Hebreos 3 - Kashibo-Kakataibo Biblia

Moisésbëtan sënë́nmaira ca Cristo ꞌicë quiax quicë bana

¹ ꞌËn xucë́antu, mitsux ainanshi ꞌinun Nucën Papa Diosan ꞌimicë ꞌixun camina, Nucën Papa Diosan a ñuiquin unicama ñuixunun ënë nëtënu xuá ꞌixuan an aín unicama Nucën Papa Dios ñucáxuncë, Cristo Jesús, a uisa uni cara ꞌiacëxa quixun upí oquinra ꞌunánti ꞌain.

² Bëráma ca Jesús ucëma pain ꞌain, Moisésnën nucën raracaman cushi ꞌixun, Nucën Papa Diosan cacësabi oquin upí oquin ñu ꞌacëxa. Usaribi oquin ca Jesusan, aín Papan usaquin ꞌanun caíscë ꞌixun, an cacësabi oquin camabi ñu ꞌacëxa.

³ Nucën Papa Diosan Moiséscëñun judíos unicama ainan ꞌinun caísa ꞌaínbi, ca a unicama asérabi Nucën Papa Diosnan ꞌimiti Jesucristo axira ꞌicën. Usa ꞌain ca Moisésbë sënë́nmaira Jesucristo ꞌicën. Ënëx ca ësa ꞌicën. An ꞌacë xubu rabicësamaira oquin ca an xubu ꞌacë uni a unin rabia. Usaribi oquin ca Moisés ꞌimainun judíos unicama ꞌacësamaira oquin unin Jesucristo rabiti ꞌicën.

⁴ Ësa ca. Uisa ꞌaíshbi ca xubu abi uníma. Unin ꞌacëx cuni ca ꞌia. An ꞌacë uni ax ca aín ꞌibu ꞌicën. Usaribi oquian an Moisés ꞌimainun judíos unicama ainan ꞌitioquin mëníonan camabi menu ꞌicë ñucama unio ax ca Nucën Papa Dios ꞌicën.

⁵ Nucën raracama judíos unibu ꞌain ca Moisés atun cushi ꞌiacëxa. Aín cushi ꞌixun ca Nucën Papa Dios cuëëncësabi oquin upí oquin ñu ꞌacëxa. Uisairai ꞌi cara ainan ꞌiti ꞌicë quixuan judíos unicaman ꞌunánuan atu ñuixunun quixun Nucën Papa Diosan cacësabi oquin ca Moisésnën nucën raracama ꞌitsa ñu ñuixuancëxa.

⁶ Usa ꞌaínbi ca Nucën Papa Diosan unicaman cushi ax aín Bëchicë, Cristo, an aín Papa Dios cuëëncësabi oquin ꞌacë, a ꞌicën. Usa ꞌaish ca Cristo ax nun cushiribi ꞌicën, nun nu ami catamëti ënquinma cuëënquin abë aín nëtënu ꞌiti sináncë ꞌain.

Nucën Papa Diosan unicamaxa abë chuámarua ꞌiti bana

⁷ Usa ꞌain ca a bana Nucën Papa Diosan Bëru Ñunshin Upitan ꞌamicëxun unin cuënëo, ax ësai quia: Bëría Nucën Papa Diosan mitsu cacëxun cuaquin

⁸ camina cuacëmasa otima ꞌain, mitsun raracama ꞌásaribi oquin. Atux ca Nucën Papa Diosan ꞌaquincëxbi an cacë bana cuaisama tani ꞌatimati banai, —Nucën Papa Diosan ca nu uisabi oima —quicësa ꞌiacëxa, anu uni ꞌicëma menuax.

⁹ Ësai ca Nucën Papa Dios quia: Anuax ca ꞌën cuarenta baritia atu bërúanquin ñu ꞌaxuncëxun isíbi mitsun raracama ꞌëmi sinanima ꞌatimati banacëxa.

¹⁰ Usai ꞌia oi atumi nishi cana ësai quiacën: Ënë unicaman ca bëtsi bëtsi ñu sinani ꞌëmi sinánquin ꞌëx cuëëncësoi ꞌiti ꞌunántisama tanxa.

¹¹ Quianan cana atumi nishi sinanatëcëntimoi ësaribiti quiacën: Atux ca a ꞌën atu ñuixuncë me anu chuámarua bucunux bëbatima ꞌicën.

¹² ꞌËn xucë́antu, mitsúxribimi usai ꞌitima cupí camina bërúancati ꞌain, ꞌatimaquin sinánquin Nucën Papa Dios, axa bamatimoi tsócë, a ami catamëquinma ëntin rabanan.

¹³ Usai ꞌima camina micama uinu ꞌicëxbi ꞌatima ñu ꞌatishi sinani Nucën Papa Diosmi manúti rabanan, camabi nëtën, axa Jesucristomi catamëcë unicamabë ami upiti sinánmiananti ꞌain, ënë nëtëa cëñútisama pan ꞌaínshi.

¹⁴ Anun nux aín nëtënu ꞌiti nëtë sënë́ntamainun cananuna ami catamëtabatínu ꞌiásabi ꞌi ami catamëti ꞌain. Usai ꞌi cananuna camabi nëtën Cristobë ꞌain.

¹⁵ Ësairibi ca Nucën Papa Diosan bana cuënëo quia: Bëría Nucën Papa Diosan mitsu cacëxun cuaquin camina cuacëmasa otima ꞌain. Mitsun raracama ꞌiásaribiti camina ꞌitima ꞌain. Atux ca Nucën Papa Diosan ꞌaquincëxbi an cacë bana cuaisama tani ꞌatimati banacëxa.

¹⁶ ¿Uicamax cara Nucën Papa Diosan bana cuaquinbi cuacëmasa oi ax quicësabi oi ꞌiisama tancëx? Moisésnëan Egipto menua bëcë unicamax ca usai ꞌiacëxa.

¹⁷ ¿ꞌImainun cara uicamami Nucën Papa Dios cuarenta baritian nishacëx? Axa aín ꞌucha cupíbi an anua bëbati ñuixuncë menu bëbaima, anu uni ꞌicëma menuax cëñúa unicamami ca Nucën Papa Dios nishacëxa.

¹⁸ ¿ꞌImainun cara uicamaribi Nucën Papa Diosan sinántëcëntimoquin, an atu ñuixuncë menu ca chuámarua tani bucunux bëbatima ꞌicë quixun cacëx? An a timaquin aín bana cuaisama tancë unicama ca Nucën Papa Diosan usaquin cacëxa.

¹⁹ Usa ꞌain cananuna a ñucama sinánquin ꞌunanin, atúan aín bana ca asérabi ꞌicë quixun sináncëma ꞌianan ami catamëcëma cupí ca Nucën Papa Diosan a unicama anua chuámarua tani ꞌitia ñuixuncë menu bëbamiama ꞌicën.