌë ñucáxunti, a ꞌain, Melquisedec ꞌiásaribi.

^18-19 Usai ca judíos unicama ꞌiti ꞌicë quicë bana upí ꞌaínbi ca anun unin sinan upí ꞌiáma ꞌicën. Usa ꞌaínbi cananuna bëtsi bana, Jesús ñui quicë, a cupí asérabi nun ꞌuchacama tërë́ncë ꞌianan nun sinan upí ꞌaish Nucën Papa Diosnan ꞌain.

²⁰ Aín Bëchicë an aín unicama a ñucáxunti oquin ca Nucën Papa Diosan sinanatëcëntimoquin mëníocëxa.

²¹ Levitan rëbúnquinën ca ꞌën unicama ë ñucáxunti ꞌicë quixun ca Nucën Papa Diosan sinanatëcëntimoquin cáma ꞌicën. Usa ꞌixúnbi ca an sinanatëcëntimoquin caquin, Jesús asérabi an unicama a ñucáxunti ꞌimiacëxa, aín bana cuënëo ësai quicësabi oquin: Nucën ꞌIbu Diosan ca sinanatëcëntimoquin aín Bëchicë ësaquin cacëxa: Mix camina nëtë́timoi usabi sacerdote, an ꞌën unicama ꞌë ñucáxunti, a ꞌain, Melquisedec ꞌiásaribi, quixun.

²² Usa ꞌain ca an Moisésnën cuënëo bana cuacë uni ꞌiásamaira oi an Jesús ñuicë bana cuacë uni Nucën Papa Diosan iscëx upí ꞌia.

²³ Levitan rëbúnqui sacerdotecama ca ax pain ꞌitancëxa bëtsix bamacëbë bamacëbë sacerdote ꞌicë ꞌaish ꞌitsaira ꞌiacëxa.

²⁴ Usa ꞌaínbi ca ax bamatimoi tsócë ꞌaish usabi sacerdote ꞌixun Jesusan cuni aín unicama Nucën Papa Dios ñucáxunia.

²⁵ Ui unicaman cara a cupí abë upí ꞌiisa tanquin Nucën Papa Dios ñucatia, a ca Jesusan xënibua ꞌaínbi Nucën Papa Diosnan ꞌinun ië́mia. A unicama Nucën Papa Dios ñucáxunux ca bamatimoi tsotia.

²⁶ Usa ꞌaían Jesús axira nun sacerdote ꞌiti ca upíira ꞌicën. Nucën Papa Diosan iscëx upíira ꞌixun ñu ꞌatima ꞌacëma ꞌianan ñu ꞌatima ꞌati sináncëma ꞌianan ax upíira sinánñu ꞌaish ca aín Papabë ꞌApuira ꞌicën.

²⁷ Ax ca Levitan rëbúnqui ꞌicësai ꞌiáma ꞌicën. Atun ca camabi nëtën aín ꞌucha pain tërë́anan judíos unicaman ꞌuchacamaribi tërë́nun Nucën Papa Dios ñucáxunia, ñuina rëtancëxun xaroquin. Usama ca Jesús ꞌicën. Axbi ca camabi unin ꞌucha cupí ñuina rëxun xarocësa ꞌitánun bamatsianxmabi achúshitishi bamacëxa.

²⁸ Usa ꞌain ca Moisésnën cuënëo bana quicësabi oi Levitan rëbúnqui, ꞌuchañu ꞌaíshbi an judíos unicama Nucën Papa Dios ñucáxunti ꞌia. Usa ꞌaínbi ca an Moisés ꞌinan bana xënibucëbëtan, Nucën Papa Diosan sinanatëcëntimoquin caquin, aín Bëchicë Jesús, axa asérabi ꞌuchañuma ꞌiá ꞌaish usabi ꞌuchañuma ꞌia, an aín unicama a ñucáxunun ꞌimiacëxa.