Hebreos 10 - Kashibo-Kakataibo Biblia

¹ Jesucristoa ënë menu utancëx unicaman ꞌucha cupí usai ꞌiti tanquian judíos unicaman aín ꞌucha cupí castícancëma ꞌinuxun ꞌaracacë ñuina ꞌanun ca Nucën Papa Diosan mëníocëxa. Usoquin mëníocë ꞌain ca judíos unicaman Nucën Papa Diosbë upí ꞌiisa tanquin camabi baritia ꞌaracacë ñuina ꞌaxun xaroia. Usoquin ꞌacë ꞌaínbi ca aín nuitu asérabi ꞌuchatëcëntimoquin upí ꞌinun mëníocëma ꞌicën.

² Aín ꞌucha tërë́ncë ꞌianan aín nuitu asérabi upí ꞌimicë ꞌain ca judíos unicaman Nucën Papa Diosan isnun quixun ꞌaracacë ñuina amiribi amiribi ꞌá ꞌitsíanma. Usoquin ꞌaracacë ñuina ꞌacë cupía aín ꞌucha tërë́ncë ꞌaish aín sinan asérabi upí ꞌain ca ꞌaracacë ñuina rëmitëcënti sináncëma ꞌitsíanxa.

^3-4 Vaca bacë ꞌimainun chivo rëxun xaroanan aín imi ánscacë ꞌaínbi ca a unicama aín sinan ashiquin upí ꞌinun mëníocëma ꞌicën. Usa ꞌain ca judíos unicaman camabi baritia ñuina rëmiquin —ꞌën sinan ca asérabi upíma ꞌicë —quixun sinántëcënia.

⁵ Usa ꞌain ca Cristonën ënë nëtënu uquin aín Papa Dios ësaquin cacëxa: Ñuina unin rëxun xaroti cuëënquinma camina ꞌëx uni ꞌaish unicaman ꞌucha cupí bamati mëníon.

⁶ Aín ꞌucha cupía unin ñuina rëxun mi xaroxuncë a camina cuëëniman.

⁷ Usa ꞌain cana mi can: ꞌËn Papa Dios, mix cuëëncësabi oquinshi ꞌanux cana ënë nëtënu ain, min bana cuënëo quicësabi oi.

⁸ Moisésnën cuënëo bana, aín ꞌucha tërë́ncë ꞌinun ca unin ñuina rëxun xaroti ꞌicë quicë ꞌaínbi ca Cristonën aín Papa Dios cacëxa, “aín ꞌucha cupía unin ñuina rëxunmi xaroxuncë a camina cuëëniman”.

⁹ Catancëxun ca Cristonën ësaquinribi aín Papa Dios cacëxa: “ꞌËn Papa Dios, mix cuëëncësabi oquinshi ꞌanux cana ënë nëtënu ain”. A bana cuënëosabi oi utancëxa Cristo camabi unin ꞌucha cupí bama ꞌain ca bërí unin aín ꞌucha cupí ñuina rëxun xarotëcëntima ꞌicën.

¹⁰ Jesucristo aín Papa Dios cuëëncësabi oi, bamatsianxmabi achúshitishi bama ꞌain cananuna nux Cristo bama cupí Nucën Papa Diosan iscëx nun ꞌucha tërë́ncë ꞌaish asérabi ainan ꞌain.

¹¹ Judíos sacerdotecaman ca camabi nëtën ꞌuchañu unían bëxuncëxun aín ꞌucha tërë́ncë ꞌinun ꞌaracacë ñuina rëxunia. Usoquian ꞌacëbëbi ca aín nuitu upíma usabi ꞌia.

¹² Usa ꞌaínbi ca Jesucristo achúshitishi camabi unin ꞌucha tërë́ncë ꞌinun bamax baísquitancëx anu aín Papa ꞌicë anu abë ꞌApu ꞌaish aín mëqueu ꞌi cuancëxa.

¹³ Anu ꞌaish ca axa ami nishcë unicama a Nucën Papa Diosan ꞌibuamimainun anua Nucën Papa Dios ꞌicë anu ꞌicën.

¹⁴ Usa ꞌain ca achúshitishi bama ꞌixun axa ami catamëcë unicama aín ꞌucha tërë́anan nëtë́timoia abë upí ꞌinun ꞌimia.

¹⁵ Usa ca quixun ca aín Bëru Ñunshin Upitan nu ꞌunánmia, ësai ca Nucën Papa Diosan bana cuënëo quia quixun nu sinánmiquin:

¹⁶ Ësoquin cana ꞌëx mitsun ꞌIbu Dios ꞌixun mitsu cain, usai ca judíos unicama ꞌiti ꞌicë quixun caquin ꞌë a pain ꞌinan bana sënë́ncëbëtan cana bëtsi atu ꞌinánti ꞌain. Ësai ca a bana quiti ꞌicën: ꞌËn cana ꞌën cacë bana ꞌën unicaman aín nuitu mëu upí oquin ꞌunánan manuquinma sinánun ꞌunánmiti ꞌain.

¹⁷ Quianan ca ësairibi a bana quia: Aín ñu ꞌatima ꞌacëcama tërë́nxun cana manuquin aín ꞌuchacama sinántëcëntima ꞌain.

¹⁸ Usa ꞌaían unin ꞌucha sinántëcëntimoquin tërë́ncë ꞌinun Cristo bama ꞌain ca unin aín ꞌucha tërë́ncë ꞌinun ꞌaracacë ñuina rëxun xarotëcëntima ꞌicën.

Cristonan cupí abë banaquin Nucën Papa Dios ëntima ñui quicë bana

¹⁹ ꞌËn xucë́antu, Jesucristo aín imi ꞌapati bama cupí nun ꞌuchacama tërë́ncë ꞌianan Nucën Papa Diosnan ꞌaish cananuna —Cristo cupí ca Nucën Papa Diosan nux banaia cuati ꞌicë —quixun sinani racuëtima abë banati ꞌain.

²⁰ Bamax baísquitancëx aín Papan nëtënu abë ꞌi cuan ꞌixuan, Jesusan nu ꞌaquincëx cananuna ax bamatimoi tsócë Nucën Papa Dios, abëbi banati ꞌain, nucën rara judíos unicama ꞌiásamai.

²¹ An Nucën Papa Diosan unicama a ñucáxuncë ax ca Jesús ꞌicën.

²² A cupí nun ꞌuchacama tërë́ncë ꞌaish cananuna uisa ñu cara ꞌaisama ꞌicë quixunu ꞌunánquin mëníocë ꞌaish asérabi ax cuëëncësabi oi ꞌiisa tani Nucën Papa Diosbë banati ꞌain, an ca cuati ꞌicë quixun ꞌunani. Ax Nucën Papa Diosbë banai tabernáculo xubunu atsínux ca sacerdote aín ꞌucha tërë́ncë ꞌianan upiti nashi mëníocacëxa. Usaribiti cananuna Jesucristo cupí chucacësa ꞌaísha nun nuitu, nun sinan upí ꞌain Nucën Papa Diosbë banain.

²³ —Nucën Papa Diosan ca aín quicësabi oquin nu upí ꞌimianan nux aín nëtënu abë ꞌinun ꞌimia —quixun ꞌunánquin cananuna asérabi ami catamëquin aín bana ënquinma an nu cacësabi oquin ꞌaquin bëtsi uniribi —Nucën Papa Diosan ca ax quicësabi oquin, usoquin nu ꞌaquinia —quixun ñuixunti ꞌain.

²⁴ Camaxunbi cananuna uisai caranuna bëtsibë bëtsibë nuibananan Nucën Papa Dios cuëëncësabi oquin ñu ꞌanun ꞌaquiananti ꞌain quixun sinánti ꞌain. Sinántancëxun cananuna asérabi usoquin ꞌati ꞌain.

²⁵ Usabi ꞌicë aísha bëtsi bëtsi uni axa Jesucristomi catamëcë unicamabë timë́tisama tancëbëbi cananuna nux usai ꞌima, aín unicamabë timë́anan bëtsibë bëtsibë Jesucristomia catamënun ꞌaquiananti ꞌain, Jesucristo utëcënti nëtë ca ꞌurama ꞌicë quixun sinani.

²⁶ Jesucristomi catamëcë ꞌixunbi nunbi ꞌaisa tanquin ënquinma ñu ꞌatima amiribi amiribi ꞌai cananuna nun ꞌucha tërë́nun Jesucristomi catamëti cuëëncëma cupí nun ꞌucha tërë́ncëma ꞌaish usabi ꞌiti ꞌain.

²⁷ Usa ꞌicë, anun an camabi unin ñu ꞌacë isti nëtën Nucën Papa Diosan ax cuëëncësa oi ꞌiisama tani ami nishcë unicama ꞌacësaribi oquin nuribi ꞌuchoquin manë tsinu ꞌimicëx cananuna nux abë ꞌitimoi ꞌiti ꞌain.

²⁸ An usai ca judíos unicama ꞌiti ꞌicë quixun Moisésnën cuënëo bana quicësabi oquin ꞌacëma uni a ñuia, rabë́ ꞌimainun achúshi uni —asérabi ca usa ꞌicë —quicëbëtan ca nuibati sinanaquinma a uni uni itsin ꞌaia. Rabë́ uníxëshia a ñui usai quicëbëtanribi ca usaquin ꞌaia.

²⁹ A unia usoquin ꞌásamaira oquin ca axa aín Bëchicë ꞌimainun aín Bëru Ñunshin Upími ꞌatimati banacë uni a Nucën Papa Diosan castícanti ꞌicën. Nucën Papa Diosan Bëchicë, axa unicama ꞌuchañu ꞌicëbi ië́minux aín imi ꞌapati bama, a ami ꞌatimati bananan Nucën Papa Diosan Bëru Ñunshin Upí an uni nuibaquin ꞌaquincë ami ꞌatimati banacë, a unicamax ca an Moisésnën cuënëo bana ꞌacëma unia ꞌacësamaira oquian Nucën Papa Diosan castícancë ꞌiti ꞌicën.

³⁰ Cananuna ꞌunanin, ësai ca Nucën ꞌIbu Dios quiacëxa quixun: “Uix cara ꞌuchaia, a cana ꞌënbi uisaira oquin carana ꞌati ꞌai usoquin ꞌati ꞌain”. Ësairibi ca quiacëxa: “Uinu ꞌicë ꞌën unicaman cara ꞌëx quicësabi oquin ꞌacëma ꞌicë a cana ꞌën uisa carana oti ꞌai usoquin ꞌati ꞌain”.

³¹ Usa ꞌain cananuna nun ꞌucha ëncëma ꞌaish, Nucën Papa Diosan ca ax cushiira ꞌixun uisaira oquin cara ꞌati ꞌicë usoquin nu ꞌati ꞌicë quixun sinani ami racuë́ti ꞌain.

³² Jesucristomi catamëtabatia, unin mitsu bëtsi bëtsi oquin tëmëramicëxunbi camina bënë́quinma tanshiacën. Usaími mitsux ꞌia a camina sinánti ꞌain.

³³ Mitsu raírinëx camina unin mitsumi cuaiquin ꞌitsa unin ismainun mëëcë ꞌiacën. Usai ꞌimainun ca axa Cristomi catamëcë uni raírinën mitsux usai ꞌicë isi masá nuituquin ënquinma ꞌaquiancëxa.

³⁴ Usa ꞌixun camina Jesucristomi catamëcë cupía sipuacë unicama nuibaquin ꞌaquiancën. Mitsumi nishquian mitsun ñu bicancëbëbi camina masá nuitutíma usabi cuëëancën. —Ënë nëtënuax ñuñu ꞌaish cuëëncësamaira oi cana Nucën Papa Diosnan ꞌaish aín nëtënu nëtë́timoi abë ꞌiti ꞌai —quixun sinani camina cuëëancën.

³⁵ —Usai cana ꞌiacë —quiax manúquinma camina min ꞌacësabi oquin Jesucristomi catamëti ëntima ꞌain. Ami catamëcë ꞌaish camina a cupí nëtë́timoi abë Nucën Papa Diosan nëtënu ꞌiti ꞌain.

³⁶ Jesucristo ucëbë ax quicësabi oi Nucën Papa Diosan nëtënu abë ꞌinuxun camina uni itsían mitsu tëmëramicëxbi a taníma usabi Cristomi catamëquin ax cuëëncësabi oquin ꞌati ꞌain.

³⁷ Ësai ca Nucën Papa Diosan bana cuënëo quia: Xënibutíma ca ax bënëtishi uti ꞌicën. A nun caíncë ax ca nëtë́butima uti ꞌicën.

³⁸ ꞌËn iscë́xa ax upí ꞌicë ꞌën unicamax ca tëmëraibi ꞌëmi catamëti tsóti ꞌicën. Usa ꞌaínbi cana an ꞌaquinbi racuë́quin ꞌën bana ëncë uni a isi cuëëntima ꞌain”.

³⁹ Usaía an aín bana ꞌaquinbi ëncë uni ax Nucën Papa Diosan nëtënu abë ꞌitima ꞌaínbi cananuna nun ami catamëquin ëncëma ꞌaish, asérabi Nucën Papa Diosnan ꞌaish aín nëtënu abë ꞌiti ꞌain.