Habacuc 1 - Kashibo-Kakataibo Biblia

An bana ñuikë Habacuc Diosbë bana ñuikë bana

¹ Ënëx ka an aín bana ñuikë uni Habacuc kakë a Diosan usakin ain unikama kanun kixun ká bana ꞌikën.

² ꞌËn ꞌIbu Dios, ¿uínsaran kaina ꞌën munuma banakin ñukákëxun kuakin ꞌë ꞌakinti ꞌain? ¿Uínsarainra karana munuma banakin bëtsi unikaman ꞌatimañu ꞌakëbëtan ꞌakinkëxumabi ꞌën mi ñukákë a ënti ꞌain?

³ ¿Uisa kupí kaina ꞌaisamaira ñu ꞌatima ꞌakania isi masá nuitunun ꞌë ꞌimin? Kamabinua kana ꞌatima ñuishi ꞌakania isanan ñu ꞌaisama okin masókania isin; ꞌimainun kana amami amamiaxa tsuákiruax unikama mëanani sharatia kuatin.

⁴ Ax kikësokin ꞌati min bana ax kikësokin ka ꞌakanima, an bana mëníokë ꞌapukaman ka ꞌatimokinshi ñu ꞌaia, an ñu ꞌatima ꞌakë unikaman ka an ñu ꞌatima ꞌakëma uni an ka kuëënkësa okinshi ꞌaia, ꞌimainun ka ꞌupiokin ꞌakinma ꞌatima ñuishi upisa kixun ꞌaia.

⁵ Ësokin kakëxun ka Diosanribi kakëxa; Israel unikama mitsun kamina axa mitsu rapasu ꞌikë unikama uisai kara atux ꞌia a isi rakuëkanti ꞌain. Usa ꞌain kana ꞌën mitsunu usaribi ñukama inumiti ꞌuramashi ꞌain, usakin ꞌaia bëtsi unikaman ñuixunkëxunbi kamina mitsun usa ka kixun sinánkantima ꞌain.

⁶ Usa ꞌain kana caldeo unikama ꞌakanani unun ꞌimiti ꞌain atux ka ñu ꞌaisama ꞌakëbuira ꞌaish ñu ꞌaisama atishi ꞌikën, usa ꞌain kana atu ënti ꞌain, atun suntárukamax ka bëtsi bëtsi menu kuankin, ainamabi bëtsi unikaman me ꞌibuakin bikë unibu ꞌikën.

⁷ Usa ꞌaish ka atux ꞌitsaira bëtsi unikama rakuëmikë ꞌianan ꞌaisama unibu ꞌikën, usa ꞌixun ka ax kikësoi ꞌiti bana a tankinma atunan kikësokinshi ꞌaia.

⁸ Atun caballokamax ka paru ꞌinúan abákësamaira ꞌinun abatia, usa ꞌaish ka shórapánakama raëkëma anu uni ꞌikëma menu ꞌikë axa në́kësamaira ꞌikën. Atun caballokamax ka paru ꞌinúan abákësamaira ꞌianan, shórapána raëkëmakama në́kë anu uni ꞌikëma menua ꞌikë usamaira ꞌikën. Usa ꞌaish ka an nikinkë unikaman buánkëx abákin ꞌitsaira ꞌixun aín taën me banamikë ax ꞌuranxubi unin kuakë ꞌikën, ꞌianan ka tëtëkamë ꞌëo aín piti ñuina binux ꞌikësa usaribiti ꞌia.

⁹ Usa ꞌixun ka Babilonianu ꞌikë suntárukaman, anua kuankënua mërakin bënë́kinshi ñu ꞌatima obiani kuania; usa ꞌain ka atux kuania kuati kamabi menu ꞌikë unikama rakuë́tia, usa ꞌain ka ñatankia bikë unikama ax parúmpapanua masi bëru iskësamaira ꞌikën.

¹⁰ Atux ka bëtsi ëmanu ꞌikë ꞌapu kamami kuaianan ꞌain kushibukamaribi ꞌusania. Usai ꞌikin ka atun ëma kënëkëkama anun ꞌirukianxun ꞌati ꞌaia, usakin ꞌatankëxun ka rakuëokin mëëkëxa rakuë́tia bëtsi unikama ñatania.

¹¹ Usakin ꞌai ka suñúan kushiira inúkësa ꞌinun ꞌia; usakin atun kushínbi ꞌatankëx ka nukamax kananuna dios kamasamaira kushiira ꞌai kiax kikania. Kiax ka Dios kiakëxa.

¹² Ësai kia ka Habacucnën kakëxa: ¿Nukën ꞌIbu Dios mix karamina bërámabi ꞌia ꞌaish, ꞌën Dios upíira ꞌianan ñutima oi tsókë a ꞌain? Usa ꞌikë kana ꞌën mi rabin min kamina ꞌë bërúankin ꞌakian, minbi kamina an kuëënkësa okían nu ꞌatimonun Babilonianu ꞌikë unikama kushiira ꞌinun ꞌimia.

¹³ Mix kamina upíira ꞌain, usa ꞌixun kamina ñu ꞌatima ꞌai ꞌuchati kuëënima, usa ꞌain kamina an ñu ꞌatimashi ꞌakë unikama nu ꞌaisama oia, iskinbi nua usakin ꞌanun isëshitin. ¿Uisa kupín kaina uisaibi kikínma unin bëtsi ꞌaia isíbi kima ꞌianan an ñu ꞌatimashi ꞌakë unikaman, asa ꞌikëmabi uni upí sinánñukama ꞌakëbëbi uisaibi kiman?

¹⁴ ¿Uisa kupín kaina unikama bakanu ꞌikë ñuinara ꞌakësokin ꞌanan ꞌibuñuma pukun niríkë ñuinakama ꞌakësokinshi ꞌain?

¹⁵ Caldeo unikaman ka bëtsi menu ꞌikë unikama an tsatsa bikë unikaman, ꞌibuaxun tsatsa bikësa usakinshi ꞌaia. Usakin ꞌakin ka mishkitinën ꞌanan rikan bikësa usakinshi bitsia, bitankëx kana bia kixun sinani kuëënkë usairibi ꞌikania.

¹⁶ Usa ꞌain ka an tsatsa bikë unikaman atun rika rabianan, atun mishkitikama aribi ñuina xaroxunkin, asábi ka kakin a kupí kananuna upí pitiñu ꞌianan, ꞌitsaira pitiñu ꞌai kiax kia.

¹⁷ Usakin kara, ¿Babilonianu ꞌikë unikaman ꞌain rikan bikin ꞌakësokinshi ꞌakin nukama ꞌakin këñuti ꞌik? ¿Atun kara usokin kana ꞌatima ꞌai kixun sinánkimaishi unikama këñukin ꞌati ꞌik?