Hebreos 5 - Kashibo-Kakataibo Biblia

II. LEVITAN RËBUNQUI ꞌIASAMA CA CRISTO ꞌICË QUICË BANA (5-8)

¹ Nucën Papa Diosan mëníosabi oquin ca judíos sacerdotenën cushicaman ꞌapun, judíos unicaman ꞌucha ꞌimainun aín ꞌucharibi tërë́ncë ꞌinun ꞌaracacë ñuina ꞌaxunquin Nucën Papa Dios ñucáxunia.

² Usa ꞌixun ca axribi uni ꞌicëa ñunshin ꞌatimanën ꞌapun ñu ꞌatima ꞌanun quixun tancëxun ꞌunan ꞌixun uni itsi usaribiti ꞌia ꞌaquinti ꞌunania. An ca, —usa ñu ꞌati ca ꞌaisama ꞌicë —quixun ꞌunánquinma an ñu ꞌacë unicama ꞌimainun, —usa ñu ꞌati ca ꞌaisama ꞌicë —quixun ꞌunánquinbi ꞌacë unicama aribi, ami nishquinma atux upí ꞌinun ꞌaquinti ꞌicën.

³ Axribi ñu ꞌatima ꞌacë ꞌixun ca judíos sacerdotenën cushicaman ꞌapun judíos uni raírinën ꞌuchacama ꞌimainun aín ꞌuchacamaribi tërë́ncë ꞌinun quixun ꞌaracacë ñuina ꞌaia.

⁴ Ui uníxbi ca axbi ꞌiisa tani judíos sacerdotenën cushicaman ꞌapu ꞌitima ꞌicën. Nucën Papa Diosan ꞌimicëx cuni ca usai ꞌiti ꞌicën, Nucën Papa Diosan —Aaronën ca ꞌën unicama ꞌë ñucáxunti ꞌicë —quixun Moisés cásaribi oi.

⁵ Usaribiquin ca Cristonën anbi judíos sacerdotenën cushicaman ꞌapu ꞌiti sinánma ꞌicën. Nucën Papa Dios an Mix camina ꞌën Bëchicë ꞌaish xënibua ꞌaínbi ꞌëbë ꞌiti ꞌai, quixun cacë, anbi ca Cristo judíos sacerdotenën cushicaman ꞌapu ꞌimiacëxa.

⁶ Ësairibi ca cuënëo bananua Nucën Papa Diosan aín Bëchicë cá bana quia: Mix camina nëtë́timoi usabi sacerdote, an ꞌën unicama ꞌë ñucáxunti, a ꞌain, Melquisedec ꞌiásaribi.

⁷ Jesusan ca ënë menu ꞌaish abë banaquin aín Papa ñu ñucácëxa. Ñucáquin ca axa bamatimoquin a ië́miti cushiñu ꞌicë ꞌunánquin, munuma banaquin cacëxa. Usaquian ax cuëëncësabi oquin ꞌaquinun quixun ñucácë cupí ca Nucën Papa Diosan Jesucristo ꞌaquiancëxa.

⁸ Usa ꞌain ca Cristonën, ax aín Bëchicë ꞌaíshbi tëmëracë ꞌixun, Nucën Papa Dios cuëëncësabi oquinshi ꞌati ꞌunáncëxa.

⁹ Ax tëmëraibi aín Papa Dios cuëëncësabi oi ꞌiá ꞌixun ca an aín bana cuaquin ax quicësabi oquin ꞌacë unicama a aín ꞌucha tërë́nquin Nucën Papa Diosnan ꞌaish xënibua ꞌaínbi abë ꞌinun ië́mia.

¹⁰ Ax ca ësaquian Nucën Papa Diosan cá, a ꞌicën, —mix camina sacerdote, an ꞌën unicama ꞌë ñucáxunti, a ꞌain, Melquisedec ꞌiásaribiti.

Jesucristomi catamëquin ëncë ꞌicë ꞌaish ꞌunánmitëcëinsa bana

¹¹ Usa ꞌaínu mitsu ënë banacama ñuixuinsa tancëxunbi camina mitsun asérabi upí oquin a bana cuaisama tanin.

¹² Mitsúinra a ñuicë bana a ꞌunáncë ꞌixun uni itsi ꞌunánmisa ꞌaíshbi camina mitsúnmi bëráma cuacë bana Jesucristo ñui quicë, a ꞌunánmitëcë́insa ꞌain. Ënë ñu upí oquin cuacëma ꞌaish camina mitsux tuáratsu ñu iru piisama pain ꞌixun aín titan xuma ꞌacësa ꞌain.

¹³ Bëráma cuacë bana ꞌunánmitëcëinsa ꞌaish camina an aín titan xuma ꞌacë tuásaribi ꞌain, uisai cara Nucën Papa Diosan uni ꞌiti ꞌicë quixun ꞌunáncëma ꞌaish.

¹⁴ An Nucën Papa Diosan bana upí oquin sinánquin an cacësabi oquin ꞌacë uni, an ca upí oquin ꞌunania, uisa ñu ꞌati cara Nucën Papa Diosan iscëx asábi ꞌicë, uisa ñu ꞌati cara ꞌaisama ꞌicë quixun. ꞌUnánquin ca usoquin ꞌaia. Usa unix ca tuá xuratsusama ꞌaish uni apánsa ꞌicën.