Hebreos 2 - Kashibo-Kakataibo Biblia

Jesucristomi catamëti ië́tisama tantima bana

¹ Usa ꞌain cananuna Nucën Papa Diosan Bëchicë ñui quicë bana a upí oquinra bëmë́quin cuati ꞌain, a bana manuquinma ax quicësabi oquin ꞌanuxun.

² Bëráma ca ángelcaman ꞌaquinmainun Nucën Papa Diosan nucën raracama ñuixunun quixun, Moisés aín bana ꞌináncëxa. Usa ꞌain ca raírinën a bana quicësabi oquin ꞌamainunbia an a bana quicësabi oquin ꞌacëma unicama, a Nucën Papa Diosan atun ꞌucha cupíbi castícancëxa.

³ ¿Asérabi usa ꞌain caranuna nux —Jesucristomi catamëtia uni Nucën Papa Diosnan ꞌinun ië́ti bana a cuatíbi, a bana quicësabi oi ꞌicëma ꞌaish uisa tancëx ië́ti ꞌain? A bana anun nun ꞌucha tërë́ncë ꞌaish Nucën Papa Diosnan ꞌinux ië́ti, a ca Nucën ꞌIbu Jesucristonën pain unicama ñuixuancëxa. Usa ꞌain ca an cuacë uni raírinën, a bana ca asérabi ꞌicë quixun ꞌunánquin, nuribi ꞌunánmiacëxa.

⁴ A unicama ca Nucën Papa Diosan uni itsin ꞌacëma ñu ꞌanun ꞌamiacëxa, an aín bana ñuixunia cuacë unicaman, asérabi ca aín bana ꞌicë quixun ꞌunánun. ꞌImianan ca atu bëtsi bëtsi ñua ꞌanun aín Bëru Ñunshin Upí ꞌináncëxa, ax cuëëncësabi oquin.

Axa ami catamëti unicamasaribia Jesucristo ꞌiá bana

⁵ Aín unicama cara uisai ꞌiti ꞌicë quixun ñuiquin cana mitsu cain, Nucën Papa Diosan ca ángelcama —mitsux camina ꞌën unicaman ꞌapu ꞌiti ꞌai —quixun cáma ꞌicën.

⁶ Usama ꞌaínbi ca bëráma Nucën Papa Diosan bana cuënëo ësai quia: Nucën Papa Dios, ¿axa añu ꞌicë caramina uni sinánxunin? ¿Axa añu ꞌain caramina axa chëquiti unicama ꞌaisamaira oquin sinanin?

⁷ Min camina usabi ꞌinuxmabia ángelcamabë sënë́nmara ꞌinun uni ꞌimiacën. Usa ꞌimiquinbi camina minan ꞌaísha mibë xënibua ꞌaínbi ꞌitioquin ꞌimianan min unio ñucamaribi ꞌibuamiacën.

⁸ Usonan camina unicama camabi ñu aín ꞌibu ꞌinun ꞌimiacën. Usa ꞌain ca camabi ñun ꞌibu ꞌinun ꞌimiquin Nucën Papa Diosan añu ñubi an ꞌibuacëma ꞌitimoquin unicama uniocëxa. Usa ꞌaínbi cananuna ꞌunanin, camabi ñuira ca unin ꞌibuacëma pain ꞌicën.

⁹ Usa ꞌaínbi cananuna Jesús ꞌunanin. A ca Nucën Papa Diosan, usabi ꞌinuxmabi ënë menu uni ꞌaish ángelcama meura ꞌinun xuacëxa. Unicama nuibaquian Nucën Papa Diosan sinánsabi oi ca ax camabi unin ꞌucha cupí bamacëxa. Usa ꞌicëbi ca paë tani bamacë cupí baísquimitancëxun Nucën Papa Diosan aín nëtënu abë ꞌApu ꞌinun ꞌimiacëxa. Usa ꞌicëbi ca paë tani bamacë cupí baísquimitancëxun Nucën Papa Diosan aín nëtënu abë ꞌApu ꞌinun ꞌimiacëxa.

¹⁰ Nucën Papa Diosan ca camabi ñu ainan ꞌinun uniocëxa. Usoquin ꞌá ꞌaish ca, an aín bana cuacë aín bëchicëcamaxa aín nëtënu abë ꞌiti cuëënia. Usa ꞌixun ca axa uni ꞌaish tëmëranan paë tani bamacë cupíshi Nucën Papa Diosan ainan ꞌinun uni ië́minun Jesucristo ꞌimiacëxa.

¹¹ Jesús, an aín unicama Nucën Papa Diosan iscë́xa upí ꞌinun ꞌimicë a ꞌimainun an usaquin ꞌimicë unicama, acaman Papa ca Nucën Papa Dios ꞌicën. Usa ꞌain ca Jesús aín unicama sinani rabinima, atux ca ꞌën xucë́antu ꞌicë quia,

¹² aín bana quiricanu cuënëo quicësabi oquian aín Papa ësaquin cásabi oi: Usa camina mix ꞌai quixun cana ꞌën xucë́antu ñuixunti ꞌain. Min unicamaxa timë́cë, abëtan cana mi rabiti ꞌain.

¹³ Ësaribitia Jesús quiá ca cuënëo bananu ꞌicën: ꞌËx cana ꞌën Papa Diosmi catamëtin. Ësaribi ca cuënëo bananu ꞌicën: ꞌËx cana ënu ꞌain, ꞌën Papa Diosan ꞌë ꞌináncë aín bëchicëcamabë.

¹⁴ Achúshi unin bëchicëcamax ca aín xucë́nsaribi ꞌia. Usaribiti ca Nucën Papa Diosan bëchicëcamaxa uni ꞌain, axribi uni ꞌinux Jesús uacëxa. Uni ꞌaish ca, an ñu ꞌatima ꞌati sinánmicë ꞌaísha Nucën Papa Diosbë uni ꞌitima ꞌicëbi ñunshin ꞌatimanën ꞌapu a ñusmonux bamati cupí, Jesús uni ꞌiacëxa.

¹⁵ Usai ꞌiquin ñunshin ꞌatimanën ꞌapu ñusmoquin ca Jesusan axa ami catamëcëma ꞌaish aín bamati sinani racuë́cë unicama, ax ainan ꞌaish aín bamatimi racuë́timoquin mëníocëxa.

¹⁶ Usa ꞌaish ca Jesús ángelcama ꞌaquinti sinani uni ꞌinux uáma ꞌicën. Uicamax cara Abraham Nucën Papa Diosmi catamëasaribiti ami catamëtia acama ꞌaquinti sinani ca Jesús uni ꞌinux uacëxa. Asérabi ca usa ꞌicë quixun cananuna ꞌunanin.

¹⁷ Ësaquin nu ꞌaquinti cupí ax nusaribi uni ꞌixun, ñunshin ꞌatimanën ꞌapun tancëxun ꞌunánan paë tani tëmërati ꞌunan ꞌixun ca Jesusan aín unicama Nucën Papa Dios upí oquin ñucáxunia. Usa ꞌaish ca nun ꞌucha tërë́nux bamati cupí nusaribi uni ꞌiacëxa.

¹⁸ Ax tëmëranan ñunshin ꞌatimanën ꞌapun tancëxunbi ñu ꞌatima ꞌaíma ꞌixun ca an, a ñunshin ꞌatimanën ꞌapun ñu ꞌatima ꞌanun quixun sinánmicë aín unicamaribi usoquin ꞌaxunma ꞌanun cushioti ꞌicën.