Hebreos 4 - Kashibo-Kakataibo Biblia

¹ Usa ꞌain cananuna Nucën Papa Diosan ainan ꞌinun nu ꞌimiti nëtë inúcëma ꞌaínshi, ainan ꞌiti sinánti ꞌain. Mitsu raírinëxmi Nucën Papa Diosnanma ꞌitin rabanan camina bërúancati ꞌain.

² A me anu chuámarua ꞌiti ñui quicë bana a ca nucën raracaman cuacëxa. Cuaquinbi ca —asérabi ca a menunu ꞌinun nu buánti ꞌicë —quixun sinánma ꞌicën. Usa ꞌaish ca a ñuixuan menu bëbama ꞌicën. Anu nucën raracama bëbama ꞌaínbi ca Nucën Papa Diosan nucën rara cásaribi oquin nux Jesucristomi catamëti aín nëtënu abë ꞌinux ië́ti bana ñuiquin nuribi caxa.

³ Nucën raracama ñuiquin cuënëo bana ca ësai quia: Atumi nishi cana sinanatëcëntimoi a unicama ñui quiacën: Atux ca a ꞌën atu ñuixuncë me anu chuámarua bucunux bëbatima ꞌicën. Atúxa usai ꞌiá ꞌaínbi cananuna nux Nucën Papa Diosmi catamëti ax nubë ꞌain chuámarua ꞌi cuëënin. Usaínu ꞌitioquin ca Nucën Papa Diosan camabi ñu unioquin mëníocëxa,

⁴ aín bana cuënëo ësai quicësabi oquin: Camabi ñu mëcën achúshi ꞌimainun achúshi nëtë cëñuquin uniotancëx ca Nucën Papa Dios nëtë itsin tanti —ꞌë ñu uniocëcama ca asábi ꞌicë —quixun isi upí oquin sinani cuëëancëxa.

⁵ Nucën raracama ñui ca Nucën Papa Diosax ësaribiti quiacëxa: Atux ca ꞌën atu ñuixuncë me anu ꞌëbë chuámarua ꞌaish cuëëni bucunux bëbatima ꞌicën.

⁶ Usa ꞌain ca ënë nëtënu ꞌicë unicama Nucën Papa Diosmi catamëti abë upí ꞌaish chuámarua ꞌiti, ꞌaíshbi raírinëx ami sináncëma pain ꞌicën. Usaribiti ca atun pain cuaquinbi a bana quicësabi oquin ꞌacëma ꞌaish a Nucën Papa Diosan ñuixuncë menu bëbama ꞌicën.

⁷ A paían ñuixuncë unicaman aín bana cuama ꞌain ca ënë nëtënu ꞌicë unicaman cuati oi Nucën Papa Dios amiribishi quitëcëni, bërí camina ꞌëmi catamëcanti ꞌai quiax quiacëxa, ësai: Bëría Nucën Papa Diosan mitsu cacëxun cuaquin camina cuacëmasa otima ꞌain. Usaquin ca Davitan, Josuénëan judíos unicama Nucën Papa Diosan ñuixuan menu bëbaquiían ꞌain, a xënibucëbëtan cuënëocëxa.

⁸ A unicama Nucën Papa Diosan anu chuámarua ꞌaish bucuti ñuixuncë menu bëbáma ꞌaínbi ca aín bëchicëcamax Josuénën buáncëx anu bëbacëxa. Josuénëan anua atux chuámarua ꞌaish bucuti menu buáncëx bëbatancëxuan ax quicësabi oquin ꞌai ami catamëcë ꞌain ca Nucën Papa Dios amiribishi anun uni chuámarua ꞌiti bana ñui quitëcëanma ꞌitsíanxa.

⁹ Usa ꞌain cananuna ꞌunanin, Nucën Papa Diosan ca aín unicamaxa ainan ꞌaish ax cuëëncësabi oi ënë menu chuámarua ꞌitancëx aín nëtënuira chuámarua ꞌaish bucuti oquin mëníocëxa quixun.

¹⁰ Uicamax cara ax cuëëncësa oíshi ꞌiti sinani bënë́ti a ëni, ami catamëti Nucën Papa Dios cuëëncësabi oi ꞌia, ax ca Nucën Papa Dios ñucama uniotancëx cuëëansaribi oi ꞌia.

¹¹ Nucën Papa Diosan atu ñuixuncë menu bëbáma unicama usaribiti nuxribi ami catamëcëma ꞌitin rabanan cananuna ainan ꞌaish upí oquin sinani ami catamëquin ëníma bërúancati ꞌain.

¹² Cananuna ꞌunanin, Nucën Papa Dios ax ca bamatimoi tsotia. Ax ca cushiira ꞌicën. Usa ꞌixun ca aín bananu ꞌaia nu ꞌunánmia, nun caranuna asérabi upí oquin sinani, caranuna upí oquin sinanima quixun. ꞌUnánmianan ca uisa cupí caranuna usoquin ꞌai quixun nu ꞌunánmia.

¹³ Axa an unio ꞌaish Nucën Papa Diosmi unë́ti uisa ñubi ca ꞌaíma ꞌicën. An uni aín ñu ꞌacë cupí, uisa cara oti ꞌicë quixun ꞌunáncë, Nucën Papa Dios, an ca camabi ñua unin ꞌaia ꞌunánan aín nuitu mëúa chiquinaquinma sináncë ñubi ꞌunania.

An aín unicama Nucën Papa Dios ñucáxuncë, Jesucristo ñuicë bana

¹⁴ Jesús ax ca Nucën Papa Diosan Bëchicë ꞌianan, an nu Nucën Papa Dios ñucáxuncë ꞌaish aín Papa Diosan nëtënu abëbi ꞌicën. Usa ꞌicë cananuna ami catamëquin aín bana cuati ëntima ꞌain.

¹⁵ Jesús an nu Nucën Papa Dios ñucáxuncë, ax ca uni ꞌaish nux ꞌicësaribiti tëmëraíbi ꞌuchama ꞌicën. Usa ꞌixun ca nuribi tëmëranan ñunshin ꞌatimanën ꞌatima ñu ꞌamitisa taniabi nuibaquin nu ꞌaquinti ꞌicën.

¹⁶ Asérabi ca usa ꞌicë quixun ꞌunánquin cananuna ami racuë́quinma, an nu nuibacë Nucën Papa Dios a nun ꞌuchacama tërë́nquin nu ꞌaquinun ñucáti ꞌain, an nu nuibacë cupí. Usaquin cananuna anúnu uisai cara ꞌicë nëtën, nuibaquian nu ꞌaquinun ñucáti ꞌain.