Hebreos 13 - Kashibo-Kakataibo Biblia

Usaquian aín unicaman Nucën Papa Dios cuëënmiti bana

¹ Mitsux Jesucristonan ꞌaish camáxbi xucë́nsa ꞌaish camina mitsux ꞌicësabi bëtsibë bëtsibë nuibanani ꞌiti ꞌain.

² Mitsun ꞌunáncëma unibi camina mitsun xubunu bëbaia cuëënquin biti ꞌain. Usai ꞌiquin ca raírinën ꞌunánquinmabi ángel, unisaribi ꞌicë, biacëxa.

³ Mitsúxribi atubë sipuacë ꞌaish tëmëracësa ꞌixun camina axa Jesucristonan cupí sipuacë unicama manuquinma a sinánquin ꞌaquinti ꞌain. Mitsúxribi usaribi uni ꞌixun camina —usaribi oquin ca unin ꞌë ꞌati ꞌicë —quixun sinánquin unían bëtsi bëtsi ocë uni a ꞌaquinti ꞌain.

⁴ Min xanuma ꞌain camina xanu itsibë ꞌitima ꞌain. Xanu minan ꞌiti bitancëxun camina abë nuibananquin upí oxun ꞌiquinti ꞌain. Aín xanuma ꞌain bënëñuma xanubë ꞌiti ꞌimainun uni itsin xanubë ꞌiti ca Nucën Papa Dios cuëënima. Cuëënquinma ca usa uni ꞌimainun usa xanuribi ꞌuchoquin uisa cara oti ꞌicë usoquin ꞌati ꞌicën.

⁵ ꞌAisamaira curíquiñu ꞌiti camina sinántima ꞌain. Nucën Papa Diosan “ꞌËn cana mi ꞌaquinquin ëntima ꞌai” quixun cacë a sinani camina mitsux ꞌaisamaira ñuñuma ꞌaíshbi masá nuituti bënëtima cuëënti ꞌain.

⁶ Usaquin sinánquin cananuna ënë bana cuënëo quicësabi oquin sinánti ꞌain: Nucën ꞌIbu Diosan ca ꞌë ꞌaquinia. Usa ꞌain cana unin uisa cara ocëxbi racuë́tima ꞌain.

⁷ Jesucristo ñuiquin mitsu bana ñuixuncë unicama camina manuquinma sinánti ꞌain. —Atun ca Jesucristomi catamëquin upí ñuishi ꞌaia —quixun sinani camina usaribiti ꞌiti ꞌain.

⁸ Jesucristo ax ca usabi ꞌiá ꞌaish bëríribi usabi ꞌaish, usabi ꞌiti ꞌicën.

⁹ Usa ꞌain camina uni itsían mitsu bëtsi bëtsi bana ñuixunquin Jesucristomi sinánti ënun quixun cacëxunbi ëntima ꞌain. A unicamax ca —bëtsi bëtsi ñu piquinbi camina bëtsi bëtsi ñu pitima ꞌai —quia. Atúxa usai quia a bana cuatibi ca uni aín nuitu upí ꞌima. Usa ꞌain camina —Cristo cupíshi ca Nucën Papa Diosan nu nuibaquin nun ꞌucha tërë́anan nux ainan ꞌinun ꞌimia —quixun ꞌunani amishi cushicanti ꞌain.

¹⁰ Nun nu —Jesucristo bama cupí ca nun ꞌuchacama tërë́ncë ꞌicë —quixun ꞌunáncë ꞌaínbi ca judíos sacerdotecaman ꞌaracacë ñuina rëcë aín nami picë ꞌaíshbi, ami catamëcëma ꞌixun, —Jesucristo bama cupí cana ꞌën ꞌuchacama tërë́ncë ꞌai —quixun ꞌunanima.

¹¹ Unicaman ꞌucha tërë́ncë ꞌinun ca sacerdotenën cushicaman ꞌapun, ꞌaracacë ñuina rëcë aín imi, anuxun Nucën Papa Dios rabiti xubu ꞌucë mëu, Cata Upíira cacë, anu buánxun anuxun ánscaia. Usoquin ꞌanan ca a ñuinacan namicama a ëma ꞌura buánxun nëënia.

¹² Usaribiti ca Jesús, Jerusalén ꞌuri aín imi ꞌapati i curúsocënu, camabi uníxa aín ꞌucha tërë́ncë ꞌaish Nucën Papa Diosnan ꞌinun, bamacëxa.

¹³ Usa ꞌain cananuna Jesús, axa ëma ꞌuracëox ꞌuchañuira uni ꞌicësari bama, a nuxnu ainan ꞌicëa uni itsin tëmëramianan ꞌusáncëxunbi, ainan ꞌiti ëntima ꞌain.

¹⁴ Ënë nëtënu ca axa cëñutima usabi ꞌicëbënu anu ꞌiti ëma ꞌaíma ꞌicën. Usa ꞌain cananuna axa cëñútima nëtë Nucën Papa Diosbënu anu ꞌiti a cainin.

¹⁵ Usa ꞌain cananuna Jesucristo cupí camabi nëtën abë banai cuëënquin Nucën Papa Dios nun cuëbitan rabianan —mix camina asérabi nun ꞌApu ꞌai —quixun caquin a rabiti ꞌain.

¹⁶ Rabianan camina uni raíri ꞌaquinquin ñu upí ꞌati manutima ꞌain. Ñuñuma uniribi camina nuibaquin min ñu mësú ꞌinánti ꞌain. Unían usaquin ꞌaia isi ca Nucën Papa Dios cuëënia.

¹⁷ Mitsun cushicaman ca mitsúxmi upiti Jesucristomi sinánun mitsu ꞌaquinia. Usaquin mitsu ꞌaquinuan Nucën Papa Diosan caíscë ꞌixun ca an cacësabi oquin upí oquin ꞌaisa tania, ax cuëëntanun. Usa ꞌain camina aín bana cuaquin atux quicësabi oquin ꞌati ꞌain. Mitsun usaquin ꞌaia isquin ca atun masá nuituquinma cuëënquin mitsu ꞌaquinti ꞌicën. A unicaman bana cuaquinbimi an cacësa oquin ꞌaiama isi ca Nucën Papa Dios cuëëntima ꞌicën.

¹⁸ Cananuna ꞌunanin, ñu ꞌatima ꞌaquinma upí ñuishi ꞌaisa tania ca Nucën Papa Diosan nu upí isia quixun. Usa ꞌicë camina nu Nucën Papa Dios ñucáxunti ꞌain.

¹⁹ ꞌËx mitsubë ꞌitëcëni bënëtishi cuanun camina manúquinma Nucën Papa Dios ꞌë ñucáxunti ꞌain.

Upí oquin sinania bërúanx ꞌinuan Pablonën ca

²⁰ Nucën Papa Dios, an aín unicama abë upí ꞌinun ꞌimicë, an ca Nucën ꞌIbu Jesucristo, an aín unicama bërúainracë, a bamacëbi baísquimiacëxa. An Jesús aín imi ꞌapati bamacë cupí nun ꞌuchacama tërë́nquin nux xënibua ꞌaínbi ainan ꞌinun ꞌimicë,

²¹ anbia an iscë́xmi upí ꞌinun ꞌimianan ax cuëëncësabi oquinmi upí ñuishi ꞌanun mitsu ꞌimiti cana cuëënin. ꞌIanan cana an, Jesucristo cupí, ax cuëëncësabi oquin nu ꞌimiti cuëënin. A ca aín unicaman xënibua ꞌaínbi ënquinma rabiti ꞌicën. Usaquin ca ꞌati ꞌicën.

²² ꞌËn xucë́antu, ꞌën mitsu ꞌësëquin, ꞌitsamashi cuënëoxuncë banacama ënë camina upí oquin sinánquin cuati ꞌain.

²³ Mitsun camina ꞌunánti ꞌain, nucën xucën, Timoteo, a ca sipuacë ꞌicëbi chiquíncanxa. ꞌItíxa bënëtishi bëbaia cana mitsu isi cuanquin a buánti ꞌain.

²⁴ Anu ꞌicë Jesucristomi catamëcë unicama ꞌimainun mitsun cushicama a camina bërúanxa ꞌinun ꞌë caxunti ꞌain. Italianuax ucë unicamanribi ca mitsu bërúanxmi ꞌinun mitsu camia.

²⁵ Nucën Papa Diosan nuibaquin ꞌaquincëxmi chuámarua ꞌaish bucuti cana cuëënin. Ashi.