Hebreos 1 - Kashibo-Kakataibo Biblia

I. CRISTONËX CA ANGELCAMA ꞌIMAINUN MOISESBËTAN SËNË́NMAIRA ꞌICË QUICË BANA (1-4) Aín unicama pain xutancëxuan Nucën Papa Diosan aín Bëchicëira xua

¹ Bëráma ca Nucën Papa Diosan nucën raracaman aín cushi ꞌunánan uisai cara aín uni ꞌiti ꞌicë quixun ꞌunánun, Nucën Papa Dios, an sinánmicë bana uni ñuixuncë unicamabë bananan namámiquin canan, bëtsi bëtsi ñu ismiquin canan, bëtsi bëtsi ñu ꞌaquinribi atu ismiacëxa.

² Bëráma usaquin nucën raracama ꞌunánmia ꞌaínbi ca an xucëxun aín Bëchicë anbi aín Papan bana unicama ñuixuancëxa. Nucën Papa Diosan ca aín Bëchicë camabi ñu uniomiacëxa. Usa ꞌain ca an camabi ñu, naíu ꞌicë ángelcama ꞌimainun, ënë menu ꞌicë unicama ꞌimainun, camabi ñu unio ꞌicë aín Papan a ꞌibuamiacëxa.

³ Nucën Papa Dios ax ca unin sinánsamaira ꞌaish upíira ꞌicën. Usa ꞌain ca aín Bëchicë Jesucristo axribi asaribi ꞌicën. Usa ꞌain ca uisa cara ax ꞌiacëxa quixun ꞌunánquin unin ꞌunánti ꞌicën, aín Papa Dios ax ca asaribi upí ꞌicë quixun. An unio ꞌixun ca an unio ñucama, aín banánbia usabi ꞌinun ꞌimia. Usa ꞌaish ca camabi unin ꞌucha tërë́ncë ꞌinun bamax baísquitancëx, aín Papan nëtënu cuan ꞌaish aín mëqueu abë ꞌApu ꞌicën.

⁴ Nucën Papa Diosan Bëchicë ax ca aín Papa cuëëncësabi oi ꞌicë cupí, aín ángelcamasamai upíira ꞌicën. Usa ꞌain ca aín Bëchicë Jesucristo axribi asaribi ꞌicën. Usa ꞌain ca uisa cra ꞌaish aín Papabë ꞌApu ꞌicën. Usa ꞌaísha ax aín Papabë ꞌApu ꞌain ca ángelcama abë sënë́nma ꞌicën.

Nucën Papa Diosan Bëchicë, ca ángelcamabëtan sënë́nmaira ꞌicë quicë bana

⁵ Nucën Papa Diosan ca uinu ꞌicë ángelbi cáma ꞌicën: Mix camina ꞌën Bëchicë ꞌaish xënibua ꞌaínbi ꞌëbë ꞌiti ꞌai quixun. ꞌImainun ca uinu ꞌicë ángelbi ñuima, Jesúsëshi ñui, Nucën Papa Dios ësairibi quiacëxa: ꞌËx cana aín Papa ꞌiti ꞌain. Ax ca ꞌën Bëchicë ꞌiti ꞌicën.

⁶ Usa ꞌaish ca aín Bëchicë aratsushi ꞌicëbi ënë menu xuti ësai quiacëxa: ꞌËn ángelcaman ca a rabiti ꞌicën.

⁷ Angelcama ñui ca Nucën Papa Dios ësai quiacëxa: ꞌËn ꞌamicëxun ca ꞌën ángelcaman ꞌën cacësabi oquin ñu ꞌaia. Usa ꞌain cana ꞌaisa tanquin suñusa ꞌimianan ꞌaisa tanquin tsi rëquirucësa ꞌimin. Usa ꞌixun ca ꞌë ñu ꞌaxunia.

⁸ Usai quiquinbi ca aín Bëchicë aira ësaquin caia: Mixribi Dios ꞌaish camina usabi ꞌitioi ꞌën nëtënu ꞌApu ꞌain. Mix ꞌApu upíira ꞌaían min banaribi upí ꞌain ca min ꞌati ñucamaribi upí ꞌicën.

⁹ Unían upí ñuishi ꞌati cuëëanan camina atúan ꞌaisa tancë ꞌatima ñu a cuëëncëma ꞌain. Usa ꞌicë cana ꞌëx Dios ꞌaish min Dios ꞌixun, unicama ꞌimainun ángelcamaribi ꞌacësamaira oquin, cuëëinra cuëënun mi ꞌimian.

¹⁰ Usaquin canan ca Nucën Papa Diosan ësaquinribi aín Bëchicë caia: Mix camina camabi ñu aín ꞌibu ꞌain. Min camina bëráma mecama ꞌimainun naí ꞌimainun anu ꞌicë ñucamaribi uniocën.

¹¹ A ñucamax ca nëtë́ti ꞌicën. Nëtë́cëbëbi camina mix nëtë́tima ꞌain. Chupa ꞌicësaribiti ca a ñucama xënibuti ꞌicën.

¹² Usa ꞌicëmi min, chupa xëni ꞌacësaribi oquin capúncëxbi ca me ꞌimainun naí iótëcëncë ꞌiti ꞌicën. Acamaxa usai ꞌicëbëbi camina mix usabi ꞌin. Mix camina usabi ꞌiá ꞌaish usabi ꞌiti ꞌain.

¹³ Uínsaranbi ca uinu ꞌicë ángelbi Nucën Papa Diosan ësoquin cáma ꞌicën: Axa mimi nishcë unicama ꞌën mi ꞌibuamimainun camina mix ꞌëbë ꞌApu ꞌaish ꞌën mëqueu ꞌiti ꞌain.

¹⁴ Camabi ángelnëx ca an Nucën Papa Dios ñu ꞌaxuncë ꞌicën. Usa ꞌixun ca an xucëxun, uicamax cara an mëníosabi oi Nucën Papa Diosnan ꞌinux ië́nuxun ꞌaia, acama ꞌaquinia.