Hebreos 6 - Kashibo-Kakataibo Biblia

¹ Usa ꞌain cananuna tuá xuratsu ꞌicësaíma uni apan ꞌicësai ꞌinuxun a paínu cuacë bana Cristo ñui quicë, aíshima bëtsi ñuribi ꞌunánti ꞌain. Cananuna a paínu ꞌunan banacama ësai quicë, a ñuitëcëntima ꞌain: nunbi ñu ꞌatima ꞌacë cupí Nucën Papa Diosnanma ꞌaish bamati ꞌaíshbi sinanati Nucën Papa Diosmi catamëtishi ië́ti,

² ꞌimainun Jesús sinani nashimicë ꞌiti, ꞌimainun Jesúsnan ꞌixun axa ami catamëcë uni itsinu nun mëcën nanquin Nucën Papa Dios ñucáxunti, ꞌimainun camabi uníxa baísquia ca Nucën Papa Diosan an ꞌacë ñucama ꞌunánquin uisa cara oti ꞌicë quixun cati, acama.

³ Ësa banacama mitsu ñuixuntëcënquinma cananuna Nucën Papa Dios cuëëncëbëtan bëtsi ñu mitsu ñuixunti ꞌain.

⁴ Ui unicamax cara Jesucristomi catamëcë ꞌixun, ax ca abë ꞌicë quixun ꞌunáncë, ꞌianan Nucën Papa Diosan Bëru Ñunshin Upitan aín nuitu mëu sinánmicë ꞌianan,

⁵ Nucën Papa Diosan bana ca upíira upí ꞌicë quixun sinánquin cuanan, Nucën Papa Diosan cushi, anun cana aín nëtënu ꞌiti ꞌai quixun sináncë,

⁶ ꞌixunbi ami sinánquinbi ëni uni raírinën cuatánun —ꞌëx cana Jesucristomi sinántëcënima —quia, a unix ca an Nucën Papa Diosan Bëchicë i curúsocënu matáscë uníxa ꞌiásaribi ꞌicën. Usai ꞌicë uni ax ca amiribishi Jesucristomi sinanatëcënima.

⁷ Usa unicamax ca anu ñu ꞌapáti meesaribi ꞌicën. Ësa ca. Nucën Papa Diosan, menu ꞌuí ꞌitsa ꞌibúmicëxun chabócëx ca ñu bëru ꞌimainun unían ꞌapácë ñu cotancëx tapunia, tapúanan ca tuaia. Usaía ꞌinúan Nucën Papa Diosan ꞌimicëxa ꞌia ca an ñu ꞌapácë uni an aín naënu ꞌicë ñu pinuxun bitsia.

⁸ Usa ꞌaínbi ca bëtsi me camabi ñu ꞌatima, muxa, chucu, acama anu coi canicëbë anu upí ñu ꞌiruima. Usa ꞌaish ca Nucën Papa Diosan iscëx a me ꞌaisama ꞌicën. Usa ꞌicë ca aín ꞌibun axa corucë ñucama nëënia.

Xënibua ꞌaínbi Nucën Papa Diosbë ꞌiti cupí bënëtima chuámarua ꞌiti

⁹ ꞌËn nuibacë xucë́antu, uni raírinën ca Nucën Papa Diosan Bëchicëmi catamëtancëxunbi ënia quixun ñuixunquinbi cananuna ꞌunanin, mitsux camina Jesucristo cupí ainan ꞌinun ië́micë ꞌixun ëncëma ꞌaish asérabi Nucën Papa Diosan upí oquin ꞌaquíncë ꞌai quixun.

¹⁰ Nucën Papa Dios, an ca aín sinan upí ꞌixun, mitsúnmi aín unicama nuibaquin upiti bucunun ꞌaquianan bëríribi usoquin mitsun ꞌaia, manuquinma sinania.

¹¹ Usa ꞌaínbi cananuna anúnmi Nucën Papa Diosan nëtënu ꞌiti nëtë utámainunmi mitsun ꞌacësabi oquin chiquíshquin ënquinma Nucën Papa Dios cuëëncësabi oquin ꞌati cuëënin. Usaquin ꞌaquin camina Nucën Papa Diosan nëtënu cëñútimoi abë ꞌiti sinánquin caínti ꞌain.

¹² Mitsúxmi chiquish ꞌiti cananuna cuëëniman. Cananuna cuëënin, Nucën Papa Diosan aín quicësabi oquin ꞌaquincë́xa aín uni raírinëx a ëníma ami catamëti upiti ꞌia isími usaribiti ꞌiti.

¹³ Nucën Papa Diosbë ca camabi uni ꞌimainun ángelcamaribi sënëníma. Usa ꞌixun ca anbi sinanatëcëntimoquin Abraham cacëxa:

¹⁴ “Ësoquin cana asérabi ꞌati ꞌain. Cana mi upí oquin sinánxunquin bëchicëñu mi ꞌimianan min rëbúnqui ꞌitsaira ꞌinun uámiti ꞌain”.

¹⁵ Usaquian cacëxun ca Abrahamnën —Nucën Papa Dios quicësabi oi ca ꞌiti ꞌicë —quixun sinánquin bënë́quinma, caíancëxa. Caíncëbë ca Nucën Papa Dios quicësabi oi Abrahamnën xanu tuutancëx Isaac bacë́ancëxa.

¹⁶ Ënëx ca ësa ꞌicën. Unix ca uni itsían aín bana isa asérabi ꞌicë quixun ꞌunánun quiax, aín ꞌapu axa asamaira ꞌain, a ñui ësai quia: Nun ꞌapúnbi ca ꞌunania, ꞌën mi cacë bana ënëx ca asérabi ꞌicën. Usai quicëbëtan ca an aín bana ca asérabi ꞌicë quixun ꞌunánquin abë cuëbicanántima ꞌicën.

¹⁷ Usaribiti ca Nucën Papa Dios axribi, axa ami catamëti ainan ꞌiti unicaman —aín quicësabi oi ca asérabi ꞌiti ꞌicë —quixun ꞌunánun, —xënibua ꞌaínbia sinanatëcëntimoi usabi ꞌiti ca ënë bana ꞌicë —quiax quiacëxa.

¹⁸ Usa ꞌain cananuna an ca ax quicësabi oquin ꞌaia quixun ꞌunánan, axa —sinanatëcëntimoquin cana mitsu cai —quicë cupí ca an asérabi usoquin ꞌati ꞌicë quixun ꞌunanin. Usaquin ꞌunánquin cananuna ꞌunanin, nun nu an nu ꞌaquinun ñucácë ꞌixun ca nu asérabi ꞌaquinti ꞌicë quixun. ꞌUnánan cananuna ami catamëquin —aín bana quicësabi oi cana asérabi ainan ꞌaish aín nëtënu abë ꞌiti ꞌai —quixun ꞌunanin.

¹⁹ Ënëx ca ësaribi ꞌicën. An manë nunti niquincë unicaman ca aín manë nuntia bëchunan tucáncaquin amami amami buánti rabanan, manë cha manë risin tëcërëcaxun, an cushioquin tuínun quixun baca nëbë́tsi nipatia. A manë chan tuíncë cupí ca nunti amanu amanu cuanima. Usaribiti cananuna Cristo anu Nucën Papa Dios ꞌicë anu cupí nun amanu amanu sinánbëquínquinma Jesucristomi sinánti ëntima ꞌain.

²⁰ Cristo axa anua Nucën Papa Dios ꞌicë anu ꞌain cananuna nuxribi anu abë ꞌiti ꞌain. Ax ca nëtë́timoi xënibua ꞌaínbi usabi sacerdotenën cushicaman ꞌapu ꞌaish, an aín unicama Nucën Papa Dios ñucáxunti a ꞌicën, Melquisedec ꞌiásaribiti.