Hebreos 12 - Kashibo-Kakataibo Biblia

Jesúsmi cananuna catamëti ꞌai quicë bana

¹ A unicamaxa ꞌiásaribiquin ca nubë ꞌicë ꞌitsa unin tëmëraquinbi —Nucën Papa Diosan ca asérabi aín quicësabi oquin nu ꞌaquinti ꞌicë —quixun ꞌunánquin ami catamëquin ënima. Atúxa ꞌicësaribiti ꞌinuxun cananuna an nu ꞌatimaquin sinánmicë a ñucama ëanan an usabi ꞌitioquin nu ꞌatima ꞌimicë ñucamaribi ënti ꞌain. Acama ënquin cananuna bënë́quinma añu ñu ꞌën ꞌati cara Nucën Papa Dios cuëënia quixun sinánquin upí oquin ꞌati ꞌain. Cuai bëtsibë upiti abáti cupí ca unin an ië́ocë ñu nania, usaribiquin cananuna upí oquin nun ꞌati ñu ꞌanuxun, uisa ñun cara nu ꞌatimaquin sinánmia, a ënti ꞌain.

² Jesús, a cupí nux ami catamëcë ꞌaish ainan ꞌianan asaribi upí ꞌaish aín nëtënu abë ꞌiti, ax ꞌiásaribiti ꞌinuxun cananuna uisai cara ax ꞌiacëxa quixun sinánti ꞌain. ꞌUchañuira uni ꞌacësa oquin ca unin i curúsocënu a matásti ꞌicë quixun ꞌunánxbi ca ënë menu uacëxa, —ënë ñucama inúcëbë unicama upí ꞌiti mëníotancëx cana ꞌën Papa Diosbë ꞌi cuëëntëcënti ꞌai —quixun ꞌunani. Usai bamax baísquia ꞌaish ca Nucën Papa Diosan nëtënu abë ꞌApu ꞌicën.

³ Tëmëraquin —axa ami sináncëma unicaman ca ꞌëx Jesucristonan ꞌicë cupí ꞌë bëtsi bëtsi oia —quixun sinánquin ami catamëti ëntin rabanan camina —usaribi oquian ami nishquin unin ꞌacëxunbi ca Jesucristonën tanshiacëxa —quixun sinánti ꞌain. Usaquin sinani camina ami catamëtia unin bëtsi bëtsi ocëxun oquin a ënti sinanima ami cushiti ꞌain.

⁴ Mitsux ꞌuchati rabanan tëmëranan Jesucristonan cupí bëtsi bëtsi ocë ꞌaíshbi camina bamacëma ꞌain.

^5-6 ¿A bana mitsúxmi aín bëchicë ꞌicëa ꞌësëquin Nucën Papa Diosan cacë a caramina manuan? ësai quicë: ꞌËn bëchicë ꞌicë cana mi cain, Nucën ꞌIbu Diosan ca an nuibacë unicama ꞌixunbia ñu ꞌatima ꞌaia oquin amiribishi ꞌatëcënxunma ꞌanun quixun ꞌunánmiquin uisoquin cara ꞌati ꞌicë usoquin ꞌaia. Uicama cara aín bëchicë ꞌinun ꞌimiaxa acama ca usoquin ꞌaia. Usa ꞌain camina ñu ꞌaisama ꞌaia Nucën ꞌIbu Diosan mi uisa cara mi ocëxbi aín bana cuaisama tani bënë́tima ꞌain. ꞌIanan camina masá nuituti sináncasmaquin, uisai carana ꞌiti ꞌai quixun sinántima ꞌain.

⁷ Camabi unin ca aín bëchicë ñu ꞌatima ꞌaia oquin upí ꞌinun quixun ꞌunánmia. Usa ꞌain camina mitsun Nucën ꞌIbu Diosan ñu ꞌatima ꞌaia oquin uisa cara ocëxunbi a tani masá nuituquinma upí oquinshi sinánti ꞌain, an ca mitsúxmi aín bëchicë ꞌicë cupí usoquin ꞌaia quixun ꞌunánquin.

⁸ Nucën Papa Diosan ca aín unicama ñu ꞌatima ꞌaia oquin amiribishi ꞌatëcënxunma ꞌanun quixun ꞌunánmiquin uisa oquin cara ꞌati ꞌicë usoquin ꞌaia. Usoquin mitsu ꞌacëma ꞌaish camina mitsux asérabi ainanma ꞌaish aín bëchicëma ꞌain.

⁹ Nux xu ꞌixun ñu ꞌatima ꞌaia oquin ca amiribishi ꞌatëcënxunma ꞌanun numi nishquinmabi nu ꞌunánmiquin nucën papan nu mëëacëxa. Mëëcëxunbi cananuna ami nishquinma ax cuëëncësabi oquin ꞌacën. ¿Usa ꞌain caranuna uisa cupí Nucën Papa Diosan nux abë upí ꞌinun quixun, uisa oquin cara nu ꞌati ꞌicë usoquin ꞌacëxunbi upí oquin sinántima ꞌain?

¹⁰ Nux canitancëxnu upí ꞌinun quixun ca aín sináncësa oquin ꞌunánmiquin usoquin nucën papan nu ꞌacëxa. Usa ꞌaínbi ca Nucën Papa Diosan asaribi upí ꞌiminuxun upí oquin nu ꞌunánmia.

¹¹ Cananuna ꞌunanin, Nucën Papa Diosan usoquin nu ꞌacëxun taní cananuna masá nuitupanin. Usai ꞌitancëxbi cananuna usaquian nu ꞌacë a inúcëbë Nucën Papa Diosbë upí ꞌiquin upí oquin sinani cuëënti ꞌain.

Jesucristo ñui quicë bana timati rabanan bërúancati

¹² Usa ꞌain camina tëmëraibi masá nuituquinma upí oquin sinani ami cushi Cristomi catamëti ꞌain.

¹³ Usa ꞌixunmi mitsun aín cuëëncësa oquin ꞌaia isquin ca raíri uniribi ami catamëti upí oquin ꞌunáncëma ꞌaíshbi a ëníma mitsux ꞌicësaribiti ꞌiti ꞌicën. Usaía atux ꞌinun camina Jesucristomi catamëquin aín cuëëncësa oquin ꞌati ꞌain.

¹⁴ Nishananima camina upitaxëshi bucuti ꞌain. Aín ꞌucha ëncëma unix ca Nucën Papa Diosbë ꞌitima ꞌicën. Usa ꞌain camina nishananima upitax bucuquin uisa ꞌuchabi ꞌati sinántima ꞌain.

¹⁵ Nucën Papa Diosan ax cuëëncësabi oquin mitsu ꞌaquincëma ꞌitin rabanan camina an mitsu ꞌunánmicësabi oi ꞌinux bërúancati ꞌain. Usai ꞌiquin camina uni raíri ꞌaisama nuituñu ꞌinun ꞌatimaquin sinánmitima ꞌain.

¹⁶ Uni aín xanubëishi ꞌitioquin mënío ꞌain ca micama ui uníxbi aín xanuma ꞌain, xanu itsibë ꞌitima ꞌicën, bëbúxribi ca xanúxmabi uni itsibë ꞌitima ꞌicën. Nucën Papa Dios ca uni ꞌimainun xanuribi usai ꞌiti cuëënima. Usai ꞌitin rabanan camina camáxbi upí sinánñu ꞌinun ꞌaquiananti ꞌain. Esaúnën ca Nucën Papa Diosan cacë bana sinánquinma, ax rëcuën ꞌixunbi aín piti cuëëncë cupíshi aín xucën aín rëcuën ꞌimiacëxa. Ax piti cuëëncë cupía Esaú ꞌiásaribiti camina ꞌitima ꞌain.

¹⁷ Camina ꞌunanin, ꞌitsa baritia ꞌicëbë ca Esaú aín papan rëcuën bëchicë ꞌitëcënti sináncëxa. Usaquin sinani masá nuituti iníbi ca ꞌiáma ꞌicën. Usa ꞌain ca Esaúma, aín xucën Jacob, axa aín rëcuën bëchicësa ꞌicë, aín papan Isaacnën upí oquin sinánxunquin Nucën Papa Dios ñucáxuancëxa.

¹⁸ Mitsux camina aín bashi Sinaí, anuxuan nucën raracaman Nucën Papa Diosan bana cua, anu cuánma ꞌain. Anuaxa canacamëꞌëo sharaquimainun ca a bashix nëtë cuinan mapucë bëánquibucë ꞌiacëxa. Aín bashicamanubi ca tsi rëquirucë tínbu ꞌiacëxa. Anu camina mitsux ꞌiáma ꞌain.

¹⁹ Manë bana ocë sharatia camina cuama ꞌain. Cuatíma ꞌianan camina Nucën Papa Dios banaiaribi cuama ꞌain. Nucën Papa Dios banacëbëa ꞌaisamaira ñu ꞌia isquin ca nucën raracaman racuë́quin Moisés cacëxa: —Nux bamatima cupí camina minbi Nucën Papa Diosan cacëxun nu cati ꞌain.

²⁰ Bananuxun ca Nucën Papa Diosan cacëxa: “Uinu ꞌicë uníxbi ca aín bashi tanáin cuantima ꞌicën, ñuinacaxribi ca cuantima ꞌicën. Uni ꞌimainun ñuina ax anu cuancëcamax ca maxaxan rëanan masíbunën ꞌacë ꞌiti ꞌicën”. A bana sinani ca nucën raracamax racuë́acëxa.

²¹ Usaía ꞌaisamaira ñu ꞌia isi ca Moisésnëxribi quiacëxa: “ꞌËxribi cana racuëti bërëin”.

²² Mitsux camina aín bashi Sinaí anuaxa Nucën Papa Dios baná anu cuanma ꞌain. Bëráma camina mitsux Nucën Papa Dios rabinux Sión cacë matá, anua Jerusalén ꞌicë, anu cuancën. Usai ꞌiá ꞌaíshbi camina Jesucristonan ꞌaish, uinu caramina ꞌai anuax, Nucën Papa Dios axa bamatimoi naínu ꞌicë Jerusalén aín nëtënu tsócë, abë banain. Anuxun ca ꞌitsaira ꞌixun aín ángelcama timë́xun a rabia.

²³ Anuribi uicamax cara ainan ꞌicë, aín anë ꞌacë, acamanribi ca a rabia. Anu ca ax ꞌApuira ꞌixuan an camabi unin ꞌacë ñu iscë, Nucën Papa Dios, ax ꞌicën. Anuribi ca Nucën Papa Diosan ainan ꞌicë upí ꞌimicë ꞌaísha bamacë unicama aín bëru ñunshin ꞌicën.

²⁴ Anuribi ca ax aín imi ꞌapati bama ꞌixuan an nuxribinu anu ꞌinun mëníocë, Jesús, ax ꞌicën. —Cain, an Abel ꞌacë uni, ax ca cupicë ꞌiti ꞌicë —quiax Nucën Papa Dios quicëbë ca usai ꞌiacëxa. Usa ꞌaínbi ca Jesús bamacë cupí uínbi an ꞌacë uni cupiama ꞌicën. Usoquian Jesús unin ꞌá ꞌixunbi ca aribi cupiquinma uicamax cara ami catamëtia, a aín ꞌucha sinántëcëntimoquin tërënia.

²⁵ Cananuna ꞌunanin, Moisésnëan Nucën Papa Diosan bana ñuixuncëxunbia an a bana timaquin cuaisama tancë, nucën raracamax ca castícancë ꞌiacëxa. Moisésnën ñuiá banasamaira ca Jesucristo ñui quicë bana, Nucën Papa Diosan naínu ꞌixun nu ꞌinan, ax ꞌicën. Usa ꞌain ca nucën raracamaxa ꞌiásamaira oi an Jesucristo ñui quicë bana timaquin cuaisama tancë unicama ië́tima ꞌicën. Usa ꞌain camina asérabi Jesucristo, Nucën Papa Diosan a aín nëtënua xua, a ñui quicë bana timaquinma upí oquin cuati ꞌain.

²⁶ Bëráma ca Moisésbëa Nucën Papa Dios banacëbë mecama shaíquiacëxa. Usa ꞌaínbi ca Nucën Papa Dios ësairibi quia: “Mecama amiribishi shaícatëcënquin cana ashi ꞌaquinma naínu ꞌicë ñu, bari, ꞌuxë, ꞌispa acamaribi shaícati ꞌain”.

²⁷ Nucën Papa Diosa “cana amiribishi ñucama shaícatëcëni” quiá ꞌain cananuna ꞌunanin, usoquin shaícacëx ca a ñucama cëñúcë ꞌaish ꞌaíma ꞌiti ꞌicën. Acama ꞌaíma ꞌaínbi ca uisai cara aín unicama abë ꞌiti ꞌicë quixun an mëníosabi oi ꞌiti ꞌicën.

²⁸ Ax xënibua ꞌaínbi cëñútimoi nucën ꞌApuira ꞌain cananuna nux nëtëtima anu abë ꞌianan aín unicamabë ꞌiti ꞌain. Usai ꞌiti sinánquin cananuna Nucën Papa Diosmi sinánquin aín bana cuaquin —asábi ca —cai cuëënquin a rabiti ꞌain, ax cuëëncësabi oquin,

²⁹ ax upíira ꞌixun ca rëquiruquin tsin ꞌacësaribi oquin ñu ꞌaisamacama cëñuti ꞌicë quixun sinánquin.