Habacuc 2 - Kashibo-Kakataibo Biblia

¹ ꞌËn kaisa tankë banakama kana kan, usa ꞌain kana upíokin anuxun kuati, an bërúankë unin anuxun bërúanti ꞌakë anuxun bërúankësa okin uisakin kara Diosan ꞌë kaia isnuxun ꞌati ꞌain, uisakin kara ꞌën kakë banakama a ñuikin ꞌë kaia kana kuati ꞌain.

² Usa ꞌain ka Diosan ësokin ꞌë kakëxa: Maxax paránu kamina mi kamainun bana kuënëoti ꞌain, ꞌaínbi kamina bënë́kinshi istisabi ꞌitánun ꞌaia kuaisabi ꞌati ꞌain.

³ Kamina kuënëoti ꞌain, anúan ꞌiti nëtë ka ꞌikëmapan ꞌikën, usa ꞌaínbi kana anúan ꞌiti nëtë ꞌikëbëtan mi ismiti ꞌain; ꞌaínbi kana ꞌëx kikësa okinbi ꞌati ꞌain. Usa ꞌain kamina min basikëbëtanbi uisaran kara a ñukama ꞌia kaínti ꞌain. Usa ꞌain ka anúan ꞌiti nëtë aka ꞌiti ꞌikën.

⁴ Ënë bana kamina kuënëoti ꞌain, an ñu ꞌatima ꞌakë unikamax ka ax isa usaira ꞌikë kiax kikanti ꞌikën, ꞌaínbi ka an ñu upí ꞌakë unikama atux ꞌëx kikësokin ꞌai tsóti ꞌikën.

Anuan bëtsin uni ꞌatimoti ñuikë bana

⁵ An uvas baka xëakë unikaman ka bëtsi ꞌatimoia, usokëxun ka bëtsínribi a kupikin usakinribi ꞌaia, usakin ꞌai ka ꞌëx kana usaira ꞌai kiax anun rabitia, usakin ꞌakin ka tantikima, atuinra bëtsi ꞌatima okin ꞌatankëx kushin rabitia, usai ka an ꞌanuma bëtsi uni ꞌatankëx kia. Usa ꞌaish ka anu uni bamaia maínti me naëkë usaribi ꞌinun atun kuëbi bakai banakania, usakin ka an ñu ꞌatimashi ꞌakë unikaman bëtsi menu ꞌikë unikama ꞌatankëxun ꞌain ëma ꞌibuaia. Usakin ꞌai ka anua uni maínkë me naëkësa ꞌaish an ñu ꞌatimashi ꞌakë unikama tantima.

⁶ Usai atux ꞌikëbë ka kamabi menu ꞌikë unikama Babilonianu ꞌikë unikama ñatankin bia akamax kantai ësai kiti ꞌikën: ¡Mitsux kamina minan ꞌaímabi bëtsi unikaman ñu bikë anun ñuñuira ꞌikanin! ¿Uínsaran kaina mitsu ribinxun kupíokëxuma bëtsi unikaman ñu bianan atun chupa bitsimi anun ñuñuira ꞌikankë a ënkanti ꞌain? Usakë ꞌikë ka Diosan mitsu aín kuëënkësokin ꞌati ꞌikën.

⁷ Usai ka ꞌiti ꞌikë kixun mitsun ꞌunánkë ꞌaímabi ka bëtsi menu ꞌikë unikama an mitsu kuríki ꞌinánkë, akamax numi ribinkë kamina nu kupíoti ꞌai kakin an rakuëoxun ñuñuma ꞌitánun rakuëoxun mitsun ñu bitsi uti ꞌikën, usakin ꞌakin ka ñuñuma ꞌitánun mitsu ënti ꞌikën.

⁸ Usakin mitsu ꞌai ka ain memi bikan bëtsi menu ꞌikë unikama mitsu ꞌanux timë́ti ꞌikën, usai ꞌikin ka mitsumi ꞌasaribiokin mitsu ꞌatima oti ꞌikën, usai ka ꞌiti ꞌikën, mitsun kamina usakin ꞌakin uitishi uni kara atu ꞌatima ñuira ꞌakin a tanti bana kikësokin ꞌakinma rëtëanan ꞌatimaira okën, usakin kamina bëtsi menu ꞌikë unikama ain mekëñun atun ëmakamaribi ꞌakën.

⁹ ¡Uisa kupí kaina mëkamakë ñun mitsun aintsi ꞌibukama ñuñuira ꞌimikanin, usakin kamina mitsux ñu ꞌatima inuanan, tëmëraima isa ꞌinun kixun mitsun aintsi ꞌakanin!

¹⁰ Usakin bëtsi menu ꞌikë unikama ꞌakin kamina mitsun ꞌaintsi ꞌibukama rabinnun ꞌimikan, mitsúxbi kamina ꞌatima orakan, usakin ñu ꞌakin kamina mitsúnbi anun ꞌatima orakati barikan.

¹¹ Anun ëma kënëaranu ꞌikë, maxákama ꞌimainun xubu ꞌirakankë ikamaxbi ka mitsun ꞌatima ñu ꞌakë ñui kikanti ꞌikën.

¹² Mitsun kamina anu tsókë unikamapain ꞌatankëxun, anubi birutëkënkin ëma ꞌanan, upíokin ñu ꞌakimabi anuxun ꞌatima ñuira ꞌakanin.

¹³ Nukën ꞌIbu Dios kamabi kushiñu an ka mitsun ñu mëëkë axa ñankáishi ꞌakë ꞌinun ꞌimianan, atsanxunbi ñu mitsun mëëkë axribi ñankáishi ꞌinun ꞌimiti ꞌikën, akamax ka mitsun ñankáishibi ꞌakë ꞌaish tsin nënkin masókë ꞌiti ꞌikën.

¹⁴ Usa ꞌain ka bakakaman a mi saëkin aín ꞌumpaxan parúmpapa buákarukë usaribi okin kamabi menu ꞌikë unikaman Diosan aín kushin ñu ꞌakë ꞌunánti ꞌikën.

¹⁵ ¡Mitsun kamina mi ꞌurama ꞌikë ëmakamanu ꞌikë unikama ñu muka xëamin, anun usakin ꞌati kamina uvas baka ꞌakë këñun mëskuxun bëtsi ro xëamin! Usakin xëamixun kamina ñu muka xëax sinanima chupañuma rakákë usa ka kixun ain nami iskanin.

¹⁶ Usa ꞌaish kamina usa ka kixun bëtsin rabikëxma katë́kanti ꞌain, Diosan ka mitsu bëtsi unikamami ꞌakësa usakinbi ꞌati ꞌikën, usakin ꞌakin ñu muka xëax ꞌikësai chupañuma ꞌikë ka mitsun, nëtokë ñu rëbu tëakëma a iskanti ꞌikën, usakin ꞌakëx kamina mitsux rabinkëma ꞌaish bëtsi unikamasashi ꞌiti ꞌain.

¹⁷ Usai ꞌimainun ka mitsun masókan Líbanonu ꞌikë nikama axribi kiti ꞌikën, kimainun ka ñuinakama abámikin ꞌakan usaribikin Diosan mitsu abámiti ꞌikën. Ësai ka mitsunmi ꞌaisama ñuira ꞌakin a tanti bana kikësokin ꞌakinma uni ꞌanan, bënë́kinshi bëtsi ñu ënë menuxun ꞌanan, ꞌain ëma ꞌimainun anu ꞌikë unikama ꞌakan a kupín ꞌiti ꞌikën.

¹⁸ ¿Añu kara an ꞌati ꞌunánkë ꞌixun unin ñu tankin ꞌatankëxun këñukin sënë́onkë ꞌixunbi ꞌati ꞌik? ¿Añu kara bëtsi ñu tankin ꞌaxun ax isa Dios ꞌikë kixun uni paránkin kakë anbi ꞌati ꞌik? Bëtsi ñu tankin uniokë ñukama ax ka banaima; ¿Uisa ꞌaish kara a ñukamami an uniokë unikamax katamëti ꞌik?

¹⁹ ¡Mitsun kamina bëtsi dios i ꞌakë ꞌikëbi isa bësunun kain; ꞌimainun kamina maxáribi banakë ꞌikëmabi nirunun kixun kain! ¿Akamax kara usai ka ñu ꞌiti ꞌikë kiax kiti ꞌik? ¡Usama ka atux ka uni ꞌikësai tsóti anun uintiñuma ꞌikën, usa ꞌaish ka kuri ꞌimainun manën unin rataka kakëishi ꞌikën!

²⁰ ꞌAínbi ka anúan Dios ax aín xubu upíira anu ꞌikën: usa ꞌain ka an ismainun kamabi menu ꞌikë unikamax ñu ꞌatima ꞌaíma bukukanti kuëënia.