Génesis 50 - Kashibo-Kakataibo Biblia

¹ Usaia ꞌain bana ñomëti nëtë́ti ñuia ka Josénën aín papa ꞌikúkin bikin bëtsuku kakëxa.

² ꞌAtankëxun ka Josénën an uni ꞌinsínia ronkë rukuturukama aín papa Jacobnën nami anëtima kupían ron upíokin ꞌanun kakëxa, usakian kakëxun ka rontankëxun upíokin chupan rabunxun nankëxa.

³ Usakin ꞌakin ka cuarenta nëtë ꞌimikin anun anëtima ron ꞌakëxa a nëtë kamax ka anun usokin ꞌati ꞌiakëxa. Usakin ꞌakë ꞌain ka egipcio unikamax ꞌitsaira masá nuitukin setenta nëtë ꞌimi ꞌitsaira rarumakëxa,

⁴ usai ati nëtëkaman aín papa sinani nitë́xëtankëxun ka Josénën ꞌapu faraón aín xubunu ꞌikë aín kushi kamabë pain banakëxa, banakin ka ësokin kakëxa: —Mitsux upí sinanñu ꞌixun ꞌë ꞌakinsa tankin karamina ꞌapu faraón ësokin ꞌë kaxuni kuanti ꞌain.

⁵ ꞌËn papan ka ñutisamapan rakáxun, ësokin ꞌë kaxa sinántëkëntima okin anu ñuia maintia anbi ꞌá Canaán kakë me anubi maínun kixun ꞌë kaxa, usa ꞌain kana ꞌënbi anu maintia ꞌa me anu mainikuanti ꞌain, usa ꞌain kana ꞌën mi ñukatin ꞌë karamina ꞌën papa maíntanun ꞌë xutima ꞌain, maínbëtsini kana utëkënti ꞌain.

⁶ Kixuan kamikëxun ka faraónën kakëxa: —Min papa kamina usakin anua mi kakë usakinbi maini kuanti ꞌain.

⁷ Usa ꞌain ka José aín papa maini kuankëbë, kamabi aín kushibu axa ꞌapu faraónën xubunu ꞌikë ꞌimainun Egipto menu an ñu mëëkëkamaribi kuankëxa,

⁸ kuankëbë ka Jacobnën aintsi ꞌibukama ꞌimainun Josénën xukë́antukamaribi atubë kuankëxa. Kuankin ka Gosen kakë me anu uniakë xukama ꞌimainun atun ñuina kamaishi ëbiankëxa.

⁹ ꞌImainun ka uni aín carreta caballonëan nirinbiankin uankë anúnribi José kuania buani ꞌitsaira uni rikiankëxa, usa ꞌaish ka ꞌaisamaira uni aín caballonën tsótax kuankankëxa.

¹⁰ Usakiani kuanx ka anua Goren-ha-atad, ꞌikë Jordán baka kuainakëkë anu bëbaxun ꞌaisamaira uni timëkamë ꞌëokë ax masánuituti ini rarumakëxa. ꞌImainun ka José mapai achúshi ꞌimainun rabë́ nëtë anuax ꞌitsaira iankëxa.

¹¹ Usai ꞌiaka anu tsókë cananeo unibunën ꞌaisamaira timëkamë ꞌëokë isakëxa, isí ka kikankëxa: egipcio unibu ka uni ñukë mainux timëkamë ꞌëoxa kiax kikankëxa. Usai anuax ꞌikë ka Abel-misraim kakin anëakëxa, ax ka Jordán baka amiaxa bari urukë au ꞌiakëxa.

¹² Usa ꞌain ka Jacobnën bëchikë kaman aín papan ñutisama ꞌixun kakësabiokin kamabi ꞌakëxa,

¹³ usakin ꞌatankëxun ka Canaán kakë me anua ꞌikë Macpelá kakë me anua ꞌikë kini, Abrahamnën Efrón kakë uni hitita ainan ꞌikëbi anu aín aintsikama ñuia maínti marua anu maíankëxa. A me ꞌimainun a kinix ka Mamré kakë me amiaxa bari urukë au ꞌiakëxa.

¹⁴ Usokin aín papa maíntankëx ka, José amiribishi Egiptonu aín xukë́nkama ꞌimainun abëa kuankë unikamabë kuantëkëankëxa.

Ashitia José a nëtën usai ꞌia ñuikë bana

¹⁵ Aín papa Jacob ñukë ꞌain ka Josénën xukë́nkaman ësokin sinánkëxa: Bërí sapika Josénën nun painu ꞌatimo a sinánkin nuribi ꞌatima oti ꞌikën.

¹⁶ Ësokin sinánkin ka aín xukë́antun kamiakëxa: Nun papa ñutisama ꞌixun ka nu kakëxa,

¹⁷ ësokin mi kanun: Min xukë́nkama kamina an mi ꞌatima oi ꞌucha ꞌikëbi uisabi otima ꞌain. Usa ꞌain kamina nun mi ꞌatimo a sinánkin nuribi ꞌatima otima ꞌain, nukamax kananuna nun papa Dios aín unikama ꞌain. Ësakian a kamikë unikaman kakëxun kuati ka José iankëxa.

¹⁸ Usai ꞌian ka aín xukë́n ꞌibukama ami bëbai aín bëmáno nirakëti rantipuruni aín bëmánanën me tikai tsóbukin kakëxa: —Ënu kananuna nukamax uan. Nukamax kananuna min ñu mëmikë uni ꞌiti ꞌain.

¹⁹ ꞌAínbi ka Josénën atu kakëxa: —Kamina rakuënkantima ꞌain. ꞌËx kana Diosma ꞌain.

²⁰ Mikaman kamina ꞌë ꞌatima oti sinánkën, usakin mitsun ꞌaiabi ka Nukën ꞌIbu Diosan ꞌatima okin ꞌakë a upíokin bërínu iskë ñukama ënë mëníoxa: usa ꞌain kana ꞌën ꞌitsaira uni bamati ꞌikëbi ꞌakian.

²¹ Usa ꞌain kamina mitsux rakuë́tima ꞌain. ꞌËn kana mikama ꞌimainun mitsun bëchikëkamaribi aín piti ñu ꞌinánti ꞌain. Ësokin kakin ka Josénën aín xukë́nkama upíokin sinánmiakëxa.

José ñua ñuikë bana

²² Usakin kamabi ñu pain ꞌatankëx ka José aín papan aintsi ꞌibukamabë Egipto menubi tsóakëxa. Anu ka José ciento diez baritia ꞌimi tsóakëxa,

²³ usai anu tsóxun ka Efraínën bëchikënëan bëchikë aín xutakama isakëxa. Isanan ka Manasésnën rëkuë́n bëchikë Maquir kakë aín xutan bëchikëkamaribi ꞌitsaira ꞌikë isakëxa.

²⁴ Achúshi nëtën ka Josénën aín xukë́nkama kakëxa: ꞌËx anun ñuti nëtë ka ꞌurama ꞌikën, usa ꞌain ka Nukën ꞌIbu Diosan mitsu ꞌakinti ꞌikën, usa ꞌixun ka ënë nëtënua anbi mitsu chikinbiakin a ꞌinánuxuan Abraham kanan Isaac ꞌimainun Jacob ka me anubi mitsu buánti ꞌikën.

²⁵ Ësakin kakin ka José aín xukë́n kaman a sinanatëkëntima okin atun kanun kakëxa: Asérabi ka Nukën ꞌIbu Diosan mitsu ꞌakinti ꞌikën. Usa ꞌain kamina mitsun ꞌëx ñuia ënu maínkinma ënua ꞌë buánti ꞌain.

²⁶ Usai pain ꞌitankëx ka José Egipto menuax ciento diez baritiañu ꞌaish ñuakëxa, ñuia ka aín nami anun uni ñuia ꞌati ro anun ꞌatankëxun upíokin sabananën rabunxun anu uni bamaia maínti ꞌakë cajun achúshinu ꞌaruakëxa, ꞌaruxun anu maintia mëníokë anu maíankëxa, ësokin ka José ñukë ꞌakankëxa ashi.