Hebreos 11 - Kashibo-Kakataibo Biblia

IV. CRISTO UCËMA PAIN ꞌAIN CA JUDIOS UNI RAIRINËX ASERABI NUCËN PAPA DIOSMI CATAMËACËXA QUIAX QUICË BANA (11-13) Usaía judíos unicaman rara raírinëx Nucën Papa Diosmi catamëa bana

¹ Nun Nucën Papa Dios isquinmabi cananuna asérabi ca anu ꞌicë quixun ꞌunanin. Aín bana ca cëmëma asérabi ꞌicë quixun sinánquin cananuna ꞌunanin, an ca aín quicësabi oquin ꞌati ꞌicë quixun. Usaquin ca axa ami catamëcë unicaman ꞌunania.

² Nucën Papa Diosan ca axa quicësabi oquin ꞌati ꞌicë quixun sinánquian, ami catamëquin nucën raracaman ñu ꞌaia isi ca Nucën Papa Dios cuëëancëxa.

³ Ënë nëtëcamax ca Nucën Papa Dios quicëbëshi an sináncësabi oi uniacëxa. Uisa ñu ꞌaíma ꞌaínbi ca an unin iscë ñucama uniocëxa. Usoquin unioia isáma ꞌixunbi cananuna a bana acama ñuiquin cuënëo a isquin, usai ca ꞌiacëxa quixun ꞌunanin.

⁴ Bërí nëtë́nma ca Adanën bëchicë, Abel, an ami sinánquin Nucën Papa Dios quicësabi oquin a rabiquin ꞌaracacë ñuina rëxun xaroxuancëxa. Usomainunbi ca aín xucën Cainan aín cuëëncësa oquinshi aín ñu bimishi Nucën Papa Dios xaroxuancëxa. Cainan usoia isi ca Nucën Papa Dios cuëëanma ꞌicën. Abelnëan ꞌaxuncëxun isi cuni ca cuëëancëxa. Abel bama ꞌaínbi cananuna —Abelnën ca asérabi Nucën Papa Diosmi catamëquin ax quicësabi oquin ꞌacëxa —quixun sinanin.

⁵ Ënë́nsaran nëtë́nma ca Enoc cacë uni, amia catamëcë cupía anun Nucën Papa Dios cuëëncë ꞌiacëxa. Usa ꞌicë ca ënë menuax bamaima aín nëtënu ꞌinun Nucën Papa Diosan buáncëxa. Buáncë ca unin mërama ꞌicën. Usoquin buáncëma pain ꞌaish ca Nucën Papa Dios Enocnën cuëëancëxa quiax ca aín bana cuënëo quia.

⁶ Uicamax cara Nucën Papa Diosbë banatisa tania, uicamax cara ainan ꞌiisa tania, an ca —Nucën Papa Dios ca asérabi anu ꞌicë —quixun sinánti ꞌicën. Sinánan ca —an ca ꞌën ñucácëxun cuati ꞌicë —quixun sinánti ꞌicën. Usaía ax asérabi ami catamëcë uni anun cuni ca Nucën Papa Dios cuëënia. Axa ami catamëcëma unin ca Nucën Papa Dios cuëënmima.

⁷ Ënë́nsaran nëtë́nmaribi ca Noénën ami catamëquin —Nucën Papa Dios quicësabi oi ca ꞌiti ꞌicë —quixun ꞌunáncëxa. ꞌUnáncë ꞌicë ca Nucën Papa Diosan Noé cacëxa, —camabi uníxa ꞌaisamairai ꞌuchacë cupí cana unían usai ñu ꞌiti sináncëbëtanmabi camabi me baca mapumiquin cëñuti ꞌai —quixun. Nucën Papa Diosan bana ca asérabi ꞌicë quixun ꞌunánquin ca Noénënshi, ꞌitsa ꞌuí ꞌibúcëma pain ꞌaínbi aín manë nunti chaira anua aín aintsi ꞌibucama atsínmiti ꞌacëxa, Nucën Papa Diosan a cacësabi oquin. An usoquin ꞌaia iscë unicama ca —ënë menu ꞌicë unicama ꞌaisamairai ꞌuchacë cupí ca Nucën Papa Diosan cëñuti ꞌicë —quixun Noénën ñuixuancëxa. Nucën Papa Dios quicësabi oi ca ꞌiti ꞌicë quixun sinánquian Noénën, an cacësabi oquin ꞌaia isi ca Nucën Papa Dios cuëëancëxa.

⁸ Bërámaribi ca Abraham cacë uni aribi ami catamëcë ꞌicë Nucën Papa Diosan cacëxa: —Camina min me ëbiani, bëtsi me ꞌura ꞌicë, anu ꞌi cuanti ꞌain. Min rëbúnquicamanan ca a me ꞌiti ꞌicën. Cacëx ca Abraham uinu cara a me ꞌicë, uisa me cara quixun ꞌunánxmabi, aín me, Ur cacë, anuax cuancëxa, Nucën Papa Diosan ca an cacësabi oquin ꞌati ꞌicë quixun ꞌunani.

⁹ Nucën Papa Diosmi catamëcë ꞌaish ca Abraham a me, a Nucën Papa Diosan a ñuixuncë, anu bëbatancëx anu tsoócëxa. Anu ꞌaísh ca aín menumabia uni tsócësa ꞌiacëxa. Anu ꞌaíshbi ca upí oquin xubuoíma, chupa ꞌacë xubunuishi ꞌiacëxa. Usaribiti ca aín bëchicë Isaac ꞌimainun Isaacnën bëchicë Jacob, acamaxribi ꞌiacëxa. —Abraham, mix camina ꞌënan ꞌiti ꞌain, min rëbúnquicamaribi ca ꞌën uni ꞌiti ꞌicë —quixun ca Nucën Papa Diosan Abraham cacëxa. Usaribi oquin ca Nucën Papa Diosan Abrahamnën bëchicë, Isaac, ꞌimainun Isaacnën bëchicë, Jacob, cacëxa.

¹⁰ Usaquin cacëxun ca Abrahamnën ꞌunáncëxa, —Nucën Papa Diosan, usai ca ꞌiti ꞌicë quixun mënío ꞌain cananuna ënë menu tsócë ꞌaíshbi Nucën Papa Diosnan ꞌaish, an sináncësabi oquin mënío aín nëtë anu ꞌiti ꞌai quixun. Usaquin sinani ca cuëëancëxa.

¹¹ Abrahamnën xanu, Sara, anribi ca Nucën Papa Diosan Abraham cacësabi oquin, caniacëquinbi tuacëxa, Nucën Papa Dios quicësabi oi cana ꞌiti ꞌai quixun sináncë cupí. Usai tuutancëx ca Sara bëbu tuá, Isaac cacë, bacë́ancëxa.

¹² Usa ꞌain ca, Abraham caniacëcëra ꞌaíshbi bëchicëñu ꞌiacëxa. Aín bëchicënën rëbúnqui ca ꞌitsaira ꞌiacëxa. Naínu ꞌicë ꞌispacama cananuna tupúncasmati ꞌain. Parúnpapa cuëbí ꞌicë masiribi cananuna tupúntima ꞌain. Usaribiti ca Abrahamnën rëbúnqui ꞌaisamaira ꞌaish unin tupúntisama ꞌiacëxa.

¹³ Abraham, Sara, Isaac, Jacob, acamax ca Nucën Papa Diosan ñuiasa oi ꞌicëma pan ꞌain bamacëxa. Usa ꞌaínbi ca aín bamati nëtë sënë́ntamainun masá nuituquinma cuëënquin, Nucën Papa Diosan nu cacësabi oi ca nun rëbúnqui ꞌiti ꞌicë quixun ꞌunáncëxa. Usaquin ꞌunani ca ësai quicësa ꞌiacëxa: nux ënë menu ꞌicë ꞌaishbi cananuna uníxa aín menumabi bëtsi menu cuanúxbi tsócësa ꞌain.

¹⁴ Usaia quiása ꞌain cananuna ꞌunanin, a unicamax a menu bucuxunbi ca —ënë menu ꞌiti unima, bëtsi menu ꞌiti uni cananuna nux ꞌai —quixun sináncëxa.

¹⁵ Anuaxa cuancë me, Ur cacë, anu cuantëcëinsa tani ca Abraham anu cuantëcëan ꞌitsíanxa.

¹⁶ Cuantëcënti ꞌaíshbi ca anu cuantëcëinsama tancëxa. A menu ꞌicësamaira oi bëtsi nëtë, upíira a Nucën Papa Diosan atu mëníoxuncë, anu ꞌiti ca cuëëancëxa. Usa ꞌain ca Nucën Papa Dios —ꞌëx cana atun Dios ꞌai —quixun sinani cuëënia. Usai cuëënquin ca anua atux abë ꞌiti nëtë mëníocëxa.

^17-18 Abraham ca —asérabi ca Nucën Papa Diosan aín quicësabi ꞌoquin ꞌati ꞌicë —quixun ꞌunani ami catamëacëxa. Ësai ca ꞌiacëxa. Nucën Papa Diosan ca Abraham cacëxa: “Min bëchicë Isaacnën rëbúnqui ca asérabi ꞌitsaira ꞌianan ꞌënan ꞌiti ꞌicë” quixun. Usa ꞌaínbi ca Nucën Papa Diosan —asérabi cara Abrahamnën ꞌën cacësabi oquin ꞌati ꞌicë —quixun ꞌunántisa tanquin, Abraham cacëxa —min camina ꞌaracacë ñuina ꞌaxunquinma, min bëchicë Isaac abi ꞌë rabiquin ꞌë ꞌaxunti ꞌai —quixun. Cacëxun ca usoquin anuxun ꞌatinu Isaac buáncëxa.

¹⁹ Buánquin ca sináncëxa: —ꞌËn bëchicë achúshi, Isaac, aín rëbúnqui ca asérabi ꞌitsaira ꞌiti ꞌicën, Nucën Papa Diosan ꞌë cacësabi oi. Usaía ꞌinun ca bamacëbi baísquimiti ꞌicë —quixun. Usaquin sinánquian Nucën Papa Diosan cacësabi oquin Abrahamnën ꞌati ꞌaíshbi ca Nucën Papa Diosan xucëxun ángelnën Abraham cacëbë Isaac bamati ꞌaíshbi ië́acëxa.

²⁰ Usa ꞌain ca Isaacnënribi, —Nucën Papa Diosan ca aín quicësabi oquin ꞌati ꞌicë —quixun ꞌunánquin, aín bëchicë rabë́, Jacob ꞌimainun Esaú, —Nucën Papa Diosan ca an ꞌë cacësabi oquin mitsu ꞌaquinti ꞌicë —quixun caquin atu Nucën Papa Dios ñucáxuancëxa.

²¹ Jacobnënribi, —Nucën Papa Diosan ca aín quicësabi oquin ꞌati ꞌicë —quixun ꞌunánquin ca aín bamati sënë́ncëbëtan, xëni ꞌaish, aín tsatimi cëpíxun aín xuta Josénën bëchicë rabë́, —Nucën Papa Diosan ca an ꞌë cacësabi oquin mitsu ꞌaquinti ꞌicë —quixun caquin atu Nucën Papa Dios ñucáxuancëxa.

²² José, Egipto menu ꞌixun ca —ax quicësabi oquin ca Nucën Papa Diosan nun rëbúnqui Egipto menua nun nëtë, Canaán, anu ꞌitëcënun buánti ꞌicë —quixun sinánquin aín aintsi cacëxa: Ënë nëtënuax nun nëtënu cuanquin ca mitsun rëbúnquinën ꞌën xoribi buánxun anu maínti ꞌicë quixun.

²³ ꞌItsa baritia Egipto menu Jacobnën rëbúnquicama ꞌicëbë ca a menu ꞌicë ꞌapu, Faraón cacë, ax Jacobnën rëbúnquimi nishacëxa. Nishi ca bëbu tuácama bërí bacë́ncë —ax ca bamati ꞌicë —quiacëxa. Quicëbëtanbi ca achúshi bëbu tuá, Moisés cacë, aín papabë aín tita Nucën Papa Diosmi catamëti, Faraónmi racuë́quinma —ënë tuá ca upíira upí ꞌicën, usa ꞌain cananuna ꞌapun bana tanquinma unëti ꞌai —quixun sináncëxa. Usaquin sinánxun ca rabë́ ꞌimainun achúshi ꞌuxën Moisés unëacëxa.

²⁴ Usaquian unëcë ꞌicë ca a ꞌapun bëchicënën Moisés aín tuása ꞌinun caniocëxa. Usa ꞌaínbi ca Moisés canitancëx a ꞌapun bëchicënën tuása ꞌiisama tancëxa.

²⁵ Ca sináncëxa, Egiptonu ꞌicë ꞌapu ënëbë ꞌaish cana aín xutasa ꞌaish ꞌëx camabi ñuñu ꞌiti ꞌain. Usa ꞌaínbi ca Egipto menu ꞌicë unicama ënën Nucën Papa Dios cuëëncësama oquin ñu ꞌatimashi ꞌati cuënënia. Usaquin ꞌanan ca axa Nucën Papa Diosmi sináncë unicamaribi ꞌatimoia. Usaquin sinani ca ax Egiptonu ꞌicë ꞌapun xutasa ꞌitsíanxbi aín aintsi judíos unicama, a Nucën Papa Diosan ainan ꞌinun caíscë, acamabë tëmëraibi ꞌiti cuëëancëxa.

²⁶ Cuëënquin ca sináncëxa, Egiptonu ꞌicë unicamax ñuñu ꞌaish cuëëncësamaira oi cana ꞌëx Nucën Papa Diosmi sináncë ꞌaish tëmëraibi cuëënti ꞌain. Cristonan ꞌicëa unin ꞌatimocëx tëmëraibi aín unicama cuëëncësaribi oi ca Moisés tëmëraibi Nucën Papa Diosan unicamabë ꞌi cuëëancëxa. Ax ca —Nucën Papa Diosan ca ax quicësabi oquin nu ainan ꞌaish aín nëtënu abë ꞌinun ꞌimia —quixun ꞌunani ami catamëti cuëëancëxa.

²⁷ —ꞌËn bërúnbi isquinmabi cana Nucën Papa Dios ca asérabi ꞌëbë ꞌicë quixun ꞌunani —quixun sinani ca Moisés ami catamëti Egipto menuax Madian cacë menu cuancëxa, racuëtima ax cuancëbëa ꞌapu nishtánunbi.

²⁸ Madianuax Egipto menu cuantëcëntancëxun ca Moisésnën —Nucën Papa Diosan ca ax quicësabi oquin asérabi ꞌati ꞌicë —quixun sinánquin, an cacësabi oquin judíos unicaman xubucama ꞌunánti oquin, aín xëcuë ëman carnero imi shimiacëxa, Nucën Papa Diosan ángelnën atun rëcuën bëchicëcama ꞌatin rabanan.

²⁹ Egipto menuax cuani ca judíos unicama —Nucën Papa Diosan ca ax quicësabi oquin nu ꞌaquinia —quixun sinani parúnpapa Xonsa cacë, a nëbë́tsi me racácëbë sicaracëacëxa, me ësquicënu cuancësabiquiani. Atúxa usai cuancëbë ca axa atu catícabiani cuancë Egiptonu ꞌicë suntárucamax —nuxribi cananuna usai sicaracëti ꞌai —quixun sinanx cuanibi, ꞌunpax anu racátëcëncëbë bacamiquiacëxa.

³⁰ Judíos unicama Egiptonuax cuantancëx anu atux cuancë me anu bëbatancëxun, a mecama ꞌibuanux ca Nucën Papa Diosmi catamëti aín quicësabi oi judíos suntárucama siete nëtë, Jericó cacë ëma ratanarati cuainácëti niacëxa. Nicëbë ca Nucën Papa Diosan sinanënshi, a ëma anun cënëcë, ax rurucubuacëxa.

³¹ A cënë rurucubúcëbëa anu ꞌicë unicama an Nucën Papa Diosan bana cuacëma ꞌaish cëñúmainun ca ꞌatima xanu Rahab cacë, axëshi ꞌiacëacëxa, an Nucën Papa Diosmi sinánquin judíos unibunën xucë uni rabë́ ꞌaquincë cupí.

³² ¿Uisaquinribi carana mitsu cati ꞌain? Gideón, Barac, Sansón, Jefté, David, Samuel, acama ꞌiá ꞌimainun an Nucën Papa Dios quicë bana uni ñuixuncë unicamaribi mitsu ñuixunquinbi cana sënë́ontima ꞌain.

³³ Raíri unínribi ca Nucën Papa Diosmi catamëquin —an ca nu ꞌaquinia —quixun ꞌunánquin bëtsi ꞌapun suntárucamabë ꞌacananquin ñusmocëxa. Raíri uniribi ꞌapu ꞌixun ca Nucën Papa Diosmi sinánquin a unicama upiti bucunun, upí oquin ꞌaquiancëxa. Ami sinania ca a unicama ax quicësabi oquin Nucën Papa Diosan ꞌaquiancëxa. Raíriribi ca ami nishquian, unin ꞌinun pinun quixun aín cënënu niabi, Nucën Papa Diosan sinanën ꞌinúnbi piama ꞌicën.

³⁴ Axa Nucën Papa Diosmi catamëcë uni raíriribi ca tsi rëquirucë an nëëntanun quixun anu niabi Nucën Papa Diosan sinanën tsinbi uisabi oma ꞌicën. Raíri uníxribi ca suntárunën ꞌati ꞌaíshbi Nucën Papa Diosan sinanën ië́acëxa. Raírinëxribi ꞌinsíncë ꞌaish cushima ꞌaíshbi ca Nucën Papa Diosan sinanën cushi ꞌiacëxa. Nucën Papa Diosan ꞌimicëxun ca suntárunën cushiira ꞌixun abë ꞌacanancë bëtsi ꞌapun suntárucama abámiacëxa.

³⁵ Bëtsi bëtsi xanun ca aín tuá bamacë ꞌicëbi Nucën Papa Diosan sinanën baísquiia biacëxa. Raíri unin ca unin Nucën Papa Diosan bana ënun quixun bëtsi bëtsi oquin paë tanmicëxunbi, ami sinánquin ëníma —ꞌëx masócë ꞌaish bamaibi cana Jesucristobë ꞌiti ꞌai —quixun sinánquin ami catamëti ënquinma tanshiacëxa.

³⁶ Raíri uni ca Nucën Papa Diosmi catamëcë cupí unin ami cuaianan rishquiacëxa. Raíri ca unin manë risin nëaxun sipuacëxa.

³⁷ Nucën Papa Diosmi catamëcë uni raíri ca unin maxaxan rëacëxa. Raíri ca Nucën Papa Diosmi sinánxma ꞌinun quixun unin bëtsi bëtsi ocëxa. Raíri ca unin tëarabëocëxa. Raíri ca manë xëtocën ꞌacëxa. Raírinëx ca chupañuma ꞌixun carnero rani pañuanan chivo rani pañuax cuaínbëquini niacëxa. Ñuñuma ꞌaish nuibacacë ꞌianan ca bëtsi bëtsi ocë ꞌiacëxa.

³⁸ A unicama aín nuitu upíira ꞌaish ënë nëtënu ꞌima Nucën Papa Diosan nëtënuira ꞌiisa ꞌaíshbi ca anu uni ꞌicëma menu nitsi aín bashinuribi cuaínbëquini xubuñuma ꞌaish bashi quininu ꞌiacëxa.

³⁹ A unicama ñuiquin cuënëo bana isquin cananuna ꞌunanin, Nucën Papa Diosmi ca asérabi catamëacëxa quixun. Ami catamëquinbi ca uisaira oquin cara Nucën Papa Diosan, Cristo cupí, aín unicama ꞌimiti ꞌicë quixun ꞌunánma ꞌicën.

⁴⁰ A ñucama ꞌunánma ꞌaíshbi ca utancëxa Cristo bama cupí nux ꞌicësaribiti, axa bëráma ami sinan unicamax Nucën Papa Diosan iscëx upí ꞌianan asérabi ainan ꞌaish nubë aín nëtënu nëtë́timoi ꞌiti ꞌicën. Usai ꞌicëbë ca camáxbi Nucën Papa Diosan aín unicama cásabi oi ꞌinuxun ꞌaia.